في سبيل الله قمنا نبتغي رفع المذكرات....!!!

تمخضت مجاهدات اصلب العناصر لاصلب المواقف او كما ظلو يرددون في بواكير حضورهم الكوني الي الساحة السياسية السودانية
وتحولو الي متحولين ومتسولي اصلاح بعد ان كانو هم الوقود والمحرك الاساسي لدولة الانقاذ ومنذ انطلاقها القبيح في السودان فهذه الجوقة التي تردد في الاخبار هنا وهناك بانهم يقفون خلف تلك المذكرات هم من ساندو وحفروا اساسات راكوبة الانقاذ وحملو شعبها علي كتوفهم وعلي دقونهم وعلي لياليهم الطوال التي كانو يقضونها في التامر علي هذا السودان باسم التمكين وباسم المشروع الحضاري وباسم سيادة الله في الارض..

وفي هذه الراكوبة التي نضيت الان الموارد والمال ونضبت ايضا من البنون بفعل الانتنوف والقنابل كان رواكيب الفساد تستطيل عماراتها وتمتلي كروشها وتختفي قروشها في بنوك بلادا اصلو ما معروفة وووين.... فكان الصمت وكان التبرير وكان الدفاع عن الباطل بكل حماس وبكل تغبيش...
وفاض نيل هذه الراكوبة بالدماء التي سالت ومنذ حضور الانقاذ الاول انطلاقا ببيوت الاشباح ومرورا بالفيافي البعيدة في خور برنغا وفي خور عفن وفي دندرو فكان الفتية الصلبين يمارسون الصمت والتصفيق في رقصات الدكتاتور الاهوج وعلي انغام في سبيل الله قمنا نبتغي رفع اللواء....

وانهد معبد الجغرافية وذهب الجنوب جنوبا وفارق الوطن الكبير اروع معانيه هو التنوع والسطوة الجغرافية وسطوة الموارد وسطوة انسان جنوبنا الجميل...ولكن ظل الصمت هو الجلالة الاعلي صيتا في جلالات اصلب العناصر المتوهمين كذبا وبهتانا بانهم سيحولون الارض البور البلقع الي جنة نضيرة...

شيخهم الذي علمهم السحر قال عنهم بان هولا ذهبو الي السلطان وتركو القران رغم يقيني بان قشور القران والمتاجرة به قابعة شعبيا ووطنيا ولكن مشهد المفاصلة عكس التهافت ما بين التنظيم وكشفت رياحها عن جيوش من الانتهازيون الذين طفحوا الي السطح الان عندما بلغت الاشياء الحلقوم وعندما اصبح الوطن بكليتاته يتهادي في كف عفريت اسمه عمر البشير وجوقته من بني نخبة كيزانية

ولاحت الثورة في الافق تحدثنا عن تغيير اتي بلاريب دعم هذا التغيير المحلي الاتي تغيير اقليمي قضي علي اخضر الطغاة ويابسهم
وفي طريقه حتما للارض السودانية مهما تفنن الانتهازيون والمغبشين في النكران والاصرار علي السباحة عكس حتمية الاشياء...
اصحاب المذكرة هم الموج الاولي من المتحولين وفي لحظات الثورات الكبري القادمات يطل الي السطح الاذكياء من الانتهازيون الذي يعون جيدا وبحسهم الانتهازي العالي بان التغيير اتي بلا ريب ويركبون الموجة هي تستمر لاحقا دورات الاستهبال والنجاة من المركب المجرم الذي حتما سيقتص هذا الشعب من كل قياداته ومن ركابه مهما تفننو ومهما تخبو بمذكرات الاصلاح الخجولة

