ماشين فى السكة نمد بشريات (كبرى السوق المركزى بالصور

الكبرى فى مرحلة التشطيب وشكلوا سيخفف كثير من زحمة المرور فى منطقة السوق المركزى الخرطوم

وهذا انجاز يضاف لسجلات الانجازات السابقة للانقاذ

والقادم احلى

شكرا اختنا فدوي

بارك الله فيك

الأخت فدوى الشريف,
متى بدأ العمل فى هذا الكبرى؟

الاخ ود الباوقة
انجازات الانقاذ الخدمية السابقة والاتية
ولسة القادم زى ما قلت سيكون أحلى
مع كل الود والتقدير

الاعمال جارية على قدم وساق حتى مرحلة اكتمال الكبرى

Quote: متى بدأ العمل فى هذا الكبرى؟

السؤآل واضح وما محتاج لى فهامة.

ياقلقو
انت متى دا بهمك بشنو ؟

فدوي بت عمي
مسكاقمي
العمارات الشاهقة والكباري في الخرطوم لا تعني ان البلد قد تطورت
جميل أن تكون عاصمتنا جميلة ورائعة
ولكن الناس في وطني لا يحتاجون لإصلاح صواني المرور
بل يحتاجون لإصلاح صواني الطعام

غايتو ما عندنا مانع نجي للسوق المركزي زاحفين على بطنا
بس يكون الاسعار رخيصة
المواطن ما عندو مانع يمشي ( الجكة دي لله ) لغاية ما يصل السوق
بس يقدر يشتري

نغفو على حلم الرغيف ولم نجد .. .. إلا خيالاً منه في الإغفاء
ونغيب في الصمت الكئيب كأننا .. .. كهف وراء الكون والأضواء
ونلملم الأحلام من صدر الدجا .. .. سوداً كأشباح الدجا السوداء

لك ودي

Quote: وهذا انجاز يضاف لسجلات الانجازات السابقة للانقاذ والقادم احلى

عندما تتقزم الطمحات و تتضاءل الحلام و تموت همم الرجال , يصبح

انشـاء كبري انجـاز
حفـر نفق اعجاز

ويصبح الواجب منة
ويهتف و يصفق الهتيفة


وتبقى التنمية عمارات و اقتصاد منهار

Quote: عندما تتقزم الطمحات و تتضاءل الحلام و تموت همم الرجال , يصبح

انت يا أحيمر اخوى قاموس اللغة العربية دا غيروه ولا شنو ؟
بل هذه تنمية تستحق الاشادة

حمزاوى
ويافينا
ياقريبى الوضع ليس بهذا السوء الذى تتصوره
الدنيا بخير
ولك من الود اطنان

اب


شكرا فدوى

شكرا اخى الشفيع
لك الود

غايتو انا مع قلقو دا. سلو روحنا لحدت ما وصل المرحلة دي!
الشارع دا اتعطل يمكن اكتر من 30 شهر
انا شخصياً نسيتو زاتو :)

والأهم من الكوبري المدينة الرياضية الجمبو


يا فدوية تعالي نعزمك بيغادي مشويات شامية الإيوان الدمشقي في الحديقة التحت الكوبري دا

Quote: غايتو انا مع قلقو دا. سلو روحنا لحدت ما وصل المرحلة دي! الشارع دا اتعطل يمكن اكتر من 30 شهر انا شخصياً نسيتو زاتو :) والأهم من الكوبري المدينة الرياضية الجمبو يا فدوية تعالي نعزمك بيغادي مشويات شامية الإيوان الدمشقي في الحديقة التحت الكوبري دا

يامحمد يوسف
شكرا على العيزومة بس مابحب الاكل الشامى دا
اهو بعد الضيق حصل الفرج
هو الكبرى قرب اتشطب تانى سؤال متى لاجدوى منه ولا شنو ؟
دايرين تطلعوا رقم وطنى ولا شنو اصلو

Quote: انت متى دا بهمك بشنو ؟

كدى بالأول جاوبى لى على سؤآلى بعد داك انا بوريكى انه بيهمنى فى شنو .

تمام والله ومبرووك الكوبري .... زاتو بساعدنا بعدين في سرعة الوصول لمكان الالتحام ...

