غايتو فصاحتك دي!!! تكريم لسيدنا الحسن نحنا بنهدي ليه بتنا بت خالد بعرس أو بدونه
قبلي ساي مجانا
Post: #8 Title: Re: صاحب السمو مولاى الحسن فى حديقة الحيوانات ( فيديو ممتع) Author: قيقراوي Date: 01-13-2012, 02:03 PM Parent: #6
لا لحديقة الحيوانات لا للعسف
الحرية للجميع
-----------
اسي منو(!) من الظهروا في الفيديو دي طالع من توصيف (حيوانات) دا!؟ طيب ساجنين المساكين الما بتكلموا في حديقة لي شنو؟ ما يخلوهم (احرار) في البرية دي سااي .. ربما هم اكثر تقديراً و احتراماً للحرية منهم .. المافي شنو!؟
Post: #9 Title: Re: صاحب السمو مولاى الحسن فى حديقة الحيوانات ( فيديو ممتع) Author: عبد الحافظ خضر Date: 01-13-2012, 02:32 PM Parent: #8
مشكلة الكثيرين هي رؤية العالم بمنظور السودان ومًًًًالات الامور فيه اولا النظام الملكي في المغرب نظام راسخ في الثقافة المغربية والفكر السياسي المغربي مر النظام الملكي بمراحل تطور عديدة ولم تكن مطالب التحرر والانتقال من الملكية المطلقة الى الملكية الدستورية غائبة عن فكر الملك الحسن الثاني والد الملك الحالي محمد السادس. فقدكانت رؤية الحسن الثاني عبارة عن برنامج لانتقال الى الملكية الدستورية بتدرج مرسوم بدا تنفيذه الحسن الثاني وواصل فيه محمد السادس بخطى. مدروسة الشعب المغربي يحترم نظامه الملكي وله تقاليد ونظم يرعاهاويحافظ عليها ولاية الهعد فيالمغرب له وضعها الدستوري المنظم ولها مركزها عند الشعب ولي العهد يتم تاهيله وإعداده ببرنامج علمي عالي جداً ومثل هذه الفعاليات ماهي الا تطبيق عملي لذلك البرنامج
الان دعونا ننظر الى الموضوع. شوفوا كيف النظام والضبط والنظافة لكل من ظهر فبهذا الشريط موضوع الافتتاح نفسة حديقة حيونات بمساحة 50 فدان طفل يقوم بمهمته مراعيا البرتوكول بصورة مدهشة
Post: #10 Title: Re: صاحب السمو مولاى الحسن فى حديقة الحيوانات ( فيديو ممتع) Author: AMNA MUKHTAR Date: 01-13-2012, 03:52 PM Parent: #9
غايتو يا عبد الحافظ ..حيرتنا !!
...................
الحكمة لو شفتو سوار الدهب مع الملك الراحل الحسن .
Post: #11 Title: Re: صاحب السمو مولاى الحسن فى حديقة الحيوانات ( فيديو ممتع) Author: أمين محمد سليمان Date: 01-13-2012, 04:29 PM Parent: #10
سلام يا سعد الالمني في الفيدو ده ليس خنوع الكبار : هم عارفين البسوو فيه ده ... المؤلم طفولة الود الأغتالوها دي ... من منبر بكري أب صلعه و من مدينه صغيرة في ضهاري كانسس أطالب الأخ محمد السادس بتغيير الدستور المغربي و عدم تكليف أي من الأمراء و الأميرات باي اعباء حتي سن الثامن عشر ... ياخي خلو الود يعيش حياة طبيعية عشان بعدين يبلكم بل طبيعي ...
---------- لو محمد السادس ما سمع كلامي حا ازعل جدا !!
Post: #13 Title: Re: صاحب السمو مولاى الحسن فى حديقة الحيوانات ( فيديو ممتع) Author: قيقراوي Date: 01-13-2012, 05:05 PM Parent: #11
Quote: . ياخي خلو الود يعيش حياة طبيعية عشان بعدين يبلكم بل طبيعي
البصل ريحتو واااحدة!! والبل ياهو البل
--------
بالجد شاغلني كتير مصير ابناء الطغاة .. بما فيهم زيف الاسلام القذافي مساكين الناس ديل .. هم ضحايا جنون اباءهم .. و المطبلين المزيفين للحق و الحقيقة، و بطانة السوء حوله ينشئوهم على انهم اصحاب حق الاهي .. و يجوا الثوار يغتصبوهم!! وكتها بخشوا في ذهول علاء و جمال مبارك .. لو كانوا محظوظين او مصير عدي و قصي صدام، و المعتصم بالله القذافي
Post: #12 Title: Re: صاحب السمو مولاى الحسن فى حديقة الحيوانات ( فيديو ممتع) Author: سعد مدني Date: 01-13-2012, 05:00 PM Parent: #6
دينا إنت ماشة بعيد مالك، تفتشي العرس فى البلاط الملكى المغربى... عندك صاحب السمو، مساعد أمير المؤمنين الاميرعبد الرحمن المهدى، لسه مل متزوج و الايام دى بفتش فى عروس...قدمى اوراقك و أنشاء الله تكونى من الفائزين (بقلبه)..