الثورات التي انجزت الان في مصر وفي تونس وفي ليبيا تعاني الان من جيوش المتحولين ولايزال بعضهم يتبوا مواقع في الاعلام وفي وسط حركة المجتمع ويشكلون ثورة مضادة خافتة الصوت حينا وعالية الصوت احيانا عندما تلوح لهم الفرصة لممارسة الانتهازية وايضا نذكر في الاثر حديث السدنة في عصر ما بعد نميري وكيف لاحقا نبت لهم ريش وطاروا في طيارة الانقاذ وركو في رقاب هذا الشعب مرة اخري وممارسو وعيهم الشمولي بكل اريحية وحماس من اجل سرقة قوت وموارد وصوت هذا الشعب

المذكرات التي تسرب بانها تطاقشت وتخابتت في سماء الموتمر الوطني والحركة الاسلامية التي تشظت ترسل الي المشهد السوداني لقطات عديدة..
1-تذمر اهل التنظيم الواحد ووصول سطوة الفجوة الاقتصادية الي عضام الموتمر الوطني

الأخ عبد الكريم
سلامات
متابعة ومتعة
وكلو في سبيل الله

سلامات يا كيكي ومتابعين التحليل والتفكيك العميق لسيناريو السقوط الكيزني القادم قريبا لا محالة

لا لسوق قد عملنا
لا لفساد قد نظرنا
لا لدنيا قد حيينا



كيكى سلامات

كدى النرجع بهدو

Quote: سلامات يا كيكي ومتابعين التحليل والتفكيك العميق لسيناريو السقوط الكيزني القادم قريبا لا محالة

تحياتي يا نادر
ونعم السقوط الكيزاني يتسارع بسرعة صاروخ ارض جو
وهاهي الارتدادات للثورة والتغيير يحس بها الانتهازيون من بني كوز ويحاولون التخارج من هذه الورطة التاريخية بمذكرات بائسة لاتساوي ثمن الفلسكاب الذي كتبت فيه

Quote: وكلو في سبيل الله

تحياتي ياعمر
وكما قيل في السابق وعند حرب الجنوب (الجكة دي لله)
فهاهي دورات الاستهبال الكيزاني تتحرفن وتضخ في المشهد

مقولة شديدة وجديدة هي (المذكرة دي لله)

Quote: لا لسوق قد عملنا لا لفساد قد نظرنا لا لدنيا قد حيينا

هلا يا طوربيد
وكان لسان حال القوم المتذكر (ومتذكر من اهل المذكرة9

فاليعد الي الموتمر الوطني مجده او ترق كل الدماء بما فيها دماء الشوكة حوت البشير
الذي شنقل ريكة الحركة الاسلامية وحولها الي هباء منثورا وكركب ضقلها

نقاط كثيرة تطل الي السطح ونحن نتامل موجة المذكرات التي هطلت علي سماء المشهد الكيزاني... ومهما كانت المسببات الحالية فلن نستطيع عزل هذه الممارسة المذكرتة من تاريخ الاسلاميون في السودان وانقساماتهم الاولي ومنذ الاخوان المسلمين
وتداعيات مذكرة العشرة الشهيرة الت مهدت الي مفاصلة الترابي - علي عثمان... فعليه فان حضور ممارسة تنظيمية بمثل التي ظهرت في شكل مذكرات فهذا يعني ويرسل ملامح وبوادر انشقاق اتي بلاريب... ولكن في هذه المرة الظروف المحيطة تجعل من الامر اكثر اثارة ودهشة كون الامور مرتبطة بسلطة وحكومة ومرتبطة بتحالف مع قوي عسكرية..