وليكم يوم يا كيزان

Quote: كتلوك الناس القصر الناس المأفونين الناس البالة مغطى والساسة المبيوعين كتلوك خدم الراسمال يا زول يا عاتى يا زين الفرحو الامريكان والربحو تجار الدين كتلوك وكان قاصدين فى ذاتك ناس تانين الناس ام عرقا يجهر السرها يوم حيبين يا عادى كما العمال والريح الحينا بحين يا صاحى كما الآمال فى عيون المحرومين ماشين فى السكة نمد من سيرتك للجايين شايفنك ماشى تسد وردية يا قاسم امين

فدوي ازيك ... في البداية بس عايز الفت نظرك لانه عنوانك مقتبس من قصيدة لمحمد الحسن سالم حميد وهي من أدبيات الحزب الشيوعي السوداني ... وإسم القصيدة قاسم أمين وهو قائد نقابي وعمالي شيوعي ... وقد تغني بها كورال الحزب الشيوعي ...
ثانياً بخصوص الكبري ألف مبروك وعقبال مليون كبري وكبري ... عارفه السنة الفاتت اول ما جيت السعودية طفشان من البلد ... ركبت البص من جدة للرياض والله وما طالباني حليفة في ألف كبري زي ده ... قول لي عديتهم كيف ... لا ما عديتهم لكن كل كيلو متر او كيلومترين بتلقي في كبري نفس ده عشان الناس ما تقطع الطريق السريع اها مكتوب فيه مخرج رقم كده لمن قربت للرياض كانوا 937 بعداك الدنيا بقت ليل ما شفت الباقيات ... اها كمان اقول ليك حاجة في مليون طريق زي ده في السعودية اتخيلي في كم كبري زي كبرينا ده ... اغرب حاجة جنبنا في كبري ضخم جداً شغالين فيهو فترة طويلة ... اها كنت منتظر الإفتتاح قلت الواحد يمكن يعزموه عضة كاربة بإعتبارهم جيراني وكده كل يوم بشوف الكبري قرب يكمل ... اها الكبري لمن كمل شايف العمال بينضفوا قلت خلاص العزومة والإفتتاح قرب وأكيد حا يجي مسئول كبير يليق بالكبري الكبير ... يا زولة جيت تاني يوم ماشي لقيت ليك الكبري فاتح والعربات ماشه وجاية عادي ... قلت يمكن المسئول ما فاضي والإفتتاح بعد فترة يا زوله يوم سألت لي واحد صاحبي من الموضوع قال لي أنت يا زول ما عندك شغلة لو الناس دي بارت تفتتح الشوارع والكباري دي ما حا يشتغلوا حاجة هنا كل يوم في كبري وشارع بيتعملوا ... قال لي تصدق هسه وزارة النقل متعاقدة علي 30ألف كيلو متر بتاعت أسفلت جديد للسنوات الجاية وشوف دي حا يكون فيها كم كبري ... سرحت وإتذكرت ثورة الكباري بتاعتنا ... والله صحي نحن ناس مساكين ... ما تقولي الزول ده بهرته السعودية ... يمكن إحتمال أيوه لأنه المابتشوفه في بتي ابوك يخلعك ... بس كمان عرفت أنه التنمية واحدة من الأعما البتقوم بيها الحكومة دون أي منة علي شعبها وهذا من صميم أعمالها ... ولك تحياتي ... كنت عايز احكي ليك نكتة لكن شايف روحي اتثاقلت زيادة من اللزوم فما في داعي ... لك ودي وتقديري ...

زناتي ازيك

Quote: ركبت البص من جدة للرياض والله وما طالباني حليفة في ألف كبري زي ده

يا اخوي كترت المحلبية
الطريق ده انا مشيته زي مية مرة وممكن اعد ليك الكباري واحد واااحد

Quote: اها كمان اقول ليك حاجة في مليون طريق زي ده في السعودية

المحلبية كترت خالص خالص يا زناتي
زي الطريق ده في 9 طرق فقط يا زناتي

لا احد ينكر انو المملكة بها طرق دولية مترابطة وفي غاية المواصفات
ولا ننسى انها بتصدر 10 مليون برميل يومياً ومنذ اكثر من 30 عام
يعني دخلها اليومي حوالي 4 بليون ريال يومياً (ميزانية دولة)

