دفعة المنبر 26/11/2004 أين أنتم ؟؟ أين أنتن ؟؟

كان حدثاً غير مسبوق في بعده الكمي
لأول مرة حسب ظني يمنح السيد بكري أبوبكر ( كم ) العضوية ذاك لذلك العدد من الناس معاً
تباينت ردود فعل الأعضاء ( المخلوعين ) من العضوية التي ( نزلت ) عليهم فجأة
كما تباينت ردود فعل الأعضاء القدامي
سوف أرصد من الذاكرة بعض تلك المواقف

لا توجد روابط إلا ما يخصني

ثابت محمد الجاك

دفعتي في الدراسة
ودفعتي أيضاً هنا


ما تشوفوهو ( مسمسم ) كدا

منى خوجلي

المهندسة مها بشير

Maha Bashir

تكتب بالقطارة

نادية عثمان مختار

بطريقته ( المميزة ) إستقبلنا زميل المنبر أبو الريش ببوست صادم
أسماه " من أين أتى هؤلاء ؟؟؟ "
قال فيه أن جهاز الأمن قد أرسل ( تجريدة ) كاملة للمنبر - أو كما قال -

لم تقصر كذلك عضوة المنبر المحبوبة تماضر شيخ الدين
فقد في أحد مداخلاتها منتقدة بكري

" أنه فتح باب العضوية في السهلة " - أو ما معناه -

لم يصدق البرالمة أن بكري قد منحهم العضوية
وقعوا في المنبر وقوع من ( يخاف سحب الباسوورد )
بوستات تطاقش بوستات

لم أكن إستثناء
تطاقشت معهم
رغم أنهم لم يتركوا لي مدخلاً أدخل منه
ذلك حيث أنني عملاً بمبدأ " التقلة صنعة "
فقد ( صبرت ) يومين كاملين لأنزل بوستي الأول

[[U]B]هل غادر ( البرالمة ) من متردم ؟[/B[/U]]


--------------

أثر البرلمة ظاهر في طريقة كتابة عنوان البوست ( التنسيق )

ببشاشتها المعهودة
طافت العزيزة رجاء العباسي على كل بوستات البرالمة مرحبة بهم
وهى تكاد لا تعرف معظمهم معرفة مسبقة


وبعد إنتهائها من ( واجب الترحيب ) والذي منو
رجعت لبيتها
و ( تشطفت )
ومددت ساقيها
وأطلقت جملتها الشهيرة

" ما عارفة ليه عندي إحساس كدا أنو اليوم دا زى يوم العيد العصر "

عاطف أخوي
سلامات و كيف الاحوال
يعني يا عاطف مش بالله عضويتنا في المنبر دا تستحق الاحتفاء

Quote: المهندسة مها بشير Maha Bashir تكتب بالقطارة

بكتب بالقطاره و الله ما خالص نقول شنو مع الزمن المامكن يتلحق
لكن كدي خليني يلا أحكي ليك شويه عن إضافة سودانيزأونلاين لي
هي علاقاتي التي أعتز بها و أحتفي بها ومثالا علاقتي بك يا عاطف
بالاضافه للسبق في المعلومه والتواصل ...
إلتقيت بحبيباتي و صديقاتي مني خوجلي إشراقه مصطفي و رجاء العباسي و حليمه تو" صباح" عزاز شامي
عشه بت فاطنه و عليا أختها والله أفتقدها و إالتقيت الصديقه العزيزه أماني عبد الجليل و تماضر شيخ الدين
إالتقيت بطلال عفيفي مرتين في النمساء والسودان وإالتقيت بنصار إالتقينا أنا و معز عمر بخيت في المطارات
إلتقيت ببكري أبو بكر و صديق عبد الهادي الذي أعرفه أصلا و كوستاوي و أنوار عبد الوهاب الانسانه الغير عاديه
و التي أحمل لها عرفانا وود كبيرين.....إالتقيت بخالد كودي عدد من المرات و أيضا ندي علي
بعض الناس إالتقيتهم أكثر من مره لكن في أول محك حقيقي اثبتو أنهم غير جديرين حتي بالوقت الذي ضيعته حتي في التعرف عليهم
لكن لبعض الافعال ضريبه مش؟
إالتقيت بحسين ملاسي و الفنان عصام عبد الحفيظ و "هميمه" هاله عبد الحليم التي أعرفها اصلا كنا ساكنين في حله واحده و إلتقيت بنجاة محمود و عادل أمين
ألتقيت بصبري الشريف الذي زارني في بيتي في كندا
إالتقيت بالاصدقاء عبد الرحمن بركات و كمال سالم عزموني أحلي فول و سمك في سوق واقف في الدوحه
و بدر الدين الامير عزمني غداء في أحلي فندق في الدوحه و االسني دفع الله و زوجته أحلام
و هارون دياب والجنرال المكي و ناجيه و عزومتهم لي في منزلهم كما إالتقيت عادل التيجاني و النور حمد الذي أعرفه أصلا
وطارق المكي و عزيز " دكين" والبنوته الحلوه مهيتاب بركات

