Post: #1
Title: المفحضة
Author: نجلاء قرافي
Date: 12-28-2011, 07:36 AM
Parent: #0
عالم من الاسرار مخبوءة في الاحضان الحنينة والصارمة في آن واحد
تندس الاصابع في جوفها بسرية تامة تبحث عن ملين أو تعريفة وربما ربما قرش .
تلك الاصابع المشتاقة المتلهفه للدخول بين الطيات السرية فهي لاتدخل هناك الا عند ( الشديد القوي ) .
|
Post: #3
Title: Re: المفحضة
Author: نجلاء قرافي
Date: 12-28-2011, 08:10 AM
Parent: #2
خروجها مهيب من بين الاحضان الدافئة والصارمة في آن واحد
تتطلع الاعين الصغيرة بتلهف فمهما حاولت التلصص لمعرفة مابداخلها رغم تيقنهم بإستحالة ذلك الا انهم يعيدون الكره فينقلب البصر مكسور وحسير
العيدين قطع شك خروجها مؤكد
وبالذات بعد صلاة العيد
تجد الصغار يتحاومون حول (حبوبة ) بمناسبة وبغير مناسبة يرهفون الاذان عسى أن تناديهم لتغدق عليهم منحة العيد
لخروج العيدية من المفحضة مراسم وبرتوكولات ابتداءً من وضع سفة معتبرة لتظبيط المزاج ومن ثم تبَين المفحضة من الخارج ثم فتحها باليد المعروقة وهزها برفق لتصيب هدفها مباشرة فتقبض الاكف الصغيرة المختلجة المشاعر بالعيدية بظفر وتختفي عن الانظار بهمة وفرح .
|
Post: #4
Title: Re: المفحضة
Author: نجلاء قرافي
Date: 12-28-2011, 08:28 AM
Parent: #3
الطرادة إحدي الاسرار الثمينة المخبوءة في محفضة حبوبة
ودي منحة عيدية بامتياز وغالباً ماتمنحها حبوبة في عيد (الحلاوة)
ولاتتكرر في احايين كثيرة فالقرش هو سيد الموقف .
|
Post: #5
Title: Re: المفحضة
Author: نجلاء قرافي
Date: 12-28-2011, 08:33 AM
Parent: #4
الطرادة الورقية لها وقع خاص فمن النادر أن تمنح كعيدية ولو مشيت بيها الدكان ممكن بتاع الدكان يجي يكلم اهلك لضخامة المبلغ .
يعني حلاة وحمار ياحليلك يالطرادة ...زمن والله .
|
Post: #6
Title: Re: المفحضة
Author: نجلاء قرافي
Date: 12-28-2011, 08:48 AM
Parent: #5
تطورت المفحضة واتخذت اسماً حديثاً جزلان
وفقدت حنيتها ومابداخلها فقد قيمته ياحبوبة
|
Post: #7
Title: Re: المفحضة
Author: عبد الناصر الخطيب
Date: 12-28-2011, 09:37 AM
Parent: #6
.
الله يرحمه حبوبة ....... والواحد منتظر منها تطلع المفحضة عشان الشلن ( خمسة قروش )
ولا ريال ( عشرة قروش ) ......... الطرادة بتكون في المناسبات ( عيدية ).....
شكرا أستاذه نجلاء ........ في البال تفاصيل لزمن بقي بعيد ... قاعد في الذكريات
بتفاصيلوا وشخوصوا .... وحاجاتو المنها مفحضة حبوبه ...... وشلوخه البهية
وحكاويها عن ود النمير وفاطمة السمحة ..........
-----------------------
تحياتي
|
Post: #8
Title: Re: المفحضة
Author: محمد أبوالعزائم أبوالريش
Date: 12-28-2011, 09:59 AM
Parent: #7
نجلاء إزيّك ....
المفحضة (ويمكن زماننا كان قبلكم)، ما كنا بنشوف منها الطرّادة.
تجود المفحضة (بعد تقليب جيوبها الكثيرة) بي (تعريفة) أو (قرش) أو (شلن) .... وبالكتير ريـال. لكنها كانت ثروة كافية للتبضّع بأشكال من الدوم والنبق والقنقليز .... وربما حلاوة كاراميلا.
____
للمفحضة استعمالات أخرى ......
حصل جلدوك بي سير المفحضة؟
|
Post: #9
Title: Re: المفحضة
Author: مهيرة
Date: 12-28-2011, 10:29 AM
Parent: #8
يا سلام يانجلاء
رجعتينا للزمن الجمييييييييل
الزمن الحنييييييييين
زمن يما ويابا
آه يانجلاء فتحتى فى قلبى طاقات الذكريات الحبيبة
وأصلا يا نجلاء بتى ،انا ترباية حبوبة.....أمى الحنينة
تسلمى يانجلاء وجعل الله ايامك كلها اعياد
تحياتى
|
Post: #10
Title: Re: المفحضة
Author: Nagat Sid Ahmed Elshiekh
Date: 12-28-2011, 06:49 PM
Parent: #9
Quote: تجد الصغار يتحاومون حول (حبوبة ) بمناسبة وبغير مناسبة يرهفون الاذان عسى أن تناديهم لتغدق عليهم منحة العيد
لخروج العيدية من المفحضة مراسم وبرتوكولات ابتداءً من وضع سفة معتبرة لتظبيط المزاج ومن ثم تبَين المفحضة من الخارج ثم فتحها باليد المعروقة وهزها برفق لتصيب هدفها مباشرة فتقبض الاكف الصغيرة المختلجة المشاعر بالعيدية بظفر وتختفي عن الانظار بهمة وفرح . |
الله يا نجول لوحة سريالية من زمن مضى بكل ذكرياته .....