تحياتي يا غالي

Quote: وهذا انجاز يضاف لسجلات الانجازات السابقة للانقاذ

الكوبري دا إنجاز؟؟؟
يعني إنجازاتكم من العينة دي؟؟؟
الكبري دا لو تكلفته فاتت المية ألف دولار تكون المصيبة كبيرة
أها والمصيبة الأكبر ثمن هذا الكبري يساوي ثمن عربية واحدة
يركبها ايا من الوزراء الخمسمية في السودان

الشفيع كيفك

Quote: لا احد ينكر انو المملكة بها طرق دولية مترابطة وفي غاية المواصفات ولا ننسى انها بتصدر 10 مليون برميل يومياً ومنذ اكثر من 30 عام يعني دخلها اليومي حوالي 4 بليون ريال يومياً (ميزانية دولة)

انت اكيد شاهدت فى الرياض كيف الكبارى تتقاطع فى شمال وشرق الرياض

وطيب سيبك من السعودية شوفت الكبارى فى القاهرة عارف فى كم كبرى فى الزمالك بس ؟

شوفت كبرى 26 يوليو طولو كم ؟

كبرى26 يوليو بيمتد من بداية الشيخ زايد حتى ش صلاح سالم عند مستشفى العباسية

فدوتنا سلام ت
مدو اكثر من عشرين سنة في كباري
رحلنا المالديف ولا شنو?

Quote: ماشين فى السكة نمد بشريات (كبرى السوق المركزى بالصور

عندما يصين السجان سجنه بإقامة طريق يؤدى الى احدى غرف السجون
طريق لراحة السجان وليس حبا فى المساجين الغلابة
طريق يؤدى الى مسكن السجان ومتجر السجان وحى السجان

.........

وبالرغم أنه يصب فى مصلحة السجان فإنه يأخذ أضعاف أضعاف ثمنه ويضغ ما تبقى فى جيبه وهو اضعاف اضعاف قيمة الكبرى
والذى ستهترئ اعمدة إضاءته الصناعة الصينية مثل بصات الوالى بعد اسابيع قليلة من أفتتاح طريق الجلاد السجان

وسيكون منظره قبيحا كمستشفى الباوقة يا ود الباوقة

أنا بس عايز أعرف الرابط شنو بين العباطة والمعارضة الكيبوردية؟؟؟
يعني لو السعودية عندها مية ناطحة سحاب ومليون طريق دائري ومعلّق ومصر عندها 5 مليون طريق معلّق المانع شنو أنّه السودان دا يكون عنده كبري واحد بس؟؟؟

بعدين الكباري والطرق الدائرية وغيرها من الانجازات تبقى انجازات للشعب السوداني حتى بعد ذهاب البشير

كما بقيت انجازات عهد مبارك التي بفاخر بها البعض للشعب المصري بعد ذهاب مبارك
البعض يظن أنّه لن يكون معارضاً كيبوردياً لا يشق له غبار غير أن يكون "كسّار مقاديف لوطنه"

ويا ها ذاتها "جو يساعدوه في دفن أبوه دسّ المحافير"

دعونا نفرّق بين ما هو وطني وما هو حزبي وبين ما يخدم المواطن حتى ولو بأّول خطوة وبين المكايدات الغبية التي لا تقدّم للمواطن أي مصلحة ولا ترفع عن كاهله معضلة

Quote: زناتي ازيك Quote: ركبت البص من جدة للرياض والله وما طالباني حليفة في ألف كبري زي ده يا اخوي كترت المحلبية الطريق ده انا مشيته زي مية مرة وممكن اعد ليك الكباري واحد واااحد

فدوى والشفيع ......سلام
اول شى يا الشفيع انت قاعد معانا فى السعوديه النحن فيها لينا تلاته وتلاتين سنه
سنه دى واللا قاعد فى المسعودية؟
كلام الزناتى ده صحيح مليون فى الميه ماتنسى كل مخرج لقرية او هجرة
او معبر جمال فيه كبرى احسن من كده كمان..
فدوى يعنى ده انجاز الانقاذ طيب انجاز حكومة الوحدة الوطنيه وينو والحكومه
المريضة انجازاتها شنو؟
ماقلتو الانقاذ دى انتهت مع توقيع اتفاقية السلام وحصل تحول ديمقراطى
يعنى ده اعتراف انه انقلاب الانقاذ الى الان مستمر؟؟
يحلنا الحلا بله،،،

العباطة الجد جد انو الناس تفرح بكوبري..
و انو الرئيس و كبار المسؤولين و جميع الحرامية يجوا يفتتحوه..
و العباطة الاكبر هو فاصل المن و الأذى الرخيص الذي يبدأ مع الافتتاح و لا ينتهي ابدا.

