كوز دارفور + كوز حوش بانقا = كوز المنشية!

محتار جداً من القصة الغريبة دي , السادة المناضلون في المنبر ده عندهم
مشكلة مع الكيزان عموماً؟ ولا عندهم مشكلة مع كيزان بي عينهم؟ الكوز
مش يا هو الكوز؟ ولا القصة دي برضو فيها خيار وفقوس؟

طيب :

كونه خليل إبراهيم كوز فدي حقيقة لا يتناطح فيها إثنين , وكونه
كان دباب فدي برضو لا يتناطح فيها تلاث , وكونه شارك في
حرب الجنوب فدي لا يختلف فيها أربع , وكونه حرب الجنوب
كان فيها قتل , وحرق ونهب , و.....إلخ , فدي لا يتناطح فيه
خمس!!!

ومعروف إنه خليل إبراهيم لم يعتذر لضحايا الحرب في الجنوب , و دي
حقيقة لا يتناطح عليها سته , وكونه خليل لم يبدي أي ندم على مشاركته
في حرب الجنوب , فدي حقيقة لا يتناطح عليها سبعة.

يعني يا مناضليننا الأفاضل : إنتو الكوز لمن يكون من دارفور تطلعوا
بيه السماء , ولو الكوز طلع من حوش بانقا تخسفوا بيه الأرض؟


مالكم كيف تحكمون؟

فبالله عليكم أرسوا لينا على بر , لأنو الشغلاتة دي بقت جايطة
وبقت جبّانة هايصة , إنتو عايزين مع الكيزان؟ ولا ما عايزين؟

ولو الموضوع موضوع بتاع قبلية وجهوية , وفرز بتاع كيمان , فبرضو دي وجه
نظر جديرة بالإحترام , وبدل اللف والدوران طااااااااخ طررررراخ كده ختوها واضحة
بدون لولوة , قولو عدييييييييييييل كده نحن مع القبيلة ومع الجهة سواء كانت القبيلة دي
متقاطعة مع كوز ولا شيطان رجيم , وبي كده الأمور تكون مفتوحة ومفهومة ومافي داعي
للغتغتة ومداراة الكلام وتغليفه بي مصطلحات لا تسمن ولا تغني.

بالمناسبة الوضوح مافي أحلى منه , ختوها واضحة وريحوا رقبتكم!!!

السودان أصل مشكلته في القبلية والجهوية ودي حقيقة لا يتناطح فيها ثمانية , فياخي
مافي داعي الناس تلعب على بعض , ختوها على بلاطة كده وبعد الناس تكون واااااضحة
وتحدد عصب المشكلة بعد داك تجي مرحلة المعالجة , أما محاولة إنكار وجود المشكلة
ما حيقدم ولا بحل ولا بربط , فتعالوا ختوها هنا بالعربي المفتوح وقولوا الموضوع
قبلية وجهوية.

بعدين يا مناضلين عايزين الجد ولا الكضب؟ الكيزان المن دارفور لو ملوهم موية
حارة وكشحوها في المحيط المتجمد الشمالي ممكن تقلبو لي موية تغلي برااااااحه
وممكن يسلقوا فيها البيض الإسفيري المعتت الهنا ده!!!!

حتى النضال الكيبوردي الإسفيري العفيييييييييييييييييييين ده غلبكم وحار بيكم دليل نضاله المخستك ده؟


قلنا الرووووووب خلاص!!!!

نجّمت وفكرت ونظّرت كثيراً اتأمل فنجاناً مقلوب , فقلت إحتمال يا مناضلين تكون مشكلتكم مع الكوز
البكون قاعد في الكرسي وده إفتراض - في وجهة نظر المتواضعة - تسنده الوقائع وتحمله الأدلة
وهو إستنتاج سائغ , لأنه (فجعتن) كده لقيت مناضلين الكيبورد يمدحوا في الترابي , التراااااابي
الواااااااحد ده بعد ركب التونسية وتلميذه علي الكرار توهط اللفتهانزا , والناس بقت تهتف بي إسم
أبوذر الصحفي اللي بيكتب في جريدة صوت الشعب اللي هي الناطق الرسمي بإسم المؤتمر
الشعبي اللي رئيسه وعرابه سيدنا ومولانا حسن الترابي حفظه الله ورعاه في منشيته المكنونة!!!