أما أصدقائي البعرفهم قبل سودانيزأونلاين أسعد الريفي و محمد المرتضي حامد ومتوكل محمود
أما أصدقائي الاسفيرين فهم كثر أعتز بهم ايما إعتزاز و أتمني في المستقبل أن ألتقي بهم إذا إتيحت لي الفرصه
اثناء سفري ...
تحياتي يا عاطف ومعزتي التي تعرف
مها

غاليتنا مها بشير
مراحب وأشواق
ثم شكر وامتنان وأنت أول المطلين من أبناء الدفعة
تستحق عضويتنا الإحتفاء صدقاً
كيف لا وصديقنا بكري قد منحها بعد فترة طويلة من الإنتظار
كيف لا وقد منحتنا أجمل الأوقات
كتبنا
ناقشنا
تعرفنا على أفاضل وفضليات كرام
أصبحوا جزءاً مهماً من حياتنا
تحياتي وعميق احترامي لكل الأعزاء والعزيزات الذين أوردتيهم في مداخلتك الضافية
وتحايا ومحبات لك
ولأحمد وياسمين

انا بوليس سرى لهذه الدفعة

Quote: انا بوليس سرى لهذه الدفعة

تحياتي وسلامات عبدالحميد مامون
ياخ إنت الرجل الخفي زااااتو
20 مداخلة فقط في خمس سنوات ؟؟؟
ولسع فاكر اليوزر نيم والباسوورد ؟؟؟

لكن رغم كل هذا سعيد بك يا دفعة

وكان العزيز نصار كالعهد به لطيفاً

افترع بوستاً أسماه

" يا برالمة ما بنقدر على الحوامة ، تعالو هنا نرحب بكم "

أو شئ قريب من هذا المعنى

فتدافعنا نحوه

عاطف يا غالي..

ســـلامات وإحترامات أنت وغيرك يعرفها..

أذكر ذلك اليوم جيدا.. كانت دفعة كبيرة في الـ "كم" والـ "الكيف".

كسب المنبر يومها أقلاما واشخاصا مميزين. دائما ما أرى النصف المملوء من الكاس.

إذا كانت هناك أقلام "مكسورة" فهذا ليس تخصصا في هذه الدفعة. هذه سنة الحياة، يعني في الدفع القبلها والبعدها والتي لا زالت تنتظر..

وبالغعل. كان إحساسي كأنه يوم العيد العصر. بعد ما تمشي تحوم على كل بيوت الحلة وتاكل الحلاوة والكعك والبسكويت واللذي منه:))

أتذكر أن محمد حامد جمعة، وهو من تلك الدفعة، كان يحتاج لمساعدة في وضع صورته على البروفايل. وقد ساعدته في ذلك بسعادة. وبعدها وبعد طوفان بوستات الأمن والأمنجية. لم أندم قط على تقديم تلك المساعدة أو الترحيب به. وحتى اليوم أجده شخصا مهذبا. أختلف معه 100% فكريا وإنتماء. ولكن إختلاف الراي لا يفسد للود قضية ليست فقط مقولة نستخدمها (بمزاج).