وسنعود

المفاصلة التاريخية ومهما كانت تداعياتها لاحقا الا ان حسن الترابي وجوده الكارزيمي في دواخل بني كوز واشواقهم التي كان يغذيها لهم عندما كان هو العراب الكبير لا تزال قابعة بصورة او باخري في الوجدان التنظيمي للغالبية الساحقة من منسوبي الحركة الاسلامية..وحتي الذين ذهبو الي الموتمر الوطني ظل سيفهم مع الموتمر الوطني وقلبهم واشواقهم تحن ما بين الفينة والاخري للشيخ فالرجل ساق كورة هذا التنظيم لسنوات طويلة وافتتن به القوم ومنذ ندوة اكتوبر 64 الشهيرة...
لذا نجد التوزيعات الكيزانية القابعة حاليا في الارض السودانية تنقسم الي التالي
1- ترابيون تحت النخاع شعارهم ان ذهب الترابي شرقا ذهبا شرقا
2- خاينة خايفة وهولا ما بين الاشواق الي كارزيما الترابي والتنظيم و القبض علي بعض المكتسبات من السلطة والثروة
3- حارقي المراكب والزاهدون في الترابي وقيادته والباحثون عن السلطة بكل الاثمان هي وان كان الثمن هو سجن الشيخ وتحجيمه

هندسة ...تحليل مبالغة متابعين والله..
تسلم .

هلا يا بيكاسو
وحبابك في مدارات بني كوز في تشظيهم وصواميلهم التي تفرتقت لدرجة تجعلهم لا ينفعون كاسبيرات لاي حركة اسلامية في الشرق الاوسط الجديد

وكل التقدير

هلا ممراح

اعتقد انها حركة في شكل مذكرة

لتخفيف الضغط بعد تفشي البطالة والغلاء والفساد

واقول كما قال منصور خالد لعلي الحاج ذات مرة


they are just

...........................

Quote: واقول كما قال منصور خالد لعلي الحاج ذات مرة they are just ...........................

هلا يا خليوف
ونعم انهم جست ميكن (احم احم ) او كما قال منصور خالد لوووووول...
المذكرة يا خلي موجة مبكرة من موجات سلوكيات المتحولين فعندما يخنق الالمي القنطور فان الانتهازيون واصحاب الدقون الخفيفة واللفيفة هم اول من يتحسس الخطر ويحاول ان يتخارج من السونامي القادم... ويا سبحان الله او كما قال شيخك ابو ضفيرة

ماشة معاكم حلاوة لكوم بس ( صورة ) .....


اقبض يا زول

هههههه

امسك الباكادلي دا لحدي ما نشوف نهايتها معاك شنو

هههههه

Quote: امسك الباكادلي دا لحدي ما نشوف نهايتها معاك شنو

هلا يا باوقة..
واها قمتو خلاص خجيتو الاستفتاء التعبان ده وبقيتو علي السمسرة
يا اخوي هذا استفتاء لايساوي ثمن الكلك الذي كتب به ولا يغير في واقع السونامي السوداني القادم بقوة الصاروخ ارض جووووو..
فالحق روحك يا ابو عمار وانجو يا زول كما نجا فرفر

دي يا كيكي

internal memo


لا شان للشعب السوداني بها

(كل او ليهو آخر ياخليل ياابنى ) ..
هذا فيما يخص الانقاذ ..ومايخص صاحب
البوست ايضا ...اصبح ينتظر مكرمة الخيرين
من امثالنا ...والانقاذ تنتظر فرجا من
السماء لن ياتى ..لان السماء لاتمطر
ذهبا ولافضة

سـلام يا كـريم، وشـكراً على القراية الواعية والحصيفة لحال بني كيزان..بالمناسبة أخونا الغايب عمـر دفع الله ظفرنا منه بعمل أخير:

إلى أن أعـود..

غايتو ياكيكى مذكراتهم دى يبلها ويشربوا مويتها

لكن دعوة حليمة المظلومة دى حتجيب أجلهم قريب دة باذن الله

تحياتى

Quote: دي يا كيكي internal memo لا شان للشعب السوداني بها

هلا يا خلي
ونعم الامر في نظرته المجردة عبارة عن انترينال ميمو يمكن ان تتواجد في اي تنظيم من التنظيمات ولكن بني كوز في انتهازيتهم وشفقتهم وانانيتهم البغيضة اسقطو الان كل عللهم وامراضهم ومشاكلهم ومصائبهم علي مجمل الوطن السوداني.. فالسلطة صارت هي التنظيم والتنظيم هو السلطة لذا نجد من هذه المذكرات وتداعياتهم تهابش الجميع الان...

