Post: #1
Title: أمسية عثمان بشرى , وايمان آدم , وامين عكام , (ملخص + صور)
Author: مركز الخاتم عدلان
Date: 01-12-2012, 10:52 AM
Parent: #0
مركز الخاتم عدلان للإستنارة والتنمية البشرية
الصالون الادبى
ليلة من الف ليلة وليلة , الجيتارست (امين عكام) يصدح بخليفة موسيقية , والشاعر (عثمان بشرى) , والشاعرة (ايمان آدم) يصدحان شعراً , وجمهور تجاوب مع الاداء الراقى .
أمسية الاربعاء 11 يناير 2012 , كانت من الامسيات التى سوف تبقى فى الذاكرة طويلاً .
شكراً لهم.
شكراً لكل المبدعين على امتداد الوطن , الذين يحفرون فى الصخر ويتحدون مناخاً يسخر من الابداع او يُدجنه على الاقل .
|
Post: #2
Title: Re: أمسية عثمان بشرى , وايمان آدم , وامين عكام , (ملخص + صور)
Author: مركز الخاتم عدلان
Date: 01-12-2012, 11:01 AM
Parent: #1
وتحدث عثمان بشرى شعراً
البنيات البمرقن من مسامك
كل ما غنيت عشية امتحانك
زى وجع صحى وكأنك لما تتحكك معاهن بركبن فرس الرهان
البنيات الراهف السر
وما يأتى نهار الدهشة
بتمصمص مخاوفك ضلفتين
عليكن قدرة الموت
والفتى الغبيان مورط فى الجنون
يرهد حشاء الدهشة , ويسافر فى النعاس حفيان الا من الرهافة
فما تيسر من وجع , بستحملك يا موت طرى
ويا موج , لو بتعرف طول حبالك
كنتا كتفتا البحر من جنو , والريح , والبنيات البمرقن من مسامك
كل ما غنيت عشية امتحان
يا الله
ما قوة سماءك من غيرنا ؟
ما لك ما بتدينا ؟
ونحنا حبات اليقين , والسبحة , والدهشة بتمص خاطر الشيلنو عنك
يا الله
ما لك ما بتيجنا ؟
يا الله البنات فكرة ؟
سهرنا عليك , كأنى انا الوحيد التوهت فى الهدى والصراط عارى
مُكتف بالسلف
والورطة
يا موسى ما شج البحر غير ديل
ديل , عصافير القيامة الفينا
لبسات الداعش والهم فساتين
مُسلمات حد الفضيحة , ولا يزال فرس الرهان ابليس
سليمان لما اتورط سباء
بلقيس نست توبها
وتدنت مسرح التاريخ
وجيانك بحر نتعمدك
مرقت مخاليقك
طشيت
طشيت , جرحتنا بالدوار
وكنتا بتطيب كسيحك , من داء مفاصل , وحمى عميانة ورمت
فجأة , اكتشفناك سرنا الغايب , محمد ابن عبدالله
توخينا الحذر
قامت قيامة الناس هناك
واستحضر التاريخ شبابيكنا
وفتحنا على رياح تانية ومشت
لسه بتوترنا بحديثك آ نبى ؟
لسه بتحملنا الامانة ؟
وانتا عارف عبء هذا الجرح فينا
البنيات والرهاف المُمُكنة
وكأس من حزن ناعس
انا داقس
ما كان دا احساس بالفداء
ما كان دا حلمك آ خليل
كل الخلوق الليلة كبش
والفالح يرجع آدم التفاحة
من وين نجيك يا الله ؟
آ ؟
من وين نجيك يا الله مليانين شرافة ؟
والبنات البمرقن من مسامك كل ما غنيت عشية امتحان
يا الله ما وقفت سماءك من غيرنا
مالك ما بتجينا ؟
مين يسوق القمرة لحفلة ضلام ؟
|
Post: #3
Title: Re: أمسية عثمان بشرى , وايمان آدم , وامين عكام , (ملخص + صور)
Author: مركز الخاتم عدلان
Date: 01-12-2012, 01:13 PM
Parent: #2
يواصل ود بشرى حديث الشعر
شتل المدى الاطفال
وعدمنى اللباس
نقريش كلام
او هسع فى لحظة غباش تريان
لو يقدر زول يجى من هناك او بكرة
لو نطفىء الشمس فى ذوقك
ما نضفنا غير الشوف , عشان نسهر بدون الالفة والليل , والسلام الانتقالى
وفى سفر عادى ومُشقق بالحنين والحردة , من اقصى السهر , اقصد سكر
صحى بنسأل عليك
كانت وريقاتك سهن فى الريح
رمت عُقل المداين بالبلل
شتل المدى الاطفال
وعدمنى اللباس
عريان
فى فوضى مُطلقة مُنتبه عفواً
طبقتا حيشان البلد فى خف وضليت السرير
سهران مُربينى السكات بالثرثرة
ومزنوق
يا الله , احتملنى
عشان اجيك ممافى
او من خافى
او من دكتك مستور
كدحاً , مُستند على فكرتك فى الشلهتة
وفى اى باب ؟ , علقتا ابواب للبنات
احب دينك .