أتذكر أيضا إنضمام شابتين أديبتين (كانن سمحات بالحيل). أها الجماعة هنا هجموا عليهن هجمة أشرس من هجمات خالد بن الوليد وابو عبيدة بن الجراح زاتو.. ههههه. قومن إختفن الخفية الياها.


* بالمناسبة في هذه الدفعة إنضمت (تارا) هدى العباسي.



مرحب بيكم دوما..

طيب يا عاطف سمونا ياخي أيِ إسم بدل دفعة 26/11/2004
ياخي تاريخ ما فيهو أيِ طعم

عـزيزي الأخ عاطف، تحياتي وأنا كنت من (ملحق) الدفعة بتاعتكم بعد تلاتة يوم.. وكنت قبل ذلك أكتب في سودان دوت نيت وسودانيات.. ومـن طرائف تلك ونسبة لحضور الصديقة الأخت رجاء، فقد سبق أن كتبت بوست تطلب فيه راي غير الأعضاء حول ما يكتب في المنبر وقمت رسلت ليها إيميل ونشرتو.. وفي بوست الترحيب بالبرالمة كتبت ليها: بالمناسبة أول مرة نُشـر لي فيها حاجة في المنبر كان من حسابك إنتي.. فظنت أن الهـكر جاي يعترف!.. لا أنسى برضـو بوسـت ترحيب الأخ عادل عبدالعـاطي بالبرالمة..
بعـدين داير أتونس معاكم شوية يا دفعة (دي على وزن يا صفوة).. لأني قمت بالدس كدة قتحت البروفايل بتاعك، قلت يمكن تغلط تكـون كاتب تاريخ الميلاد عشان أشوف يمكن نكون دفعة في حاجات تانية برضو غير البورد.. لكن لقيت حاجة تانية أجمل بالنسبة لي:

Quote: كثر لكن للأستاذ عثمان حسين وقع خاص

يا سـلام يا عاطف ورحم الله أبوعفان.. مش وقع خاص بس.. أنا بالنسبة لي أن الأستاذ عثمان حسين هـو أعظم فنان في تاريخ الأغنية السودانية وسابق لزمانه (بآلاف السنين)..شايف اليومين ديل الكلمة دي حايمة بهنا برضو.. ما أن أسمع قصتنا أو شجن أو لا تسلني إلا وأتأمل كم هو عبقري ومتفرد وعظيم،، حتى أغانيه من السهل الممتع الممتنع متفردة وبها كمية من التطريب لا يدانيه غيرها رغم وجود الكثير من عباقرة الغناء والتلحين والشعر والتطريب في السودان.. وهذه هدية لكل الدفعة ولمن رحب بها من السناير..

نحنا دفعة 2003م من ذمن كنا نكتب بالاسم الانجليزي ( ibrahim bagal ) قبل تغييره للعربي
وتحديث تاريخ جديد ومسح التاريخ القديم

عاطف
أنا برضو من ملحقي الدفعة بعد يومين ولا أزال أذكر الي اللحظة ترحيب رجاء العباسي وبقية الشباب الأداني دفعة معنوية كبيرة جداً خصوصاً أني كنت برلوم في مسألة الأسافير دي و أول منبر أكتب فيهو كان سودانيزأونلاين.
أستفدت كثيراً من الموقع و تعرفت على ناس أعتز بهم كثيراً و الي الآن لم أندم على معرفة شخص من خلال الموقع

بالمناسبة دي في زول عايز أوجه ليهو تحية و هو أستاذ إسمو خالد عبدالله محمود و جاتني كمية كبيرة من الإتصالات بعد التسجيل في الموقع تسأل إذا ما كنت أنا أستاذ خالد ويبدو أن الرجل كان شخصية محبوبة و تخرج على يديه كمية كبيرة من الطلاب

عاطف
تحايا
قبل هذا التاريخ كنت ولكن تم فصلى بعد اسبوع ( مع هوجة الهكرز الزمان )
و26 نوفمبر 2004 هو تاريخى هنا ... يعنى براى اسقطت تلك الفترة
وممكن نقول نحن هنا يا عمك .... وبس



