قالت
إسمى روجينه
عاينت لينا ومشت
ومااستنت تشوف
بعد داك الحصل
وكيف الفجة طربت وانتشت
سِكك المدينه اتلونت
فرحت بيوت الحله جت
خلت حكاياتا الحزينه
رقصت دروب الحلة جت
وجات العصافير الحنينه
قالت شامّه لى عطرا هطل
شايفه فرحا
كبّ فوقكن وانبهل
أكيد لاقتكن البت الرزينه
قالت إسمى روجينه
خليط النخلة والأبنوس
عصير الدهشة والفرحة
مزيج الليل مع الفانوس
عناق الضفة والمينا
شعور الزول
ساعة روحو منو تروح
لامن نفسو يتقطع
ويبدا يكوس
يقوم يلقاها فى جواهو
زى الروح
شعور الزول
ساعة العطشة تمسك فيك
وتبدا تموت
وفجأة الدنيا تبقا خريف
وروجينه
تهطل فيكَ زى عِينَه
سألتك بالذى
سوا الوجع فينا
فى كل يوم
امرقى ورتبى التاريخ
وفى كل حين
طِلى وكُبى من ألقك
قليل لينا
وكل خريف
ابقى سحابة واروينا
قالت إسمى روجينه