عاد ده كلام ده؟

فطالما دي بقت المشكلة , فعندي ليكم إستراتيجية (متخرش) المية وهي كالآتي :
إنتوا الكيزان ديل لا تكرهوهم شديد , ولا كمان تحبوهم شديد , يعني إمتثلوا بهدي القول المأثور :

أحبب حبيبك هونا ما , عسى أن يكون بغيضك يوماً ما
وأبغض بغيضك هونا ما , عسى أن يكون حبيبك يوماً ما!!






وكدا!!!

لأنكم بي طريقتكم دي إذا على عثمان إتقلب على البشير , البشير موضعه منكم حيكون
زيه وزي الترابي هسه وأبوذر وخليل إبراهيم وحتقعدوا تشبكونا الحرية لنا ولسوانا

وياقي الحنك العاضي داك , ............ وما أدراكا....

قولوا لي لييييييييييييييييييه !!!

ليييييه؟

لأنو الترابي كان في الحكومة وأوتاد خيمتها منه هو ومن حيرانه , وكان فيها وزير , وكان وكان , وخليل
إبراهيم كان فيها برضو وزير , وغيرهم وغيرهم , ولما ديل كانوا في الحكومة كنتوا بتلعنوا وتسبوا
الليل والنهار , ولما جارت عليهم أيام شلتوهم في عيونكم , يبقى البعيد شنو البشير ده ظاااااطو تحصل
ليه نفس القصة؟ وكلكم ومعاكم إبراهيم حسين ظاااطو تغنوا ليه :

لو جارت عليك أيام تعال لي عيونا بتشيلك.

وكدا!!!

أقول قولي هذا وأستغفر الله لي ولكم.......
قوموا إلى نضالكم الإسفيري يرحمكم الله.

يعني لو عبد الواحد محمد نور واصل في طرحه لفكرة حق تقرير مصير دارفور
وأدى ذلك إلى الإنفصال برضو , يبقى كيزان دارفور ما حتلقوا معاهم
فرقه , وفي النهاية ح تجو تطلبوا لجوء في السودان وتصدعوا بينا تاااااني!!!.

عبد الواحد كوز , وخليل كوز , وسيسي كوز , وحاج آدم كوز .....إلخ!!!!.


فأين المفر؟.

طالما المقام مقام جهوية وحسبه وقربى , فحنتوقف شوية كده ونعّرِج على
حزب الميرغني الإتحادي الديمقراطي وأنجاله ليمتد , وكذلك حزب الأمه للصادق
بن المهدي وإنجاله ليمتد.

لأنه في كلمتين واقفات لي في زوري ولازم أنزلهم , وحأنزلهم يعني حأنزلهم!!!!



فكونوا معنا..........

Quote: قلنا الرووووووب خلاص!!!!

يا محمد عبد المطلب
عندى سؤال
إنت كوز؟

Quote: يا محمد عبد المطلب عندى سؤال إنت كوز؟

يا محمد النيل

عندي ليك سؤال :

إنت من الكلام الفوق ده كله والخرمجة الإسفيرية الحاصلة
دي كووووووووولها , دي الحاجة الوحيدة القدرت عليها؟

Quote: كونه خليل إبراهيم كوز فدي حقيقة لا يتناطح فيها إثنين , وكونه كان دباب فدي برضو لا يتناطح فيها تلاث , وكونه شارك في حرب الجنوب فدي لا يختلف فيها أربع , وكونه حرب الجنوب كان فيها قتل , وحرق ونهب , و.....إلخ , فدي لا يتناطح فيه خمس!!!

