ارشح المهندسة هالة عبدالرحمن مدنى رئيسة للجالية السودانية بدولة قطر

بت ابوها وعلمانية على السكين

فازت هى والمهندس عمر بوب بعضوية فئة المهندسين
ضمن قائمة الاجماع الوطنى

قوى الاجماع الوطنى اكتسحت انتخابات الجالية السودانية بدولة قطر
في مقابل المؤتمر الوطنى

هلا يا بدر الدين
هالة شابة طموحة وطاقة شبابية وروح جديدة بتمني ان تحدث هي وزملائها من المرشحين الاخرين نقلة في عمل الجالية
لكن يا بدر وحسب اللائحة والنظام الاساسي بتاع الجالية
لا انا ولا انت نمتلك حق ترشيح فلان وعلان
فهذا الحق وحسب النظام الاساسي (مقصور) علي المجلس الخمسيني فهم فقط من يمتلكون هذا الحق
فمادام نحن قوة ديمقراطية فخلونا ندي الناس الذين تم اختيارهم حقوقهم الدستورية واللائحية فهم اهل لذلك وهذا هو حقهم
لايستطيع اي شخص ينازعهم فيه ...
وانا شخصيا اثق بان من سيتم اختياره سيكون (الشخص المناسب في المكان المناسب وسيكون واجهة سودانية تليق بالجالية السودانية في قطر)

Quote: فمادام نحن قوة ديمقراطية فخلونا ندي الناس الذين تم اختيارهم حقوقهم الدستورية واللائحية فهم اهل لذلك وهذا هو حقهم لايستطيع اي شخص ينازعهم فيه ...

كيكى
اتتفق معك ياصاحب وتصويبك الاجرائى
لكن برضو من حقى كا احد افراد الجالية السودانية الحققت اغلبية انتخابية
ان احشد الدعم لفرد ارى انه جدير بربيعنا ......

بالإ ضافة ل كلام كيكي
فان مسوغات بدرالدين لترشيح المهندسة هالة مدني جد ضعيفة
كونها علمانية ف غالبية اعضاء المجلس علمانيين او من دعاة الدولة المدنية الديمقراطية
كونها مهندسة فهناك بوب وسعيد سنوسي
ومن حيث النوع فهناك 5 اخريات منهن من هي اكثر تجربة منها

اود تأكيد تقديري لهالة ورفيقاتها

وياريت بدرالدين يريحنا شوية

Quote: وياريت بدرالدين يريحنا شوية

يا ابو ساندر ا
(هو انا قلت حاجة تزعلك)
ياخى انا بحشد الدعم لمهندسة سوةدانية شابة لتكون رئيسة للجالية السودانية بدولة قطر
هل هذا يغضبك

Quote: لكن برضو من حقى كا احد افراد الجالية السودانية الحققت اغلبية انتخابية ان احشد الدعم لفرد ارى انه جدير بربيعنا ......

هلا يا بدر
ما من حقك تخيل ..!!
لانو لمن الزول يقول (حقي) بتكون في مرجعية لهذا الحق...
والمرجعية في امر اختيار الرئيس هو النظام الاساسي بتاع الجالية
والنظام الاساسي بتاع الجالية اعطي حق اختيار الرئيس للمجلس الخمسيني...

احنا الناخبيبن دورنا في العملية الانتخابية انتهي بمجرد (جدع ورقة التصويت في الصندوق للفئة التابعين ليها)
وبعدها النظام او السيستم بقول لينا دوركم انتهي وزحوا وخلو الاشياء الاخري لمن تم اختيارهم ..
يختاروا بمعرفتهم لانو ده شغلهم ومسئولية يحاسبون عليهم من قبل الجمعية العمومية

