Post: #1 Title: من أنواع التحايا الجديدة للشباب:إن شاء الله البلد رايقة ومليانة شوايقة Author: النذير حجازي Date: 02-03-2012, 02:24 PM
طبعاً أنا مهتم جداً بلغة الراندوك وكل ما يستجد من لغة الشباب في السودان، اليوم قابلني أحد الأصدقاء في الماسنجر بتاع الفيس بوك وقال لي: "إن شاء الله البلد رايقة ومليانة شوايقة" هاهاها أعجبتني هذه التحية الجديدة ووددتُ أن أشارككم بها وأهديها لأصحابي الشوايقة في المنبر: الشاعر عبد المنعم سيد أحمد نصار د. فاروق وعمدة الشوايقة في المنبر طارق جبريل
ولا عزاء لأصدقائي: عبد الواحد إبراهيم تراجي مصطفى وبشاشا
Post: #2 Title: Re: من أنواع التحايا الجديدة للشباب:إن شاء الله البلد رايقة ومليانة شو Author: النذير حجازي Date: 02-03-2012, 02:28 PM Parent: #1
ونسيت برضو أهديها لصديقي العزيز الكُرمبا كوستاوي
ولجميع من سقط اسمه سهواً من الشوايقة في هذا المنبر
Post: #3 Title: Re: من أنواع التحايا الجديدة للشباب:إن شاء الله البلد رايقة ومليانة شو Author: معاوية عبيد الصائم Date: 02-03-2012, 02:28 PM Parent: #1
انشاء الله بكدى ولاد عم الكابويات بخير ..
ازييييييييييك يا مواطن .. من وين ؟ اركويت وللا شنو ...زمن
ياخ عبد الواحد عايز ليهو اميل سريييييييييييييييييييع
مع تحيات السناجك
Post: #4 Title: Re: من أنواع التحايا الجديدة للشباب:إن شاء الله البلد رايقة ومليانة شو Author: النذير حجازي Date: 02-03-2012, 02:31 PM Parent: #3
حبيبنا عبيدوف سلامات يا فردة ومنور البوست فعلاً لازم البوست دا نرسلو لعبد الواحد سريع ونجيب ليهو سكتة قلبية هاهاها
تحياتي ليك يا ملك
Post: #5 Title: Re: من أنواع التحايا الجديدة للشباب:إن شاء الله البلد رايقة ومليانة شو Author: عبد المنعم سيد احمد Date: 02-03-2012, 03:02 PM Parent: #4
Post: #6 Title: Re: من أنواع التحايا الجديدة للشباب:إن شاء الله البلد رايقة ومليانة شو Author: عبد المنعم سيد احمد Date: 02-03-2012, 03:10 PM Parent: #5
الصديق الرائع النذير كيفنك ياخى دايرين نهدى اللحن الجميل والمعبر ده لى زول جميل مسمى نفسه المطرطش صديق من الزمن الجميل الا وهو محمد عبد الرحمن محمد من نواحى الولايات المتحدة الامريكية
Post: #7 Title: Re: من أنواع التحايا الجديدة للشباب:إن شاء الله البلد رايقة ومليانة شو Author: النذير حجازي Date: 02-03-2012, 04:58 PM Parent: #6
حبيبنا منعم، سلامات ومشتاقين
يازول أهدي طوالي، والمطرطش دا زولي
ودا الفيديو بتاعك:
Post: #8 Title: Re: من أنواع التحايا الجديدة للشباب:إن شاء الله البلد رايقة ومليانة شو Author: سلمى الشيخ سلامة Date: 02-03-2012, 07:05 PM Parent: #7
النذير الزول السمح ازيك كان البلد بقت مليانة شوايقة زى مصطفى سيد احمد ومحمد الحسن سالم حميد ومحمد جبارة ومحمد كرم الله ومحمد عبد الرحمن حبيبى المطرطش وكل الجميلين ما كان بتجيها عوجة تب "امانى ما بريد الشوايقة " امسك عندك جارتنا لعشرة اعوام فى الابيض العاجبة بت دار السلام وحات الله ما لقيت احلى واظرف وارقى منها هى وزوجها عم السر بلنجة امسك عندك خالتى مريم الشايقية انى امنت بالله من جمال هذه المراة واضيف خديجة والسر وعيالهم رغم اننا اتفارقنا قبل ما يزيد عن العشرين سنة لمن كنا فى السكة حديد لكن ما تزال اوصرنا معقودة بجمال الى يومنا هذا اريت كان كل الشوايقة القلتهم ديل كانوا فى السلطة ايمان رحمن حال البلد كان انعدل
