الامين البرير: لا توجد قوة تمنعنى من ممارسة نشاطى

كما ورد فى جريدة الراى العام اليوم الجمعة و على الصفحة الاولى:

Quote: تسلم المكتب التنفيذي لنادي الهلال أمس خطاباً من الكاف بواسطة الاتحاد السوداني لكرة القدم يشير فيه إلى ان لجنة الاستئناف التابعة للاتحاد الإفريقي لكرة القدم (كاف) قد أوقفت الأمين البرير رئيس الهلال لأربعة أعوام وعدم ممارسته لأي نشاط رياضي طيلة هذه المدة .. وأضافت اللجنة عقوبة مالية عشرة آلاف دولار على رئيس الهلال. ومن جانبه علق البرير على القرار وقال انه يعلم بالقرار منذ أكثر من شهر مؤكداً أن هذا القرار لا يمنعه من ممارسة نشاطه الرياضي فى الهلال ، وأضاف : ( العقوبة لو كانت أربعين سنة مش أربعة سنوات) سأظل فى منصبي رئيسا للهلال ولا توجد قوة في الأرض تمنعني من ممارسة نشاطي لأنني انتخبت عبر الجمعية العمومية.وأشار البرير انه اعلم الإدارة القانونية بالهلال بالقرار وطالبها بان تشرع و تمضى فى رفع الاستئناف المطلوب إلى المحكمة الدولية ويستأنف القرار لدى محكمة الكأس في لوزان ..

عنجهية البرير امر مفروغ منه
بس اود سؤال اهل الرياضة: هل يمكن الطعن فى قانونية نتائج مباريات الهلال و مشاركاته المحلية
و الافريقية فى حال لم يتم اختيار او انتخاب رئيس جديد للنادى؟؟؟؟

و الله عفيت منك يا البرير يا الكلس عفوا راضى و شامل

الناس كلهم مكنكشين فى محلاتهم تجى تكون نشاذ انت و تنسحب دا لا يجوز عرفا و لا قانونا فى السودان

يالله كنكش مع المتنكنكشين و ان شاء الله الرياضة تلحق الزينين

هلال شنو يا زول اوعاك تسمع كلام الحاقدين و الشمات ديل ما عندك اى شغلة بيهم و لا بالهلال المهم الكنكشة و بس و لاشيء غيرها

ماهم ديل ناس الاتحاد الاكبر منك لا بيهشوا و لا بينشوا و لا عارفين انه الكاف وقفك و الله ما وقفك ومع ذلك مكنكشين تجى عليك انت المسكبن دا بس

و ناس اللجنة الاولمبية مشوا قطر اتفسحوا و جوا راجعين زى الترتيب و لا هماهم مرمطة السودان و لا حاجة و قاعدين منفخين يبرروا فى مواقفهم



لك الله يا سودان اذا كان من يحمل فيك هم الرياضة هم البرير و امثاله

و الفضيحة الكبرى هى ذلك القيادى فى اتحاد السلة الذى ادعى انه هو من ضرب الحكم الجزائرى
هل عوقب على شهادة الزور و تضليل العدالة الكروية

و ايضا ذلك المستشفى الخاص الذى استخرج الشهادة الطبية المزورة ما راى المجلس الطبى فى هذا التزوير؟؟

الاخ العزيز عوض لك التحايا مثنى و ثلاث و رباع
و عذرا فقد فات على تحيتكم فى مداخلتى الاولى فلك العتبى حتى ترضى
لكن بعيدعنك جيت زعلان لانه مامكن واحد يتصرف غلط و يعاقبوه و مازال مكابر
و لا واحد من الاتحاد و لا واحد من الوزارة المعنية و لا زول مسئول و لا ناس ادراة الهلال و لا حتى جمعيته العمومية يقول ليه تلت التلاتة كم

و الله لو واصل رئيس للهلال تبقى مصيبة لكن نقول شنو فى بلد كل زول شايف نفسه انه ما فى غيره

الطف بنا يا رب