Quote: ما من حقك تخيل ..!! لانو لمن الزول يقول (حقي) بتكون في مرجعية لهذا الحق... والمرجعية في امر اختيار الرئيس هو النظام الاساسي بتاع الجالية والنظام الاساسي بتاع الجالية اعطي حق اختيار الرئيس للمجلس الخمسيني... احنا الناخبيبن دورنا في العملية الانتخابية انتهي بمجرد (جدع ورقة التصويت في الصندوق للفئة التابعين ليها) وبعدها النظام او السيستم بقول لينا دوركم انتهي وزحوا وخلو الاشياء الاخري لمن تم اختيارهم .. يختاروا بمعرفتهم لانو ده شغلهم ومسئولية يحاسبون عليهم من قبل الجمعية العمومية

كيكى ياهندسة
غايتو لو كلامك دا صاح ببقى ما خلينا للدكتاتورية فرضا ناقص
يعنى باختصار داير تقولى (انطم) واوعك تفتح خشمك وبنجيك تانى بعد سنتين ونقوليك امش سجل ثم امش صوت لفلان وفرتكان
ولو عندى راى على ان اذهب وعلى الطريقة السلفية واطرق ابواب منازل اعضاء المجلس الخمسينى فردا فردا واقول لهم ياخى رشحو هالة
عبدالرحمن مدنى لتكون رئيسة للجالية لانها ولانها .......
و تانى انت والاخ ابوساندرا ومن ناحية جندرة ساكت كنت بتوقع منكم المساندة ضيعت تلت العمر معاكم في تحاور واختلاف
علمانى علمانى وحين المحك طلعتو سلفيين على طريقتكم

Quote: غايتو لو كلامك دا صاح ببقى ما خلينا للدكتاتورية فرضا ناقص يعنى باختصار داير تقولى (انطم) واوعك تفتح خشمك وبنجيك تانى بعد سنتين ونقوليك امش سجل ثم امش صوت لفلان وفرتكان ولو عندى راى على ان اذهب وعلى الطريقة السلفية واطرق ابواب منازل اعضاء المجلس الخمسينى فردا فردا واقول لهم ياخى رشحو هالة عبدالرحمن مدنى لتكون رئيسة للجالية لانها ولانها ....... و تانى انت والاخ ابوساندرا ومن ناحية جندرة ساكت كنت بتوقع منكم المساندة ضيعت تلت العمر معاكم في تحاور واختلاف علمانى علمانى وحين المحك طلعتو سلفيين على طريقتكم

هلا يا بدر الدين..
وياخ هالة دي من (الفئة) بتاعتي ومساندتهم والعمل علي فوزها ووصولوها الي الجالية قمنا بيهو كواجب علي اوجه الكمال انا وكل المجموعة التي عملنا سويا في هذا الامر علي ارض الواقع واهدرنا الزمن الكبير من اجل ذلك...
يعني المساندة لفوز هالة (كمهندسة) قد تم انجازه وتم اختيارها كعضو في المجلس الخمسيني ... عشان تعمل حاجات كثيرة منها ولاسباب هذا البوست هي ان تقوم ومعها ال49 الباقين اختيار رئيس الجالية...
يعني انا اخترتها وكلفتها هي وسعيد السنوسي وبوب حتي يقومو بهذا الواجب بالنيابة عني حسب النظام الاساسي...
--------
العلمانية والسلفية والدكتاتورية يا بدر ما عندها طريقة تشتغل هنا
لانو هنا في نظام وانتخاب وتوزيع ادوار وواجبات محددة اوجبها النظام الاساسي


-----------
لو كان النظام الاساسي يتيح لي وليك ولكل الناخبين اختيار الرئيس كان كلامك ده في محلو
ولكن طالما الحق ده هو حق ناس مواصفات وتكاليف خاصة فعلينا نحن ان ننطم بعدما ننجز العلينا باختيارهم

Quote: لو كان النظام الاساسي يتيح لي وليك ولكل الناخبين اختيار الرئيس كان كلامك ده في محلو

ياكيكى
ياخى انا عارف ان اختيار الرئيس بتم من خلال المجلس الخمسينى وانا داير اوصل وجهة نظرى دى للمجلس الخمسينى
اعمل شنو امش دق بوابهم ولا اعمل اعلان مدفوع الاجر في الصحف القطرية ولا امش اعمل لى يافطة في باب السفارة
السودانية بالدوحة عسى ولعل يشوفها مجلسك المقدس هذا

Quote: ما من حقك تخيل ..!!

