Post: #1
Title: يوميات عائد من الدار الآخرة
Author: على ميرغني
Date: 02-15-2012, 02:43 PM
Parent: #0
نهار الجمعة الماضية
حضرت الى المكتب صباحاً لامر يخصني
ثم عدت سريعا الى البيت
المسافة تقريباً (27) كيلومترا يعني نص ساعة
فطرت ثم ذهبت الى صلاة الجمعة في مسجد قرية الجعلين
عدت الى المنزل الخالي
انا وبس مافي زول تاني
واجمل حاجة انو المدام في مناسبة زواج تخصها
دخلت غرفتي.. وقررت في نفسي ان انتقم من النوم
رقدت.. وبديت استرجع احداث يومي وهي طريقة اتعودت انو اخدع بيها النوم
غمدت عيوني.. لكن السرير بدأ يتأرجح
مسكت بايدي الاتنين برضو السرير ما داير يثبت
فتحت عيوني.. ويا ريت لو مافتحتم
|
Post: #2
Title: Re: يوميات عائد من الدار الآخرة
Author: على ميرغني
Date: 02-15-2012, 03:08 PM
Parent: #1
عمري ما جربت البنقو ولا الحشيش.. ولا حتى العرقي ذاتو
الغريبة ضابط عشرين سنة.. ثمانية منهم في الجنوب حيث كل الـ 4Ws حلال
المهم
الدنيا كلها كانت لافة شديد.. سقف الغرفة كان بدور بسرعة الف عكس عقارب الساعة
مسكت راسي بيدي الاتنين.. السقف وقف..
حمدت الله.. وفكيت راسي
تاني السقف قام يلف بسرعة الف.. بس المرة دي مع عقارب الساعة
يا ربي يكون دا مس شيطاني
ولا اكون اتعنت .. بس على شنو..
حمار ××××××××××× القرد ذاتو مافي
(وعلامات في دي من عندي مساعدة لسيد الحواشة)
المهم الكون كلو بيقى يدور ... وانا معاهو ادور..
سبت السرير الكنت راقد فيهو.. ومشيت رقدت في واحد في البرندة
الوضع زاد تعقيد .. على طريقة بن قنة في حصاد اليوم الاخباري
والعالم كلو بقى يدور بشدة.. لحدى ما بقيت افتش في كرعي ذاتم وين ما عرفتم
مرة القاهم جنب راسي وسريع سريع يرجعن محلن
|
Post: #3
Title: Re: يوميات عائد من الدار الآخرة
Author: على ميرغني
Date: 02-15-2012, 03:50 PM
Parent: #2
الموضوع شكلو بقى جد جد
وصراحة كدا شميت ريحة الموت
وانا براي في البيت
صراحة النسوان ليهم حوبة كبيرة.. بس البقنعنا انحنا الرجال شنو
مضت اكثر من ساعة والوضع يزداد سوء
والحكاية انقلبت لطمام بطن
سمعت زول جاي على البرندة... كان زي وصول رحلة انقاذ غردون الى الخرطوم
طلبت من القادم ان يدور العربية ويوديني لاقرب مستشفى
ناس تدور العربية تمشي بيها للسادة وناس تدور العربية تمشي بيها العيادة
وناس لا لاقية السادة ولا العيادة ولا العربية ذاتها
المهم ركبت العربية.. ما عارف كيف .. المه لقيت نفسي جواها
برضو العربية كانت بتدور... زيها زي الهلكوبتر لمن مروحة الذيل تنكسر وتبقى زي (السورو) تلف في بكانا
واتحدى اليعرف السورو دا عبارةو عن شنو.. اولاد الغرب يمتنعون
لقيت احسن حاجة اغمض عيوني واعمل نائم
|
Post: #4
Title: Re: يوميات عائد من الدار الآخرة
Author: على ميرغني
Date: 02-15-2012, 04:08 PM
Parent: #3
لمن غمضت عيوني.. العربية ذاتها بقت ماثابتة
فتحتم.. لقيت شارع الظلط طالع لفوق فوق شديد لحدي ما الكباشي قارنة مع السماء
طبعا انا كنت ماشي لمستشفى الكباشي
غمضت عيوني لقيت انو شقلبان العربية احسن من الشارع الماشي السما
المهم وصلت المستشفى..
بعد مقابلة الدكتورة.. قالت ارتفاع في الضغط
أمّك أمانة ما وقع تور
في اللحظة ديك كان همي بس الدنيا دي تقيف من دورانها الما عندو طعم دا
ـــــــــــــــ
واسع الطيارة قامت في اطني الاتنين
وكان حيين بكرة بواصل
|
Post: #5
Title: Re: يوميات عائد من الدار الآخرة
Author: برير اسماعيل يوسف
Date: 02-15-2012, 04:43 PM
Parent: #4
يا زول الحمد لله علي سلامة العودة و ربنا يرجع المراحيم و المرحومات.
|
Post: #6
Title: Re: يوميات عائد من الدار الآخرة
Author: على ميرغني
Date: 02-16-2012, 01:48 PM
Parent: #5
تشكر يا برير
ـــــــــــــــ
المهم في الموضوع اني رجعت الى المنزل وقد اصبحت من اصحاب الضغوط المرتفعة
وحمدت الله كثيراً على انه ليس معه سكر
وفي المنزل ازدادت حالتي سؤ وتم نقلي الى المستشفي.. كان المقصود السلاح الطبي
لكن عندما زاد الوضع سؤ نقلت الى مستشفى البراحة
وبعد كمية من الفحوصات ورسم القلب وطعين بالحقن والفراشات
قال الطبيب ان الموضوع التهاب بالاذن الوسطى
الحمد لله .. ضغط مافي
واهم توصية عدم استعمال الموبايل لاسبوع كامل نهائياً
والاهتمام بتقليل وقت المكالمات الى اقصر وقت ممكن
دا كلو كوم وقصة مراجعة النفس كوم تاني
|
|