قاسم المهداوى

Quote: و26 نوفمبر 2004 هو تاريخى هنا ... يعنى براى اسقطت تلك الفترة وممكن نقول نحن هنا يا عمك .... وبس

كسبت دفعتنا إذاً لاعباً مهارياً من طراز فريد
تحياتي وسلامات عزيزي قاسم المهداوي

تحياتي وسلامي خالد عبدالله محمود

Quote: برضو من ملحقي الدفعة بعد يومين ولا أزال أذكر الي اللحظة ترحيب رجاء العباسي وبقية الشباب الأداني دفعة معنوية كبيرة جداً خصوصاً أني كنت برلوم في مسألة الأسافير دي و أول منبر أكتب فيهو كان سودانيزأونلاين.

امسكي واحد تاااني يا رجاء

معك نوجه التحية للأستاذ الفاضل خالد عبدالله محمود
فمن ذكره الناس بكل ذاك الخير
هو إنسان خير بلا شك

سعيد بتواجدك هنا

تحياتي وسلامي إبراهيم بقال

بالإنجليزي إنت سينيرنا
والعربي إنت برلومنا

لكن ما شفناك رحبت بينا

ولاً إمكن رحبت
لكن نحن الكنا دايشين

شكراً يا عزيز

تحياتي وسلامي عيسى
ثرية وحميمة هى المحاور التي حوتها مداخلتك الجميلة
كل منها يصلح بوستاً قائماً بذاته
وعصية هى أيضاً على أخذ جزء منها وترك آخر

Quote: وكنت قبل ذلك أكتب في سودان دوت نيت وسودانيات.. ومـن طرائف تلك ونسبة لحضور الصديقة الأخت رجاء، فقد سبق أن كتبت بوست تطلب فيه راي غير الأعضاء حول ما يكتب في المنبر وقمت رسلت ليها إيميل ونشرتو.. وفي بوست الترحيب بالبرالمة كتبت ليها: بالمناسبة أول مرة نُشـر لي فيها حاجة في المنبر كان من حسابك إنتي.. فظنت أن الهـكر جاي يعترف!..

نحيله لـ ( سينيرنا ) رجاء العباسي
واثق أنه سوف يحركها لتفتح ( سحارتها ) وتخرج بدر نفيس من الذكريات
فشر ( دكان ود البصير )

Quote: بعـدين داير أتونس معاكم شوية يا دفعة (دي على وزن يا صفوة).. لأني قمت بالدس كدة قتحت البروفايل بتاعك، قلت يمكن تغلط تكـون كاتب تاريخ الميلاد عشان أشوف يمكن نكون دفعة في حاجات تانية برضو غير البورد.. لكن لقيت حاجة تانية أجمل بالنسبة لي:

خلي الطابق مستور أحسن ( ليك إنت )
نحن يا دفعة لم يعد من الممكن أن نخفي شيئاً
عشنا بفضل الله حتى الآن ( نصف قرن ) من الزمان

Quote: يا سـلام يا عاطف ورحم الله أبوعفان.. مش وقع خاص بس.. أنا بالنسبة لي أن الأستاذ عثمان حسين هـو أعظم فنان في تاريخ الأغنية السودانية وسابق لزمانه (بآلاف السنين)..شايف اليومين ديل الكلمة دي حايمة بهنا برضو.. ما أن أسمع قصتنا أو شجن أو لا تسلني إلا وأتأمل كم هو عبقري ومتفرد وعظيم،، حتى أغانيه من السهل الممتع الممتنع متفردة وبها كمية من التطريب لا يدانيه غيرها رغم وجود الكثير من عباقرة الغناء والتلحين والشعر والتطريب في السودان..

