فضوها سيرة إلى حين ..

أقصد شكل وكواريك الجماعة بتوع السياسة العاملين لينا بيها غاغة في المنبر الأيامات دي..
المقام مقام الكورة السودانية المالية الدنيا وشاغلة الناس في كل فج عميق ..
إصطفوا شوية خلف صقور الجديان لغاية ما تنتهى مهمتو الأفريقية وبعدين تعالوا واصلوا
الزيطة والزمبريطة الفالقننا بيها دي إن شاء الله بعد كدا ما يفرزوكم إلا بالسنون ..
يستثني من هذا الأدباء والمبدعين على سبيل المثال لا الحصر تاج السر الملك وعبدالإله
زمراوي إلى جانب دكين الذي عرفته أخيرا .
يتبع .....

الباقين غير الأدباء والمبدعين والكورنجية
اخدوا ليكم انجمامة شوية وأقضوا أوقات فراغكم في حاجات مفيدة
إن شاء الله تمشوا تصطادوا سمك أو تحاحوا الطير في النواحى البعيدة.
يتبع ..

في باتا صقور الجديان يا حلاتا ..
الفرصة مواتية لصقور الجديان لتأكيد الجدارة بالإنجاز التاريخي الذي تحقق حتي الآن
بعد ترقي المنتخب إلى ربع نهائي أمم أفريقيا لكرة القدم بمتابعة التفوق والمضي
قدما في المشوار الأفريقي الكبيرة عندما يلتقي زامبيا عشية السبت في باتا.
ومثلما نجح المدرب القدير محمد عبدالله مازدا في إخراس ألسن الهتيفة والمنظرين
والمدعين وأصحاب الأجندة السوداء وهو يقود الصقور إلى ربع النهائي فهو قادر
بمساعدة أبنائه الذين يعرفون قدره على إرداف هذا الإنتصار المؤزر بانجاز آخر
بالوصول إلى نصف النهائي ليجذب مزيدا من الأضواء والفلاشات إلى هذا المنتخب العريق
الذي قفز فوق حاجز المستحيل متجاوزا العقبات والعثرات من لكل لون وصنف ليحجز له
مكانا مرموقا بين كبار أفريقيا مستشرقا فجرا جديدا ومستقبلا وضاءا موسوم بالوعد
والتمنيات .
يتبع .....

أثني .. بل أطلب رفع البوست عالياً
فوق من أجل السودان

مشكور يا طلحة

Quote: في باتا صقور الجديان يا حلاتا ..

ماعارف ليه !! لكن المانشيت اعلاه زكرنى كتابة الرشيد على عمر

ياطلحة اصواتنا معك فليصمتوا الى حين
وكلنا خلف المنتخب حتى يتحقق الانجاز

كما كانت الدعوات من قبل للتضامن مع مناسبات كتيرة (بيت الفنون مثالاً) بفتح بوستات دعم ومساندة مخصصة
ادعو ان يكون يومى الجمعة والسبت مخصصين لبوستات دعم ومساندة المنتخب واظن هذا اضعف الايمان
فالكورنجية على قولك ياطلحة والمهتمين والحادبين كتار بالحيل وبامكانهم حجب بوستات الزيطة والزمبريطة بجرة كيبورت ...

كما نرجو من بكرى تعليق هذا البوست فى اعلى الاعالى اسوة ببوست ود البشرى للاهمية القصوى
وياريت لو اتغير العنوان ليصرح بالمضمون (خلف المنتخب )

وسلمت يا خبير

يتبع....

المراقب لاحوال هذا المنبر ..
لن يندهش أبدا مجيء هذا اليوم الذى يقول فيه الكورنجيه لاهل السياسة أن يسكتوا !!!!!!!

تحياتي يا أمين مبارك ومشكور على الدعم

أحمد الأمين ادريس عوافي يا زول وتقديري لدعمك وربنا يوفق الصقور ويعينها على
التحليق في نصف النهائي .. تغيير العنوان بيد الباشمهندس وأتمني أن يغيره حسب
طلبك أما رفعه عاليا فهو بيد كل حادب غيور ومحب لشعار الوطن .

الحبيب ود المشرف لك وللمراقب لأحوال المنبر التحية والاحترام وشكرا لرفع البوست .. هههههه

يااا كمين .. المنظر شنو الليلة بالمختصر كـدا؟

والله ودو كماين البوست دا لي ساعة أفتش فيهو فشنو.. مشكور لتقليعو
بالنسبة لى دا

Quote: المنظر شنو الليلة بالمختصر كـدا؟

إن فازوا فحباب الاعجاز المنتظر وإن خسروا فوالله ما قصروا يديهم العافية

يا طلحة ورينا النتيجة ياخ

ما جاتني اي اشارة من المصدر

قسطنطين تاثر بتوقف النشاط الرياضي

اخاف بشدة على منتخبنا من ربع الساعة الأولي ومن الزمن الأضافي اذا حدث

فيما عدا ذلك منتصرين بأذن الله ......

يا عمكـ
أنا جيت من الصباح قلت أشوف كمين نظريتو شنو!
فااااا .. ما تقعد تنظر فينا .. أدينا النجيضة يا قول لي رافض!!

يا خليل الرؤية ضبابية ياخ ..

يا جنابو عمر يمكن للمنتخب أن يتخطى الربع ساعة الأولي ويمضي على خير نسق لدرجة
نتعشم معها في فوزو ولكن فجأة يدخل هدف في شباكو فيحدث الانهيار .. دي المشكلة الخايف منها أنا.

يا ودو كماين إعتبرني من الروافض ياخ ..

معناها مرشوشين رش العدس!!

يا ودو المباراة صعبة ولكن هذا لا يعني أنو منتخبنا ح يطلع منها
مرشوش رش العدس ..