طَيِب على الأقل مِن حقو يِرَوِج لِنفسو كنصير لِلمرأة وأبعاد ها النصر الإجْتِماعِية وإنْدِياحاتو البِتحكي الإنْفِتاح والإنْشِراح، ده مِن حقو.. مِن حقو يِسَوِق روحو في كمُتَبَوْتِق في عُمْق البنفسج المؤطرة في البُعد اللاشِعوري المُتجذِر في سديم الشُعاع الساقِط على أُفُق المعرِفة السرمدِية.. و.. كِده

السِياسة علم والديمُقْراطِية فعلها النبيل، لا يُطيقهُ فهمًا وإعْمالاً الرعاع، وإن ركبولو في كنْكوجو فهاما.. خليني أشرح ليك المسعله بِطريقة تانِية يا بدرالدين ياخ:
- زَيد رشح عُبَيد
- وليه زَيد رشح عُبَيد؟
- زَيد رشح عُبَيد، لأن برنامِج + فهم عُبَيد، نفع تااااب مع برنامِج وفهمو -أي زَيد-.
- قام يا سيدي الآمنت ليك، عُبَيد فاز
- يبقى عُبَيد ده حيتكلم بِلِسان زَيد في المجالِس
- ما بنفع بعد كَدي زَيد يِنْفزِر ويِناضِم في مجالِس معقودة، لأنو لو زَيد ناضم وحمزة وعلي وعُثمان، ترشيح ديل لِعُبَيد شِنْ طعمو؟!
ــــــــــــــــ

Quote: وعلمانية على السكين

طَيِب تفْتكِر يا بدرالدين، المجلِس الخمسيني لامِن يِعرِف إنو المُهندِس/ هالة مدني علمانية وعلى السكين كمان، ده حيكون ضدها ولا معاها؟ لأنو مُش بِالضرورة يِكون المجلِس الخمسيني الواقِف كمُعارِض للإنقاذ، علماني أو علماني على السِكين، مُمْكِن، بل أكيد، في المجلِس الخمسيني مَن يرى أن العلمانِية كُفر عديييل كَدي، أها مِتِل ده وبعد تعريفك البذلتو مجانًا، م/ هالة مدني، العلمانية العلى السكين، ما بزكيها تااااب، جِبْت ليها الهوا ياخ.. علشان كَدي كتبنا إنو تثقيف الحركات/الأحزاب، لِقواعدها، أمر واجِب، فإن قفل الجاهِل فاه في موائِد المُثقفين، أولى، وإن فعل -أي فتح فاه- فضح وفُضِح





(يا ربي تعديل المُداخلة بِتُعد مُداخلة؟)

Quote: السِياسة علم والديمُقْراطِية فعلها النبيل، لا يُطيقهُ فهمًا وإعْمالاً الرعاع، وإن ركبولو في كنْكوجو فهاما.. خليني أشرح ليك المسعله بِطريقة تانِية يا بدرالدين ياخ: - زَيد رشح عُبَيد - وليه زَيد رشح عُبَيد؟ - زَيد رشح عُبَيد، لأن برنامِج + فهم عُبَيد، نفع تااااب مع برنامِج وفهمو -أي زَيد-. - قام يا سيدي الآمنت ليك، عُبَيد فاز - يبقى عُبَيد ده حيتكلم بِلِسان زَيد في المجالِس - ما بنفع بعد كَدي زَيد يِنْفزِر ويِناضِم في مجالِس معقودة، لأنو لو زَيد ناضم وحمزة وعلي وعُثمان، ترشيح ديل لِعُبَيد شِنْ طعمو؟! جِبْت لِلمُهندس/ هالة عبدالرحمن مدني، الهوا.. علشان كَدي كتبنا إنو تثقيف الحركات/الأحزاب، لِقواعدها، أمر واجِب، فإن الجاهِل في موائِد المُثقفين، لا يصمُد كثيرًا، وإن تجرأ وفتح فاه فضح وفُضِح

