السوداني تجمل وجه جمال!!!!!

انتو يا ناس السوداني بتضحكوا على منو؟

ولمن نقول ( السوداني) مؤكد بيكون جمال المقصود هو رئيس مجلس ادارتها جمال الوالي

معقوله تحاولوا تغشوا الناس بالطريقه دي

مانشيت تالت في الصفحه الاولى
الحضري الى جمهور المريخ : اني اعتذر

بالله؟

ده على منو يا ناس السوداني

والخبر بالصفحه الاولى وليهو كمان تمامه بالصفحه التانيه
لكن برضو ما بتتبلع
قال شنو في الخبر
المريخ يكسب حقه الادبي من حارس الفراعنه وسبعمائه الف دولار قيمه صفقه الانتقال
بس قبل ما امشي قدام داير اذكر القارئ الغشيم في نظر السوداني ان الغرامه بتاعت الحضري براها كانت اكبر من المبلغ ده اها بعد كده نخش على محاوله تجميل وجه جمال
الجريده عايزها تقنعنا ان المريخ اخد حقو من الحضري
ونحن عارفين ان الحضري اتفق مع الاتحاد السكندري اولا وقبض حقو وبعد كده جاء يشوف السودانيين المساكين ديل
قام شنو طلع بيان في موقعه الرسمي ما فيهو سيره انو قبض قروشو على داير المليم من المريخ وفيهو اعتذار خجول شديد



كده وقت الصلاه ضايقني
جمعه مباركه للكل وبنرجع انشاء الله للمسخره دي كان ربنا هون

يا ضياء الدين بلال عملتوها ظاهره

كان تخلوا الشغل ده لناس كسير التلج في السوبر والزعيم والصدى والمريخ
ده شغلهم وما بيخجلوا منه ومافي زول بلومهم
لانو اكل العيش حار

لكن انتو عندنا اكبر من كده ياخي

معقوله بس
عايزين تغشونا
نحن المتابعينا القصه دي من طق طق لسلام عليكم

وين الفيفا ووين الملايين والشعب العربي وين

لكن للامانه والتاريخ
صوره السيد جمال المنشوره مع الخبر وهو يبتسم ابتسامه عريضه كانت معبره تماما


واضح الزول بيضحك
ما داير ليها ذكاء
ضحكته ظاهرها
لكن بيضحك على منو؟
ده السؤال
اظنه بيضحك على الجمهور البسيط المسكين

ما يهمنا هنا ان نقول ان الحضري نجح في هزيمه السودان كله ممثل في الوالي ومجلسه الكومبارس سته صفر
رجع مصر كما صرح من كم شهر
ادفعت غرامته
قبض كميه ما معروف عددها من الدولارات السائبه
شتم السودان وعيره بعدم وجود تعليم فيهو
شتم المريخ ورئيسه وقال ما كان يحلم يتصور جنبي
شتم لاعبي المريخ ووصفهم بقليلي الطموح
قال ما قبض مرتب من عشره شهور
وفي الاخر قال
انسوا بس
معاكم الكاميرا الخفيه
ومشي قبض من الاتحاد السكندري دولارات
وبكره راح يوقع ليهو

وبرضو تقول لي الحق الادبي

يسالني الله لو كان بيلعب في فريق حلتنا في البلد

كان عمدتنا عبدالرحيم ود حمد
وقفوا بالفيفا مدي الحياه
ده طبعا بعد ما يكون لحقوا بالبصطونه كم شحطه ومحطه

جمال الوالي مشهود له بالتهذيب والإحترام
ولكن تبقى مسالة ثراءه واحدة من الأسئلة الكبيرة
عموماً نقول أن الفضل بيد الله يؤتيه من يشاء

احمد موسي
ربنا يزيدو كمان وكمان

بس كمان ما بيقدر يضحك هو وبقيه جوقته على عقولنا
الحضري في القضيه دي هزمهم بالقضيه
طبق فيهم اي نظريه ممكن تطبق في الدنيا دي

لعب بيهم زي الشفع
لعب شنو

قول ضقل بيهم

واليغيط في الموضوع يقول ليك شلنا حقنا الادبي

لا بالله

أخي فدياس
تحياتي

جمال قضى غرضه من استقدام الحضري وهو الدعاية الإعلامية لناديه في الميديا المصرية القوية
والمنتشرة جداً...والحضري كمان استفاد الفايدة الكبيرة ولهط الفيها النصيب

ورزق ال........ على ال...............

