استقراء لشكل التواصل لغويآ فى السودان الجديد !!!!

نحن الغبش استمدينا ثقافتنا لغويآ من البلد والحبوبات والأجداد , وثقلتها المدرسة ومراحل التعليم . فصارت هناك لغة موحدة متبعة فى كل بيت وشارع ومكان عام , وما تعلمناهو من ناس سيبويه لم يعكر صفو التواصل بيننا وبين أهلنا فى البيت , فبعد ما نرجع من المدرسة ولا تزال ترن فى آذاننا مكر مفر مقبل مدبر معآ , نسلم على الوالدة والحبوبة وتسألنا : يا بت التيبار دا مويتو ساقطة ؟ ويا ولد هوى ما تكسر الدح وبعضهم ينطقها المح ...وتجى جارة أخرى وتسأل يا أمونة ما قضيتى حلتك ؟ ولا بتدورى تسويها ملاح لايوق سا ؟عندكم خودراا ؟بملىء الفم !
ولا أمحد أحمد البيجى من هناك يقول : ها جنا ها فوت لى غادى صنقر حدا الشدرة دى ...
وناس أم خليل الجات من حلفا قبل نصف قرن وسكنت بالخرطوم ولا زالت تناديه : هليل يا ولدى تأل جيب لينا رءيف , وأدفع القروش وبأدين بديلك ...
وناس السنجك البتناديه أمو يا عبد أر حمان ..أنا شايلى السوق أبيعلى عمبلوك !!!
كل هذا أخشى أن يتسربل لمجرد أن البلد ولادها وبناتها علقت بعتادهم بعض الثقافات وبسبب الهجرة والتى بقت واقع سواء للغرب أو الخليج ...
ولم يخلو بيت من فتافيت كلمات دخيلة بقصد أو بدونه ...
وتابعوا معى هذه الحوارات بين أفراد أسرة سودانية :
عمر من أبناء الشكينيبة وقدم للبلد بعد ثلاث سنوات قضاها فى احدى دول الخليج ...
يبدأ الحوار والد عمر مخاطبآ أبنه الآخر : يا المكاشفى عمر ضرب فى الداهى التلفون دا وقال جاى باكر , دحين لازم نمشى نتلاقاهو فى الخرتوم فشان العفش قال كتير تب ...
وخارج بوابة المطار ينتظر المكاشفى وأبوهو ويظهر عمر محمل بالشنط ويسلم على والده : كيف حالك بوى أيش لونج , شو ها السالفى ماب تردون على مكتوبى ؟ والله حالى انشغل عليكم وايد !!!
وفى طريقهم الى الشكينيبة فى الباص ...الحوار الآتى :
أبوهو : أت يا عمر دحين عارف ختوبة ابراهيم ود البلة لى بت جار النبى ؟؟؟
عمر :لا والله يا بوى أيش بيشتغل الولد هدا ؟
أبوهو : عمر ات ماك سامعنى قتلك ولد البلة بيدور يعرس بت جار النبى !! والله بت سمحة تب , أمك كانت عازلاها ليك , الأ القسمة ...
عمر : أنا مانبيها يا بوى , ايش بيكم انت وامى تريدون تخطبون لى غيابى ؟؟ شو دراكم بطلبى ؟؟؟
وحوار آخر بين أفراد أسرة وأبنهم الذى مكث بمصر سبعة سنوات :
بأولك ايه يابا أنا ماعنديش فلوس , أدينى ميتين قنيه , ويا أما فين الأميص اللى كان منشور فى البلأوونة راح فين ؟؟؟ وفين الألم اللى كنت بكتب بى ؟ وما بعيد الولد دا أمو وابوهو يشوفوا ليهو فكى يبخره من العين الصابتو دى , لأنه فى نظهرهم بقى ما طبيعى وحيفتكروهو جن عديل .
وحوار بين أفراد أسرة سافر ابنهم الى لندن وبعد أربعة سنوات رجع ...
:ألأم : تعال لى يا جنا حشاى والله غيابك هرد قلبى ...
الأبن : (Take it easy Mum)
الأخت تسأل اخوها العائد ( وهى أساسآ لم تفك الحرف)
:أسو ليك شاى ؟
الأخ العائد :
Not now !!!يا جماعة أنا Iam not , Ohh , Just OK خلاص .
الولد العائد يمشى لسيد الدكان فى الحلة ( والراجل سيد الدكان مسيكين جاى من الضهارى والله فتح عليهو بالدكيكين دا وما مشى لا مدارس لا يحزنون )
الولد : Hi , may I have a lighter please ?
سيد الدكان : اهلآ بيك ات ماك جنى حاج على ؟ ات ماك الجنى اب وجنات ؟؟؟
علا نضمك دا ما خبرتو كدى عقب ..عقب تانى ...

ست البنات

الله يديك العافية موضوع شيق وخفيف الظل.

اعتقد ان هذه المشكلة في منطقة الخليج العربي اكثر تعقيدا حيث هنالك وافدون من كل

أصقاع الدنيا ، حتي ان بعض الاخوة هناك يقولون ان اللغة المستعملة في الحياة اليومية

اصبحت اقرب الي الهندية .

في السودان ، كما تفضلت ، بعض الاخوة والاخوات العائدين من الخارج يحاولون استقدام بعض

المصطلحات اللغوية معهم ولكن سرعان ما يقلعون عنها حينما يكثر التندر منهم خصوصا في

المناطق الريفية.

اكرر شكري للموضوع الشيق.

3 سنوات في الخليج و يجي يشيك الناس ...يا ريال أيشلونك...ده بس براهو داير ليهو سبب..طبعا بكون رجع لابس غترة و عقال...


اللغة و اللهجة و الثقافة عموما..اكتسابها و التأثر بها عملية صعبة و معقدة ..يعني يمكن يعانو منها ناس الجيل التاني أو المغتربون منذ الصغر..ألا..في ناس براها دايره تتحلا من سودانويتها...زي العاش في الشكينيبة ده ....ولا أيش رايك يا طويلة العمر..؟؟؟

سكينة ازيك
شكرا علي البوست الظريف
وانتي تقولي شنو في بتي البتتكلم الالمانية مسودنة
واللة ولا عالم سجيمان ما يلقالا وصف في قا موس سخريتة
كنا بنلعب قبل شوية قلت ليها كدي ح تموتي ردت بلكنة عربي جوبا وقالت لي
براك انتي تود وهذة الاخيرة تعني الموت غير مصرفة وعند تعريبنا ليها
بتكون الجملة براك انت تموت
غايتو مسالة اللغة دي كل ما اتذكرها ضغطي برتفع رغم المعاناة من الانخفاض الطبيعي ليهو.

دا كلو كوم و كلام الجالية كوم تاني .....