Post: #1
Title: في 2012 لا دايرة أحج لا دايرة أمشي الأردن..
Author: lana mahdi
Date: 12-31-2011, 12:11 PM
Parent: #0
(1)-أ-
السودانيون معظمهم يحصرون حياة الواحد منهم في 4 محطات بين الميلاد والموت
أتخرج
أعرس
أحج
أمرض وأمشي الأردن(زمان كانت مصر)
واتكل امووووت
مرة سمعت زول جايي يبارك لعريس
على سبيل الظرافة الزايدة لمن مدفقة قال ليهو : إتخرجتا وعرستا
فاضل ليك الحج والأردن تهي تهي تهي كاه كااااه كاااااااه
دة كلالالالالام دة يا راجل؟! اتلومتا لوم السنين
(1)-ب-
وبما أن 2012م مقبلة بي (حشادها ورشادها) على حد تعبير حبوبتي والتي قولها ليس كقول حبوبة زميل المنبر صلاح غريبة المسغفة شديد
وبما أني في المحطة 2
فإنني ومن على هذا المنبر أعلن أنني في 2012
لا دايرة أحج لا دايرة أمشي الأردن
سغيرة وجاهلة ياخ
ولكن ممكن بروفات للحج طالما قرر الكيزان عمل نموذج للكعبة في الساحة الخضراء لتدريب الناس على الشعيرة (الله لا كسبهم)
وطبعا ما محتاجين -كسودانيين- لبروفات للأردن لأن حياتنا في ظل الإنقاذ بروفة متواصلة من المغصة والمرض
المهم على قول مممممممم (هو منو عضو المنبر البختم مداخلاتو بكلمة "المهم"؟ الزهايمر اشتغل)
(2)
صحي السودانيين شعب بيفلسف النكتة؟
ولا بنتفلسف لمن ننكت؟
وللا بننكت على سبيل الفلسفة؟
صحي نحنا شعب ما بيعرف يستمتع بحياتو؟
حاصرها في 4 محطات ما بين الميلاد والموت؟
صحي؟
(3)
ماما وين عليا الثولح؟
الوليد دود الوعر سألني بينما أنا بكتب في البوست دة
إتخلعتا وإتصدمتا
انتبهت أنه يقصد علياء الصلح
إبنة صانع إستقلال لبنان ورئيس أول حكوماتها بعده رياض الصلح
كنت أقرأ قبل أيام كتاب عن عليا (ست الستات عليا الصلح)
على غلافه صورتها
فالوليد سألني:دي منو يا ماما؟
أجبته دي عليا الصلح!!
رسخ الاسم في ذاكرته
بالغتي يا لنا مهدي
هو فارز عليا الثولح منو؟
كان تقولي ليهو دي خالتو وخلاص
نحمل أبناءنا فوق طاقتهم
خليهم يعيشو طفولة بسيطة ياخ!
ايه العقد والكلاكيع دي؟!!