بس زي ما قلت كمان مافي داعي الوالي والسوداني يلعبوا علينا

جدو
سلامي واحترامي

بكل اسف فدعايه جمال لنفسه ولناديه ممكن نقول عليها دعايه سلبيه اظهرتنا كسودانيبن اننا ما بنعرف الف باء الاحتراف وانو زول فاشل وخريج صنايع ممكن يلعب بينا

ياريت لو زول يجيب لينا الفيديو النزلها محمد خليل بتاع احمد شوبير والحضري وهما يتلاعبان بجمال الوالي

العزيز فدياس صباح الخير والبركات

ولضيفوك الكرام التحية والتقدير ..

واسف لاني ما شفت البوست بتاعك ده قبلما افتح لي بوست بغادي..

والله يا فدياس البعمل فيهو جمال الوالي وزمرته ده حيرنا..


نخلي زوارك الكرام مع فيديو الاعتذار وبعد داك الحكم لهم..

نن

محمد
الله يصبحك بالخير
لا ضير في ان يسير البوستان متجاوران فهناك الفيديو يوضح للناس حقيقه ما جري
وهنا نفضح السوداني ونعزز ذلك بايراد الفيديو
شكرا لسرعه الاستجابه

طبعا يا جماعه كتابنا الكبار ضياء الدين بلال رئيس تحرير السوداني والطاهر ساتي وحسين ملاسي ملوك الصفحه الاخيره بالصحيفه اعضاء معانا هنا
وربما واحد من الثلاث قد مر من هنا وما مطلوب نهائي منهم التعليق او الرد لانو ما ممكن يسيبوا شغلهم ويقعدوا يردوا على انتقادات القراء
لكن المطلوب ان تصلهم رسالتي وفحواها لو فدياس المفعوص ده شاف في شغلكم ده كسير تلج ولوي لعنق الحقيقه
باقي القراء من دكاتره ومهندسين وصيادله واساتذه جامعيين واعلاميين وشعب مثقف لحدي عم حمد النجار الممكن يناقشك في السياسه الخارجيه للاتحاد الاوربي
ديل ممكن يقولوا عليكم شنو؟

انتبهو يا ساده فالحكمه تقول
الوصول للقمه سهل
لكن البقاء عليها هو الصعب

كنت قد ذكرت في هذا البوست ان محاوله اظهار السيد جمال الوالي بالمنتصر في هذه القضيه كان سيكون مقبولا عندي لو جاء من صحف المريخ كالصدي والزعيم والسوبر
لكني كنت مخطئا في هذا الاعتقاد فاليوم وفي عاموده في صحيفه الزعيم كتب احمد محمد احمد الشهير باحمد ما بنطير برانا كلمات رافضا هذه الصفقه مذكرا بان الانديه المصريه لا يمكن ان تدفع سبعمائه الف دولار للتعاقد مع الحضري ونادي الاتحاد معلوم بانه يمر بازمه ماليه
ثم عرج على لقاء شوبير والحضري والوالي منبها لسخريه الحضري وشوبير عندما استجدي شوبير الحضري بان يعترف بانه قبض فلوس عشان يلمو الموضوع وخلاص فرد الحضري اذ كان كده فانا استلمت فلوس وكمان استلمت حافز بطوله الدوري
وشدد الكاتب احمد محمد احمد ان هذا استهتار وتصرف مرفوض جمله وتفصيلا
وبدوري اثمن هذا الموقف الشجاع من الكاتب واشد على يده

ومزمل قال شنو يا فدياس

ودالبشري
تصدق مزمل موقفه كان اشجع من ناس السوداني ديل ورفض الاعتذار التلفزيوني الهزيل وطالب بعوده الهارب واعتذار مكتوب