Post: #1
Title: الصحة والرشاقة بعد 10 آلاف نقرة: شرب الماء على الريق
Author: مريم بنت الحسين
Date: 01-15-2012, 06:54 AM
في اطار احتفالات البوست بتاع Sudaneseonline Biggest Loser الخاصة بي مرور 10 ألاف نقرة، حبيت اشرح باستفاضة عن الحاجة الساعدتني جداً في اني انقص 7 كيلو خلال الأربعة شهور الفاتت دي، الحقيقة تلاته كيلو من السبعة كانوا بي سبب اني بدأت اشرب موية بالصباح على الريق، وقبل الوجبات.. ببساطة الفكرة انه الزول اول ما يصحى من النوم وقبل السواك يشرب حوالي اربعة كبابي موية... المسألة في البداية بتكون صعبة وبتقلب البطن، لكن شوية شوية الزول بتعوّد عليها، الحركة دي مهمة لأسباب كتيرة، وفيها debate كتير، لكن الثابت انها مفيدة جداً للناس العندهم مشاكل بتاعت مصران (زي حلاتي كده)... برضه بتخلي الجهاز الهضمي يشتغل ويستعد لعملية الهضم .. لانه المويه بتبقى ليه زي تدريب كده بعد فترة النوم ... الحاجات العملتها وساعدتني على الاستمرار في العادة دي اني اولا استخدمته كباية كبيرة (سعتها كبايتين ونص) ... بملاها مره وتاني بملاها لتلاتة أرباعها كده... ما ضروري الكمية تكون كلها في مرة واحدة.. بس اهم شي مافي اكل ولا شراب لمدة نص ساعة على الاقل...حتمشوا الحمام كتير في البداية بعداك خلاص... كده حتكونوا شربتوا نص كمية الموية البحتاجها الجسم خلال اليوم.. بفضلوا ليكم اربعة كبابي.. قبل كل وجبة بي نص ساعة كده، اشربوا ليكم كباية واحدة.. منها بتهيئوا الجهاز الهضم للاكل، ما بتاكلوا كتير وبتشربوا موية...
بدون ريجيم قاسي ومشاكل، حتحسوا انه وزنكم نقص...
|
Post: #2
Title: Re: الصحة والرشاقة بعد 10 آلاف نقرة: شرب الماء على الريق
Author: Mohd Ibrahim
Date: 01-15-2012, 07:48 AM
Parent: #1
يامريم....شكرا ابدأ اجرب من بكرة....7 كيلو موضوع مغري...لكن خايف الموية تزيد الكرش!!!!!
....النتائج بتظهر بعد كم يوم..
|
Post: #3
Title: Re: الصحة والرشاقة بعد 10 آلاف نقرة: شرب الماء على الريق
Author: هاشم محمد الحسن عبدالله
Date: 01-15-2012, 07:48 AM
Parent: #1
شكرا جزيلا الأخت مريم بنت الحسين فكرة شرب الماء على الريق فكرة صينية قديمة ، ولقد طبقتها ولها نتائج مذهلة، وبالتحديد أنا أحرص على أداء صلاة الفجر فى المسجد ومباشرة بعد انتهائى من الصلاة والعبادة التى أقوم بها من اورد ونحوه، أقوم ومن الكولور بتاع المسجد أشرب حوالى 3 أكواب من الماء ومن ثم أذهب للمنزل وارتاح قليلا قبل الفطور والذهاب للعمل وذلك بعد 45 دقيقة من شرب الماء والنتائج رائعة ، مودتى .
|
Post: #4
Title: Re: الصحة والرشاقة بعد 10 آلاف نقرة: شرب الماء على الريق
Author: النصرى أمين
Date: 01-15-2012, 06:11 PM
Parent: #3
امبارح يا مريم مشيت المطعم الهندى ,,للاسف لقيتو
قافل ومعلقين ورقة فى الباب تقول ان صاحب البناية
الغى العقد مع المؤجر.....الحاجة دى كانت متوقعة
لان ادارة المطعم كانت تبدو عليها علامات العشوائية
المهم ...مشينا مطعم باكستانى فى نص البلد....برضو
لقيناهو مقفول بسبب الاصلاحات.....
دى مصيبة شنو ؟
الواحد يزازى الليل كله عشان سمك.....
حليل ايام زمان اى KFC or McDonalds حيقضى الغرض .....
فى الاخر مشينا مطعم باكستانى ممكن نطلق عليه كلمة فاخر....
طلبنا السمك التيكا....
جابوه لينا كله زيت ...ده شنو ده...
غايتو اكلناه وطلبنا معاهو عدس بسموه دااااال .....
قال ايه؟
الفاتورة 70 دولار لنفرين ....
توبة لحبوبة.....
بدا البحث عن مطعم هندى باكستانى يعمل السمك بطريقة صحية
|
|