أف
(5)
غصبن عننا غصبن عننا
بنحتفل بسنة جاية والقلب نص نص
لا فرحان شديد لا مقبوض شديد
ليه ما بنفكر نحتفل بالسنة المسكينة المرت؟
أصصصصصلو ما حصل فيها حاجة حلوة
نكد في نكد يا كافي البلا؟
يا لطيف
2011 لا بواكي لها
(6)
ما عندي توقعات سحرية من 2012
لكني واثقة أنني سأعيشها كما ينبغي للمرء أن يعيش حياته
full options
,وأدعوكم كلكم أحبائي لتعيشونها
فل اوبشنز
طيبة ومحنة ومحبة وصفاء وتطلع للأفضل وإنجازات وترقي
سنتكم full options يا أحباب
والعفو والعافية
|
Post: #2
Title: في 2012 لا دايرة أحج لا دايرة أمشي الأردن..دايرة الحاجات تبقى كويسة
Author: lana mahdi
Date: 12-31-2011, 03:06 PM
Parent: #1
: في 2012 لا دايرة أحج لا دايرة أمشي الأردن..دايرة الحاجات برضو تبقى كويسة
الفراشة بي طرف جناحها الرقيق ممكن جداً تكسر القيد
تفر تفوز بحريتها
|
Post: #3
Title: Re: في 2012 لا دايرة أحج لا دايرة أمشي الأردن..دايرة الحاجات تبقى كويس
Author: طارق جبريل
Date: 12-31-2011, 03:09 PM
Parent: #2
لنا كيفنك
ياخي انا السنة دي عايز ادخل الضل ياخي
واقضي اجازتي في المالديف
|
Post: #4
Title: Re: في 2012 لا دايرة أحج لا دايرة أمشي الأردن..دايرة الحاجات تبقى كويس
Author: lana mahdi
Date: 12-31-2011, 03:20 PM
Parent: #3
Quote: لنا كيفنك
ياخي انا السنة دي عايز ادخل الضل ياخي
واقضي اجازتي في المالديف
|
الله يحقق الأماني الجميلة
المالديف معانا
لكن الضل دة كلللللو كللللللو ما معانا ياخ
|
Post: #5
Title: Re: في 2012 لا دايرة أحج لا دايرة أمشي الأردن..دايرة الحاجات تبقى كويس
Author: Siham Elmugammar
Date: 12-31-2011, 05:02 PM
Parent: #4
يا لنا كل سنه وانتى بألف خير
انا شخثيا عاوزة امشى الحج وعمرة رجب و رمضان
برضو ممكن اغشى ود جبريل فى المالديف
الا الاردن نهيييييى
|
Post: #8
Title: Re: في 2012 لا دايرة أحج لا دايرة أمشي الأردن..دايرة الحاجات تبقى كويس
Author: lana mahdi
Date: 01-03-2012, 07:35 PM
Parent: #5
Quote: يا لنا كل سنه وانتى بألف خير
انا شخثيا عاوزة امشى الحج وعمرة رجب و رمضان
برضو ممكن اغشى ود جبريل فى المالديف
الا الاردن نهيييييى |
الحبيبة الغالية سهام
وأنت بألف ألف خير يمة
الله يديكي الفي مرادك
غايتو أنا للضمان كدة لا هذا ولا ذاك
|
Post: #6
Title: Re: في 2012 لا دايرة أحج لا دايرة أمشي الأردن..دايرة الحاجات تبقى كويس
Author: Mahmoud Mustafa Mahmoud
Date: 12-31-2011, 05:23 PM
Parent: #4
الحبيبة لنا مهدي ولكم دينكم...
بوستاتك لطيفة..قصدي البوستات اللي من النوع دا..
جميلة خالص خالص..
وقاعد أخاف منها الخوف الواحد دا..
وفي البال مداخلات مع الراحل سمندلاوي...
Quote:
المهم على قول مممممممم (هو منو عضو المنبر البختم مداخلاتو بكلمة "المهم"؟ الزهايمر اشتغل)
|
هي يا اااا لنا..
دا ماااااااا طبارك شيخ الدين ياخ...
وهل يخفى الولد؟؟
..
.
تحياتي لولدنا دود الوعر...
راااااااجل ود رجال وأمه زاتا بت رجال كابر عن كابر..
..
..
وكل سنة والناس كلهم طيبين...والعفو والعافية..
..
محمود العربي..
..