Post: #14 Title: Re: صاحب السمو مولاى الحسن فى حديقة الحيوانات ( فيديو ممتع) Author: أمين محمد سليمان Date: 01-13-2012, 05:19 PM Parent: #12
Quote: والبل ياهو البل
ده عندكم هناك يا قيقا ... البل في المغرب و دول العالم البائس أنواع : في بل بالبيض و بل بالجبنة و واحد باللحمة المفرومة ... البل أنواع يا راجل المافي شنو ؟!! و حقيقة حقيقة أولاد الزعماء القلتهم ديل كلهم ضحايا لكن ما زي ده .... هسي الود ده يطلع سوي كيف و هو من عمرو سته سنين تنحني له جباة الرجال و أي رجال ... وزراء و أصحاب مناصب دستورية و الناس الممشيين البلد ... أنا بقترح إنو نفتح بوست نناشد الأخ محمد السادس و لا نشيل ايميلو من طارق جبريل !!
Post: #15 Title: Re: صاحب السمو مولاى الحسن فى حديقة الحيوانات ( فيديو ممتع) Author: قيقراوي Date: 01-13-2012, 06:00 PM Parent: #14
Quote: أنا بقترح إنو نفتح بوست نناشد الأخ محمد السادس و لا نشيل ايميلو من طارق جبريل !!
يا زول الموضوع دا بوست ساي ما بحلو .. ما في نلكع نسافر .. ننقذ الود دا من مصيرو البائس المنتظرو .. نمش بالدرب عدييييل
اها اضرب كبد ابلك من برابري تكساس الما قريبة .. و انا بسرج خيلي من مكة و نتلاقى مراكش بس
و بالمرة نزور طارق جبريل .. و كان لقينا فرصة نتصور مع تيمليت
--------
نخوض معاهم مفاوضات شائكة .. يا اقنعناهم .. يا كمان هم اقنعونا و نبوس معاهم الايادي الصغيرة دي المافي شنو!؟
بس حتواجهنا مشكلة بشلافينا الكبيرة دي .. الشافعة دا الا يسلتف ليو قفاز بيسبول
Post: #16 Title: Re: صاحب السمو مولاى الحسن فى حديقة الحيوانات ( فيديو ممتع) Author: عبد الحافظ خضر Date: 01-13-2012, 07:02 PM Parent: #15
Quote: غايتو يا عبد الحافظ ..حيرتنا !!
.
لك السلام اخت امن مختار لكن ليس في الامر حيرة أبدا تناول المتداخلون هنا الموضوع كل من زاويته وانصب جل الحديث عن الجبابرة والخنوع دون التطرق للنظام الدستوري المغربي المغرب الان وان لم تصل الى درجة الملكية الدستورية وفقا للوضع في دول العالم الغربي الا انها الاقرب الى الدستورية كما انها تسير الى الامام في هذا الطريق ودونك المناقشات والأطروحات الي ظهرت عند اقتراح انضمام المغرب لمجلس التعاون حيث انصب الهم المغربي على الخوف من اثر ذلك الانضمام على مسيرة التحول الدستوري المستمر للملكية فيالمغرب الاقتصاد المغربي غير النفطي يعتبر من الاقتصاديات العربية والأفريقية نموا الحركة الثقافية في المغرب اصبح لها شان ليس على المستوى الاقليمي فقط ولكن حتى على المستوى العالمي ودونك المهرجانات العالمية التي تعج بها كازبلالنكا ومراكش ومدن الشمال كل ذلك كان نتاج سياسة تحول مدروسة ومخطط لها منذ أمد بعيد وكانت تحت عنوان عريض للملك الحسن الثاني وهو تحول المغرب من الملكية المطلقة الى المالكية الدستورية لا اقول في المغرب الكمال لانها تجابه أيضاً الكثير من الإشكاليات التي تجابهها دول العالم الثالث الاخرى ولكن اقول واشهد على تطور ملموس في كل الجوانب وعلى راسها الجانب الدستوري وجانب الحريات والديمقراطية وليتك تأخذي عدة دقائق للاطلاع على الصحف المغربية على الانترنت وخصوصا صحف المعارضة ان مكانة الملوك وأولياء العهد محفوظة في اكبر الديمقراطيات الغربية