اختنا فدوي شكرا علي الافادة

بس عشان نلقا فرصة نكون ساهمنا في مشروع الفلاي اوفر ده

تتعبي روحك شوية وتسالي المهندس المسئول عن موضوع المطر متذكرنو

وعاملين حسابهم و عارفين انه الموية بتنزل من فوق لي تحت ونعمل بركة وتسد

الشارع .....

بس عشان المطر جاي جاي

وتسلمي

العباطة الأكبر أنّه الناس تشوف الفرح بكوبري يقف ضد نضالاتهم الوهمية
وأنو الرئيس ولا كبار المسؤلين لما يفتتحوه المعارضة ح تفقد كرت

النظام به من الأخطاء والمساوء ما يكفي لتعريته وحشد الناس ضده

ولكن معارضة العباطة تختار من "تكسير مقاديف" مشاريع التنمية وما يبقى في الوطن بعد ذهاب الحكام وسيلة للنضال

والناس العامّة في السودان بيفرحوا بالقليل البسهّل ليهم حياتهم وما متطلعين لحال السعودية ولا مصر

والبقيف قدام أمالهم البسيطة دي حتماً "عبيــط" سواء كان باسم النضال أو باسم حركات ذات أمواز

ود الموج
ازيك
انا مسؤول من تغطية الطريق ده من اوله لي اخره بشبكة الجوال
نعم توجد مخارج كل كم كيلو للقرى والهجر لكن في الغالب بتكون على اليمين وما فيها كباري كل 1-2 كيلو

تحياتي

فرانكلى
سلمت يداك ياريت كل من يعارض يفهم بان هذه المشاريع هى خدمية فى المقام يستفيد منها المواطن السودانى .
البقارنوا بين السودان والسعودية كما علق اخى الشفيع انوا السعودية بلد لم تشهد تشرزم وصراعات داخلية كما شهدها السودان الذى دفع فاتورة حرب طيلة سنوات وظل حتى الان يدفع ..السعودية تعتبر من اكبر الدول النفطية فى العالم اقتصاديا وبلاشك هذا له مردوده الايجابى فى انشاء الاف المشاريع الخدمية من كبارى وطرق وهى مشاريع ذات تكلفة عالية جدا ..لامجال للمقارنة .

المحسي سلام

Quote: انت اكيد شاهدت فى الرياض كيف الكبارى تتقاطع فى شمال وشرق الرياض

لا تبخسوا الناس اشياءهم يا ناصر
والالف ميل بتبدأ بي خطوة
وفدوى قالت ليكم (نمد)، ودي بشريات فقط


نحنا عايزين واحد زي ده في ود البشير- امبدة، اكتر اشارة مزدحمة في امدرمان

يا فرانكلي

Quote: البعض يظن أنّه لن يكون معارضاً كيبوردياً لا يشق له غبار غير أن يكون "كسّار مقاديف لوطنه" ويا ها ذاتها "جو يساعدوه في دفن أبوه دسّ المحافير" دعونا نفرّق بين ما هو وطني وما هو حزبي وبين ما يخدم المواطن حتى ولو بأّول خطوة وبين المكايدات الغبية التي لا تقدّم للمواطن أي مصلحة ولا ترفع عن كاهله معضلة

لا شكر الله سعيكم
(وكمان جابت ليها مقاديف وحفر قبر)
الوطن ما كان رسل ليكم كرت دعوة
عشان تنقلبوا علي خياره الديمقراطي
وتجو تخموا قروشه وتبنوا عمارات في ماليزيا ودبي
وحتي في الطائف والرياض وكافوري
وتلوحوا ليهو بكبري
لا جاب ولا ودا
(شايف الإنجاز دا، يللا سبحوا بحمدنا صباح ومساء)
عاملين زي الأخ الكبير اللبع الورثة بعد وفاة الأب
وباع البيت والتجارة والعمارة
وعمل ليهم برندة جميلة في ضواحي الكلاكلات
وما داير زول يسالوا القروش راحت وين
دايرهم كل صباح يشكروه علي البرندة الجميلة في ضواحي الكلاكلات