والله صحى
بس مين يقنع الديك
خلى المعولق بشاشا يدينا رايو

Quote: ومعروف إنه خليل إبراهيم لم يعتذر لضحايا الحرب في الجنوب

Quote: إنت كوز؟

انت مالك ومالو

هس انت في زول سالك قال ليك شايت وين ..

سلام ابو حميد

كوز دارفور= كوز المنشية- كوز حوش بانقا
وهذا لا يستقيم
لان
كوز حوش بانقا =كوز المنشية - كوز دارفور

كوز المنشية - كوز دارفور = كوز المنشية- كوز حوش بانقا
كوز دارفور= كوز حوش بانقا
اللهم اشغل أعدائي بأنفسهم وعجل بالنصر والفرج
جني

شويتين كده ونجيكم.

Quote: والله صحى بس مين يقنع الديك خلى المعولق بشاشا يدينا رايو

آخر ما كنت أتوقعه من مناضلين الغفلة الدفاع
عن خليل إبراهيم , تلميذ الترابي النجيب!!!

تعيش أكتر تشوف أكتر.

Quote: ومعروف إنه خليل إبراهيم لم يعتذر لضحايا الحرب في الجنوب

نعم , نعم.

Quote: انت مالك ومالو هس انت في زول سالك قال ليك شايت وين .. سلام ابو حميد

سلام يا ود الباوقه , كل عام وأنت بخير.

ما تسأل أسئلة صعبة زي دي , براحه عليه عشان ما يطفش!!!!

Quote: كوز دارفور= كوز المنشية- كوز حوش بانقا وهذا لا يستقيم لان كوز حوش بانقا =كوز المنشية - كوز دارفور كوز المنشية - كوز دارفور = كوز المنشية- كوز حوش بانقا كوز دارفور= كوز حوش بان

يخيل لي المعادلة دي مفروض ترسى على الآتي :-

كوز دارفور على كوز حوش بانقا على كوز المنشية = كوز مرفوع للقوة كوزليون.
.

محمد عبد المنطلب

نطحتهم نطح غرائب الإبل وفي مقتل ...واصل لافض فوك ولا جف قلمك


وفي رواية أردم

Quote: كوز دارفور= كوز المنشية- كوز حوش بانقا وهذا لا يستقيم لان كوز حوش بانقا =كوز المنشية - كوز دارفور كوز المنشية - كوز دارفور = كوز المنشية- كوز حوش بانقا كوز دارفور= كوز حوش بانقا اللهم اشغل أعدائي بأنفسهم وعجل بالنصر والفرج جني

جنى = اغبى متحاور فى المنبر

Quote: محمد عبد المنطلب نطحتهم نطح غرائب الإبل وفي مقتل ...واصل لافض فوك ولا جف قلمك

وحنواصل يا أمير فتحي وبدون فواصل , عشان نشوف كيف
مناضلين الغفلة وبي قدرت قادر بعملوا للكوز ريش وجنحين
ويخلوهوا طاير وفاكي الزراير!!!

Quote: جنى = اغبى متحاور فى المنبر

ممكن مزيد من الشرح , لو سمحت؟

نرجع لي موضوع سيد صادق وأنجاله , وسيد الميرغني وأنجاله!

في كثير من المواقف سيد صادق بديني الإنطباع الآتي :

إنه حزب الأمه ده فيهو قسمين لا تالت لهما :

الأول : حزب أمه آل صادق , ثم حزب أمه آل
المهدي (أنا وأولادي "وبناتي" على إبن عمي , وأنا
وإبن عمي على الغريب) , ولا يفوت على
فطنة القارئ الحصيف و"الداقس" أن المقصود
بالغريب هنا القسم الثاني الذي سيرد ذكره في
ثانياً أدناه.


ثانيا : عامة الناس من كل فج عميق!!!!