نعم المدرس ونعم الدرس

بدرالدين الأمير

Quote: نعم المدرس ونعم الدرس

بارك الله فيك.. قُبول الدرس أول التعلُم.. ولِتعلم أن العلم لَيس بِالحفظ وحده، بل أن تعمل بِما علمت.. بارك الله فيك.


أنا علماني مؤمِن بِالله الواحِد الأحد وبِمُحمد عبده أرسله نذيرًا وبشيرًأ، وده إسمو [العلمانية الجزئية]، أها طالما إنت بتعرف م/ هالة مدني وبتعرِف أبوها وسِكينُمْ، وبترشِحا تكون رئيس لِلجالِية الأنا فوقا، يا ريت تنَوِر "الخمسيني" لِسان حالنا، بِرأي م/ هالة مدني في رب العالمين شنو، هل تؤمِن به؟ ولو م/ هالة مدني مؤمنة بِالله الواحِد الأحد، رأيها شنو في:
<فَانكِحُواْ مَا طَابَ لَكُم مِّنَ النِّسَاء مَثْنَى وَثُلاثَ وَرُبَاعَ> (3 النِساء).
<لِلذَّكَرِ مِثْلُ حَظِّ الأُنثَيَيْنِ> (11 النِساء)
<يُدْنِينَ عَلَيْهِنَّ مِن جَلابِيبِهِنَّ> (59 الأحزاب).

ما كمان يا خوي المفروض البِمثِلنا كرئيس، يِكون فهمو مِتِل فهمنا.. وكِده

الأخ بدر الدين الامير تحياتي

Quote: فازت هى والمهندس عمر بوب بعضوية فئة المهندسين ضمن قائمة الاجماع الوطنى

وأيضا الباشمهندس سعيد السنوسي فاز بعضوية فئة المهندسين ضمن قائمة الاجماع الوطني
بجانب كل من المهندسه هاله عبد الرحمن والمهندس عمر بوب





ـــــــــــــــــــــــــــــــــــــــــــــــــــــــــــ
التعديل لإضافة حرف الراء في اسم بدر الدين

Quote: بارك الله فيك.. قُبول الدرس أول التعلُم.. ولِتعلم أن العلم لَيس بِالحفظ وحده، بل أن تعمل بِما علمت.. بارك الله فيك.

عزام
خلاص كملت كوتك من المداخلات يلا امش نوم
ورحم الله بكرى ابوبكر عمل فينا خير كتير

Quote: [Qو تانى انت والاخ ابوساندرا ومن ناحية جندرة ساكت كنت بتوقع منكم المساندة ضيعت تلت العمر معاكم في تحاور واختلاف علمانى علمانى وحين المحك طلعتو سلفيين على طريقتكم

هالة مدني شابة تعجبك

هذا الشبل من ذاك الأسد

هالة هي المسئولية والنضج والطموح
وهالة ندخرها بقوة للمستقبل ...