كدي بالله قارن لي بين تكلفة هذا الكوبري وبين عربات الوزراء الكم وثمانين ديل
(ممكن يكون في أحسن الأحوال أكثر من ثمن عربيتين ليلي علوي يستخدمهم وزير واحد بس؟؟؟)

لا نقول شكر الله سعيكم
(ما قلنا ليكم تعالوا أحكمون، نزلتوا في إنتخابات حرة وسقطتوا)
نقول ليكم لحدي هنا كفاية
خلوا الناس تحكم نفسها بنفسها وتحاسبكم علي ملايين الدولارات الضيعوتها
وعلي ملايين الأفندة الخربتوها
وعلي البنيان الجميل الإسمه الوطن الذي أحلتوه لكوشة

Nasr

كلامك الكتير دا كله هو من نوع العباطة التي تحدثنا عنها

وها أنت تأتينا بانصع صورها

فدوى راجعي المقطع (ماشيين في السكة نمد ) وماذا يعني في القصيدة ولماذا؟؟؟

يااما انتي ما عارفة مؤشراته في القصيدة

وماذا يعني ..

او عارفة ولكي مقاصدك ...

فهل سيساعد الكوبري كما قال احد الأخوان هنا في انسياب حركة الجماهير على من تجبر عليهم
بعد أن أغلقوا متعمدين السوق العربي وسوق الخضار وميدان ابوجنزير معاقل ميادين التحرير

إذا كان هذا هو المقصود فشكرا على البشرى

ميدان القاهرة ...وسط الرياض


الطريق الدائري بالرياض وحده به عشرة تحويلات بهذا الشكل ...
اذا كانت الانقاذ تعتبر كبري السوق المركزي اياه انجازا ...فسنعيش مائتين سنة لنصل لمرحلة دائري الرياض

الشفيع سلامات .... وتحياتي

الفكرة التي أردت أن أوصلها أن من واجب الحكومة أن تنمي البلد دون من أو أذي وأتيت بالسعودية كمثال لأن لم اري غير السعودية ومصر في حياتي .. رغم أن صديقي المقيم في امريكا قال لي انه امريكا ربطوها بشبكة الطرق دي من زمن الرئيس منو كده ما عارف في سنة حفروا البحر ... لكن امريكا ليست مقياس للسودان .. لكن يمكن أن نقيس بمصر والسعودية لأسباب كثيرة ... في كل الأحوال لا تتحمل الإنقاذ وحدها وزر عدم التنمية وإن كانت تتحمل الوزر الأكبر لانها أطول الأنظمة بعد الإستقلال عمراً في السلطة .... وكم عدد الكباري تحديداً في السعودية ليس بذي أهمية قدرما المهم هو إنعدام النسبة والتناسب بين الدولتين في البنية الاساسية والطرق ... في كل الأحوال يسعدنا أي تنمية في البلد وأي مشاريع تخدم الإنسان ولن نقف ضدها مهما كان النظام القائم .... إلا أن مشاريع الإنقاذ كلفتها عالية علي المستوي الإقتصادي أو الإنساني ويمكن أن نفصل ونأتي بكثير من الأمثلة ....

يا فرانكلي لم أعند أن أهاتر في هذا المنبر لذا لن أرد عليك .....

ولنفرض أنّك لن ترد so what?

أنا رسالتي وصلتها وردك من عدمه لا يعنيني في شيء

و عليكم السلام أخوي الزناتي

Quote: في كل الأحوال يسعدنا أي تنمية في البلد وأي مشاريع تخدم الإنسان ولن نقف ضدها مهما كان النظام القائم

ده هو البهمنا
وطالما اتفقنا عليهو الباقي لا يهم

--------------
قرأت مداخلتك بطريقة المبالغات وكان ردي بالمثل
ان شاء الله حالنا ينصلح ونخلي السعودية من ورانا

حكومة كباري!