Post: #17 Title: Re: صاحب السمو مولاى الحسن فى حديقة الحيوانات ( فيديو ممتع) Author: أمين محمد سليمان Date: 01-13-2012, 07:21 PM Parent: #16
Quote: يا زول الموضوع دا بوست ساي ما بحلو .. ما في نلكع نسافر
يا زول الكع براك ...محمد السادس حبيبنا ده بتاع كركبة و ممكن ما يسمع كلامي... بوست ذاتو ما بفتحو : برسل ليه ايميل بعد ما طارق جبريل يرسل لي ايميلو ... ----------- عبدالحافظ يا حبيبنا ... سلام
Quote: ان مكانة الملوك وأولياء العهد محفوظة في اكبر الديمقراطيات الغربية
الملوك وأولياء العهد في الديمقراطيات الغربية ما حاكمين زي الملوك العرب ... مختوتين للزينة و تنشيط السياحة ... لا في زول ببوس يدهم و لا عندهم كلمة مسموعة أصلا ! ياخي الفيديو الفوق ده لا يصلح إلا كمشهد في مسرح العبث ...
Post: #18 Title: Re: صاحب السمو مولاى الحسن فى حديقة الحيوانات ( فيديو ممتع) Author: عبد الحافظ خضر Date: 01-13-2012, 07:34 PM Parent: #17
Quote: عبدالحافظ يا حبيبنا ... سلام Quote: ان مكانة الملوك وأولياء العهد محفوظة في اكبر الديمقراطيات الغربية الملوك وأولياء العهد في الديمقراطيات الغربية ما حاكمين زي الملوك العرب ... مختوتين للزينة و تنشيط السياحة ... لا في زول ببوس يدهم و لا عندهم كلمة مسموعة أصلا ! ياخي الفيديو الفوق ده لا يصلح إلا كمشهد في مسرح العبث ...
العزيز امين سليمان لقد ركزت فيما كتبت سابقا على التحول التدريجي للملكية في المغرب لتكون على ذات النهج الغربي الملك يسود ولا يحكم ولعلك تتفق معي ان الأنظمة الغربية الحالية وصلت الى ما هيعلية عبرتطور طويل شهد الكثيرون المظالم والتضحيات المغرب الان يسير على هذا الطريق وفقا لدستوره ومن اللبشريات لكل أمة وشعب ان يكون سائرا في اتجاه صحيح لانه سيصل حتما لمكان صحيح وان طال الزمن حقبة الحسن الثاني اسست لحكم محمد السادس ولكن على نهج مختلف ومحمد السادس سيفتح بوابات اخرى لحقبة الحسن الثالث
Post: #19 Title: Re: صاحب السمو مولاى الحسن فى حديقة الحيوانات ( فيديو ممتع) Author: قيقراوي Date: 01-13-2012, 08:35 PM Parent: #18
Quote: الملوك وأولياء العهد في الديمقراطيات الغربية ما حاكمين زي الملوك العرب ... مختوتين للزينة و تنشيط السياحة ... لا في زول ببوس يدهم و لا عندهم كلمة مسموعة أصلا ! ياخي الفيديو الفوق ده لا يصلح إلا كمشهد في مسرح العبث ...
لوووووووووب
في بريطيانيا، البرتوكول بنص انو الملك دي ما تهبشا ذاتو .. و ان علوت شأناً مرة، مبارك حسين اوباما رئيسكم الوهم دا - ما عارف البرتوكول دا - رفع ليك الكُلف، ؤ عمل الحالة واااحدة راح خاتي يدو في كتفها!!