ويقدم التحية لشاعر الشعب محجوب شريف
يا حبيب , قسى الايام
بالله وين ؟ .. كيفك ؟
دقت مراكبى حداك
موج الحنين دوار
الرحلة ليك طالت
ورينى بس طيفك
رميت عليك حملى
والقلب كان ضيفك
فتحتا ليهو الباب
سكنتو , طمئنتو
عشيتو , غطيتو
لمن بقيت بيتو
واعتاد على كيفو
بُنك يرد الروح
والشاى عصارى الدوح
والضحكة تعريفة
|
Post: #5
Title: Re: أمسية عثمان بشرى , وايمان آدم , وامين عكام , (ملخص + صور)
Author: سلمى الشيخ سلامة
Date: 01-12-2012, 02:22 PM
Parent: #4
عثمان بشرى يا احمل لواء الكلمة من الفين عام
بردت لى جوفى يومى اللاقيتك
يبرد حشاك يا زول
يا دفقة من النيل
يا شاعرا مهبوش بالحب وما تبعه
ليك المحبة تدوم
واتمنى ان يكتمل هذا البهار الناصع اللغة فى دفتين نقراهم
كتاب وشجن يا اجمل الشعراء
يا انبل الشعراء
اتمنيت لو كنت هناك
عشان احضن الكلمات معاكم
شكرا مركز الخاتم عدلان
يا ضو فى عز الضلمة
|
Post: #6
Title: Re: أمسية عثمان بشرى , وايمان آدم , وامين عكام , (ملخص + صور)
Author: مركز الخاتم عدلان
Date: 01-15-2012, 08:33 AM
Parent: #5
يديك العافية أ/ سلمى
مُبدعين يتحدون واقع صخرى صعب للغاية , ويتدفقون ابداعاً .
|
Post: #7
Title: Re: أمسية عثمان بشرى , وايمان آدم , وامين عكام , (ملخص + صور)
Author: مركز الخاتم عدلان
Date: 01-15-2012, 08:58 AM
Parent: #6
|
Post: #8
Title: Re: أمسية عثمان بشرى , وايمان آدم , وامين عكام , (ملخص + صور)
Author: عبدالعزيز حسين عبدالرحيم
Date: 01-15-2012, 09:08 AM
Parent: #7
حولا السنين عملت عمايلها في عثمان بشرى بس إن شاء الله ما تكون غيرته
عثمان الطويل الاخدر الرقيق - يضحك زي الشفع - يعاين بي خجل - يتكلم بي همس
اخر مره قابلته سنة 98 في أبوجنزير جانا من اتنيه حزين وزعلان من شلة الافرنجي قال كلام سمح وسأل سؤال ما بتذكره
البلاقيه يبلغه التحايا والتحيات
|
Post: #9
Title: Re: أمسية عثمان بشرى , وايمان آدم , وامين عكام , (ملخص + صور)
Author: مركز الخاتم عدلان
Date: 01-15-2012, 09:17 AM
Parent: #7
وتحدثت أيمان آدم شعراً
ادلق علي من البهاء
ولا تخف
اشرق بدمعك , لا تخف
كن انت , انت
وفترتا معاك
يا شوق ودار
يا خطوة تبعد للمشوار
انا فيك غلبنى الهم والروح الضاقت من صدرى
الروح الضاقت بالاسوار
فتشتا الراح فى بير الروح
دسيت الروح جوه المنديل
دسيت الروح من شر القيل
جايك عديل متوسدة فى الليل القنديل
القاك تعابت فى صمتى وما عارف انو الصمت تقيل
حصنتك من هجسان القلب
واتغالطو فيك الهوى والبوح
والنغم الفضاح المشروح
وانتصر الشوف وحصافة الصبر
حايلت الهم
وقفلتا الباب
ما عارف انو هوى ارباب وبروقى يقين
ما ضىء كداب
شيلاك العين , امان وعديل
دسيت الروح من شر القيل
دسيت الروح جوه المنديل
منديل ابيض من لبن الأم
واحن عليك من حضن يُضم