رحمة الله عليك حبوبة بت علوب ...كانت مفحضته كينق سايز والله
.. عشان الفكة كتيره ..
بنجيك برواقه وانتى الليلة حركتى عصب السكون.....
. لنا ذكريات مع مفحضة حبوبة ..بالله اسألى حيدر من محفضة حبوبة بت علوب عشان كان ليه نصيب الأسد ونص وخمسة .طبعآ كنا مغيوظين من حيدورة عشان نصيبوا بكون طرادة فى المناسبات وحتى بدون مناسبة يعنى بالضرا وكدا ..ود المصارين االبيضاء....هههههه
|
Post: #11
Title: Re: المفحضة
Author: سلمى الشيخ سلامة
Date: 12-28-2011, 10:41 PM
Parent: #10
تسلمى يا نجلاء على
المفحضة
تاريخ ربمااندثر
لكنه محفور فى الوجدان
خاصة نحنابنات الحبوبات
فلكل حبوبة لونها فى امر المفحضة
واحدة تحبها سوداء وكبيرة
واخرى بنية ومتوسطة
حيث تتدلى من تحت الجلابية "ما فستان "
فى بربر تسميها حبوباتى "الشكوى " ولا اعرف على وجه الدقة من اين جاءت تلك التسمية
وكانت البنات فى المدرسة فى بربر يستخدمنها مثلما نستخدم المحفظة الان
حيث حكت لنا خالتى نفيسة احمد ابراهيم من اوئل المدرسات فى بربر
ان احد التلميذات جاءتها تبكى ضياع "شكوتها "
والتى فهمت بعد ذلك ان التلميذة تعنى المفحضة
اما الجلد بسير المفحضة كما ذكر ابو الريش
الله لاوراك فيهو "حرورية محيطة "
كانت تباع فى سوق امدرمان القديم حيث مشيت رفقة امى نفيسة وهى والدة امى عليهن الرحمة
نمشى بغرض شراء المفحضة خاصة وان كانت مدعوة لمناسبة ما
ومن نفس المحل غالبا ما تشترى مركوب فاشرى لزوم "القشرة "
تحياتى
|
Post: #17
Title: Re: المفحضة
Author: نجلاء قرافي
Date: 12-31-2011, 02:17 PM
Parent: #10
ياتوته الحلبي دا بتنجهوهو
يستاهل المعاملة الخاصة عشان زول عسل ومدفق حلا ( وش غامز) .
بعدين حبوباتنا ديل بفهموها وهي طايرة
يعني ما إنحياز ساي ...شفتي كيف .
بعدين بت علوب الله يرحمها براها ماناس كتار مشروقين متل شرقتها دي ههههههههه.
|
Post: #16
Title: Re: المفحضة
Author: نجلاء قرافي
Date: 12-31-2011, 02:09 PM
Parent: #9
صاحبة الفضل يامهيرة
هي صديقتي العزيزة أحلام التي اهدتني اياها حينما جاءتني الى المطار مودعة تحملها في ايدها
وهى تعرف سر ولعي بالاشياء التراثية .
كم فرحت بالهدية وعلقتهاعلي رقبتي طوال السفرية متباهية بتراث وطني الجميل .
|
Post: #13
Title: Re: المفحضة
Author: نجلاء قرافي
Date: 12-30-2011, 05:28 PM
Parent: #8
اهلين ابوالريش
كيفك كده
أكيد ياخي عاد شن لماني معاك ههههه لووووووول
حبوبتي الله يرحمة حنيييييينه ماحصل شفتها مدت ايدها على واحد فينا ومن شدة حنيتها مابتنوم الا ابوي يخش البيت تقعد تنده لامن يخش البيت
لها الرحمه يااارب ...آمين .
|
Post: #12
Title: Re: المفحضة
Author: نجلاء قرافي
Date: 12-30-2011, 05:23 PM
Parent: #7
عبد الناصر
حبوبتي غير ناطقة بالعربي لها الرحمه والمغفره
كان عندها مشكلة في نطق إسمي اختصرت الطريق وبتقول لي البت الصغير
لاني اصغر اخواتي .
احتفظ باشياءها الصغيرة
الكدوس / الغويشة المعدنية / واشياء اخرى .
زمنهم زمن البركه رطل السكر كان يمشي كام يوم هسي يتلحس بي سفة واحده .
الله يرحمهم جميعاً .
|
Post: #14
Title: Re: المفحضة
Author: نجلاء قرافي
Date: 12-30-2011, 05:37 PM
Parent: #12
في زمن السرعة اصبحت محفظة حبوبة بها القريشات مضغوطة
ماستر كارد
فيزا كارد
كريدت كارد
ووووو
.
راحت علي ناس امنية وجنى والاء وحمودي .
|
Post: #15
Title: Re: المفحضة
Author: Nagat Sid Ahmed Elshiekh
Date: 12-31-2011, 00:53 AM
Parent: #14
Quote: في زمن السرعة اصبحت محفظة حبوبة بها القريشات مضغوطة
|
هههههه المضغوطة دى كان فكوها المفحضة بتشرط كرررررر.
بس الدفع ح يكون كيف يوم العيد مع المضغوط دا؟؟؟
|
Post: #18
Title: Re: المفحضة
Author: Abd-Elrhman sorkati
Date: 01-05-2012, 11:06 AM
Parent: #15
أستاذة نجلاء تحياتي
كلام وموضوع معتق يحمل الكثير بداخله وينقلنا نقلة ( رهيبة ) من زمن الي زمن وفارق كبير بين زمنين
تطور الحياة شيء طبيعي ولكن حقيقة أحن الي ذلك الزمان الجميل
شكرا لك واتمني ان تواصلي ،،،،، الموضوع كبير
|
|
[/URL