________

يعني يا فدوى كمان بقيتو تعتدو على مورثات الحزب الشيوعي
وكمان بدون إعطائه حقوق النشل...

منذ ان لبست رموزنا السياسية الطرابيش بعد الاستقلال وتكومت بكروشها على السلطة قبل السودنة
كان هنالك كبري واحد اسمه كبري ام درمان القديم طراز الصناعات الحديدية الامبرياليةعلى عهد الملكة فكتوريا
مرت عليه كل الاحزاب لم تطليه حتى بالبوهية،،مليء بالحفر والثقوب تماما مثل الانظمة السياسية التي عبرت فوقه
متسخ وصديء ومهلهل
كان بناء كبري مشروع من باب الخيال العلمي واستطاع جعفر نميري وهو احسن حالا على سجمه من هذه الاحزاب المتهالكة
استطاع ان يبني كبري او اثنين خلال العقدين من الزمان
اما الكذبة من حكومات العوائل فلم يتكلفوا حتى مشقة ان يمسحوا دموع ذلك الكبري القديم
ناهيك عن بناء جديد
انتشرت ثقافة بناء الكباري الان واصبحت تشيدها ايادي خريجي الهندسة السودانية في الشرق والغرب والشمال والجنوب
العاصمة كلها والتي كانت مفككة ومتباعدة اصبحت الكباري فيها كازرار القميص
كذلك كان حال الاتصالات حيث لم نستطع تمرير مكالتك كان معناها انت سوداني
كذلك حال الشوراع حيث نصل الى اهلنا في الشوال عبر الرمال والليالي والنهار في ايام وليالي
كذلك حال البنزين حيث نبيت كهيكل سليمان بالقرب من
المحطات في سبيل شمة من البنزين
كذلك حال السكر والرغيف فبأي الاء ربكما تكذبان
العبرة ليست في الكبري العبرة في الثقافة الجديدة ان نتعلم بناء الانفاق والكباري
اما الذين ينتظرون الكباري من اجل الالتحام فهنالك تسعة كباري في العاصمة جاهزة للاتحام
التحموا يرحمكم الله

الاخ زهير
سلامات وسنة سعيدة معاك يارب
شايفة الناس هنا فرحانة بدول الاغتراب فرح شديد
وطن غيرك لابديل لوطنك مهما كان
والاخ الشفيع كفا ووفا فى شكل المقارنة هذه
تحياتى

فدوي ازييك .. عمل مقدر من الحكومة .. ولكن ما نهب وسرق وضاع هدرا... اكبر بكثير جدا من الكباري والطرق والمشاريع التي نفذت... هذا ما يلي الحكومة .. اما المعارضة فحدث ولا حرج

طيلة الاعوام السابقة والمتفرقة التي حكمت فيها هذه النخب التي تعارض الان لم نري فيها اي مشروع تنموي لاكبري ولا طريق ولاحتي محطة توليد للكهرباء ... اول ما رئينا هو مشروعي التعويض لال المهدي وتعويض المرحوم عز الدين علي عامر عن اوضة وصالة وتربيزة كشف علي المرضي... (فشل واخفاق تام ولم يراوح مكانه)وهذا الاخفاق يمكن لنا ان ننساه...

ولكن ما لايمكن ان ننساه او نغفره هو ان الانقاذ تحكم منذ اكثر من عشرون عام والمعارضة لم نسمع لها الا بيانات واشعارواحتفالات وندوات وصور وانضمام وانسلاخ ومكيفات وفنادق وطلبات لجوء وكذب وتضليل وشحدة امام ابواب السفارات والكنائس وسرقة انتفاضة اهل دارفور والشرق ضد التهميش وتجييرها لخدمة اهداف لاعلاقة لها بانسان المنطقة..و بعض الاشتباكات ايام المرحوم سالف الذكر التجمع الديمقراطي وتحت مظلة ورعاية قرنق (الحركة الشعبية) ...