هي قيادات القادم وليس اليوم
الجيل الذي نحتاجه ونؤهله للقريب القادم

والف باء تاء ثاء العمل تؤكد ان هالة تحتاج الخبرة والاحتكاك
وهذا هو الدرس الاول لطالبة نجيبة وقادرة على تحمل المسئولية

واي كلام غير ذلك جندرة وووووو ....لن ينفعنا ولن ينفع هالة
ويقع في باب التسويق فقط

ولن ينفع مسيرة طويلة لعمل ديمقراطي نسعى جميعنا إلى بناؤه
فهو يحتاج منا الصبر والتجرد والمسئولية والشفافية والابتعاد عن المزايدة

Quote: وجهة قبنظرى دى للمجلس الخمسينى اعمل شنو

هلا يا بدر
وانت عملت يا اخوي وانتهي خلاص دورك في العملية الانتخابية (تحديدا)
فيوم اللبست بدلتك وركبت عربيتك ومشيت السفارة صوتت لمنسوب الفئة بتاعك (كده الراي بتاعك وصل الصندوق وانتهي)
ولانو لمن تختار الزول الانت عايزه ده بكون الاختيار بتاعك ده ثمنو الاتي نصه
1- يحقق ليك البرنامج الانتخابي الاترشح بيهو
2- يضبط ليك النظام الاساسي بتاع الجالية بالتعاون مع الاخرين
3- جزء من ضبط النظام الاساسي هو اشتراكه كعضو في المجلس الخمسيني في اختيار (الرئيس)


الرئيس بحاسبو المجلس الخمسيني ويحاسب ايضا اللجنة التنفيذية....

واعتقد بان اعلي سلطة في الجالية هو المجلس الخمسيني وهو من يحاسب ويجيز خطاب الدورة والميزانية او يرفضها

Quote: والابتعاد عن المزايدة

الاخت محاسن
لك التقدير
من الذى يزايد وفيما يزايد
ياسيدتى هالة التى ترجونا الصبر عليها حتى تكتسب خبره هى لم تكن مرشحة ضمن قائمة الطلاب مع تقديرى الكبير للطلاب
وما احدثوه من ربيع عربى ....
وبالمقابل هالة لاتجمعنى بها لاعلاقة تنظيمية ولا عملية وترشيحى لها نابع من عندى انا كفرد ناخب وبس

انا ما زعلان
ولو زعلت ح يكون السبب انت
ببساطة لأنك بتخرمج ساكت

انا عارفك عايز تقول أو تروج لحاجتين
إنك علماني
وإنك جندري واقف مع المرأة

بس أنت أخترت العنوان والسبب الخطأ لترويج حاجتينك ديل

ف العلمانية التي طرحت هنا ، طرحتها في غير موضعها وقد تجيب الهواء لهالة على زعمات عزام العنصري
وأيضآ الجندرة والتضامن كان في غير محله ، ولو كانلكانت الأولى دكتورة منار فهي من ناحية الرمز لها رمزيتها
كقائدة ضمن قيادات سوا ، وهي تفوق هالة تجربة بحكم عضويتها في الجالية سابقآ وعملها التنظيمي في رابطة المرأة

أستطيع أن أرى الآن بعين خيالي هالة خاتة ايديها في رأسها

بعدين من ضمن مسوغات ترشيحك الضربناها ليك نسيت ليك كرمآ مني ، كونها بت أبوها

ياخ طلع لي واحدة من المرشحات ما بت أبوها ، أو من المرشحين ، ما ود ابوهو

عشان كده قت ليك رووق

Quote: وأيضا الباشمهندس سعيد السنوسي فاز بعضوية فئة المهندسين ضمن قائمة الاجماع الوطني بجانب كل من المهندسه هاله عبد الرحمن والمهندس عمر بوب

منتصر
شكرا للتصويب وتهانينا للمهندس سعيد السنوسنى

Quote: انا ما زعلان ولو زعلت ح يكون السبب انت ببساطة لأنك بتخرمج ساكت انا عارفك عايز تقول أو تروج لحاجتين إنك علماني وإنك جندري واقف مع المرأة

وهل هذا يعيبنى

Quote: ولو كانلكانت الأولى دكتورة منار فهي من ناحية الرمز لها رمزيتها كقائدة ضمن قيادات سوا ، وهي تفوق هالة تجربة بحكم عضويتها في الجالية سابقآ وعملها التنظيمي في رابطة المرأة

