يا عشم الواطا البتّق
ابقى داخل واقعد معانا
نادى الغيم البدا يتفرّق
قول لى الفرحة
مستنين هطولك
قول للغيمة عليكى النيل
عليكى الشدر الشال الحفّه
عليكى الشوق الهدّ الحيل
عليكى الموج الحِرِد الضفه
عِزى خِسامة الوجع المدفّق
يا فرح الواطا البتّق
عليك الوجع المالى الليل
قول لى الرذاذ الابا يغشانا
كفاكْ
قول للقمر الشد شراع العتمة
وعدل الدفّه
خلى البت الساكنه دمانا
تفِج السكه وتمرق
تلفح توب الإلفة
تجينا معاكَ
مليانه بى رونق جنانا
قول ليها
لا قادرين نشوفها سماكى
ولا فى زول قادر يطولك
والغناوى الناشفه
منتظرات وصولك
راجياكاى بى شوقا الطويل
وقول للواطا ابشرى
كحلى عيون النهار
ولونى الليل بالهديل
والصباح وديهو هدية
راجياكى فى ضل المقيل
يا غيمنا البدا يتفرق
البلاد الخايفه
من غيبة فصولك
ماسكه فى الحلم البخيل
ومعاها ماسكين فى صبرنا
حداها قاعدين نندهك
يا طعم الفرح المافى
معاها قاعدين فوق جمرنا
يا ضو السعد الجافى
كوسْنا ليك بلد بلد
دقينا ما خلينا باب
وينا جيتك
ووينو وعدك
لى هسه واقفين نسألك
والوجع عاصر عمرنا
مع اليباب
الحزن عامت عطشنا
خاتى رايو مع الرهاب