غايتو في مدينة جدة الآن شغالين فيمايقارب التلاتين كبرى في وكت واحد وكل كبرى عبارة عن كبرى ونفق وطرق متعددة ومرور قبلي وبعدي وكل فترة نلقى واحد سلك والعربات بتمشي فيهو من غير إفتتاح ...لا يجي ملك ولا امير ولا حتى وزير الطرق ولا غيره مجرد عامل بناء(طُلبة) يزح السواتر وتمشي العربات ..ولأن الكبرى عندنا هو انجاز كبيييييييييييير فبجي رئيس الجمهورية يفتتحه ويهللوا بيهو ناس اختنا فدوى ومحمد فرح رغم انه موضوع زيو زي فتح سوبر ماركت ...قروش وشركات تنفذ وبس ..

الكبرى هوخدمة لاشك في ذلك لكن لاتصل لدرجة الانجاز ...

اتذكرت لمن الرئيس مشى افتتح مشروع شنو كده ماعارف في جزيرة في شرقنا مع رجل اعمال سعودي قبل ايام ...معقولة رجل اعمال يقابله رئيس دولة عشان مشروع اى كان حجمه ؟!!
هل الناس مابتعرف تقيم الاشياء وماتضع قيمة لنفسها للدرجة دي ؟!!!



تحياتي للجميع ...

Quote: انتشرت ثقافة بناء الكباري الان واصبحت تشيدها ايادي خريجي الهندسة السودانية في الشرق والغرب والشمال والجنوب

ثقافة؟ أيادي سودانية؟ شرق؟ غرب؟ شمال؟ جنوب؟

هي ثقافة الحب والموت والدمار يا دكتور التي نشرها هذا النظام القمعي الذي
تدافع عنه يا دكتور. هي ثقافة السرقة والفساد والإفساد والتجارة بآيات الله!

ثورة الهامش هي نتاج هذة السياسات.. لقد هب من دكت بيوتهم الطائرات بحمم الموت
وثار الثوار لقلع حقوقهم المسلوبة منهم بالقوة بعدما عجزوا عن نيلها سلمياً.

عشرين كبري في الخرطوم لن تعيد الحياة لطفل (واحد) قصفته طائرات الانتينوف
طائرة تم شرائها بأموال الشعب لتقصفه وتقتله وتدمر قريته وزعه وضرعه..
طائرة كان الاجدر أن تنشأ مدرسة أو شفخانة أو طريق بثمنها.

نحن لا نحتاج لكباري في الخرطوم.. ولا لطائرات الموت...
نحن بحاجة لأن يذهب هذا النظام إلى مزبلة التاريخ
ولمحاسبة القتلة والمفسدين وإلى إحقاق الحقوق.

فالله يمهل ولا يهمل!

Quote: عندما تتقزم الطمحات و تتضاءل الحلام و تموت همم الرجال , يصبح

Quote: انت يا أحيمر اخوى قاموس اللغة العربية دا غيروه ولا شنو ؟ بل هذه تنمية تستحق الاشادة

والله يا فدوى وما طالباني حليفة ما محتاج ارجع لقاموس لمثل هذه الكلمات

ولكن فيما يبدو انك لم تفهمي كلامي ( بالغلطة دي و ما عاوز اقول استعجال
او غيرو , فاعتبريها عدم معرفة بلغتك العربية و غلط من زول ما بعرف يكتب طموحات
لأنو ما عربي اصلا , و بذلك تكوني قد ارضيتي غرورك بتغردك و اجادتك للغة العرب
لكن الدنيا سـداية و رضاية )
اها النرجع نوقع ليك الكلام و نقعدو ليك في الواطة )
فمقصود الكلام ان ترتفعوا بطموحاتكم شـوية عشـان تقدروا تعملوا حاجة
لأنكم بهذه العقليات لن تصلوا لما يمكن ان يسـمى انجاز في لغة الناس
و دا بيفسـر ليه بعد 22 ســنة نحن ماشـين لي ورا فالافق محدود

فلو كان تشــيد كبري انجاز فالترابة دي في خشــمنا
كبري طاير في قلب الخرطوم انجاز؟!!!!!!!!!!!!

