اعلان حظرا للتجول في الخرطوم..!!!!

اللهم استر علي الوطن واهله من ما يجري الان في الخرطوم

ملعون أبوكي كراسي ..وسُلطة ......... المواطن البسيط حصل ليه ترويع ما بعده ترويع ............ والتحية لقواتنا المسلحة للدفاع عن أمننا العام

Quote: ملعون أبوكي كراسي ..وسُلطة

فعلا يا ابوحميد
ملعون ابوها وامها تلكم الكراسي التي ضحاياها الابرياء والعزل
وافيدونا يا ناس الداخل ماذا هناك...في البلد..!!!

دلوقت في معارك في العرضة

التلفزيون بداء اذاعة اناشيد وطنية

سلام يا الحبر
وربنا يجيب العواقب سليمة
ويبدو ان الامر غريب الاطوار

هل من احد بالداخل يفيدنا عن بث تلفزيون السودان

المسالة تشادية صنعا واخراجا
وستندحر باذن الله ونامل ان تكون درسا
من اجل المزيد من الاصلاحات السياسية

Quote: من اجل المزيد من الاصلاحات السياسية

هلا الحبر
ولا اصلاح سياسي يرضي الجميع الا الاحتكام الي ارادة هذا الشعب يا الحبر
واطلاق الحريات والديمقراطية

الحبر يا اخوي
لمتين انتو في التنميطات الغريبه دي؟؟؟

Quote: المسالة تشادية صنعا واخراجا وستندحر باذن الله ونامل ان تكون درسا من اجل المزيد من الاصلاحات السياسية

تشاد مالها ومالكم تقتل نص رجالها عشانكم؟؟؟؟
يازول الناس ديل سودانين ومن حقهم تماما ان يحلموا بالتغيير زيهم وزيك.
واي كلان عن تدخل للاجنبي مرفوض.
تشاد قاعدة في اراضيها وعندها اخبار ان الخرطوم تستعد لضربها
تحتاج كل رجلا مخلص للدفاع عن اراضيها
لا عندها سكان قدرنا لا بتتشوبر في مشاكل اكبر منها
تعرف حدودها وتعرف عدد سكانها.لكن البيهبشها طبعا بتقدر له.

عبدالكريم سلام..

هي تصفية حسابات بين الإسلاميين.. فالدكتور خليل إبراهيم ليس بغريب عنهم

Quote: هي تصفية حسابات بين الإسلاميين.. فالدكتور خليل إبراهيم ليس بغريب عنهم

نعم يا رجا يا عزيزة
فهنالك مثل دارفوري يقول
ام منقور كلو قدومو احمر

والوطن لايزال يدفع ثمن مغامرات تفريخات الترابي

عبد الكريم سلامات
وربنا يجنب المدنين شر الصراع المسلح.

ولكن يبقى سؤال
ويوم زي ده بيتضح لاي حد قل زول بيطرش الجواه.

اولا البيخلي دخول حركة خليل ابراهيم طوالي توصف بالتشاديه
وحكرات عمر البشير بالسودانيه شنو؟؟؟


كلهم سودانين
ومادام البشير قال الدايرها يجي يشيلها بالسلاح فاليتحمل ويبقى راجل.

Quote: كلهم سودانين ومادام البشير قال الدايرها يجي يشيلها بالسلاح فاليتحمل ويبقى راجل

هلا ياتراجي
وحبابك الف
وياتراجي البشير وخليل ابراهيم وغيره من المستهترين بامن وسلامة الوطن
جميعهم يلبعون علي حبال وجهد موارد هذا الشعب بدون توكيل وبدون شرعبة بهنبتة علي جثث الابرياء

احمد موسى
يا راجل ما قلت سوداني جديد انت؟؟البخليك تردد كلام ناس السودان القديم ده شنو؟؟؟

Quote: ملعون أبوكي كراسي ..وسُلطة ......... المواطن البسيط حصل ليه ترويع ما بعده ترويع ............ والتحية لقواتنا المسلحة للدفاع عن أمننا العام

طيب جايك حرف حرف للكتبته هنا:


قلت صراع حول الكراسي وانا معاك ومن حقهم
ومادام هم استنى مبدأ الصراع المسلح فاليتحملوا,ولا يا ربي عندك قول ثاني انهم وصولوا
للمحل ده وطلعوا ابو يوم اهلنا بالديمقراطيه؟؟؟


ثانيا:

Quote: المواطن البسيط حصل ليه ترويع ما بعده ترويع

المواطن البسيط ده المغيب اعلاميا ليه ما طمأنتوا وقلت ليه ديل ما ناس ضدك وديل جوا لاجلك؟؟؟لكن صدقني ليس المواطن البسيط المورع
بقدر ما انت الصفوي نفسك المروع.لانك انت نفسك خائف من الآخر المختلف عنك.

