غريبة! مفوضية الانتخابات تطلب توضيحاً من عمر البشير..

فى قراره بإعفاء ولاة ولايات دارفور الثلاثة المنتخبين

القصر: إعفاء ولاة دارفور تم تحت قانون الطوارئ
التيار، الثلاثاء 17 يناير 2012م
حوازم مقدم

استوضحت مفوضية الانتخابات رئاسة الجمهورية عن قرار إعفاء ولاة ولايات دارفور الثلاثة المنتخبين. وقال مصدر مطلع داخل المفوضية: إنهم أبلغوا رئاسة الجمهورية أنّ قرار إقالة الولاة غير دستوري، لجهة أنهم جاءوا بعد أن انتخبهم مواطنو ولاياتهم ولا يحق قانونياً إقالتهم إلا عبر المجلس التشريعي للولاية المعنية بشرط ثبوت تورطهم في مخالفات واضحة، وأضاف المصدر أنه حتى في هذه الحالة ينص القانون على عقد انتخابات ثانية لانتخاب ولاة جدد. وأكّد المصدر أنّ رئاسة الجمهورية ردت على المفوضية وبررت خطوة إعفاء ولاة دارفور استناداً على قانون الطوارئ أسوة بما تم في ولاية النيل الأزرق. يشار إلى أن والي جنوب دارفور المقال، دكتور عبد الحميد موسى كاشا، رفض منصب والي ولاية شرق دارفور ولم يؤدّ القسم حتى اللحظة، فيما أبدت قيادات قبيلة الرزيقات، التي ينتمي إليها كاشا، رفضهم لقرار إبعاده من منصب والي جنوب دارفور.

في النيل الازرق أدعي المشير الديكتاتور أن هناك حالة طوارئ
(حرب وعملوها براهم وقالوا طوارئ)
والوالي من حزب عدو للحكومة
فهمناها
أها لمن المشير يقيل ولاة منتخبين وهم من الحزب الحاكم
والذي هو حزب البشير
دي يقولوا عليها شنو؟؟؟؟

دي إسمها الديكتاتورية
نست أو تناست الإنتخابات التي فبركتها بنفسها
وفوزت فيها الداير تفوزوا
ما صبرت لإنتخابات تانية

الحكومة بذات نفسها ما صدقة مكنة الإنتخابات دي


غايتو المستشار القانوني لرئاسة الجمهورية
إنعدم لديه الحس المهني والضمير لدرجة مبالغ فيها

المفوضية ما من حقها تطلب توضيحاً
على المتضرر اللجوء للقضاء او المفوضية
الولاة الثلاثة ما جه زول اشتكي ليها
مالها هي ..؟
هم الإشتكو علمت ليهم شنو ؟
دي حركة إحم إحم نحن هنا بس

الأخ نصر، تحياتى

Quote: دي إسمها الديكتاتورية نست أو تناست الإنتخابات التي فبركتها بنفسها وفوزت فيها الداير تفوزوا ما صبرت لإنتخابات تانية

المفوضية المكونة من سدنة مايو الارزقية كل عملها ينصب فى كيفية اتباع انجح السبل لتزوير الانتخابات
و الخروج فى مؤتمر صحفى مسرحى، لاعلان فوز اعضاء المؤتمر الوطنى
و لم نري منها فى يوم من الايام ما يثبت انها حريصة علي الدستور و القانون
و البشير كل مرة ينتهك الدستور، و مافى زول قال بغم..
الجدَّ المرة دى شنو!!

Quote: هم الإشتكو علمت ليهم شنو ؟

صدقت يا احمد موسي، مئات من طلبات التظلم لم تنظر فيها مفوضية الأصم، و لم تبت فيها بما يرسى نهجاَ قويماً للعدالة...
انها مفوضية لتمكين الكيزان من تزوير ارادة الشعب و الوصول للسلطة لممارسة جرائهم المعهودة...
و الحاصل اليوم، يبدو ان احدهم لكز المفوضية، و امرها تعمل حاجة كدا، انشاء الله رسالة توضيح (خجولة) لاثبات وجودها..

كلها صراعات كيزان في بعض

وما المفوضية وغيرها من المؤسسات إلا واجهات


الباقر موسى

Quote: المفوضية ما من حقها تطلب توضيحاً على المتضرر اللجوء للقضاء او المفوضية الولاة الثلاثة ما جه زول اشتكي ليها مالها هي ..؟ هم الإشتكو علمت ليهم شنو ؟ دي حركة إحم إحم نحن هنا بس

احمد موسى بتبالغ ... المسؤول منو من جلوس هؤلاء الولاة في مناصبهم؟ السيد الرئيس؟

بعدين عندك خبر شكوى لم تفصل فيها المفوضية بعد؟

حالتك محامي؟ المرّة دي سويتو افرش وغليد ....



... المهم ....

Quote: احمد موسى بتبالغ ... المسؤول منو من جلوس هؤلاء الولاة في مناصبهم؟ السيد الرئيس؟ بعدين عندك خبر شكوى لم تفصل فيها المفوضية بعد؟ حالتك محامي؟ المرّة دي سويتو افرش وغليد .... ... المهم ....

تبارك كدي أقرأ الخبر كويس
المفوضية تطلب توضيحاً
توضيحاً ..؟!!
ليه توضيحاً ؟؟
لو دي صاحياتها مفروض تصدر (توجيهاً) أو (امراً)
لكنها تطلب (توضيحاًَ)
بعدين يا تبارك القانون بقول المتضرر يشتكي للمفوضية
لو ما ادته حق يمشي المحكمة
المفوضية ما بتقدر من تلقاء نفسها تعترض على مخالفة
ومسالة إقالة الولاة مسالة دستور
ومخالفة النص الدستوري يحيل للمحكمة الدستورية
وليس للمفوضية
يا تيارك ناسكـ ديل ببساطة دايرين يقولوا (نحن هنا) فتذكرونا ..!!!