غايتو الواحد لمن يكون وحلان في الايدلوجيا بتور نفسك بالشرح نقول شباب وربيع عربى انتزع اعتى الخبرات تجى تقول لى تجربة وهم يحزنون

Quote: أستطيع أن أرى الآن بعين خيالي هالة خاتة ايديها في رأسها

هو هالة دى لو لم تطلع للعمل العام واتشرحت في انتخابات كنت ممكن اجيب سيرتها او اتكلم عنها

Quote: بعدين من ضمن مسوغات ترشيحك الضربناها ليك نسيت ليك كرمآ مني ، كونها بت أبوها هو انا اشرح شنو وخلى شنو ياخى بت ابوها دى بتتقال زيها زى كل فتاة بابوها معجبة هل في فتاة بتكره مها تورت نفسى خرفك كعب الله يكون في عون رشيدة البنيات ياخ طلع لي واحدة من المرشحات ما بت أبوها ، أو من المرشحين ، ما ود ابوهو

انا شرح شنو وخلى شنو خرفك كعب ياخى بت ابوها دى بتتقال في نفس سياق كل فتاة ابوها معجبة هو في فتاة بتكره امها

Quote: واتشرحت في انتخابات

اتشرحت في عينك ياخ.. حرم إتْ العاوزِ تشريح..







الله لا تريحك ضيعت لي تلْت تلاته ساي

تم ترشيح المهنسة هالة ليس بسبب علمانيتها ( والتى أشك فيها) .. ولا أنعا إبنة أحدهم ..

إنما بقدر ما هو مقدراتها و طموح مجموعة اختارت برنامج و رأت أن المهنسة هالة ضمن ( ثلاثة) يمكنهم أن ينفذوا هذا البرنامج و كوكبة أخرى ..

هالة مكلفة بأن تنفّذ البرنامج الذى وفقه تم ترشيحها له و رفّعت لأجل وضع خارطة له و من ثم تنفيذه ..

لم يكن ضمن معايير إختيار المهندس هالة ( علمانيتها) أو إنتمائها لحزب أو بنوتها لأحد ..

وأنا فرد من مجموعة رشّحتْها .. و لا أعرف والدها ولا علمانيتها ..

أما رئاستها للجالية .. فهذا شأن آخر

لك الحق أن تروّج له .. و للمجلس الخمسيني أن يأخذ به أو لا ..

Quote: بت ابوها دى بتتقال في نفس سياق كل فتاة ابوها معجبة

دي انا ما فهمتها


بدر اخوي كيف حالك

Quote: هلا يا بدر وانت عملت يا اخوي وانتهي خلاص دورك في العملية الانتخابية (تحديدا) فيوم اللبست بدلتك وركبت عربيتك ومشيت السفارة صوتت لمنسوب الفئة بتاعك (كده الراي بتاعك وصل الصندوق وانتهي) ولانو لمن تختار الزول الانت عايزه ده بكون الاختيار بتاعك ده ثمنو الاتي نصه 1- يحقق ليك البرنامج الانتخابي الاترشح بيهو 2- يضبط ليك النظام الاساسي بتاع الجالية بالتعاون مع الاخرين 3- جزء من ضبط النظام الاساسي هو اشتراكه كعضو في المجلس الخمسيني في اختيار (الرئيس) الرئيس بحاسبو المجلس الخمسيني ويحاسب ايضا اللجنة التنفيذية.... واعتقد بان اعلي سلطة في الجالية هو المجلس الخمسيني وهو من يحاسب ويجيز خطاب الدورة والميزانية او يرفضها

كيكى
انت جادى ولا بتهترش
ياخى حراية الراى والتعبير دا بند من بنود حقوق الانسان حسب ميثاق الامم المتحدة
انت جاى تقلعو منى

Quote: دي انا ما فهمتها بدر اخوي كيف حالك

اخى كمبور
لعلك طيب
راجع ردى على ابوساندرا

Quote: انت جادى ولا بتهترش ياخى حراية الراى والتعبير دا بند من بنود حقوق الانسان حسب ميثاق الامم المتحدة انت جاى تقلعو منى

