فريقنا القومي..... بين حاجه ستنا بت الطاهر.....ومستشفى التيجاني الماحي

الاعزاء
في الكوه لمن الزمن خير الحاجه ستنا عليا شابيب الرحمه جات ماشه جمب شجرة الجرابنه وكان معظم فريق العاصفه قاعدين في الضل بصلحوا في كداراتهم قبل مباراتهم مع الأشبال فريق الكروماب .قامت سلمت عليهم ووقفت شويهماكلهم أولاد الحي وأولادها كلهم لعبو في العاصفه وقالت ليهم ( بركة راجل الدرب منصورين الليله) قام فتح الرحمن البرتو قال ليها ( شيلي لينا الفاتحه ياحاجه ستنا) وقفت الحاجه وعاينت ليهو وقالت ليهو( الفاتحه بشيلها ليكم لكن زولكم البتراجف ده .............البثبت ليهو قلبو شنو) رغم إنو حاجه ستنا ما عندها شهاده في التدريب وماعارفه الزول الرجافه ده في الكوره إسمه كبكبه وياما ضرانا ونجضنا بي كبكبتو دي.
الأعزاء
العالم ي كله يعلم إن إعداد أي فريق أصبح مهمه علميه يقوم بها فريق من الأخصائيين إلا نحن.
كلنا نلاحظ أزمة التهيب والقلق وعدم الثقه في النفس في فرقنا المحليه وفريقنا القومي؟
كلنا يلاحظ أعراض عدم الثقه في النفس؟
كلنا يرى مشاعر الإحباط المسيطر عندما نكون مهزومين وإفتقادنا لروح القتال لآخر لحظه؟
كلنا يلاحظ سيادة أحاسيس الإستسلام والقبول بالهزيمه؟
كلنا يلاحظ أحاسيس التهيب من بعض الأسماء وبعض الدول مما يقود كثيرا لشلل في التفكير والأداء
هل دي محتاجه لذكاء إننا محناجين لوحدة طب نفسي متكامله مسئوله من الفريق مكونه من استشاري نفسيه ومعالج وباحث اجتماعي,
صديقي بيحكي عن اللاعب المشهور..............الذي يعاني من الخوف من ركوب الطيارات سافروا عشانو للفكي.................لمدة 3ساعات بالعربيه ومستشفى التيجاني الماحي منهم 5 دقايق بالكرعين
وطبعا ما اتعالج رغم سهولة المرض وسهولة علاجه (الحمدلله اللاعب ماسافر معاهم لأنو الفكي قال ليهم فاتحتو واصله مافي داعي يجيبو اللاعب معاهم)
لكن
هل في شئ في بلدنا بيمشي بي طريقه علميه؟
وهل في زول بيسمع حكمة حاجه ستنا ليها الرحمه الما دخلن المدرسه ولافكت الخظ لكن عاشت تنشر الحكمه والموده لأهلتا في الكوه لهل الرحمه ولفريقنا القومي الستره (الحالو مابيسر) ولكم الود

مجدي إسحق سلامات

نتكلم عن منو ؟ ولا عن شنو ؟ فريقنا القومى ( الإسم الحديث منتخبنا الوطنى) ولا حاجة ستنا بت الطاهر و حكمتها في مايختص بالرجافة و الرجفيبة ولا مستشفى التيجانى الماحى ؟؟

التلاتة مرة واحدة كدة صعبة شوية .. لكن مايربط بين الثلاثة مواضيع هو الخوف وعدم الثقة بالنفس .. بالمناسبة هل الخوف والرجفى يعتبر مرض نفسي ؟؟

الثقة بالتفس .. ذلكم هو مربط الفرس .. وهى خاصية مرتبطة بتكوين الشخصية .فردية كانت أو إعتبارية ! هل هي خاصية موروثة أم نكتسبها بالتجربة والممارسة وقبل ذلك بالرؤية والفكرة..

أما مستشفى التيجانى الماحى ، فلا تزال النظرة له هى أنه بتاع المجانين والناس البفلقو بالحجار .. فبل فترة زرت الشاعر عاصم الحزين وكان نزيل مصحة التيجانى الماحى مستشفيا من الإدمان ووجدت معه رهط من الناس تناولوا بالبحث و النقاش مفاهيم الأمراض النفسية كأمراض تصيب الإنسان شأنها شأن الأمراض العضوية . ولكن أكثر الناس لايعلمون أن بهم علل نفسية ..

فكرة إحتياج الفريق القومى لوحدة علاج نفسي كاملة فكرة ذكية ، ففعلا منتخبنا ضعيف الثقة في النفس وهذه صفة لازمته وفرقنا المحلية ردحا من الزمان .. ولكن ذلك تعبير عن الحالة العامة الملازمة لوطننا من فقدان الثقة بالنفس والإنهزام والإنكسار و ربما " التدجين" .. ربما أقترح عليك توسيع الموضوع ليشمل دراسة الإحتياج لمثل هذه الوحدات العلاجية النفسية للسودان برمته ، حكومة و مؤسسات سياسية ومنظمات مدنية و مواطنين ..

خالد

الغزيز خالد التوم
أنا لسع زول فريقنا القومي وناس علي قاقارين وسانتو وبيني بينك إسم الوطني بقى يعمل حساسيه ( ياربي ده من منو ومن شنو......................ماتجيب لينا الهوا ساكت)
الكبكبه والخوف هي نوع من أنواع( Performance Anxiety) وهي عندها جذورها الوراثيه والإجتمايه والفكريه ممكن تكون تظهر في مواقف محدوده أوتكون مستمره وبتصبح مرضيه وكلها ممكن تتعالج لكن المهم هو الوقايه أو تعلم وسائل تساعد الأسترخاء أو تجاوز حالات القلق والسيطره عليها قبل حدوثها.
قد يصل القلق مرحلة القلق الحادPanic attack ودي عادة بتحصل قبل المباريات الهامه مع إزدياد الضعط النفسي ويصبح دور الطبيب مساعدة اللاعب لتجاوزها وتقييم صلاحية اللاعب للمباره وأذكر أشهر حاله وهي عندما أصيب رونالدو بها قبل مباراة فرنسا في نهائي كاس العالم وقرر الطبيب النفسي عندما صلاحيته للمباراه.
ونجئ راجعين تاني للثقه في النفس
لك الود

Quote: هل في شئ في بلدنا بيمشي بي طريقه علميه؟

العزيز خالد
الثقه بالنفس بإمكنياتك
الثقه في إمكانيات زملائك
دي كلها حاجات بتتبني
وبتتعالج
لكن مع ناس (عندنا شيخ كارب في المقينيص الكوره كان عاوز يدسها منهم و الواحد الفون فاضي يشوت الهوا) في طريقة حلول علميه
لك الود

لفوق لأجل فريق مجهز بطريقه عتميه يشرفنا ويخلينا نفرح يوم..................................كبرنا على المغايص