شبهتِك؟
انتى شبهِك وين ؟
ما اظن شبه ليكى
بكون موجود
مااظن منو خلقو اتنين
شبهتك ؟
طعم الضحكة فى العينين
سحر الدنيا فى البسمه
ورود الجنة فى الخدين
حلاوة اللفتة زى نسمه
تنعش مهجة السامعين
شبهتك ؟
طيب نقول بى شنو ؟
نقول بى منو ؟
وعارفين ما بكون شبه زيك
نقول بالنور ؟
وشايفين الشمس اصلا
نزلت جاريه لى حيّك
تضوى الدنيا بى نورا
تشيل وهج السماح منك
ممكن نقول زى الحديقة ؟
طبعا برضو ما ممكن
عشان ورد الأرض كلو
من ياسمينو لى فلو
بشيل عطرو
من رباكى
من عوالمها الأنيقة
وبخت سرو
فى بهاكى
ويتزود يشيل طلو
ونحن معاهو نتزود
يا خيال فات الحدود
يا جمال كل الحقيقة
يا مصابيح الوجود
شبهتك ؟
طيب نقول بالعيد؟
نفتش فى مباهج الناس
فرح اطفال
لمة ريد
زفاف زولين
هنا و ايناس
غنا وشبال
وسترة حال
نقول عيدين
تلاتة اعياد
كلها ماخده من ذاتك
معانى الفرحة والاحساس
شبهتك ؟
يمين مافيش شبه ليكى
ولا فى الكون
حاجة قريبه من روحك
تشبه فتنة السحر السكن فيكى
تقول خلقوكى بس عينه
وقالو ليكى اتمنى
وابقى زى ما دايره
بس كونى
عليك الله
وعليك الخلقك استنى
خلينى بس افتح عيونى
ودسى مننا كون عينيكى
شبهتك ؟