بيني وبينك مناضلين سوق بكري ديل في مسألة النضال دي يحيروا الما بتحير..
خليك من خليل الكوز الدباب الوزير الانقاذي .. حسّا دي شوف الزعيم الملهم الجديد بتاع المناضلين الاسمو التوم هجو القال رافض المشاركة. الزول ده كان مستشار ووزير ولائي بقرار من رئيس الجمهورية بناء علي توصية والي النيل الازرق. يعني وزير في الحكومة ومشارك في السلطة الحاكمة. وظل في منصبه متوهط عربات الحكومة وقابض مرتباتها لحد ما جاتو الطامة الكبري مسحت بيهو الارض. اها الزول لما حزبو قرر يشارك عمل نفسه معارض للمشاركة وقلب الدنيا وقال المشاركة خيانة .. طوالي قوموا يا مناضلين سوق بكري ارفعوه ليك فوق الاكتاف وهاك يا تمجيد وتطبيل ومظاهرات ونضآلات. الغريبة لي يوم الليلة ما في واحد قال لينا ليه مشاركة الزول ده كوزير ومستشار علي المستوي الولائي تعتبر بطولة في حين ان المشاركة علي المستوي الاتحادي تعتبر خيانة .. وكمان العجب الزول التاني الاسمو عبد المنعم رحمة فك الله اسره جو المناضلين يبكو قالو الزول ده مسكين ما بكتل فرخة وما مفروض يقبضوه. لكين برضو لي يوم الليلة مافي مناضل شرح لينا ليه زول ما بكتل فرخة ينضم لحركة بتكتل الفراخ، ويكتب لي الناس البكتلوا الفراخ البيانات الثورية؟!!

Quote: الزعيم الملهم الجديد بتاع المناضلين الاسمو التوم هجو

ده منو ده كمان ده؟

ببيع شنو؟ وبفرش وين بالله؟ وموديل كم بالله؟

الواحد ما ينوم يعني؟ المنبر ده مالو بقى عامل زي
السكن العشوائي كده؟ كل يوم ظاهره لينا فيهو قطية جديدة؟

فعلاً : النضال في خطر , كل من هب ركب القطر.

وكدا!!!!

Quote: بيني وبينك مناضلين سوق بكري ديل في مسألة النضال دي يحيروا الما بتحير.. خليك من خليل الكوز الدباب الوزير الانقاذي .. حسّا دي شوف الزعيم الملهم الجديد بتاع المناضلين الاسمو التوم هجو القال رافض المشاركة. الزول ده كان مستشار ووزير ولائي بقرار من رئيس الجمهورية بناء علي توصية والي النيل الازرق. يعني وزير في الحكومة ومشارك في السلطة الحاكمة. وظل في منصبه متوهط عربات الحكومة وقابض مرتباتها لحد ما جاتو الطامة الكبري مسحت بيهو الارض. اها الزول لما حزبو قرر يشارك عمل نفسه معارض للمشاركة وقلب الدنيا وقال المشاركة خيانة .. طوالي قوموا يا مناضلين سوق بكري ارفعوه ليك فوق الاكتاف وهاك يا تمجيد وتطبيل ومظاهرات ونضآلات. الغريبة لي يوم الليلة ما في واحد قال لينا ليه مشاركة الزول ده كوزير ومستشار علي المستوي الولائي تعتبر بطولة في حين ان المشاركة علي المستوي الاتحادي تعتبر خيانة .. وكمان العجب الزول التاني الاسمو عبد المنعم رحمة فك الله اسره جو المناضلين يبكو قالو الزول ده مسكين ما بكتل فرخة وما مفروض يقبضوه. لكين برضو لي يوم الليلة مافي مناضل شرح لينا ليه زول ما بكتل فرخة ينضم لحركة بتكتل الفراخ، ويكتب لي الناس البكتلوا الفراخ البيانات الثورية؟!!

مواهيم النصال ديل أول ما جيت المنبر ده قلت ليهم القصة دي كلها ببساطة شديدة جداً
قصة بتاعة معايش ومصالح شخصية , يعني نحن السودان ده جيناهو ضيوف ولا شنو؟
ما عايشين فيهو وعارفين العليهو , كل من إنتفته مصلحته حمل عصا النضال والمعارضة
وإرتحل , إلا من من رحم ربي , وإنهم لعمري لقلة قليلة آثروا الصمت عن المزايدة في سوق
نخاسة النضال البائرة.

