فى رثاء عثمان حسين

القرير .. قوز قرافي
طريت عثمان سرح قلبي وقبيل طشه
تث###### آمنة في البركل تقالد التومة بت عشه
قطرنا الدابو صفر وجاء تعطل جوه في الورشه
دفنا الزول ترك أحزان جوه الناس بقت غبشه
دحين معقول دفنا الريد رجعنا بلاه
نشوف الدنيا صي وخلا
وأشوفها مهيرة في الباكيات
ويا هو بعانخي عزى وفات
وحي الرب كل الجمال
وانزل ذكرو في الآيات
ربيع الدنيا يا عثمان
مقيم في حضرة الديان
«نفتش ليك في التاريخ»
بترجع لينا مهما كان
لأنك جوه في الوجدان
بأعلى مكان
أمير للحسن بالألوان
مليك الفن في السودان
عشت عزيز ومرفوع رأس
مهذب وكامل الإحساس
عفيف ولطيف .. أنيق وظريف
أبوعفان حبيب الكل
يعطر زي عبير الفل
فنو رفيع ووزنو تقيل
غناه بديع وصوتو جميل
مقدس ويشبه الترتيل
مشاعر ورقة كيف بتسيل
حلات عثمان .. وليد النيل
حلاتو يغني يشجي العود
يوصف في العيون السود
ويكرم بالجمال ويجود
أديب وحبيب
يطيب لي جروحنا طبيب
بريدك في حشا قلبي
وأغنيك للوجود حبي
يا دمعاتي اسكتي كبي
وزيد نعماه يا ربي
طريت عثمان فقد دربي
بقيت مذهول وطاش لبي
طريت يا ناسنا اسماعين
ولاد البركل السمحين
وبينهم نحن ما فارزين
وليد الزيني حد الزين
وزي جنياتنا شوفتو دحين
ملانا الزول جمال وطرب
جميل عثمان حبيب الرب
متيم وصب
عميق وتقيل وزنو دهب
نغم منساب بطرقة باب
حباب وحباب .. نداء الأحباب
حلات عثمان رجل ما غاب
بشوق مشبوب جفاه النوم
وحب ممزوج بهمسة لوم
يمين والله مشتاقين
مشتاقين ومشتاقين
هردنا الشوق مكانكم وين
بريدكم انتو يا الحلوين
أريت الدنيا لو تكبر .. تطول تنشر
نزور عثمان ملاك وبشر
وتنزل مطره في العتمور تزيل الحر
بخور الحاجة في الخلوة يزيل الشر
أشوف في القمره وش عثمان
طيور الجو غزال البر
معاك بطوّل السكه
وأصلك أنت ما أنت
جمالك نوّر الحته
وكلنا في بهاك شتى
بحبك من ضمير مرتاح
وأصلك أنت ياك الصاح
نجم الليل وبرق صباح
وفي الظلمات ضوك لاح
تعيش الحانو في الكلمات
يعيش عثمانا حي مامات
تكون الحانو أهرامات
تطير تتجلي في نبته
بشوف ترهاقا حضن الزول وما خت
ومات عثمان بشي من لا ما حتى
كلامنا الليلة دخل الحوش .. عريق عثمان .. وأصله كوش

اعزى مقاشى والناس الهناك ساكنين
وفى السجانة ابكى الزول خرافى حنين
اشوف الناس صفوف واقفين
يصيح الصائح المجروح
يولول زى خروج الروح
زى قمرية باكية تنوح
دموع دفاقة من العين
وقلب حزين
حليل عثمان
حليل الكان زمانو زمان
يحرك فى الصخور وجدان
ويبعث فيها ريد نشوان
ويعزف اعذب الالحان
جميل فنان
روح قديس ضمير انسان
وداعا يا الجميل جوة
وداعا يا البرق ضوه
وداعا ياوليد فاطنى
وحبيب عاشه وحفيد الزينى بت حوه
مما قمنا شفنا الزول ملانا شجن
وكيف انساهو فينى سكن
وحبب لى قليبى الفن
اصيل سودانى كلو وطن
سمعت الحانو قلبى انا حن
وعطر للوجود صوتو
مغستى انا ما حضر موتو
فتح فينى مليون باب
يعزف عود اصلو رباب
سيد الفن والاداب
كيف بتهيلو فوقو تراب
حليل عثمان
وداعا يا الجميل بره
جمالك فينا انشره
من البركل الحانى وجبل مرة
وداعا ياحبيب الناس
غناك الطيب الانفاس
وداعا ياجميل احساس