طيب المطار ح تقولوا عليهو شــنو ؟
ولو عملتوا تنمية حقيقية بدل بيع شركات و مشاريع الناس
ولو محيتو الأمية في السودان تقولوا شـنو

ســيبك من كل دا
لو حققتو شـارع ناكل مما نزرع و نلبس مما نصنع لقلنا لكم انجزتو
و لو حفرتو ترعة الرهـد بالطواري و الكواريك الجمعتوها لقلنا لكم انجزتو
ولو عمرتوا مشـروع الجزيرة بعدما دمرتوه لكان انجاز بدل ما تقوموا من نهضة و تقعوا في نفــرة
ولو حافظتوا على المشـاريع الزراعية على حالها ( الرهد , السـوكي , ....... الخ ) لكفاكم
ولو
ولو
ولو
لكن نهضتكم كباري لأن فيها كباري
و انجازكم موقف كركر الماسـورة

يا فدوى لا اطيل عليك بس شــوفي بعين بصيرتك و ما تزايدي

Quote: الخرطوم تودع سفير قطر إمتدح والي الخرطوم عبد الرحمن الخضر الدوري القطري في قضايا السودان الوطنية السياسية والإقتصادية ودعمها في كافة المجالات بقيادة الشيخ حمد بن خليفة آل ثاني أمير دولة قطر. وقال في إحتفال الولاية بوداع السفير القطري بالخرطوم علي حسن الحمادي بحضور عدد من وزراء ومعتمدي حكومة الولاية أمس أن ولاية الخرطوم حظيت بالعديد من الاستثمارات والمشروعات القطرية مشيرا إلى أضخم مشروع عقاري بالولاية على ضفاف النيل الأزرق وهو مشروع مشيرب القطري الذي أضاف بعداً جمالياً وثقافياً للولاية إضافة إلى المشروعات الأخرى التي يمولها بنك قطر بينها توسعة شارع النيل وكبري سوبا ونفق السوق المركزي الخرطوم - الأحداث العدد(1473) الجمعة 25 نوفمبر 2011

الاقتباس دا جاء في مداخلتك
Re: على محمود حسنين من الكازوزة الى البلموني ... (Re: ود الباوقة)

Quote: أوثنى على ماقلت عن عمك حسنين فى انوا ضيف غير مناسب لموضوع الحلقة وذى ماذكر احد الاعضاء معلقا هنا


Re: على محمود حسنين من الكازوزة الى البلموني ... (Re: ود الباوقة)

Quote: أوثنى دي من ياتـو معجم للغـة العربيـة ولا عربي فالعب به

الأخت فـدوى

لعلك بخير

وها قد دارت البوسـتات ســريعا

تحياتي يافدوى
الإنسان عملتوا ليهو شنو ؟
تدويل مشكلة الجوع الذي أطل برأسه في مناطق طرفية (الجنوب الجديد) ويهدد حتى سكان العاصمة - كم طن متري ذرة قمح مخزون استراتيجي متوفر طرفكم؟
المدارس الإبتدائية والثانوية الحكومية كم مدرسة جديدة اقمتوا ؟ كم فصل عمرتوا ؟ كم كرسي وطاولة وسبورة وفرتوا ؟
الشفخانات والمراكز الصحية الريفية ومراكز علاج ومتابعة الحوامل والأطفال كم جديد تم إفتتاحه ، وكم قديم تم تأهيله ؟
الأمن بشقيه الرسمي والشعبي كم يأخذ من ميزانية الفقراء والجوعى ، وكمان عاوزين تدربوا الشرطة على السلاح الثقيل في طفرة نوعية للعمل الشرطي لم ولن تحدث إلا في حكومة اللا وطني ؟
المخصصات والمزايا والعطايا والرواتب والصرف الكيري لمنسوبي هذا الحزب من القصر للبرلمان مرورا بمجلس الوزارء حتى أصغر موظف كم بلغت في السنة؟
والأهم:
تقرعون طبول الفرح والزغاريد والتهليل والتكبير لمجرد أن كبري لا يزيد طوله عن 5 كيلو وعرضه عن 15 متر وبتمويل أجنبي قد راى النور أو سيرى النور ؟ مؤكد أن أرخص تنمية بالدنيا هي تنمية الكبارى والطرق وهي قطعا تنمية لكن لا تستحق مجرد إنتظار الشكر والثناء ...
ماشين تمدوا في السكة ركزوا على الحاجات الفوق دي ... وشكر الله سيعكم كفاية ... أمشوا أقعدوا في قصوركم وأطلبوا من الله طول العمر عشان تتهنوا بما ساقه لكم من رزق حلال طيب كان عنكم مقطوع دهورا عددا ...
الشفيع