ضباط الشرطة ديل ما سودانيين...

نهار اليوم وامام جريدة التيار وبعد عودتنا من مسيرة سلمية الى مجلس الصحافة
جاءت اربع سيارات شرطة النجدة والعمليات وحاصروا مقر الصحيفة
كنت انا بالداخل... طلعت لاحتوي الموقف خاصة وان معظم محرري الصحيفة من الشباب الذين ربما
يدفعهم التهور للاصطدام بالشرطة
المهم
طلعت برة وبحمد الله قدرت ان احتوي الموقف وادخلت الشباب الى داخل المقر
ثم حضرت سيدة في الخمسينات من عمرها وسلمت علي
سلمت عليها سلام عادي بدون معرفة
قالت لي انا فلانة .... دققت في قسمات وجهها
كانت هذه الفلانة بنت عمي التي سافرت مع زوجها الى ليبيا
قبل اكثر من ثلاثين سنة

ــــــــــــــــ
لو كنت في موقفي ح تعمل شنو

بنت عمي المقصودة هي والدة مذيعة ليبية مشهورة بالوقوف مع القذافي
يعني مفروض يكون الثوار قتلوها هي وعائلتها كلهم
المهم لمن عرفتها والله على ما اقول شهيد
بكل اخلاق السودانيين وطيبة قلبهم وخوفهم على بعض
سلمنا على بعض تاني وقالدتها في شارع البلدية وقدام عساكر الشرطة وضباطهم
وما كانت لحظة راجل ومرة
ولا كانت حتة انتاية وضكر
وبعد شوية قام ضابط شرطة برتبة ملازم اول
طلب مني التحدث على انفراد وفي حديثو قال انو حكاية العناق دي غلط
طبعا هو شايفو عناق .. وانا شايفو قلاد من مقالدة
هو شايفو مقدمات زنا.. وانا شايفو طيبة ود عم لبت عمو ما شافها ليهو ثلاثين سنة
قطعا هي اكثر من عمر الملازم اول شرطة
قلت ليهو (سبحان الله !!!! انت ما سوداني ولا شنو؟؟؟؟!!!!)

طبعا ما فهم انا قاصد شنو
وقمت شرحت ليهو نفس الكلام الفوق دا
قام قال لي (ما تعانقا في الشارع)
والله ما عرفت اقول ليهو شنو
بس مسكين الشعب الراجي الأمن من زول زي دا (ومابقول ضابط)
و يا جنابو عمر عليك الله مر بيجاي وقول لينا رايك في
ضباط الشرطة موديل 2012

اولاً يا ابو علي الف حمد وشكر على سلامة بت عمك
بركة الاتلميتوبعد 30 سنة

وربنا يصبر الشعب السوداني
على افعال هذا النظام الباطش
الذي دمر كل مؤسساتنا العامة
ولهم يومهم انشاء الله

Quote: و يا جنابو عمر عليك الله مر بيجاي وقول لينا رايك في ضباط الشرطة موديل 2012

قلنا نسبق جنابو عمر ما دام إتأخر

هذا نتاج المشروع الحضارى والذى هو بعُمر الملازم

هذا الملازم بالتأكيد لم تحضنه عمته وخالته ..

وبالتأكيد ماوزع أول ماهيه على نساء أهله الكبار وعصر ليهم الفيها النصيب وهو يسمع دعواتهم

وهو بالتأكيد ما قَدَم قريبته للسوق الشعبى وأركبها البص للعوده للديار وإشترى التذكره وأردفها بعصره كااربه

هذا هو نِتاج المشروع الحضارى .. شوه سودانيتهم .. وخرَب فطرتهم

وهذا الملازم لن يفهم معنى هذا العناق ولو شرحت له مليون سنه

و....

و حسبُنا الله ونعم الوكيل

ألأخ/على ميرغنى........................السلام عليكم.

Quote: طلب مني التحدث على انفراد وفي حديثو قال انو حكاية العناق دي غلط

طيب يا أخى الزول ده إتصرف كويس تحدث معك على إنفراد عشان ما يحرجك.دى حاجة كويسة وده تقدم ملحوظ أما القلدة دى بينا كسودانيين عادية وممكن فى اى مكان يحصل الحصل بيناتكم ده وإذا كان فى سوء نية من جانبكم اكيد ما كان الحصل ده يكون أمام الملأ من الناس وفى وسط الشارع وعليه الملازم ده ممكن يكون متدين وده شىء ما شرعى إذا كنت غير محرم لها.

والله بنقالد وبنطايب وبنصافح ومافى نية سوء أبداً ..


تقدير وإحترامى.
____________________________________________________________________________
ألأخ/ على خليها على الله بس.

هذا هو المشرع الحضاري

تبا لهم

سوء تصرف وتقدير غير مبرر وغير مقبول من هذا الضابط ومزيادة لا داعي لها علما بانه برتبة الملازم اول بمعني ان خدمته قد تجاوزت الاربعة سنوات وياسيادتو علي امسحه لينا في وشنا

شفتها والله يا علي

البكا داير يقدد عيونا....


طيب سعادتودا ما شاف الالم الفي عيونا.؟؟؟...ما شاف لي شكل وشيها ومليان دموع اربعة اربعة؟؟؟؟

دي حالة مقالدة فيها نضم تاني؟.....