نواصل في قصة حزب أمة أنجال الصادق , وأنجال الميرغني
للحزب الديمقراطي , الموضوع ده بالمناسبة موضوع ظووو
شجون لي درجة وجيكون فيهو إتدياح .....................

المحيرني جداً في أمر سيد صادق وأنجاله , إنه في المنبر ده بنشوف ناس حزب الأمه والحرب الشعواء البشنوها على النظام , وفي نفس الوقت سيد صادق بياكل فول حجات وبطيخ وطحنية وبيبسي صااااقط مع البشير وآخر ضحك وقرقرة وآخرتها جابت ليها مشارااااكة مشااااااركة عدددددييييل كده في الحكم بكل ما تحمل كلمة مشاركة من معاني.

فهل يا ترى الناس الهنا في المنبر ده ما عندهم علاقة بي حزب الأمة وبيلقحوا في جتتهم ساكت ويملونا كلام فارغ؟ أم أنهم فعلاً في حزب الأمة لكنهم معزولين من قيادة حزبهم وكل واحد بيغرد خارج سرب الآخر وبيأذن في مالطه؟


دي قصة فعلاً في منتهى الغرابة!!!!


شكلوا سيد صادق ده بضقّل بيكم وخاتيكم تمومة جرتق وتمامة عدد لا أكثر ولا أقل!!!!


إيه العوبااااارة؟

يا سيد صادق :

معقولة بس الحكاية تكون : تهتدون ثم تفلحون , ثم ترجعون , ثم تنقرطون , وبعد كده تتفاوضون , وآخرتها تشااااااااااركون أديييل كده , وطيب اللفه الكبيييييييييييييييييرة دي لزومها شنو؟ ما كان من الأول طااااااااخ كده تشاركون وتريحوا دماغنا من الزنة دي!!!

بعدين يا سيد صادق أنا محتار جداً في المصطلحات القاعد تنجرها لينا كل يوم والتاني , في أيام كده
شايفك ماسك في : المابعرف ما تدو يغرف , أها يا ناس حزب الأمه من العامة عندي ليكم سعااااال :

إنتو سيد صادق بالله إكوووووولكم وبي ربطة المعلم ما شاف فيكم ولا واحد بعرف يغرف؟ يعني
معقولة دشليون واحد في حزب الأمة والويحييييد البعرف يغرف هو إبنه سعادة العقيد ركن عبد الرحمن؟
معقولة سيد صادق حتى الإنقاذ العفييييييييينة دي مستكترها فيهم وما تديها إلا لي جناك وضناك؟

وتيب إنتو القاعدين ليها شنو لي هسه؟

أنا لو منكم تقدموا إستقالات جماعية وتخلوا حزب الأمه ده لي سيد صادق وأنجاله , ولي سيد مبارك
وفنجطته وتخبطه!!!!

الناس ديل مستقلنكم وما بدوروكم عشان شايفنكم (مش أد المآم).

محمد

عساك بخير

غايتو لو كان الزول مع الإنقاذ، وكان ممن قتل ناقة نبي الله صالح

أو حتى اشترك في إبادة الدارفوريين

طالما انه جنح لمعارضة الإنقاذ، فإن رهبان المعارضة سيهبونه صكوك الغفران

هذا هو المنطق الماثل الآن

واصل يا حبوب.. فأسئلتك منطقية

والله لو كان خليل إبراهيم حيا ومعنا في هذا البوست لما تركت له جانبا ينام عليه من انتقاد مشاركته في هذا النظام الظالم
لكنه طالما كان بين يدي ربه فنحن نتأدب بأدب أذكروا محاسن موتاكم