والله يكافينا شرور الناس ديل يااااخ

يا جماعة اذكروا الله

كيكي يا صاحبي

الكيزان التهميش والتفقير ضربهم ودايرين يعملوا فيها مصلحين، ولاد الهرمة..
___
متابعون ومشتاقون..

Quote: هذا فيما يخص الانقاذ

هلا يا انصاري
وكدي خلينا في الموضوع الاساسي او كما يقول عمر اومو
ونعم الانقاذ لا تزال تمني نفسها بالمسير في مسيرة قاصدة لاتبالي بالرياح
وهي الاوعية الشمولية دائما تواقة للبقاء الطويل في السلطة والالتفاف علي كل المشاكل والرقص في حلبات من نار
بالدم والرصاص والاشلاء...
وفعلا لكل بداية نهاية فهكذا يحدثنا التاريخ ومنطق الاشياء...

وشكرا علي مرورك

Quote: سـلام يا كـريم، وشـكراً على القراية الواعية والحصيفة لحال بني كيزان..بالمناسبة أخونا الغايب عمـر دفع الله ظفرنا منه بعمل أخير:

سلام يا عيسي وتحياتي
و يا سسسلام يااخ علي الريشة الواعية عمر دفع الله الغايب الحاضر في كل الذاكرة والوجدان النضالي ضد هذه السلطة المجرمة
وعمر دفع الله احزنني توقفه فهو صاحب ريشة كالرصاص وله ريشة مصادمة سارت بضوئياتها ركبان كل الغاضبون والثورييون ونتمني ان يواصل نهر الابداع ويردم هذه الطغمة المجرمة بريشة من ابابيل

ونعم انهم يحاولون ان يحو العظام في تنظيمهم الذي فرتق وتشظي من اثر اطماعهم وشهوتهم الجامحة في سرقة موارد هذا الشعب
واهو ربنا قاعد يوريهم حبة حبة وزنقة زنقة

Quote: غايتو ياكيكى مذكراتهم دى يبلها ويشربوا مويتها لكن دعوة حليمة المظلومة دى حتجيب أجلهم قريب دة باذن الله

هلا يا مهيرة
وتحياتي
والمجد والخلود لحليمة كيقا وكل البسطاء الطيبين ملح الارض


(حريات)

