# أنتي منو وأنتي شنو !!!

#

في ليلة رأس السنة أخوكم قال يمشي يبتهج مع الشباب لانو محتاج جرعة كبيرة من المرح والبهجة بعد أشهر طويلة من العجائب والعزلة الاختيارية لكين الشقي يلقي في الفشفاش عضمه يا قيقا الشباب كانوا منتهي الكرام مع سعادتنا ضبحوا والمزة (أي ما بين الوجبة والوصلات الغنائية ) كانت علي مستوي راقي والباقي بدون الدخول في تفاصيل من أفخر وأعتق الانواع متعهم ربي بالعافية المهم أخوك أنبهر من مستوي الاحتفاء والاحتفال وقام يهضرب وسأل البت المغنية عن نص للمرحوم العميري ولو ممكن تغني النص أعتذرت حتي المعاصرين ما قدرت تقدم حاجة مقنعه طبعا بخرقتي المعهودة بصدق قلت ليها تعرفي قصة الغنا دي ما شغالة معك يا خي مش أحسن ليك التمثيل من الغنا دا المطربةالرهيبة جنت وقالت (أنا ما برد علي المستوي زي دا) أخ كانت القاضية وأخوكم كمان كان طاشي شبكة وبدايت في الملاسنة وهاكم ما قال أبو الزهراء في لحظة الغضب المضرية +:

أنتي منو وأنتي شنو
كان وصفتك ما بتعوك لغتنا الحنينه
وكان قطعتو في حشاي بموت بحسرتي وأساي
لكين هاك مر الكلام يا شينة الفعال
أنت لا طايله أنثي ولا كديسة مستشفي
الشعرات وألله بشهد أربعين بالعدد
والوش كوم عضام والسنينات ياهو دراكولا
ذاتو في العصور المظلمة
والايدين يس ملاكم واصابعينا أصابعين نشال عديل
والغنا والله ناذر في غنا الدلكوة أرحم
مطربة شنو أنتي أزمتي وكدرتي كل العالم
وكان ما الزمن لينا هان وأتجبر للزيك
والله لا بنقعد ولا بنسمع ولا الحلم يجمعنا
ولا في السوق وسط النسوان ليها بعاين
ياخلاسيه بالكريمات بقت بنويه ما عملت
فيك الخلاطات الخيالية العجايب
والله أنت كان عارفه حالتك تدخلي الغابة
و ما محتاجة لا لسلاح ولا دبابة
بالله أصبري أنا واحد أتنازل وسمعتك
تقومي تفكيها في نفسك كد لا... لا ماكدا
أعمل شنو ديل ماشباب الزمن الغريب دا
أي حاجة بس غنا والسلام يا عبد السلام
لا وشا صبوح ولا جسم راقص
أنتي منو وأنتي شنو يا مغنية الشتارة
والكبالا والنقارة
في الزمن الغلظ دا
أنتي شنو وأنتي منو .



*مع الاعتذار لمبدعي الكمبالا والنقارة

بكرةح تلقوا الخبر في (الدار بالصورة القلم في ليلة راس السنة صحفي يتهجم علي فنانة مشهورة بأقبح وأبشع الالفاظ !

سنة جديدة سعيدة يا ابو الزهور و امنيات طيبات بتحقيق المراد و الذي منه
ابو الزهور ياخي ما معقول, شنو ياخ الارهاب دا
يعني كلو ما يرجّعوا ليك قرعتك فاضية تسل لسانك بالهجاء في بنات الناس!!
اديهن حرية الخيار ياخ

أبو الزهراء .. كل سنة وإنت طيب ياخ!
إت يا زول قايل العرس دا سمح بالحيل كـدا؟

أما فيما يختص بالمثل دا

Quote: الشقي يلقي في الفشفاش عضمه

فأرجو استخدام العبارات الصحيحة!!!



وخلي بالكـ يا معلم .. ما تقطعوا في حشاكـ
بعمل ليكـ حموضة فيما فوق الحجاب الحاجز!!