ونعم صدقت أنا لم أسمع ابداً خليل إبراهيم أو اي كوز آخر يعتذر بلسانه عن مشاركته في هذا النظام
لكنني عرفت أن خليل إبراهيم قدم دمه فداءاً لإزالة هذا النظام
وما أصدق الدم يا صديقي

فالعبرة بالخواتيم يا صديقي
وهو يكفيه شرفاً أنه لم يمت كوزاً

وأهم حاجة عندي هي المصداقية
وما أظن هناك مصداقية أكثر من التضحية بالنفس

وربنا أعلم منا بسرائر قلبه - لكننا نحسن الظن ونصدق ونغفر له
ونسأل الله أن يسكنه مع الصديقين والشهداء

وأن يحسن خواتيم أعمالنا

Quote: محمد عساك بخير غايتو لو كان الزول مع الإنقاذ، وكان ممن قتل ناقة نبي الله صالح أو حتى اشترك في إبادة الدارفوريين طالما انه جنح لمعارضة الإنقاذ، فإن رهبان المعارضة سيهبونه صكوك الغفران هذا هو المنطق الماثل الآن واصل يا حبوب.. فأسئلتك منطقية

سلام يا عماد

المشكلة مناضلين الغفلة ديل زاتهم زي ما ذكر فوق ينطبق عليهم الأمر نفسه , ودونك الترابي الذي أصبح رمزاً وهادياً لمناضلي الغفلة , بعد أن قضى أشهر عسله في عش زوجية القصر الجمهوري يأكل من بلحها وفولها وبطيخها وعدسها وطحنيتها.

وعلى قولك حنواصل وزي ما بقولوا مناضلين الغفلة ماشين في السكه نمد ونتش عين الضلام بالضوء , وددددددشششششششششششششش!!!!

Quote: لكنه طالما كان بين يدي ربه فنحن نتأدب بأدب أذكروا محاسن موتاكم

نحمد لك التأدب بأدب ذكر محاسن الموتى.

Quote: والله لو كان خليل إبراهيم حيا ومعنا في هذا البوست لما تركت له جانبا ينام عليه من انتقاد مشاركته في هذا النظام الظالم

لو أن ذلك كذلك فلماذا لم تفعل عندما كان خليل حياً يرزق؟ ولماذا لم تترك له جنباً ينام عليه حينئذٍ؟ هل كان أمر مشاركته في هذا النظام سراً خفي على أحد؟

أرجو أن نترك العواطف جانباً ونتحدث عن الوقائع والأدوار , فعاطفة تغمض الأعين عن الحقيقة هي عاطفة أولى بعدم الإلتفات إليها!!!

Quote: وهو يكفيه شرفاً أنه لم يمت كوزاً

كيف توصلت إلى تلك النتيجة؟ ولو صح ما قلت فالأمر ينسحب على سعادة مولانا صاحب الفخامة حسن عبدالله الترابي لأنه يقف في خندق معادي للحكومة ويعمل على إسقاطها , والأمر نفسه ينسحب على السنوسي وعلي الحاج , والقائمة تطول.

أعتقد أن الأمر يحتاج إلي إعادة تعريف من هو الكوز حتى يتوافق ذلك التعريف مع متطلبات المرحلة وحتى لا تقع المعارضة المتهالكة في حرجٍ جراء إنضمام الغير لها.

Quote: فالعبرة بالخواتيم يا صديقي وأهم حاجة عندي هي المصداقية وما أظن هناك مصداقية أكثر من التضحية بالنفس

أعتقد أن القول أعلاه - وإن كان يعوزه الدليل - إلا إنه يذهب إلى تعضيد الرأي الذي سردته أعلى هذا البوست حيث ذكرت أنه لو قدر لعلي عثمان محمد طه أن ينقلب على عمر البشير فالأخير يمكنه أن ينضم إلى قائمة من ذكرت خاصة أذا أعلن صادق محاربته للنظام , وهو منطق غريب جداً إلا أن الواقع يقول ليس فقط بإمكانية حدوثه بل أن قد وقع ورأيناه رأي العين.