Post: #9 Title: Re: من أنواع التحايا الجديدة للشباب:إن شاء الله البلد رايقة ومليانة شو Author: عبد المنعم سيد احمد Date: 02-04-2012, 00:59 AM Parent: #8
الشّوق من حاطِفْ .. لا قاطِفْ يتلمّ .. يهز ليك يا نوراي يا دَرَقة وسيفْ يا حُضناً كيفْ من شَرّ الصّيفْ والشتا ضاراي .. ضاراي يا شعلة عز بقّت جوّاي عدّت بي ضلام بحراً عاصِفْ يا نور قاعِدْ بِكْ .. قايم بِكْ شايلك مورودة ومتوكِّلْ يا نورا على الله .. علينا والفرج القرّب .. وحايم بِكْ يا بِت العرب النوبية يا بت النوبة العربية
بي فردة نخوة بجاوية أو شدر الصّحوة الزِّنجية دسيِّني من الزمن الفارغ .. من ريح المتعة الوكتية من شر السّاحِقْ والماحِقْ .. بين دَبَش المدن المدعية والليل يتحكّر بيناته كحّل بي دبشو عويناته يا شمس الناس المسبية روّحت اتنسّم أخبارِكْ .. لا تشفَقْ قالو لي نصيحي !!! وأنا عارفك ممكونة وصابرة .. لكن لي ناس إلاّ تصيحي جواي مأساتك مغروسة .. يا طفلة تفتش في باكر ما بينات نخلة وأبنوسة الجوع العطش الفَدْ واحدْ .. الفقر الضّارب زي سوسة الخوف والحالة المنحوسة يا بحر الحاصِلْ .. لاكْ ناشِفْ .. لا قلمي الفي إيدي عصا موسى
يا ام غلباً حار .. ينْبُرْ فينا .. ما عدّ صباح من ها .. الميناء كَدْ الكُدّاح شايلا سفينة النّاس عوجات .. تحرِسْ .. ترْجَا ترجعبو سلاح وأنوار زينة بمبان .. شوفونير .. آفات .. ويسكي .. للنّاس الدّمّنا بنزينا فِقَراً تسترزقْ من دينا بايركس إبريقن .. والموية .. تتحدّى بياض الوزّينة !!!
خرزات السبحة أمريكية .. خُصَل الموكيت إيطالية دفتر شيكاتاً ربوية .. في الجيب والسيرة النبوية جنب مصحف جوة البترينة تقروقتِك .. ديمة على القبلة .. ميهية إبريقِكْ بي طينا السِّبحة أصابعِكْ يا صالحة .. يا بت النَاس الصّالحين الذِّمَمْ المشرية الطّالحة ... شتّان بين دينِكْ وبين دينا شتّان بين يُحمد وحاج أحمد .. وقُدّاس ناس ياي وسلاطينا
شِلْناكي مع الخلِق النايحة على أرض فلسطين الفاتحة البركة في رملِكْ يا سيناء إرتج أسير الدعوات ما بين آمينك وآمينا
الشاعر حميد الفنان محمد النصري
بالله شوف الكلام السمح الليل حميد ده ودايرين نهديه لى زولة سمحة اسمها
س ا س
Post: #10 Title: Re: من أنواع التحايا الجديدة للشباب:إن شاء الله البلد رايقة ومليانة شو Author: طارق جبريل Date: 02-04-2012, 01:22 AM Parent: #9
احم احم
Post: #11 Title: Re: من أنواع التحايا الجديدة للشباب:إن شاء الله البلد رايقة ومليانة شو Author: محمد عبد الماجد الصايم Date: 02-04-2012, 07:40 AM Parent: #10
غايتو دي تفرقة عنصرية منكم ساي!!
Post: #12 Title: Re: من أنواع التحايا الجديدة للشباب:إن شاء الله البلد رايقة ومليانة شو Author: النذير حجازي Date: 02-05-2012, 02:29 PM Parent: #11
الأعزاء:
أستاذتنا سملى الشيخ سلامة: لا فض فوك يا عزيزتي، ومنورة البوست تعرفي يا سلمى الشوايقة ديل بتميزوا بلهجتهم الحنينة ولذا مكنتهم لأن يكون لهم نصيب الأسد في الشعر والفن، فمعظم شعراء السودان شوايقة.
العمدة ود جبريل: أحم ساي يا زول يا سمح؟! منور البوست
ود الصائم: يا ود الصائم ما ترمي الكلام الكُبار كُبار دا كدا ساي زي الدُراب، ممكن تخت أصبعك في أي موضع نحن تعنصرنا في هذا البوست؟!