Quote: حليمة كيقا، ناجية من المحرقة في جبال النوبة ، لجأت الى معسكر إيديا بجنوب السودان ، حيث قابلها الصحفي راين بويتي ، من فريق ( عيون وآدان) وأجرى معها حواراً مصوراً ننشره أدناه . وأعدت المجموعة السودانية للديمقراطية اولاً المقابلة للنشر في ملخصها الاسبوعي . (إسمي حليمة كيقا، انا جيت من كاتشا يوم 25 تسعة وهسع في معسكر إيديا هنا. وليوم الليلة بعد ما جينا إيديا هنا نحن تعبانين، تعبانين شديد لانو الطيارة ما ريحتنا، عمر (البشير) دا ماريحتنا بطيارات بتاعتو دا. نحن ما ابينا الشكلة، ما الشكلة دا اصلو مستمر، لكن بالطيارات دا، النوبة ديل اصلو ذنبهم شنو؟ هسع نحن تعبانين في الغابة دا مع عيالنا الصغار، وجعانين. والامم المتحدة بياكل فينا لكن عمر لسع بيجري بورانا بيدقنا بالطيارات. الزول دا ( عمر البشير) نحن ذنبنا شنو، نحن النوبة ديل، نحن دايرين حقنا منو بالتي سمح، إلا داير يدقنا بالطيرات حقو. عمر دا انا غضبان منو شديد. وأي زول لو متابع لشغله، عليكم الله عمر( البشير) دا أمسكو، أمسكو وحاسبو… يا هو نحن النوبة ديل مساكين ساكت، دايرين ناكل ساكت وهو (عمر البشير) داير يدقنا بالطايرة، نحن ذنبنا شنو ياخ! نحنا جرينا بعيالنا الصغار وفي عجائز هسع خليناهم في البيوت وما في زول بيديهم موية، ومافي زول بيديهم أكل، والناس بيموتوا في الشارع عطشانين وجعانين، دا بسبب منو؟ بسببو هو ( عمر البشير) لانو نحن دايرين حقنا منو وما داير يدينا ليه، وداير يدقنا وداير يقتلنا! أنا زعلان من عمر (البشير) دا. محكمة جنائية دا خلي يمسك عمر دا.. يحاسبوا. أولاد النوبة دا ماتوا ساكت ما عرفنا سبب عشان شنو، عيال ماتوا ساكت ما عرفنا بسبب شنو؟ نحن العجايز ماشين ساي وميتين في الشوارع، ماشين اربع وعشرين ساعة، ما عرفنا بسبب شنو؟ يعني بسبب نحنا دايرين حقنا؟ عمر دا انا دايرة يمسكوه…. يحاسبوه! نوبة ديل ذنبهم شنو؟ نحن قاعدين هنا دا السقط معانا، وشنو معانا، وهسع الحمدلله خواجة وقف معانا. إذا كان هم لسع مستمرين في الحرب وجونا لغاية محل قعدتنا هنا دا، انا داير ناسنا دا يلموهم نمشي محل سمح نحن نمشي قدام، كان نلحق سلفاكير ذاتو انا نلحق بالناس، انا داير نمشي بس… ما دايرين نقعد هنا طيارة كل يوم في الصباح يجي (نيي نيي نيي…) فوق راسنا دا… ذنبنا شنو؟ كان رجال في محل شكلة معليش، لكن المساكين والعجايز والأتايم والعيال الصغار أرواح دا، هو داير بيهم شنو؟ يمشي يشوف محل الرجال المعاهه، نحنا ذنبنا شنو النساوين الداير يكتلنا دا. ولا في مرا عندو سلاح ولا مرا عندو عدو، بس يخلي محل الرجال ويجي يدق مواطنين… أنا دايرة عمر دا يحاسبوه. محكمة بتاع جنائية جاري منو دا، أنا إسمي حليمة كيقا سبن دايره عمر (البشير) دا يمسكوه ويحاسبوه. أنا بقيف وبقول له (عمر البشير) أنا دايره حقي. نحنا مظلومين، مظلومين ولا لاقين قروش ولا لاقين اكل وحفيانين وعريانين وعيانين، وما لاقين تنمية من شغلوه. هو (عمر البشير) بيشتغل لمصلحة أهلوا في الشمالية هناك، شغال لمنو؟ ناس الخرطوم ذاتا القالوا تابعين ليه وتعبانين وراه، بياكلوا كرتة وبياكلوا في الكوشة، وبيلموا وبيشتغلوا، وزول داير يشتغل كويس بيطردوه وما بيدوه الماهية بتاعتو. هم فايدتهم شنو؟ نحن ما عندنا أي فايدة بوراهم! أنا بس دايره عمر (البشير) دا يمسكوه… يحاسبوه.. في محاكم جنائية دا. والله لو خلوه أنا ذاتي ما بعفي ليهم! شوف أنا مظلومه. كراعي دا من اربع وتسعين طلقة عوقني في كراعي وانا ليوم الليلة جري في الأرض دا. كان عمري ماشي لاتنين وتلاتين سنة انا جاري في الارض دا. انا حقي دا ضيعتو… ولدتا عيال وعيالي ليوم الليلة دا ما لقى راحة، انا أمهم دا ما لقيت راحة…. انتو عمر (البشير) دا دايرين بيه شنو؟ دايرين تربوه! هو غنماية هو؟ أمسكوه واحكموه في محكمة جنائية دا وما تخلوا… دا كلام بتاعي انا دا. انا زعلانه عشان مظلومه. لا عندي سرير وقاعده في مشمعات في الخلاء، قاعدة جعانة وباعوضه فيني… بسبب نفر واحد يدمر الدنيا دا!!! انتم دايرين بيه شنو؟ امسكوه انا دايرة عمر دا يحاسبوه في المحكمة الجنائية. ولو الناس دا عفا عنه انا ما دايره اعفا من عمر دا. ذي ما مسكوا صدام ومسكوا رئيس بتاع هناي دا، أوباما يمسك عمر دا ويحاسبو لينا. نحنا مظلومين، ولا عندنا حاجة سمح ولا قاعدين كويسين. ديل كلهم ناس ميتين في الغابة دا بسبب عمر (البشير)، ليه؟ النوبة دا ناس مساكين ساكت ذنبهم شنو وعيالهم الصغار ديل؟ انا دايرا عمر دا يحاسبوه. الدول دي ما تخلي عمر دا. انا لو جابوه وقف قدام هنا انا بوريه، انا ما بخاف، بخاف من الله بس. مما مكن نفر واحد بس يدمر ألآف، ليه؟ انتم دايرين بيه شنو؟ دايرين تربوه ذي غنامية جايين يضبحوه؟ امسكوه… اقتلوه…عشان الجاي وراه بكره داير يمسك سلطة ما يبقى زيه! يبقى زول دغري ويقسم لينا عدالة في النص… دا كلام بتاعي صغير بس… شكراً) . وحقهم ودعواتهم هي التي ستخفس بارض هذه السلطة الباطشة فالانقاذ اضرت بالانسان السوداني البسيط وعاني منها هذا الشعب معاناة كبري

