أصبح الصبح بدون محمد وردي

ورحل عنا محمد وردي

بكي النيل الأزرق وأنتحب الأبيض .. هام ذاك النهر وإذا عبر بلادي ما تمني طرب النيل لديها وتثني. مات المستحيل وترملت الوصية وتيتمت حلفا .. أصبح الصبح بدون محمد وردي .. وأماسي الغربة مافيها فد زول! عيوني في الدمعات وحيلة.. أنا لا الصبر قادر علي وما عندي حيلة!.. محمد عثمان وردي لما تغيب عن الميعاد بفتش ليك في التاريخ وبسأل عنك الأجداد وأسأل عنك المستقبل اللسة سنينو بعاد. وردي كنت معاك بحلم كأني على فرس طاير بغني على وتر مشدود واطير عبر السما المدود سما الوطن اللي مالو حدود. فقدناك وردي ودي الإرادة ونحن ما بنقدر نجابه المستحيل دي الإرادة والمقدر ما بنجيب ليه بديل.
محمد عثمان وردي غنينا معاك بحنية ياما دربك كنت بفرشو ورد وحنية واماني ياما عهدك صنتو وما خنت وكام ليك حناني ياما من ليلي ونهاري ودمعي بنسج لك أغاني وكل كلمة من غناي فيها من حبك معاني ياوردي الليلة كلمات غناك ياها زادنا في وداعك ووداعاً وو داعا. وردي علمتنا نحب من بلدنا ما برة البلد سودانية تهوي عاشق ود بلد .
وعنك بعيداً أبينا "الرحيل" وبيك اعتزاز الصباح الجميل جميع الأغانى اتكالن عليك جميع الأغانى اتكالن عليك. وردي لما غنيت إرادة المولي رادتني وبقيت غناي.. بقيت غناي الشعب السوداني شمال وجنوب بقيت غناي أفريقيا الأول والأخير.
محمد وردي يعود اليوم الحزن القديم بتطلع أنت من غابات ومن وديان ومنى أنا.. ومِن صحْيَة جروف النيل مع الموجَهْ الصباحيَّه
ومن شهقَة زهور عطشانَهْ فوق أحزانهْا متْكَّيهْ بتَطْلَع إنتت من صوت طِفلَهْ وسط اللمَّهْ منْسيَّهْ .
وردي انت والأنغام والعود في ايدك ببتحكي حكايات كل زول بتعيد ترديدها وبتشكي همساتهم من عذب نشيدك ياما الأوتار تفضح ريدهم يا نور العين يا نور العين انت وينك وين.
وردي زمان كنا بنشيل معاك الود وندي الود وفي عينينا كان يكبر حنان يزداد وفات الحد زمان يا وردي ما عشنا في غربة ولا قاسينا نتوحد وهسع يا وردي رحنا نتوجع نعيش بالحسرة نتأسف ..علي الماضي اللي ما بيرجع.
يا وردي علمتنا حساب العشق والهوي ..ومعادلات الغرام - نار الهوى الوقادة والشوق والضنا وحلاوة الأحلام وآمال الهنا إيه يجمعن غير ال 19 سنة.
وردي في زمان حكام الغفلة حلمنا معاك نبني الوطن قلنا حنبنيهو.. البنحلم بيهو يوماتى ونحوله من وطن بعاني من حكم شمولي لوطن شامخ وطن عاتى وطن خيّر ديمقراطى ومن وطن محكوم بحكم الفرد وإرادة جماعة بعينا لوطن مالك زمام أمرو .. ومتوهج لهب جمرو .. وطن غالى .. نجومو تلالى فى العالى .. إراده .. سياده .. حريّه وبرنامج تغييرنا وبديلنا الغنيناه مع محجوب شريف
مكان الفرد تتقدم.. قيادتنا الجماعيّه .. مكان السجنِ مستشفى .. مكان المنفى كليّه .. مكان الأسري.. ورديّه ..مكان الحسره أغنيّه .. مكان الطلقه عصفوره .. تحلق حول نافوره .. تمازج شُفّع الروضه .. حنبنيهو البنحلم بيهو يوماتى وطن للسلم أجنحتو ..ضدّ الحرب أسلحتو .. عدد مافوق ما تحتو ..مدد للأرض محتله ..سند للإيدو ملويّه ..حنبنيهو.. البنحلم بيهو يوماتى ..وطن حدّادى مدّادى ..ما بنبنيهو فرّادى ..ولا بالضجه فى الرادى ..ولا الخطب الحماسيّه ..وطن بالفيهو نتساوى ..نحلم.. نقرا ..نتداوى ..مساكن كهربا ومويه.. تحتنا الظلمه تتهاوى ..نختّ الفجرِ طاقيّه ..وتطلع شمس مقهوره ..بخط الشعب ممهوره ..تخلي الدنيا مبهوره ..إراده وحده شعبيّه.
وسألنا معاك وفتشنا مع الدوش: حأسأل عن بلد رايح ..وافتش عن بلد سايح.. واسأل عن امانينا.. اللي ما بتدينا.. صوت صايح
وأسأل وين مخابينا ..إذا جانا الزمن...لا فح..واسأل عن بلد مجروح..وعارف الجارحو ليه جارح..وابكى على بلد ممدوح..وعارف المادحو ما مادح.. واحلم بي حلم مسروق.. لا هو الليلة لا امبارح.
ياوردي ضاع الكلام ماتت حروف الوداع قبال اهمسا .. وردي يا ضيعة الوتر اللي غنيت معاه وعزف ..الليلة ما وشوش نسيم لروضو ولا غرد مسا.. الليلة ما سافر عبير في الطيب يغازل نرجسا .. الليلة يا حبي الكبير في حرقة لافيني الأسي.
يا وردي تسلحنا بأكتوبر لن نرجع شبرا.. سندق الصخر حتي يخرج الصخر لنا زرعاً وخضرا ونرود المجد حتي يحفظ الدهر لنا أسماً وذكري .. محمد وردي بأسمك كتبنا ورطنا وأنت تقول لنا "قلت أرحل"

يا فخر كل الاجيال يا وردي

لحظة من وسني

تغسل عني حزني
...
تحملني

ترجعني

الى عيون وطني

يا وطني ..

يا وطني يا وطن الأحرار والصراع

الشمس في السماء كالشراع

تعانق الحقول والمراعي

واوجه العمال والزراع

يا وطني ..

أصبح الصبح كأن الزمن الماضي على الماء نقوش

فارفعي راية اكتوبر فالثورة مازالت تعيش

وانا مازلت في البعد انادي

يا بلادي

يا مغاني وطني ..

أجمل من فراشة مجنحة على ضفاف المقرن الجميل

أجمل من نوّارة مفتحة ترقد تحت ذهب الأصيل

أجمل من رائحة النضال لم أشم رائحة في صبحك الجليل

يا فخر هذا الجيل

يا وطني

ترك بصمة الثورة في وجدان كل منا.

كان مميز و فلتة زمان,,

اللهم ارحمه و اغفر له
" إنا لله وإنا إليه راجعون "

أخي شهاب نعم إنها إرادةالمولي بأن لكل أجل كتاب ولكن المبدعين في بلادي يرحلون ويبقي زبد البحر