ظهور كميات كبيرة من الذهب بجبل عوينات ومئات المنقبين يتوجهون الى هناك

مع كل صباح جديد تترسخ مقولة ان باطن ارض السودان كلها ذهب وبعد ظهور المعدن النفيس في مناطق متعددة وغير متوقعة خلال الشهور الماضية مثل الفولة والقضارف وتمبول والمناطق التي حولها ومناطق شمال كردفان وشمال دارفور وجميعها مناطق لم تدرج في خرط الجيولوجيين القدماء والمعاصرون ولم يكتب عنها شيئا في كتب التاريخ والجغرافيا عن علاقتها بالذهب ووجوده في باطنها.
في الماضي كان الناس يتحدثون عن اشياء خيالية وروايات يضيف لها كل من تمر عليه ويحذف منها اذا اتصلت هذه الروايات بالمعادن النفيسة ودائما ما تنتهي القصة بحلم أو اكذوبة اطلقها احدهم وسار بها الركبان ، ولكن الان قبل الرواية ترى كتل الذهب الخام أمامك ويتم تقطيعها كأي حجر لا يسوى شيئا وتفرك عينيك وتعيد البصر فينقلب اليك مؤكداً مارآه وهو بريق .. نعم كل ما يلمع ذهبا اذا كنت في اي من وديان وصحارى السودان الشاسعة.

مساء الأمس حضر ثلاثة من شباب السودان الكادحين يحملون كتلا غبشاء طرقوها وقطعوها وصهروها وقبضوا ثمنها ما يقارب الاربعة مليارات جنيه قيمة اكثر من خمسة عشر كيلوجرام ذهب نقي جدا عياره 917 .. وتوالت الاسئلة عن المكان وكعادة العاملون في هذا المجال لم يبخلوا بمعلومة لايمانهم ويقينهم ان الارزاق بيد الله فافصحوا وابانوا .. اقصى الركن الشمالي الغربي للسودان وحدود الولاية الشمالية غربا .. جبل عوينات .. وجدوها على سطح الارض تلك الكتلة من الذهب .. لم ينتظر الكثيرون شروق شمس اليوم وفي ذات الليلة توجهوا نحو الجبل .. والمئات تحركوا اليوم علهم يظفروا بجرامات وصل سعر الواحد منها خمسون دولاراً .

الاخ / معتصم
خلاس اكان كدا انا داير آآخد إجازة بتاعة تنقيب وماشي الدهب لكن داير توريني الجاجات البشليها معاي الضرورية وتوفر لي جهاز وحقك برة
ارجو تزودنا بالصةور لكي يطمئن قلبي

شابان آخران كان نصيبهما ما يقارب الثلاثة مليارات جنيه ثمن عشرة كيلوجرامات ذهب خالص باعوها بالأمس وعادوا يرافقهم آخرون ... الى جبل عوينات ..

السلام عليكم اخ معتصم,,

هل مازال جهاز GPX 4500 هو المرغوب رقم واحد في الكشف عن الذهب في السودان ام ان هناك اجهزة جديدة دخلت السوق,
,ارجو الافادة اذا امكن مع اسعار الجهاز..ولك جزيل الشكر

الاخ معتصم سلام
ان نسال الله ان يرزق الناس رزقا حلال طيب ....
تبادر الى ذهني هذا الحديث
قال رسول الله صلى الله عليه وسلم : يوشك الفرات أن يحسر عن كنز من ذهب فمن حضره فلا يأخذ منه شيئاً .
و عن عبد الله بن الحارث بن نوفل رضي الله عنه قال : كنت واقفاً مع أبي بن كعب ، فقال : لا يزال الناس مختلفة أعناقهم في طلب الدنيا ؟ قلت : أجل ، قال : فإني سمعت رسول الله صلى الله عليه وسلم يقول : يوشك الفرات أن ينحسر عن جبل من ذهب ، فإذا سمع به الناس ساروا إليه ، فيقول من عنده : لئن تركنا الناس يأخذون منه ليذهبن به كله ، قال : فيقتتلون عليه ، فيقتل من كل مائة تسعة و تسعون . مسلم
و ذكري لهذا الحديث هنا ليس الا مجرد خاطرة مرت بي...و احببت ان اتذكر بها معكم احوال اخر الزمان ...

خلو موضوعكم سر
لو الصعايدة سمعو بيكم بكرة بتلقو العوينات كلها صعايدة وعينك ما تشوف الا زناتي واذنك ما تسمع الا هريدي


معتصم يا اخوي داير لي اقوى جهاز داير ماركتو شنو دايرو ضروري تشوف لي اقوى جهاز نوعو شنو
ضروري

Quote: الاخ / معتصم خلاس اكان كدا انا داير آآخد إجازة بتاعة تنقيب وماشي الدهب لكن داير توريني الجاجات البشليها معاي الضرورية وتوفر لي جهاز وحقك برة ارجو تزودنا بالصةور لكي يطمئن قلبي

انت يا المكاشفي ياخوي حظك حيكون زي حظ عباس

لو شلت اقوي جهاز ومشيت بيهو عمارة الدهب ما بقول بغم

احسن ليك ابقي قاعد ساي

ههههه

مفترض الجيش والشرطة يسبقو الناس هناك لانو بكرة حيظهرو احواننا المصريين ويعملو خط حدود وهمي كدا بجاي ويسحبو الجبل جوا حدودهم.

وممكن ببساطة يعملو كدا زي ما عملو كدا في حلايب اللي اتجاوزوا فيها حتى حدود خط 22 واتوغلو جنوب الخط.