---------
دي برضو اضيفا لمسرح العبث اليانكي .. مع جلطات بوش الابن، الما كان عارف انو اسبانيا (مملكة)
Post: #20 Title: Re: صاحب السمو مولاى الحسن فى حديقة الحيوانات ( فيديو ممتع) Author: ود الخليفه Date: 01-13-2012, 09:00 PM Parent: #19
احد الوهابية بشرق النيل مؤذن جامع يصحي ابنه الصغير قبل الاذان الاول ويذهبوا للجامع
ويعطي ابنه المكرفون ويلقنه الاذان حتى يتعلم واصبح الصغير مؤذنا راتبا للاذان الاول
احد كبار الحلة اراد ان ينبهه بصوره لطيفة فقال له
ياخ الولد دا بتصحيه بدري كده ليه؟
فاجاب عشان يتعلم
فقال له
ياخ الوقت الانت بتصحيه فيه دا وقت بولتو خليه اليتم بولتو في السرير بعد داك جيبو صلاة الصبح
Post: #21 Title: Re: صاحب السمو مولاى الحسن فى حديقة الحيوانات ( فيديو ممتع) Author: وليد هلال Date: 01-13-2012, 09:27 PM Parent: #19
الاخ سعد مدني ،تحياتي لك ولكل المتداخلين، طبعاان تقبيل يد الملك وولي العهد في المملكة المغربية هو تقليد مغربي لا خلاف علية من الشعب المغربي نسبة للمكانة الكبيرة التي تحظي بها المؤسسة الملكيةفي المغرب وهي ملكية دستورية راسخة وليست موضع خلاف من المغاربة وكما قال الاخ عبدالحافظ خضر اننا ننظر للأمور من منظارنا نحن ، فهنالك فرق كبير بين الشعوب العربية المنتمية لأنظمة جمهورية والمنتمية لأنظمة ملكية0
Post: #22 Title: Re: صاحب السمو مولاى الحسن فى حديقة الحيوانات ( فيديو ممتع) Author: قيقراوي Date: 01-13-2012, 09:48 PM Parent: #21
Quote: وكما قال الاخ عبدالحافظ خضر اننا ننظر للأمور من منظارنا نحن ، فهنالك فرق كبير بين الشعوب العربية المنتمية لأنظمة جمهورية والمنتمية لأنظمة ملكية0
في ناس بتعبد البقر
هل سيصبح يوماً ما استهجان عبادة البقرمجرد نظرة بخرم منظورنا الخاص؟
لا يا اخي نحن ننظر للاشياء بمنظور انساني فحسب! دي كل القصة
هل طبيعي انو انسان يركع لطفل عشان يبوس يدو -مش لمجرد انو طفل- بل لانو ولي العهد!؟
بياتو معيار دي ح تستقيم!؟
Post: #23 Title: Re: صاحب السمو مولاى الحسن فى حديقة الحيوانات ( فيديو ممتع) Author: سعد مدني Date: 01-13-2012, 10:01 PM Parent: #21
نرحب بكل اصحاب السمو و الفخامة: مولاى امجد الزين، مولاي هانى عربى، الاميرة وضاحة، الاميرة دينا خالد، مولاى كوستاوى، مولاى قيقراوى، مولاى عبد الحافظ خضر، الاميرة امنة مختار، مولاى امين محمد سليمان، مولاي ود الخليفة، و اخيراً مولاى وليد هلال.
Quote: طبعاان تقبيل يد الملك وولي العهد في المملكة المغربية هو تقليد مغربي لا خلاف علية من الشعب المغربي نسبة للمكانة الكبيرة التي تحظي بها المؤسسة الملكيةفي المغرب وهي ملكية دستورية راسخة وليست موضع خلاف من المغاربة وكما قال الاخ عبدالحافظ خضر اننا ننظر للأمور من منظارنا نحن ، فهنالك فرق كبير بين الشعوب العربية المنتمية لأنظمة جمهورية والمنتمية لأنظمة ملكية
يا وليد هلال، هذا الذى شاهدناه فى الفيديو اعلاه، كان يمكن أن يكون مهضوماً بعض الشئ لو تم الانحناء و تقبيل يد الملك نفسه، و لكن أن يتم و بهذه الصورة التراجيكوميدية من اعضاء السلك الدبلوماسى لطفل صغير، فهذا مثار الدهشة و الاستغراب و الذى تناولته معظم التعليقات أعلاه بالسخرية المستترة، و كأننا فى مسرح العبث - كما ذكر امين اعلاه - فى مسرحية من تاليف صاموئيل بيكيت، او أن هؤلاء الرجال ما جادين كما قالت دينا، و كاتمين الضحكة جواهم..
تراجيدى لانه يعبّر عن درجة من درجات الخنوع مارسها هؤلاء ( المستقبلين) لهذا الطفل الأغر، لا تليق باعمارهم و مكانتهم، نحزن لها، و كوميدي لأننا ضحكنا من منظر هؤلاء الرجال و هم ينحنون و يقبلون يد طفل صغير جاء لافتتاح رسمى لحديقة حيوانات، و هو نفسه - اي الطفل الصغير- مارس الدور علي احسن ما يكون، علي اعتبار ان الاطفال ارتسموا فى اذهاننا باللعب و اللهو و شقاء الطفولة. وعموماً البوست خفيف الظل، ربما كان هروباً من واقعنا المحبط جداً.
