توصيل كيس طلح من مطار الخرطوم الى جدة = يساوي السجن

طلب مواطن سوداني من مواطن سوداني اخر في طريقة الى مقر عمله بالسعودية
ان يقوم بتوصيل كيس طلح لشخص سيكون بإنتظاره في المطار ...
وكانت المفاجاءة ان تم القبض علي المواطن حامل كيس الطلح في المطار
لوجود حبوب مخدرة داخل اخشاب الطلح بعد تجويف قطع الطلح من الداخل


انا ما عاوز اناقش تفاصيل القضية .. بس فكرتا انو تعميم الخبر يمكن يخلينا نكون
حذرين في التعامل مع هكذا وصايا او طلبات .. مع العلم ما زال الشاب السوداني
رهن الاعتقال في هذه القضية كما تم القبض علي الشخص المرسل له كيس الطلح
اتمنى ان تقود التحقيقات الى براءة الشاب السوداني من هذه القضية في اسرع وقت


اتمنى ان تقود التحقيقات الى براءة الشاب السوداني من هذه القضية في اسرع وقت

والله الشاب ده طيب وبس
في اي مطار مكتوب تحزير بان لاتحمل معك اشياء لاتخصك
كيس الطلح بدل حفرة الدخان ودهو حفره ما فيها شمله ولانطع
معتصم تحياتي

يا هجو تحايا وود

نحنا مرات عندنا طيبة تودر عديل كده
هسه خلاص يعني الطلح ده مهم شديد

الاخ معتصم سلامات

و بي كده حتنعدم المروءة في الناس

تحياتي

الاخ عمر
سلام
هي لسه حتنعدم زمااان انعدمت

ده طلح لو كان شاف كان حيحصل شنو؟هسع لو اختنا المسكين ادخنت كان حيحصل ليها شنو؟

معتصم

الكيس ده بودي للسياف علي طول مش السجن

الله مع المسكين

ولابد ان يتم القبض علي المرسل والمرسل اليه

الاعزاء محمد الامين والسيدح شكرا علي المرور

المعلومة تم القبض علي المرسل اليــه مما يقوي من موقف اخونا حامل الوصية
ونتمنى أن يساهم ذلك في خروجــه من هذه الورطة الكبيرة ...

عزيزي معتصم

سلام

الضحايا كتار من جراء هذه العمليات القذرة ، فمن الغباء أن أحمل لأحد شئ وأنا لا أعرفه وحتى الذين أعرفهم أتاكد من محتوى الارسالية ، ومن المؤسف أن يتورط برئ في عمليات لا ناقة له فيها ولا جمل ، بس بيني وبينك هل يعقل لرجل أن يحمل طلحا، يا دوب الواحد يشيل لمرته بس .

والمشكلة يا معتصم البراءة صعبة حتى لو تم القبض على الطرف الآخر لأن الجهات الرسمية دائماً تشكك في مثل هذه الروايات إعتقاداَ منهم أنهم شبكة عصابة ، ربنا يهون على البرئ ويخفف عليهو ويظهر براءته .

على المسافرين توخي الحذر من حمل أشياء تخص الغير ولا سيما الذين لا يعرفهم والذين يعرفهم أن يتأكد من المحتوى قبل أن يحملها .

وقد حدث معي مرة وأنا في مطار الخرطوم حيث كنت قادم للمملكة للمرة الأولى أن جاء شاب وأنا أهم بالدخول في الصالة، طلب مني أن أوصل كرتونة قال بها فواكه وذكر لي بأن المستلم سيقابلني في مطار جدة ، وطلبت منه أن يتوكل على الله ويشوف غيري ، ولم أعطه أي وجه وكان ذلك بكل صرامة .

نسأل الله أن يحفظ الأبرياء من شرور الفاسقين .

ده ياهو ( الهـــبيــل ) زاتــــــــو ....

-
-
-
-
-

________________
الهبيل ده نوع من انواع الطلح
سمعت بالاسم ده مؤخرا" فى السودان

تحياتي وتقديري معتصم ..