هلا يا بدر
وياخ هرش شنو وقلع شنو البقالعك فيهو انا..
دي نظامك الانتخابي ولائحة جاليتك بتقول انك كناخب دورك كيت وكيت
وطبعا مع تاميني علي حقي في الامنيات والاحلام ...
ممكن تنورني انت لمن مشيت رميت صوتك لمرشح الفئة بتاعتك فهمك كان شنو للتصويت ده
ولمسسئوليات المرشحين الذين صوت لهم..؟؟

Quote: مِن حقو يِسَوِق روحو في كمُتَبَوْتِق في عُمْق البنفسج المؤطرة في البُعد اللاشِعوري المُتجذِر في سديم الشُعاع الساقِط على أُفُق المعرِفة السرمدِية.. و.. كِده

كتب بدر الدين الامير وله التحية

Quote: ياخى بت ابوها دى بتتقال في نفس سياق كل فتاة ابوها معجبة

كتبت ليهو

Quote: دي انا ما فهمتها

قام كتب لي

Quote: راجع ردى على ابوساندرا

وبرضو ما فهمت حاجة !


بدر يا خوي ان كان انت قاصد

كل فتاة بأبيها معجبة

تكون بالغت

لأن اب من الاسماء الخمسة ( اب , اخ , حم , فو , ذو )

وهي ترفع بالواو وتنصب بالالف وتجر بالياء

والباء حرف جر


وشنو يعني ( أبوها معجبة ) ؟

Quote: أبو ساندرا وياريت بدرالدين يريحنا شوية

هو بشتغل شنو الشى دا ممسح كدى

بدر الدين ما ممسح يا وضوحة

بدر الدين ناير أصلا .. و طبعة و خلقة ..( فتح و كسر متتاليين) ..

بعدين شغال مدير و صاحب عمل ..( شريك) ..

بورداب الدوحة/ سلام وتحية
ماعارف الناس حانقة على بدر الدين الامير لشنو يعني....؟ الزول قال وجهه نظرو فى الموضوع
وقال إنو برشح هالة عبد الرحمن رئيسة للجالية، وقدم دفوعات معينة خلتو يدعم ترشيح هالة،،،طيب بغض النظر عن إنو يجوز
ليهو التصويت فى إنتخاب المهندسة/ هالة عبد الرحمن، او العكس، ما شايف إنو في سبب منطقى تخلى الناس تثور عليهو كده
يعني هسى مثلا أنا داعم ترشيح أوباما لدورة تانية، مع إني لا يجوز لى التصويت فى إنتخاب أوباما،،،طيب المشكلة وين يعني....؟
هل ده بمنع إنو أعلن ترشيحي ليهو ....؟ أو دعمي ليهو.....؟

Quote: وقال إنو برشح هالة عبد الرحمن رئيسة للجالية، وقدم دفوعات معينة خلتو يدعم ترشيح هالة،،،طيب بغض النظر عن إنو يجوز ليهو التصويت فى إنتخاب المهندسة/ هالة عبد الرحمن، او العكس، ما شايف إنو في سبب منطقى تخلى الناس تثور عليهو كده

خالد يابحر
إمكن لان اسمها هالة والمرشحا هنا بينتمى لحركة حق
نقول شباب يقولو ليك خبرات كأن سور برلين انهد بالصدفة

Quote: وياخ هرش شنو وقلع شنو البقالعك فيهو انا.. دي نظامك الانتخابي ولائحة جاليتك بتقول انك كناخب دورك كيت وكيت

كيكى
انا خارج عن كيت وكيت بتاعتكم دى ولو ماعاجبكم ارفدونى واقعلو جواز سفرى كمان
ياخى حرية التعبير دى حق سماوى (قال ألم تؤمن ) ....