Post: #24 Title: Re: صاحب السمو مولاى الحسن فى حديقة الحيوانات ( فيديو ممتع) Author: طارق جبريل Date: 01-14-2012, 01:26 AM Parent: #23
غايتو حاسدين القرد علي حمار أضانو قوموا لفوا
Post: #25 Title: Re: صاحب السمو مولاى الحسن فى حديقة الحيوانات ( فيديو ممتع) Author: Wasil Ali Date: 01-14-2012, 01:55 AM Parent: #24
فيديو مميز فعلا! شكرا يا سعد
Post: #26 Title: Re: صاحب السمو مولاى الحسن فى حديقة الحيوانات ( فيديو ممتع) Author: Mohamed Yassin Khalifa Date: 01-14-2012, 02:43 AM Parent: #25
سمو الامير ده يا طارق موش حضرنا عرس أمه وابوه قبل يومين؟ أها متين بقى أمير.. وصاحب سمو يدينو بتنباس من الكبار؟
ماشاء الله عليه.. الله يحفظو لبلدو (الود طالع لامه) بثقتو في نفسو دي! ومعاك يا بروف أمين.. الناس ديل كتلو البراءة الطفولية فيهو لكن دي ضريبة الملوك والملوكية.. يعني عمرك شفتا الملكة إليزبيث بتبكي؟
أما تقبيل اليدين.. فدي عادة جاتنا من المغرب وكلنا بوسنا يدين كتيرة من سيدي الميرغني لأولاده وأولاد المهدي والأشراف والسادة والشيوخ وحتى الخلفاء هي ما عادة جديدة علينا ككل.. بس الجديد قيها إننا ما بنبوس يدين الشُفع!
كتر خيرك يا سعد..
Post: #27 Title: Re: صاحب السمو مولاى الحسن فى حديقة الحيوانات ( فيديو ممتع) Author: عبد الحافظ خضر Date: 01-14-2012, 04:11 AM Parent: #26
Quote: هل سيصبح يوماً ما استهجان عبادة البقرمجرد نظرة بخرم منظورنا الخاص؟
. الاخ فقيراوي. لك السلام دوما لن يصبح بل هو فعلا حاصل فاستهجان عبادة البقر هي مجرد نظرة من. الخرم الخاص. لمن يستهجنها
فبعض الذين يعبدون البقر يستهجنون. عبادة الاخرين أيضاً بنظرة من خرمهم الخاص أيضاً
Post: #28 Title: Re: صاحب السمو مولاى الحسن فى حديقة الحيوانات ( فيديو ممتع) Author: معاذ حسن Date: 01-14-2012, 07:14 AM Parent: #27
مع التأكيد على كلام عبد الحافظ
الما عندو كبير يشتري له كبير واحد من مشاكل السودان انو كبارناانتهو والقرون بقت متساوية . الكان راعي بقر عمل حركة مسلحة و بقى مستشار للرئيس والكان طلبه دخل الجيش وعمل انقلاب وبقى رئيس يا ريت لو عندنا ملك والا سلطان يحظى بالحب والاحترام ويجمع عليه الناس اذن لما تقسمت بلدناوأفينا دهرا نقتل بعضنا بعضا وتفرقنا طرائق قددا
Post: #29 Title: Re: صاحب السمو مولاى الحسن فى حديقة الحيوانات ( فيديو ممتع) Author: ود الباوقة Date: 01-14-2012, 07:25 AM Parent: #28
انا مستغرب اخونا ود جبريل قاعد مع الجماعة ديل كيف
هههههه
والله نحن في السودان في نعمة
مخير الله
Post: #30 Title: Re: صاحب السمو مولاى الحسن فى حديقة الحيوانات ( فيديو ممتع) Author: معاوية عبيد الصائم Date: 01-14-2012, 12:29 PM Parent: #29
طارق هنا سادة وهناك سادة
حظك عندك ساااادة كتاااااار
حفظ الله سيدى سيد طارق جبريل اميييييييييييييييييين
لكن سيدكم مدررررررب الكلام سيدنا ..الذى يجيد اللغة العربية ...ياطارق المسخوط ممكن نرسل ليكم سيدنا يتدرب عندكم ؟؟؟
