Post: #1
Title: المغترب السوداني ... و سياسة " الكافرة أمك " ... يوجد " دلع شديييد
Author: عمر موسي منجي
Date: 01-16-2012, 04:36 PM
عفوا و لكن هذا البوست لا ينطبق علي كل المغتربين
المغترب السوداني و ما أدراك ما المغترب السوداني " و أنا منهم او كنت " تجده في اجازته سعيدا باهله شقيا بوطنه كثير الشكوي منها فتسمع منه عبارات مثل " دي بلد دي " او " السودان أهو دا طرفي منو "حتي اذا رجع الي غربته عمل علي "تثبيط" الذين من خلفه من اخوانه المغتربين و قال في السودان ما لم يقله مالك في الخمر .... طيب يا اخوانا وييين المشكلة ؟؟؟ هل العيب في المغترب ؟؟ ام العيب في السودان .... و السؤال الاهم ... عند الهجرة من الوطن هل كانت الخرطوم "السودان" مثل دبي او نيو يورك او .. او .. لا اظن ذلك .... السودان ياهو السودان " من ماقمنا جينا " و لكن الذي تغير هو المغترب السوداني يعني بصراااحة كده .... " الغربة خربت طبعهم عدييييل كده " كما في تلك النكتة الشهيرة وقد "خربت" تلك الخواجية طبع والد زوجها حتي تنكر " للحاجة المسكينة" و تعب السنين من "قراصه" و "عصيده" حتي قال عنها ما قال. و نواصل ...
|
Post: #2
Title: Re: المغترب السوداني ... و سياسة " الكافرة أمك " ... يوج
Author: عمر موسي منجي
Date: 01-16-2012, 04:41 PM
Parent: #1
كذلك المغترب السوداني ما ان عاد الي السودان حتي تجده يتافف من الغبار و السخانة وهو بالامس القريب كان من كثرة جلوسه علي تلك " اللساتك" " المغزوزة" في ميدان الحله قد فعل بها ما لم تفعله الشاحنات في زلط بورتسودان..... تجده اذا عاد الي السودان يمسح حذاءه الايطالي كل بضع خطوات وهو الذي قبل سفره كان اذا اشتري " شده " او " تموت تخلي " يتمختر بها و كأنه عارض أزياء علي " الكات ووك"... تراه يضع منديل علي انفه كلما مر علي احدي المجاري " المطرتها صبت قبل اغترابو " ولعله نسي انه كان ايام الدراسة لا يستوعب الحصص الصباحية لو ما اخد ليهو "شمة جامدة " من مجاري اللاماب ...... و لا نسييييييينا ؟؟؟؟ " دي طبعا لناس الشجره الكلاكلات و من خلفهم و خلاصة الامر هو ان السودان هو السودان بل تحسن كثيرا " لزول عندو قروووش " و المغترب السوداني يأتي اليها و يريدها ان تكون كبلد الغربة التي تركها و لن تكون الا اذا تحققت نبوءة أخوي " ود الباوقة " ربنا يديهو العافية و أخيرا ... لو علم عمنا نسيب الخواجية ان ما كانت تطعمة اياه كم هو مضر بالصحة من سكريات و نشويات و كوليسترول لما قال في " ام عيالو " ما قال, و كذلك الاغتراب يفعل بنا و بأبنائنا ما يفعل و نحن غافلون "مركلسوون" نسب و نلعن في بلد ترعرعنا فيها و لعبنا في ازقتها و حواريها وسبحنا في انهارها و " خيرانها " وشبعنا من " ملاريتها " وحقنها وحاجات تانيه كده....
وختاما نسأل الله ان يصلح حال البلاد و العباد و يرد كل مغترب الي بلده سالما غانما
|
Post: #3
Title: Re: المغترب السوداني ... و سياسة " الكافرة أمك " ... يوج
Author: حماد الطاهر عبدالله
Date: 01-16-2012, 04:57 PM
Parent: #2
Quote: يرد كل مغترب الي بلده سالما غانما |
يا حليلك ! إنت من زمن غانما!!! الناس رجعت ل سالما.......
|
Post: #4
Title: Re: المغترب السوداني ... و سياسة " الكافرة أمك " ... يوج
Author: عمر موسي منجي
Date: 01-16-2012, 05:59 PM
Parent: #3
شكرا اخي حماد علي مرورك الكريم
Quote: يا حليلك ! إنت من زمن غانما!!! الناس رجعت ل سالما....... |
صدقت اخي حماد فالغربة ليست كما كانت و كثير من المغتربين الان بين نار الغربة و عودة مجهولة العواقب
تحياتي
|
|