منديل اوسع من قلب فسيح
واصدق من همس بشيلو الريح
منديل مشغول من نور الرب
منديل الحب
وفترتا معاك
يا كم انسان .. يا حس فنان
يا زول مجدول جوه الاشجان
راهنتنى بيك .. راهنت عليك فى عصف الريح
|
Post: #10
Title: Re: أمسية عثمان بشرى , وايمان آدم , وامين عكام , (ملخص + صور)
Author: عبداللطيف حسن علي
Date: 01-15-2012, 10:01 AM
Parent: #9
فوق لمزيد من الامتاع
|
Post: #11
Title: Re: أمسية عثمان بشرى , وايمان آدم , وامين عكام , (ملخص + صور)
Author: مركز الخاتم عدلان
Date: 01-15-2012, 10:14 AM
Parent: #9
وتواصل أيمان الحديث شعراً
بعيد عنك
بخير الدينا وافراحها
وبعيد عنك .. مُرتاحة عيونى المُرتاحة
بعيد عنك .. لا زارنا العيد
لا شوفنا جديد
لا نبتت فى صحراى واحة
بتفتح فى جراحى جراحك ؟
انا ياخى نسيت , ومعاك كمان طعم الراحة
ونسيتها اقول ليك بصراحة
البت الـ فى جواى وردة , طفلة , زهرة ريدتنا الفواحة
بعيد عنك .. والدنيا فرايحية
بتحرش اشجانى عليا ؟
ما قولنا خلاص نكبر وننسى
وانتا بتكبر فينا وتقسى
بس سويتا شوية , شوية
زى ريدتنا الكبرت حبة
ويوم كبرت
حبيتك وصفيت النية
بتحرش اشجانى عليا ؟
وعزمتك يوم كباية شاى
ما كانت شاى , انا عارفة معاك طعم القهوة
زى تسجد وتاخد ليك سهوة
وتروح مابين الروح والقلب
الله .. وبصدق انى بحب
مدفوعة فواتير اللهفة
مذهول اللُب
انا جيتك يا زول بالعنية
اطمن بيك
واحسك فى جواى اقرب .
وتقدم الامنيات لابنتها (غيداء) التى ابصرت نور الحياة قريباً
بتى حبيبتى , بتى الجات
تنطط فى حدايق الذات
ترفس مرة بالجنبات
وتقدل جوه فى بطنى
كأنها قادلة فى شمبات
بتى النور , تسعة وتسعة
تسعة شهور
اشيلها معاى محل امرق
بتى النور , بت العتمة والموية
بأذن المولى لا تغرق ولا تشرق
جميلة وهى تتخلق
ويا ذاتى التى فى ذات
غطاء بردان
غنا التومات
حديث وكلام , بهار الدنيا فى اللمات
حبيبتى الجات
وبتى الاولة فى القدام
بتى الحلوة كنداكة , ويبقالها الزمان خدام.
|
Post: #12
Title: Re: أمسية عثمان بشرى , وايمان آدم , وامين عكام , (ملخص + صور)
Author: مركز الخاتم عدلان
Date: 01-15-2012, 10:33 AM
التحيات أ/ عبدالعزيز حسين
يتعتق عثمان بشرى بمرور الزمن , ويزداد شعره نضجاً وعمقاً .
*
شكراً للمداخلة أ/ عبداللطيف حسن .
|
Post: #13
Title: Re: أمسية عثمان بشرى , وايمان آدم , وامين عكام , (ملخص + صور)
Author: مركز الخاتم عدلان
Date: 01-15-2012, 10:43 AM
Parent: #12
|
Post: #14
Title: Re: أمسية عثمان بشرى , وايمان آدم , وامين عكام , (ملخص + صور)
Author: مركز الخاتم عدلان
Date: 01-15-2012, 11:46 AM
Parent: #13
|
Post: #15
Title: Re: أمسية عثمان بشرى , وايمان آدم , وامين عكام , (ملخص + صور)
Author: مركز الخاتم عدلان
Date: 01-15-2012, 12:11 PM
Parent: #14
|
|
