Post: #1
Title: (أظنك عرفتي) نص للشاعر والكوميدي / جمال حسن سعيد.
Author: زهير عثمان حمد
Date: 02-05-2012, 12:00 PM
#
أظنك عرفتى
عواصفك مهبـّى
أبارى فى خيالك .. يسوقنى ويودّى
وين...هوك يعدى
ويجهل مصبّى
هواجسى البتزرع
وظنـّى البربى
****
لقيتك خواطر
بتصحى .. وتساور
وطيفك يزاور
وروحك تحاور
تجيبنى فى زمانك
موشـّح أساور
أقول بس نسيتك
وجرحك .. يتاوِر
*****
أظنك عرفتى عذاب المغنى
وطبلو المجدّع
شظايا التمنى
حروفو البتجزع
فى لحظة تجنى
خطاهو البتهرع
متين تطمئنى
****
مسرِّج خيالك .. حصانى القبيل
معربد غبارو
وخلّى الصهيل
مسافر .. مسافر .. وفاقِد دليل
أظنـِّك عرفتى..
هموم الرحيل
وهي كمان عارفه روحا....! لمن تقرأ دا ما أنا اللي كتب
|
Post: #2
Title: Re: (أظنك عرفتي) نص للشاعر والكوميدي / جمال حسن سعيد.
Author: سلمى الشيخ سلامة
Date: 02-05-2012, 12:28 PM
Parent: #1
محمد عثمان الجميل
يسعد ايامك
عندى علاقة خاصة بهذا النص
ربما كنت اول من سمعه من شاعره جمال
ايامها كنت اشتغل فى الاذاعة
العام 88
جاءنى فى الاذاعة عصرا
كان مبتسما كعادته وضاحكا ايضا كعادته
قال
ـ اسمعى عندك حاجة شغالة فيها ولا تجى معاى ؟
لم اتردد مشيت معه عبرنا الفاصل بين الاذاعة والتلفزيون
عبرنا المسرح حيث الكافتريا ، كنا نشاغب كل من التقانا فى السكة
خرجنا من المسرح اتجهنا الى حيث النيل
فى موقع اختاره مزارع ما ، كان لديه "عشة " صغيرة تجاوزناها وقعدنا على طرف النيل
قال
ـ عندى قصيدة جديدة ما قلتها لزول
كان جمال وازعم انه ما زال يحفظ قصائده عن ظهر قلب يكتبها فى ذاكرته ويحتفظ بها هناك طازجة
بدا يقرا فى هذه القصيدة
كنت مندهشة من التعبيرات الجديدة التى لم اسمعها من شاعر قبله
اعاد القراءة فوجدت انى حفظت بعض الابيات وانتشيت بها مرددة اياها
حين غادرت الى القاهرة وفى مرة كنت استمع لمصطفى رحمة الله عليه وجدته يغنى هذه القصيدة لاول مرة
قلت له
ـ القصيدة دى صحبتى ، وحكيت له ماصار من امرها يومذاك
شكرا يا محمد وليتك تلحقنا بهذه القصيدة مغناة بصوت مصطفى حبذا لوكانت بالعود
|
Post: #3
Title: Re: (أظنك عرفتي) نص للشاعر والكوميدي / جمال حسن سعيد.
Author: زهير عثمان حمد
Date: 02-05-2012, 12:59 PM
Parent: #2
أستاذتي وتاج رأسي سلمي متعك ربي بالعافية
تحياتي وأجلالي
طبعا حرقتي لي الكلام كلو المهم قالو أنت كان عندك رد علي النص دا منتهي الجمال والرقة ممكن يرد هنا لكي تكتمل الصورة بالله ما تكسلي أكتب الرد
ولك كل الود
*والشباب أنشالله ح يرفعوا النص مغناه بصوت الراحل مصطفي
بعدين محمد دا منو يا أستاذة أنا أبو الزهراء
|
Post: #4
Title: Re: (أظنك عرفتي) نص للشاعر والكوميدي / جمال حسن سعيد.
Author: سلمى الشيخ سلامة
Date: 02-05-2012, 01:14 PM
Parent: #3
| Quote: طبعا حرقتي لي الكلام كلو المهم قالو أنت كان عندك رد علي النص دا منتهي الجمال والرقة ممكن يرد هنا لكي تكتمل الصورة بالله ما تكسلي أكتب الرد |
الاخ العزيز زهير
تحياتى
ضاعت اوراقى كلها
للاسف
تلك التى كتبتها يومذاك
وليتنى كنت كصديقى جمال احفظ الشعر الذى اكتبه
لكن بحاول اتذكر ما كتبته
مع علمى التام بان ذاكرتى باتت "عجوزة"
مثل صاحبتها
تحياتى يا صديقى
|
|