ابو الزهور كل سنة و انت طيب ياخي
عام سعيد و ملئ بالنجاحات الباهرة ان شاء الله


اما بعد

اصلو ما تقطع في حنانك .. فتو طواااالي زي ما قال حمودي العسل
عمرنا كلو ناكل في اللباد لمن جاتنا قرحة الاثنى عشر
اسي ذاتو انشقت .. بقت كل ستة في حتة









-------

ريحتني في حناني لكن و انت عامل لي فيها زهير بن ابي سلمى
و سالي لسانك الهجاء في بت الناس .. تصلي المسكينة بألسنة حداد

يازول رشها .. رشاها بلاء
هي قايلة نفسها فاطنة السمحة؟

انت قايلا سمحة ساي؟
سمممممحة و رقاصة كمان!
و الله صحي

لكن الشماشة ما بريحوا ..

[قالوا ليها: فتيو .. فتيو
قامت فتتو .. طلقوها*]

ايوة كانت متزوجة



* الحقوق محفوظة لفرقة الهيلاهوب

ودالبشري الحبيب
كل عام وأنت بخير ومتعك ربي بالعافية
المهم يا صديقي والله أنا ما مديت قرعتي بس ما بتعرف تغني البت دي ياخي خربت مزاجنا ودي الحقيقة

ود الصايم
كل عام وأنت بخير وعافيه أظن العافية أهم من القروش

المهم ياصديقي أخونا أحمد الصطفي الحاج سجل النص في الموبيل وهو لسه نايم أو ما يصحح ويشرب القهوة نحن مقيلين مع بعض ح يكون معي النص لحظة الانفعال ذاتا بالصوت والصورة
لك ودي

العزيز قيقا
سنتك باسطه ومنتهي الدسامه كل عام وأنت متألق كدا
لك ودي

أبوالزهور

كل سنة وانت طيب ياخ والسنة الجاية عريس عديييل ( قول آمين)..
لكن يا أبوالزهور غنا عميري بالليل ما بينفع
البت العرفها شنو بي جنس الغنا الطالبو انت ده!!

يا زول ما في مشكلة ،، أهم حاجة إنك تكون أنبسطت ..

القصيدة قلت لي سجلها أخوكم أحمد مصطفى الكان معاك بالليل
وهو جايي مقيّل معاك، بعد يصحى من النوم ويشرب قهوة:!!
هو أصلو ما دام جايي يقيل ، لزوم (الفكة) بالقهوة شنو،
ما تخليه يجي بالفي راسو من امبارح دي، ويكمل عليها..

الاخ صلاح
تحياتي
كل عام وأنت بصحة وعافية وكل عام وأنت أنجح الناس
يا خوي أنت شايف حركة الجماعة ديل ودالبشري وودالصايم وقيقا طبعا أسوأ الظنون فيني ما أتغيرت أبدا مع أنو كنت صاحب قضية (البت ما بتعرف تغني ) دا موضوعي لا قرعة ولا يحزنون ....!

أمين يا صلاح أخوي أنشالله يسمع منك رب العبادوالله دعوة كويسه مع بداية العام الجديدربنا يحفظك

Quote: يا خوي أنت شايف حركة الجماعة ديل ودالبشري وودالصايم وقيقا طبعا أسوأ الظنون فيني ما أتغيرت أبدا مع أنو كنت صاحب قضية (البت ما بتعرف تغني ) دا موضوعي لا قرعة ولا يحزنون ....!

يا ابو الزهراء دايمن ظالمني
مرة حاسبني مع الشمس طارق جبرين و شر اولئك رفيقا
و مرة حاشرني وسط الظنانين ظن السوء ود الصائم ؤ ود البشرى

تظلمني والايام قد تنصف الانسان

ما سمعت هو قال ليها شنو تاني:

غرامي بيك يا فاتن مصدرو الانصاف ..
انصفت حُسنك .. حب
و انصتي حبي .. عفاف

يا روحي انصفني

و هكذا دواليبك







------

ما كان تطلب من الاستاذة الاغنية دي ياخي؟

Quote: تظلمني والايام قد تنصف الانسان

غايتو يا قيقا ، البيسمعك تغني بي هنا
أصلو ما يقول عندك مشكلة (نيو لوك)..

إنت قايل القصة دي ساهلة!!