بالفعل تكررت مثل هذه العمليات كثيرا خلال الفترة الماضية واظن ان هذا الحادث الثاني بعد الذي رواه زميلنا عصام دهب قبل عدة شهور وهو الذي تعلمت منه الا احمل لاي انسان اي شئ وكنت قبلها بكل اريحية احمل اي وصية او طرد ياتيني به احد في المطار خصوصا وان وزني دائما ما يكون صفرا ولا احمل سوى شنطة في يدي نكاية في شركات الطيران ولكن منذ رواية زميلنا عصام دهب توقفت .
سافرت الى الامارات قبل ايام وفي صالة المعادرة اتاني احدهم بظرف يطلب توصيله الى دبي والح علي واكد لي ان الظرف به شهادة وان مستقبل الشخص الموجود هناك متوقف على هذه الشهادة ولابد ان تصله صباح الغد وفتح لي الظرف وتأكدت من الشهادة واخذت رقم هاتف الشخص ووضعتها في الشنطة وصباح اليوم التالي وحرصا مني على مستقبل ذلك الشخص ورغم ارهاق السفر الا انني صحوت باكرا واول ما فعلته اتصلت عليه .. لم يرد الا بعد ثلاثة اتصالات وكان يغط في نوم عميق ورد علي بسخافة شديدة باعتبار ان الوقت مبكرا ورغم انني قلت له انني احمل لك الشهادة الا انه رد علي بكل برود ياخي لو عندك غشوة علي فريج مرر جيبا معاك .. فقلت له لا .. قال لي خلاص انا احتمال اجيك العصر ولو ما جيتك بجيك بكرة .. المهم بعد نقة فااارغة اخبرته بان شهادتخ في استقبال الفندق واعطيته رقم الفندق . والقصص مثلها كثيرا ..
انصحكم .. شهادات ذاتا ما تشيلوها ..

Quote: انصحكم .. شهادات ذاتا ما تشيلوها ..

دى النجيضة ذاتها يا معتصم

يا ود الجمام ياخي عنوانك خلعنا
قايلين الطلح منعوه كنا طوالي حا نقوم نعمل مظاهرة

الاعزاء

ولياب ... نتمنى لهذا الشاب الخروج من هذه المصيبة برغم انو قصر في حق نفسو
وتعامل بطيبة مع شخص لا ضمير له ...
عبد الدائم ... كيف احوالك واعمل حسابك من الطلح ..
معتصم .. كيف احوالك .. ظاهرة اخرى في مطارات الخليج شباب سودانين
اي واحد مالي جيبو موبايلات وممكن يدي طيارة كاملة اي راكب
موبايل .. كلنا ممكن تمرا بين ظروف نكون عاوزين نوصل
توكيل مثلا لمتابعة امر مهم في السودان لكن يجب ان اتعامل
مع من تكرم واخذ وصيتي بشي من الاحترام .. داير الجد بقينا
نعاني من ظاهرة قلة الذوق
احمد التيجاني ... الشهادات دي ممكن تكون مشفرة ورسائل سرية ولا شنو ؟؟

ود جبريل ...... بس انت جاري لمظاهرات الطلح دي .. يا زول الراجل ده ممكن
تولاتو دي تروح بسبب كيس الطلح ده

لكم شكري وامنياتي ان تنفك كربة هذا الشاب

Quote: هسه خلاص يعني الطلح ده مهم شديد

لا هو من ناحية مهم..فهو مهم شديد..

يعني يا معتصم..ممكن الفول بدون جبنة...بدون زيت..لكن بدون ملح دي صعبة شوية..

ولا رايك شنو؟؟

هو صحي ..الفول زاتو لزومو شنو يعني؟؟

ما الناس ممكن تاكل سندوتشات أي حاجة.. http://www.sudaneseonline.com/db/attention/200_4e.gif

هسي يجوك السواقين المتهورين ناس ود الصايم وخدر على سواقتي المشاترة دي..

البوست دا تلقاهو واحد من اتنين : يا بقى من كم صفحة.. يا ما تلقاهو بأي سيرش إنجين..

تحياتي..وربنا يجيب العواقب سليمة...

..

طيبتنا دي ممكن تنفعنا في السودان وممكن يتفهموها في بلدنا
لكن والله خارج بلدنا بس يقول ليك القانون لا يحمي المغفلين

سمعت قصة امرأة سودانية في التسعينات كانت مسافرة من زوجها في باكستان
لزيارة والديها في السعودية أو العكس وبصحبتها ابنتها الرضيعة
المهم سوداني في مطار اسلام اباد اداها كيس توصله وقال ليها حيلاقيك واحد في مطار جدة
المرأة بطيبة خاطر شالت الكيس وقبضوها في مطار جدة عشان الكيس فيهو مخدرات
طبعا مالقوا المرسل اليه وحكموا عليها بالاعدام
يوم تنفيذ الحكم قالت ليهم بس خلوني ارضع بنتي لآخر مرة
خلوها تنفرد ببنتها عشان ترضعها والمسألة طالت لمن فتحوا باب الزنزانة
وجدوا أن الله قد قبض روحها هي وبنتها
وكأنه أراد أن بطهر براءتهت وللبنت ألا تشقى بعد أمها

ألأخ/معتصم السلام عليكم.

ربنا يفك كربته.وزى ماقلت نحن ناس طيبين..شيل الطلح للرجال شنو لغير أسرته. ما اعتقد فى مبرر.

وده لو كان شاف كان عين الزول ده ما حتشوف إلا النور.