|
Post: #7
Title: Re: في 2012 لا دايرة أحج لا دايرة أمشي الأردن..دايرة الحاجات تبقى كويس
Author: Mohamed Doudi
Date: 01-01-2012, 04:14 AM
Parent: #6
يالنا
كل سنه وانت بخير والوليد وابو الوليد وجد وحبوبه الوليد
بس عيبى لى البحر الميت فى الاردن ده؟؟؟؟؟؟
طينو اخضر مويتو مالحه؟؟؟
|
Post: #10
Title: Re: في 2012 لا دايرة أحج لا دايرة أمشي الأردن..دايرة الحاجات تبقى كويس
Author: lana mahdi
Date: 01-03-2012, 07:50 PM
Parent: #7
Quote: يالنا
كل سنه وانت بخير والوليد وابو الوليد وجد وحبوبه الوليد
بس عيبى لى البحر الميت فى الاردن ده؟؟؟؟؟؟
طينو اخضر مويتو مالحه؟؟؟
|
أووووووووو بابا دودي شخصياً
سلام ومحبة وشوق يا حبيب
كل عام وأنت بألف خير وجد وحبوبة الوليد حيكونوا جنبكم آخر الشهر
الأردن القاصدنو ما أردن البحر الميت
القاصدنو أردن الزول الميت
|
Post: #9
Title: Re: في 2012 لا دايرة أحج لا دايرة أمشي الأردن..دايرة الحاجات تبقى كويس
Author: lana mahdi
Date: 01-03-2012, 07:44 PM
Parent: #6
Quote: الحبيبة لنا مهدي ولكم دينكم...
بوستاتك لطيفة..قصدي البوستات اللي من النوع دا..
جميلة خالص خالص..
وقاعد أخاف منها الخوف الواحد دا..
وفي البال مداخلات مع الراحل سمندلاوي...
|
الحبيب محمود
كل عام وأنت بألف خير
ما أكون إتلومتا مع المرحوم الغالي
عارفة روحي مرات مداخلاتي بتتف زي يد الهون
لكن لمن كبرتا وكدة الكبر حسنان فما تخاف
Quote: Quote:
المهم على قول مممممممم (هو منو عضو المنبر البختم مداخلاتو بكلمة "المهم"؟ الزهايمر اشتغل)
هي يا اااا لنا..
دا ماااااااا طبارك شيخ الدين ياخ...
وهل يخفى الولد؟؟
..
.
تحياتي لولدنا دود الوعر...
راااااااجل ود رجال وأمه زاتا بت رجال كابر عن كابر..
..
..
وكل سنة والناس كلهم طيبين...والعفو والعافية..
|
الشكية لابيدن قوية
ما لقيت أقع إلا مع تبارك؟؟؟
زول فيكم يكلمو بالبوست دة مافي
شايفة سمه فاير في بوست مجاور
العفو والعافية يا حبيب
|
Post: #11
Title: Re: في 2012 لا دايرة أحج لا دايرة أمشي الأردن..دايرة الحاجات تبقى كويس
Author: bint_alahfad
Date: 01-03-2012, 11:51 PM
Parent: #9
السلام عليكم ورحمة الله وبركاته
كل سنه وانتى طيبه يالنا بمناسبه عيد الاستقلال المجيد وربنا يديكى الفى مرادك ويرزقك بى حجه ويبعد منك الآردن قولى آمين
ولو حجيتى مره واحده تتمنى تحجى كل عام وقلبك يتعلق بهناك فى الاراضى المقدسه وبتحاولى قدر الامكان تمشى تانى وتالت ورابع
تعرفى يالنا اجمل شئ فى حياتى بعتبروا حجتى لبيت الله ولو كنتى فاكره لمامشيت سنه 2005 كنت صغيره وجاهله وكنت اصغر واحده فى البعثه من السودانين لكن كان معاى جنسيات اخرى فى سنى او اصغر لانو نحنا السودانيين بس بنمشى الحج لمانكبر ونعجز لكن كلما كنتى بكامل صحتك استمتعتى بالحج اكثر
وأسال الله تعالى ان يرزقنا حجه اخرى ويديكى الصحه والعافيه ويبارك ليكى فى نفسك واهلك
وفى امان الله
لا اله الا الله
|
Post: #12
Title: Re: في 2012 لا دايرة أحج لا دايرة أمشي الأردن..دايرة الحاجات تبقى كويس
Author: Tragie Mustafa
Date: 01-04-2012, 00:33 AM
Parent: #11
لنويه كيفنك ومشتاقين
وكل عام وانت بخير
و الوليد دود الوعر بخير
وابو الوليد بخير وحبوبته وجده.
2012 دي سنة ما هينه باذن الله.
منتظرنها بقارغ الصبر.
|
|