دعوا المشاعر وأمر المصداقية لعلاّم الغيوب فهو المطلع على مافي الأنفس وماتخفي الصدور.

Quote: ونغفر له

عايزة توضيح الجزئية بتاعة "ونغفر له" دي!!!!

Quote: فالعبرة بالخواتيم يا صديقي

أعتقد أن هذه العبارة تقف قاصرة عندما يتعلق الأمر بأرواح البشر , فالتاريخ لا يرحم من أطلق رصاصة واحدة على نفس بشرية حتى وإن مرت دهور على ذلك , ومن شارك في حرب أبادت وحرقت فهو في دائرة ذاك التاريخ حتى قيام الساعة , فإزهاق نفس كإزهاق كل الأنفس ومن قتل نفساً كأنما قتل الناس جميعاً.

ما علينا.

خلونا في موضوعنا بتاع حزب الأمة لصاحبه الصادق المهدي وأنجاله , والإتحادي الديمقراطي لصاحبه الميرغني وأنجاله..................

بعدين الوهمة بتاعة إنه إبن الصادق لا يمثل إلا نفسه ومحاولة تبرير عملية المشاركة بحجج واهية زي دي لا تنطلي على رجل الشارع العادي متوسط الذكاء , وإن كان رجل الشارع العادي في أيامنا هذه , وفي سوادننا هذا , أصبح لا يعرف لحزب الأمة قيمة فهو حزب ديناصوري أكل الدهر عليه وشرب , جل إهتماماته طريقة لف العمامة وحمى موضة المصطلحات الغريبة و(المنشزة). والفكرة السذاجة - التي حاول الحزب الدفع بها في محاولة مستميتة لتبرير المشاركة - بأن سعادة العقيد قد قدم إستقالته من الحزب - فهو تبرير طفولي مضحك ومدعاة للإشمئزاز وسبباً للسخرية والضحك , فحيلة بهذه السذاجه والسطحية لم يستطع الحزب فبركتها وتقديمها بالشكل اللائق للفبركة وهي مسرحية هزيلة سيئة الإعداد والإخراج والتقديم , فأي مبرر هذا بحق الجحيم؟ أما كان من الأدعى أن يتقدم المذكور بإستقالته أولاً ومن ثم المشاركة؟ هذه الطريقة الساذجة في التحايل تذكرني بأمر اليهود حين منعوا من الصيد يوم السبت , فإعتادو على حبس السمك من ليلة الجمعة والعودة لصيده صبيحة الأحد أو نحو ذلك.


كما أنني في أشد (الدحشة) من المحاولات المستميتة لتبرير عملية المشاركة , ما الذي يحعلكم تتحسسون وتشعرون بكل هذا الذنب وتلقون علي عاتقكم بعبء بهذا الثقل؟ طالما قرر آل المهدي وأنجاله المشاركة فلا داعي لكل هذه (البلبطة) و (الجقلبة).


قالوا البيرقص ما بغطي دقنه!!!!


وكدا!!!!

Quote: واستبعد عبد الرحمن الصادق وقوع ثورة شعبية في السودان على غرار الثورات العربية، ورأى أن الاوضاع في البلاد تختلف عن مصر وتونس على مستوى الحريات التي اعتبرها في السودان الافضل على مستوى المنطقة.

الحريات في السودان الأفضل على مستوى المنطقة.

Quote: ودافع عن مشاركته في السلطة وقال إنه يتحمل مسؤولية قراره وتبعاته،وكشف أنه شاور والده ورد عليه «ربنا يوفقك»

وتيييييييييييييييييب؟

يا سيد صادق بالله فهمنا الغلوتية دي :

كيف يعني ولدك وعضو حزبك أمبارح يشاورك في مشاركته النظام وتتمنى ليه التوفيق , والليلة تقابل الترابي وتتفق معاه على إسقاط النظام؟ صدقوني إنتو الأتنين والمعارضة المهلهلة دي عن بكرة أبيها ما تسقط حيطة جالوص :