Quote: يا جماعة اذكروا الله

هلا يا باوقة
والله يعمل ليكم سناكيت ياااخ
وشاحد الله وشاحد شيخي شكر الله كل كوز او من يساند الكيزان يقوم ليهو سنكيت في ضهرو
حتي يكون علامة ووسام لمن الكيمان تتفرز

Quote: الكيزان التهميش والتفقير ضربهم ودايرين يعملوا فيها مصلحين، ولاد الهرمة..

هلا يا تفة وحبابك يا فردة
ونعم الجماعة راسهم سخن و البقرة الحلوب المصوها عقدين من الزمان ونيف خلاص غرزت
ولبنها شالتو طيور نيفاشا وذهبت به جنوبا فعشان كده قالو يعملو كركبة وجوطة

كيكى
للعلم
المذكرة التالتة فى الطريق
وتستمر مسرحية رفع المذكرات
هى لله هى لله هى لله

Quote: المذكرة التالتة فى الطريق وتستمر مسرحية رفع المذكرات هى لله هى لله هى لله

هلا يا طوربيد
وبعد ده مافضل الا نسمع يوم بان الهتيفة (ود الباوقة ) كتب مذكرة
بقول فيها بربار الماركسي وصحبه عاصرني شدددددددددددددددديد في فسادكم ايها الحكام لووووووووول

------------
انها مذكرات الورجغة ومحاولة الهروب الي الامام
ولكن علي مين علي مين والشعب سنين

يبدو ان حمي المذكرات ضربت نواحي الجيش والعسكرية السودانية التي صارت تتململ
وسنجلس القرفصاء في انتظار مذكرة حرس الصيد

يرفع البوست فى انتظار رفع المذكرة التالتة ...


سلامات يا كيكى .اين بيكاسو..

Quote: يرفع البوست فى انتظار رفع المذكرة التالتة ... سلامات يا كيكى .اين بيكاسو..

هلا يا طوربيد
ونعم فليكن عاليا خفاقا في انتظار مطر المذكرات بتاعة الدقانة التي تطاقشت عندما كركبت اضقال بقرتهم الحلوب الانقاذ

وبيكاسو يااخ شايف اسفيرها بقي (مااا ياااهو) واتمني ان تكون بالف خير
وتجي تلحق ليها مذكرة مذكرتين قبل ما الحريقة تقوم...