مره واحد فى المطار قال لى لوسمحت عندى دواء قلت:ليهو ابشر دواء ده أخلف ليهو جزء من عفشى

جيت لقيت الدواء كرتونة متوسطة قلت ليهو ده كلو دواء قال لى نعم..قلت ليهو أفتحو!!!تانى ما شفتو فى الصالة ولا جاء بالقرب منى.

يا معتصم البوست ده مفيد جداً جداً وحقو نحن نعى مثل هذه ألأشياء حتى لا نقع فى مالا يحمد عقباه.

إحترامى وتقديرى.

الأخ معتصم
الأخوة المتداخلون
سلام

أضيف علي ذلك تحويل مبالغ مالية من حساب شخص إلي الأخر بدون معرفة شخصية
وبدون معرفة نشاطه إن وجد .. مما يعرض الطرف الأول للمشاكل والدنيا ما معروفة.

بوست توعوي .. لاننا ناس طيبين وعلي نياتنا

اللهم فك كربت أخونا و أعطيه علي حسب نيته الطيبه
اللهم آميين

مع التحية للجمع الكريم

ربما عملتنا مشاكل ومتاعب الغير أن نتجنب حمل أغراض الذين لا نعرفهم وحتى الذين نعرفهم يجب علينا أن نتأكد من ما نحمله ، ولكن أذكر نفسي وأذكركم بان تنصحوا زوجاتكم وابناءكم أن يتجنبوا توصيل أغراض لا تخصهم ولا يفوتني أن اذكر (والديكم واهاليكم وخاصة الذين يتأون زيارة للمملكة)

جنب الله الجميع شرور المفسدين !!!

شكرا لكل المرور

الفكرة من البوست فعلا التوعية بخطورة مثل هذه المواقف
ولكم مودتي

شخص اعرفه قادم الى كندا سلموا له بعض الاشياء لتسليمها لشخص اخر وتسلمها بطيبةسودانية ولكن عندما جاء لكندا ملء فورم كاى قادم يقول فيه بانه لايحمل اشياء ممنوعة او مهربة وامر ضابط الجمارك بتفتيش امتعته فوجدوا فيها ذهب وانكر اخونا علمه بوجود الذهب فقال له الضابط يمكننا الان فتح دعوة تهريب ضدك وبعد جدل ستر الله وسامحوه فكادت طيبته ان تعكر كيانه فى كندا نصيحتى لكم جميعا لا تتعاملوا بالطيبة حتى من المعارف
الله فرجينى

والله للأسف نحن السودانيين ديل بنتعامل بسذاجه في الامور دي
يعني عادي نحن ماشين السودان أو راجعين بنلاقي ناس في المطار بدوك حاجات توصلها
والله ما حصل يوم سألته زول عن الحاجه دي شنو ...
اخر مره في مطار الشارقه لاقتني واحده واصرت علي اشيل ليها موبايلات
شلتهم وفوجئت في مطار الخرطوم انه نحن اربعه افراد شايلين ليها نفس الموبايلات
والله بهدلونه لا ايدنا لا كراعنا ههههه
ومن يومها حلفته ما أشيل لي حاجه لي زول

بس الحمد لله البقت على الموبايلات

سلام يا معتصم
نسأل الله أن يفك كربته. للاسف زي ما قالوا الناس الحاجات دي بتقتل المروءة لكن للأسف ما في حل غير الحذر. حدثت لي قصة قبل كم سنة جاني واحد في مطار الخرطوم و أنا مغادر و قال لي أوصل شهادات لزول في الدوحة قلت ليه بكل سرور لكن المشكلة إني حأنزل في الدوحة لمدة تلاتة أيام بس و حأكون مشغول جدا و حيكون دا تكليف إضافي للناس النازل معاهم و لأسباب خاصة في اليومين الأوائل على الأقل ما حأقدر حتى أنتبه لموضوعه دا. الراجل أصر و قال لي مافي مشكلة وقت تفضى اتصلوا بالتلفون الفي الظرف و الراجل حيجي يستلم منكم الشهادات. المهم شلتها و أديته رقم تلفوني في كندا و اسمي و في الدوحة بعد يومين اتصلنا بالراجل و كان زول مهذب جدا استلم الشهادات و شكرنا. لمن وصلنا كندا براجع في الرسايل في التلفون ألقى واحدة مخلية رسالة بتقول فيها ياخي نحن الناس الأدوك شهادات في المطار لينا يومين... ما وصلتها و هسع بنضرب ليك ما بترد وصل الشهادات دي يوصلك البلا اليخمك... تصور دا الشكر التلقاه دعوة بإنه البلا يخمك! غايته الزول يكون حذر لكن برضه الواحد يراعي الظروف لو دوا ولا حاجة ما يفوت الفرصة لخدمة الناس.

شكرا لكم جميعا ...