إنه مدرسة
لا أستطيع تخيل حياتي لو لم تكن مدرسته موجودة فيها
أغانيه كانت حاضرة في أجمل لحظات حياتي
وأغانيه كانت موجودة في أكثر لحظات حياتي ألماً
أسمع حتى الآن أى أغنية من أغنياته وكأنني أسمعها لأول مرة
له الرحمة بقدر أطرب
وله الرحمة بقدرما آسى
وله الرحمة بقدرما صاغ من وجدان
وله الرحمة بقدرما أدخل بهجة أو أزال هماً وكدراً

تشكر يا حبيب على الهدية القيمة

Quote: طيب يا عاطف سمونا ياخي أيِ إسم بدل دفعة 26/11/2004 ياخي تاريخ ما فيهو أيِ طعم

تحياتي وسلامي عمران

ياخ خلي تاريخ 26/11/2004 ينسب لينا
نعمل ليهو طعم ولون ورائحة

تشرفنا بالمعرفة يا دفعة

ورجاء العباسي أيضاً هنا ؟؟
يا للجمال
تحتفل بـ ( أيفاع ) الأمس
سناير اليوم
ما أجمل الماضي يا رجاء إذا كان مدعاة للفخر
لذلك تجدينني أقف رهبة أمام مقطع أغنية الفنان الكبير حمد الريح التي يقول فيها

ما حرام ماضيك يصبح ليك أذية

سوف يأتي أبناء / بنات تلك الدفعة ليروون كيف أكسبهم الترحيب الدافئ الذي وجدوه منك ومن الآخرين ثقة.
تقليد جميل حاولنا جهدنا ألا نقصر فيه .

Quote: أتذكر أيضا إنضمام شابتين أديبتين (كانن سمحات بالحيل). أها الجماعة هنا هجموا عليهن هجمة أشرس من هجمات خالد بن الوليد وابو عبيدة بن الجراح زاتو.. ههههه. قومن إختفن الخفية الياها.

اظهرن يا دفعة
ديل يا رجاء يهجموا على العدو

التحايا أسوقها للعزيزة التي لم أتشرف بعد بمعرفتها هدى العباسي ( تارا )

تسلمي رجاء يا غالية

سلامات عاطف عمر (دفعة 26/11/2004)

نحنا هنا إلى حين عودة

(شغلتنا أموالنا و أهلونا) و (ديننا و دنيتنا)

و دمت



عضوة جديد لنج فمن من مرحب

عاطف عمر

شكراً على اللفته الحلوة دي

التحية ليك ولي للجميع " دفعة و ضيوف "

من الملاحظ على الدفعة إننا معظمنا داخل بإسمه الحقيقي

وكان هناك تعليق " الجماعة ديل ما خايفين ولا شنو ؟؟ "

هسة يجيني واحد ناطي يقول لي إنت دخلك شنو بالدفعة دي !!!!

26/11/2004 كنت بي Ismaeil H. Mohmed

وكنت برلوم " متشوبر " عملت دعوة جمعت ليك بورداب الخرطوم

في النادي الإغريقي على ما أذكر كان في معرض تشكيلي

وكانت جلسة بديعة . .
ربنا يديم الأيام الحلوة

سعيد بتواجدي في سودانيز وهنا


إسماعيل حميم


.

تحياتي وسلامي إسماعيل حميم

Quote: من الملاحظ على الدفعة إننا معظمنا داخل بإسمه الحقيقي

نعم
كانت الدفعة الأولى التي طبق فيها المعلم بكري قراره بإيقاف الأسماء المستعارة
دخلنا بأسمائنا الحقيقية ورغماً عن ذلك لم نسلم من الإتهام الصارخ الذي ووجهنا به
نحن سعداء أيضاً بتواجدنا معك في حوش سودانيزأونلاين
وأسعد بوجودك هنا

تحياتي وسلامات رانيا

حمداً لله على السلامة
لا حولاااااااااا
176 مداخلة في خمسة سنوات ؟؟؟؟
دخلت بوست الترحيب بتاعك
ياخ الجماعة ما قصروا معاك أبداً
إستقبلوك بحرارة شديدة

المهم

الفات مات

إن شاء الله نشوفك تاني كتير يا دفعة

دفعة المنبر 26/11/2004
أين أنتم ؟؟
أين أنتن ؟؟

up

رفع الله قدركم
اسماعيل حميم