عندما تستمع للأغاني ،، هل يتحكم توجهك السياسي في تصنيفها

بالواضح هل تكره غناء الفنان الفلاني لأنو منتمي للجهة الفلانية ؟
أو النشيد المعين لأنو إتقال في فترة سياسية معينة؟

ولا بتفتح أضانك للموسيقى واللحن الجميل

ممكن مثال

انا شخصيا بستمع للغناء والأناشيد بمعزل عن أي مؤثرات خارجية

لذلك تعجبني كثير من الألحان والأغاني والأناشيد في حقب سياسية متفرقة

حتى الانقاذ دي ما بغرق ذمتي فيها في نشيد انقاذي لحنها عاجبني شديد بعيدا عن الكلمات

كل سنة وانت طيب والسنة دى اسعد من الفاتت
احكى ليك حكاية
لمن كنت شغالة فى الاذاعة
كانت بتجى خطابات "الان لاتوجد خطابات لانه مافى بريد "
هذه الخطابات كان الواحد منها يحمل طلبات لعددمن الفنانين لبرنامج "ما يطلبه المستمعون "
كنت اندهش لتلك الطلبات التى تتراوح لفنانين من مختلف الدرجات
زمان كان ثمة ترتيب للفنانين
درجات
الاولى والثانية
تجد فنان ناشئ يطلبه المستمعون
واخر غير معروف وهذا ايضا يحدث
فى الخطاب الواحد تجد اسماء فنانين "الكاشف ، ابراهيم عوض ، مجذوب اونسة "فى غير ما تبرم
لا من الطالبين للاستماع ولا من مقدمة البرنامج الزميلة علوية ادم لها كل الرحمة
فهنا لايدخل التصنيف السياسى
فلو كان الامر كذلك لما استمع احد لوردى بعد غنائه لمايو
ولا لسيد خليفة ولا لابوداؤود ولا لمحمد الامين
امر الاستماع فى السودان محير للغاية
يحيرنى على نحو خاص
احيانا تجد بعض المثقفين يرفضون مجرد فكرة ان صلاح ابن البادية مطرب
لا لسبب سوى انه ابن البادية الغير مثقف كما يرونه
لكن هذا غير واقعى حين تربطه بالمستمع العادى الذى لا قبل له بثقافة ولا مفاهيم الفنان المحدد
بل يشجيه صوته وتقع الالحان التى يقدمها موقعا داخل نفسهويتفاعل مع الكلمات كما لو انه كاتبها هو
لذلك يحبه

وانت طيبة يا استاذة سلمى

وربنا يحقق كل أمنياتك وأحلامك

وكداأنت ختيتي في قلبي اليقين

انا طبعا كنت متهيب اجيب الموضوع عديل وحاولت الالتفاف حوله لكن بذكرك للأسامي ريحتيني

بس في جزئية شوية لا بد من ذكرها

بعض عضوية الحزب الشيوعي مثلا (بدون تعميم) في السبعينات كان ليهم موقف من بعض الفنانين زي سيد خليفة والسبب

معروف طبعا والكيزان وموقفهم من وردي ومصطفى سيد أحمد كان بأثر في قبولهم لأغاني الفنانين لكن هل كان الرفض دا

روحي ولا مرتبط بالتنظيم

انا مثلا بشوف من الصعب مثلا زول يسمع في ربيع الحب أو على الجمال ويا وطني يا بلد أحبابي ويقول لا دا غناء بطال

أو زول يحرم نفسو من جميلة ومستحيلة وراوائع وردي ومصطفى سيد أحمدعشان توجه سياسي

انا ما بتعجبني طريقة أداءا لفنان حمد الريح مثلا لكن ما بنكر إنو في بعض من أغانيه جميلة في رمضان الفات

محمودعبد العزيز غنى أغنية لحمد الريح دا والله شفت فيها جمال الأغاني كلهاومثال صلاح بن البادية الذكرتيهو دا

مثال ناصع لعقلية تلقي الأغاني و(التكجن) الا نطباعي

ذكرتينا ما يطلبه المستمعون والاستاذة علوية آدم لها الرحمة

Quote: لكن هذا غير واقعى حين تربطه بالمستمع العادى الذى لا قبل له بثقافة ولا مفاهيم الفنان المحدد بل يشجيه صوته وتقع الالحان التى يقدمها موقعا داخل نفسهويتفاعل مع الكلمات كما لو انه كاتبها هو لذلك يحبه

حمد
ازيك تاني بالمناسبه شدني العنوان هنا كما شدني العنوان في بوست راس السنه في السعوديه اهنئك على العناوين المميزه
ندخل في الموضوع
معروف ان الغناء والشعر مناطق شبه مقفوله لليسار
عن نفسي احب مصطفى سيد احمد رغم شيوعيته التي لم يجاهر بها ولم يدعونا لنلتحق له ذاك كان خياره وله الحريه
واحب عقد الجلاد التي بدات باليسار وانتهت باليمين او بالوسط
واحب وردي الذي تقلب مع كل الانظمه
واعشق ابو عركي اليساري القح
وحنان النيل اليساريه التي تحولت لاقصي اليمين
وسيف الجامعه المعارض السابق والمعتدل الحالي
باختصار لا يهم اتجاه الفنان السياسي طالما كان لا يحاول ان يظهر بمظهر الداعيه لذاك الاتجاه
يعجبني الكلام الجميل زايد اللحن المناسب اضافه للصوت الشجي وبس بعد داك لو بقي معاويه عبيد الصايم ما عندي مشكله