هسع بكره يقول ليل تابعه للولايه الشماليه

Quote: Re: ظهور كميات كبيرة من الذهب بجبل عوينات ومئات المنقبين يتوجهون الى ه x Author: محمد الامين محمد هسع بكره يقول ليل تابعه للولايه الشماليه

فعلاً حسب التقسيم الإداري الحالي المنطقة تتبع للولاية الشمالية. وكذلك مركز واحة سليم الحدودي للجوازات والهجرة أيضاً يتبع للولاية الشمالية.

Quote: هسع بكره يقول ليل تابعه للولايه الشماليه

الاخ محمد الامين .. تحياتي

تحياتي يا هاني ..

ما تستبعد من اولاد بمبة ..

Quote: لو شلت اقوي جهاز ومشيت بيهو عمارة الدهب ما بقول بغم

تحياتي بكري الخير ..

شكرا أخي مدثر صديق ..

لك تقديري

Quote: هل مازال جهاز GPX 4500 هو المرغوب رقم واحد في الكشف عن الذهب في السودان ام ان هناك اجهزة جديدة دخلت السوق, ,ارجو الافادة اذا امكن مع اسعار الجهاز..ولك جزيل الشكر

الجي بي اكس لا زال هو المسيطر على الساحة .. بانواعه ( 4500 - 5000 ) .

وسعره 25000 الى 30000 جنيه

اخونا معتصم
السلام عليك
بما أنك تاجر ذهب أو ليك صلة بالمجال دا فهل شفت الكتل الغبشاء بتاعت الدهب
دي بى عينك أم أنك مجرد ناقل للخبر ؟؟
لأنو الخبر دا منشور هنا http://sudanmotion.com/index.php/news/3-sudan...-2012-02-27-12-54-21
وأظنك نسيت تقول منقول .

يبدو يا طلحة انو سودان موشن هذا هو الذي نقل من سودانيزاونلاين بعد انزال لمداخلته والدليل من عم قوقل

هلا يا محمد ابراهيم
قبل كل شىء أنا غرضي هنا ما منو النقل من منو في حد ذاتها لكن كنت عايز اتأكد
لأنو يفرق لما يكون كاتب الخبر هو اللى شاف بي عينو ..
بالنسبة لصورتك الجبتها دي فلو راجعتها ح تلقي أنو الخبر نزل في الموقع قبل 7 ساعات .

كتبت هذا البوست في عام 2008

وها هي مصر تفعلها مره اخري....!!!


العوينات ارض الاجداد ...

قبل ايام كنا في محاولة لجمع المال لبناء مدرسة في تلك البقعة ... ولكن قيض الله رزقا لها ولانسان تلك المنطقة

تحياتي اخي طلحة

الخبر كتبته أنا من والذهب رايته بعيني ..

لك شكري وتقديري اخي محمد ابراهيم

لايبدو فقط ان الموقع الاخر نقل من سودانيز أونلاين بل اؤكد لك انه سرق الخبر بضبانته ولم يكلفوا انفسهم تغيير الصياغة التي كتبتها من رأسي وضمنتها المعلومات.


وافوض الاخ بكري لمقاضاتهم والموقع ينطلق من امريكا حسب ما علمت .. 

قام الموقع الاخر بإضافة عبارة sudaneonline اسفل الخبر قبل قليل ثم عدلها الى sudaneseonline

نقطة الجوازات الليبية في طرف الجبل من الناحية الشرقية بحيث أن الجبل كله داخل حدودهم ، ولديهم طوافات في المنطقة هذه وأكيد سوف تقع بعض المشاكل لأن الحدود كذلك لم يتم حسمها في الوقت الذي تبعد فيه نقطة الجوازات السودانية في واحة السلفي مسافة بعيدة ...

المنطقة قاحلة وخطيرة وليست متاحة للعامة ما عدا الذين يمكنهم توفير سيارات دفع رباعي ومياه وحماية مسلحة وفوق ذلك خبير يكون دليلاً فالمنطقة تهب عليها العواصف الرملية وتتحرك فيها السيوف الرملية بين عشية وضحاها ولا توجد علامات واضحة يمكن الاستدلال بها بالرغم من أن الطريق قد سلكه الكثيرين وفيه حركة لكن كذلك حوادث العطش والفقد والتيه والضياع كثيرة...

Quote: توفير سيارات دفع رباعي ومياه وحماية مسلحة وفوق ذلك خبير يكون دليلاً

تحياتي اخي المسافر ..

كل ما ذكرته منطقي ومؤكد ولكن كل الذين تحركوا الى المنطقة قاموا بتوفير ما ذكرت واكثر .

ده ايميل ارسلو الاخ Amir Bilal مدير موقع سودان موشن

Quote: ده ايميل ارسلو الاخ Amir Bilal مدير موقع سودان موشن

محمد ابراهيم صاحي باستمرار..

لك شكري وتقديري العميق أخي محمد ابراهيم ..

شكرا يا معتصم
وأؤكد لك مرة أخري أنني لم أضع في حساباتي أبدا ولم يخطر ببالي مسألة
من نقل الخبر ممن فقط كنت عايز أتأكد من حكاية كتل الدهب دي لأنو المسألة
بدت كالحلم .
تقديري يا حبيب
ولمحمد إبراهيم التحيات أيضا.

Quote: أتأكد من حكاية كتل الدهب

طلحة يا اخوي اتاكد تااااب
والله انا في اجازتي الفاتت دي من كتر ما سمعت حكايات عن الكتل بتاعة الدهب دي ومن ناس ثقاة
قلبي حدثني انو اجدع جوازي وبلا غربة وبلا قرف واشيل طورية وكوريق وقفة وعلى الفولة عديل
جبل العوينات ده ما ماشين عليهو بلاك شايف
ناس الغرب قالو حقهم وناس الشمالية قالو حقهم والمصريين قالو حقهم وليبيا قالت حقها



ـــــــــــــــــــ
شكرا ايمن دياب