اعتقد ما سوء تقدير ،لكنها محاولة لبسط السلطة و استعراض السلطان... وعصاية القانون الماسكها من النص!

مكرر

منبر بكري بقى زي الزفت.... خرّف...بقى يشيل ويعيد في النضم.....

الأخ علي ميرغني

تحياتي وحمداً لله علي سلامة بت أعمك وبت عمنا كلنا في هذا البورد والسودان كمان . يا أخي والله دي مش تقالدها بس دي تدق ليها دلوكة عدييييييل كدا . يا أخي نحن في بلدنا زمان كان البهائم سرقت والفزع لحقها وجابها يمين الله حفلتنا للصباح. وما تفرز دا من دا . وبعدين يا أخي سعادتو دا لمن لحق ملازم يا كافئ البلاء ما جات عليه قصص أسامة الكرور دي . يا زول الناس دي بدرسوا شنو في القاعات دي ولا بشتغلوا وين بعد التخرج ؟؟ مش في السودان المعروف دا؟ ولا بكان تاني ؟

بحيراوي

Quote: قلنا نسبق جنابو عمر ما دام إتأخر هذا نتاج المشروع الحضارى والذى هو بعُمر الملازم هذا الملازم بالتأكيد لم تحضنه عمته وخالته .. وبالتأكيد ماوزع أول ماهيه على نساء أهله الكبار وعصر ليهم الفيها النصيب وهو يسمع دعواتهم وهو بالتأكيد ما قَدَم قريبته للسوق الشعبى وأركبها البص للعوده للديار وإشترى التذكره وأردفها بعصره كااربه هذا هو نِتاج المشروع الحضارى .. شوه سودانيتهم .. وخرَب فطرتهم وهذا الملازم لن يفهم معنى هذا العناق ولو شرحت له مليون سنه و.... و حسبُنا الله ونعم الوكيل

شكرا اسامة

صدقني { قدماء العساكر } الذين أتوا مع هذا المعتوه 00
لو كانوا قريبين منك كان قلدوا ليك عمتك دي لامن تآآآآآآآآآآآآمن !!!
لكن برضو يفترض ما نظلم السيد الملازم
يكون خايف عليك من سلام عمتك يقطع ليك الوضوء !!!
غايتو جنس شلاقة
واستعراض عضلات ليس له اي داعي !!!


راجعت البنك السعودي الأمريكي قبل فترة وأخذت ورقة لزوم الانتظار
اي ريثما يظهر رقمي { 38 } على شاشة الكمبيوتر
وأتى بعدي لواء طيار بالقاعدة الجوية بالحوية رقمه { 39 } انتظر بعدي ولم يحرك ساكنا
حتى ظهر رقمه وبكل أدب ذهب للموظف
لا استعراض عضلات ولا رفع أثقال !!!

حمد لله على سلامة بت عمكم يا حبيب


أما قصة عمكـ أبو دبورتين
ف.. غايتو جنس غايتو!!

عواره منو ما أكتر من كده

اتخيل موقف بت عمك يا علي لو قلت ليها استني شوية ادبر لي مكان فاضي اقالدك فيهو!
ده زول بليد ياخي.

Quote: عواره منو ما أكتر من كده

اخي الاستاذ علي ميرغي

لا تتصور الهزة التي احدثها عنوانك علي خمسين عاما من عمري ذهب نصفها في خدمة الشرطه .. فهبطت كلها
امامي في لحظة واحدة لألتقط منها ما يمكن ان يصمني بانني غير سوداني ..

هذا العنوان اخي شمل الصالح والطالح والقديم والجديد والمتقاعد والعامل .. بينما الحدث ليس ليس اكبر مما قدره
الصائم في تعليقه المقتبس اعلاه ..

لقد حدث لي حدث مطابق تماما في احد مطارات السعودية وانا (اقالد) خالتي وتختلط دموعنا فوضع المطوع
عصاه بيننا فامسكت العصا ونهرته بقوة فتركنا ومضي .. فجاءني آخر وهمس في اذني بلطف ( خـبل) "بكسر
الخاء والباء" واضاف (ما عليك منه) .. فاعتبرته كذلك ولم ارم بها كل المطاوعه

الشرطه اخي شرطة السودان كله وافرادها كالاخرين من الموظفين يصدر منم الخطأ بمختلف احجامه خصوصا مثل
هذا التصرف الذي لا يحدث ضررا ولا يترك اثرا ..

معليش انا ايضا اتأسف لك .. لا كما فعل الكرور وعمر عثمان وانما كما افعل اذا اخطأ حفيدي مع ابن الجيران
وهذا ايضا ما كنت سافعله اذا كنت المسئول عن هذا الضابط وشكوته لي ..

عذرا فقد مسست فينا موضع عزة نختال به امام انفسنا .

عمر علي حسن

اخي عمر
لم اقصد عموم ضباط الشرطة .. وشخصيا اعرف كم هم نبلاء
لكني قصدت هذا الملازم اول
عموما لكل ضباط الشرطة العتبى إن اصاهم رشاش بسبب سوء تصرف من
ضابط صغير.. رغم انو رتبة ملازم اول ما عادت رتبة صغيرة