Quote: بالواضح هل تكره غناء الفنان الفلاني لأنو منتمي للجهة الفلانية ؟

الاعزاء حمد وفدياس لكم التحية
انا لا اكره ولكن هنالك بعض الفنانين لا استسيغ غنائهم وليس ذلك بسبب اللون السياسي
ربما اذني تقليديه تحب الحقيبه والرواد وكل الفنانين الماشين في خطهم
لا استمع الى الطيب عبدالله ولا العاقب محمد حسن ولا هاشم ميرغني
ولاتعجبني طريقة الهادي الجبل ولا مصطفي سيداحمد وهذا الاخير
اذا لم تستمتع اليه يصنفك الكثير من اخواننا الشيوعيين بانك لاتفقه
في الفن شئ وانسان غير مثقف وتجد نفسك اقحموك في الدايره
السياسيه للاستماع غصبا عنك مع احترامي لهذا الفنان وللاخرين
من الفنانين الذين زكرتهم وهم فنانين بلاشك عمالقه ولهم فنهم وجمهورهم
ولكني لا اميل الاستماع اليهم اضافة الى طن من فناني الشباب .

يا فدياس النحات

ما تنحتني دي أول مرة أفتح لي ضلفتين

العناوين دي مباشرة ما فيها تميز ياخ ما تنفخني ساكت

بعدين المهم الموضوع ماالعنوان بس أوع تكون المواضيع بيض ساكت


المهم مداخلتك دي كلها تصلح عناوين بوستات منفصلة
1-

Quote: معروف ان الغناء والشعر مناطق شبه مقفوله لليسار

طبعا تعرف أنو الشعر والغناء هي من أكثر الأشياء ال بتفرح الناس وهي مهمة صعبة لا يستطيع القيام بها إلا من أتاه الله الصفات والموهبة على فعل ذلك بالتالي من يستطيع أن يفرح الناس غناء يمكنه زرع الفرحة فيهم من خلال أنشطة أخرى لكن نعمل شنو البلد من ولدوناينعق فيها البوم في كل مجالاتهالذلك ظلت الكآبة والغم مسيطرة على على أحوالنا ياخ أدوا اليسار فرصة وأحكموا بعدها.

2-

Quote: وردي الذي تقلب مع كل الانظمه

الكلام دا مغلوط وردي ما تقلب مع الأنظمة ولا حاجة - وردي غنى لمايو عندما كانت مايو تعبر عن أحلامو بتطبيق اشتراكية يتساوى فيها الجميع لما مايو ضلت الطريق توقف وردي وعارضها بقسوة

الاإنقاذ لحدي هسة وردي ما غنى ليها ولو في بالك جلوسو مع الرئيس دا ما بعني إنو وردي راضٍ عن الإنقاذ

أنا القدامك لو طلعت لقيت الرئيس دا واقف في شارع جرير دا بسلم عليهو وممكن أعزموا ورأي في الإنقاذ في محلو

الديمقراطية غنى لها وردي لأنها محبوبته ومعشوقته وهكذا.


يسارية عقد الجلاد وحنان النيل وانقلابهم عليها دا ما عندي فيهو معلومة


بعدين معاوية عبيد دا ياخي حاول أرخي ليهو أضانك شوية زول غناي وصوتو جهور

بس انت ما اتيحت ليك فرصة تسمعو كويس


شكرا ليك يا ملك

حمزة الكوبي

أهلا

بالتأكيد ما في حجر على أحد في سمع الغناء دا بالذات
أما بخصوص التصنيف طبعا تبقى المقولة الخالدة الفن للفن هي الداعم لمسيرة الغناء غير المسيس رغم تحفظي عليها
لأنو فيها بعض السلبية وبتقعد بالفن في أطار ضيق والفن بالتأكيد يمكن أن يعالج قضايا كثيرة.

Quote: ربما اذني تقليديه تحب الحقيبه والرواد وكل الفنانين الماشين في خطهم لا استمع الى الطيب عبدالله ولا العاقب محمد حسن ولا هاشم ميرغني ولاتعجبني طريقة الهادي الجبل ولا مصطفي سيداحمد

كدا ما عصرت علينا ياخ ديل ملوك التطريب ذاتهم

الاخ حمد وضيوفك الكرام تحياتي
الفن الحقيقي بخاطب الوجدان الانساني وما عندو حدود سياسيه
اما التصنيف السياسي وعلاقتوا بالفن ده استخدام للفن في مكان ما اظن الفن بيكون صادق فيهوا وما بيستمر
(مثال انا بستمتع لكمال ترباس وبنفعل معاهو لكن لمن تغني لثورة الانقاذ في اوائل التسعينات ما اطربني والاغنيه ما استمرت ولا لقت حظها في الانتشار رغم الاعلام الكان مسلط عليها لانها كانت مصنوعه)

مرحب يا هجو

Quote: الفن الحقيقي بخاطب الوجدان الانساني وما عندو حدود سياسيه اما التصنيف السياسي وعلاقتوا بالفن ده استخدام للفن في مكان ما اظن الفن بيكون صادق فيهوا وما بيستمر

كلام سليم

بس توظيف الفن ليكون معبرا عن واقع سياسي أو ملهما للثورة في اعتقادي ناجح بدرجة كبيرة

لو تذكر إنو اناشيد أكتوبر كانت ملهمة لثورة أبريل

مشكور