ويا ترى لو الدخولا هؤلاء كانوا ناس الحركه الشعبيه كان اتروعتا وله لا؟؟؟

اما ثالثا دي فاكبر نكته:

Quote: والتحية لقواتنا المسلحة للدفاع عن أمننا العام

بالله بقت قواتكم المسلحه؟؟؟بالله بتتكلم زيك وزي اي كوز متشنج قال قواتنا المسلحه قال
لعلمك هذا جيش الجلابة وهو لحمايتهم فقط فمن يقتل اهل الجنوب لقرابة ال 30 عام
ويتقل اهل جبال النوبة قرابة ال 20 عام ويتقل اهل دارفور قرابة ال 5 اعوام
ليس جيشنا وليس قواتنا المسلحة انها قوات ابارتيد الجلابة.

فمرحبا بك جلابي متوج ومبروك عليك حماية قواتكم المسلحة لك.

الاخ عبد الكريم الجبهة الاسلامية ادخلت البلد لهذا المسلسل القبيح فضاعت حياة الانسان
من اجل الدولة الدينية التي اتت بانقلاب عسكري وهذا الحدث تفرخ من عباية الجبهة بالظلم الذي طال الانسان والحيوان


اتمني سلامة الاهالي
وغروب هذا الحكم الغاشم

Quote: وهذا الحدث تفرخ من عباية الجبهة بالظلم الذي طال الانسان والحيوان

بالتاكيد يا صبري
فالجبهة هي من اورثت الوطن مثل هذه الاحداث التي نحن فيها الان
ويارب احفظ الجميع وكل الغلابة الابرياء من هذا الشر

سلام يا هندسة

دا ما اليوم الحار زاتوا على وزن بوست خليل

هو انتو متوقعين شنو يعني
الأمة دي كلها تنظلم وتسد دي بي طينة ودي بي عجينة

Quote: دا ما اليوم الحار زاتوا على وزن بوست خليل

هلا يا نور الدين
وفعلا هذا اليوم بالتاكيد حار
ففيه ترويع للامن وتهديد بالموت وضياع الانفس المسكينة التي لاناقة ولاجمل لها في هذه المعمعة الغريبة وعجيبة

بالمناسبة يا عبدالكريم ناس قناة الجزيرة ما جايبين خبر.. حتى في شريط الأخبار.

وينقلون مباشرة من رفح.. وأنباء الوضع في لبنان..


وشرحو بي بي سي عربي

؟؟؟؟!!!!!!!!!!

Quote: وينقلون مباشرة من رفح.. وأنباء الوضع في لبنان.. وشرحو بي بي سي عربي ؟؟؟؟!!!!!!!!!!

دي ذاته يا رجا المشكلة
بتكون المعلومات مافيشة وغياب اعلام موثر من احداث زي دي امر محير...

والغريبة انو لو عترت شاه في رفح او برج البراجنة لوجدنها علي الهواء مباشر
وفعلا معك اردد عجبي

يا كيكي الله يحفظ اهلنا
حقيقي ما عارف البلد ماشة وين

Quote: حقيقي ما عارف البلد ماشة وين

هلا ياطارق وربنا يلطف علي عموم الاهل
وفعلا ماشة وين البلد دي ..الله وحده هو الاعلم في ظل هذه الضبابية العالية

ألأخ/عبدالكريم..

نسأل الله أن يحفظ الوطن..ويحقن دماء أهلنا وألأبرياء..

Quote: دلوقت في معارك في العرضة

ألأخ/الحبر هل انت من العرضة..أم على إتصال..لنتأكد من المعلومة..

إسماعيل محمد احمد عباس..

Quote: نسأل الله أن يحفظ الوطن..ويحقن دماء أهلنا وألأبرياء

نعم يا اسماعيل
والمواطنين الابريا لاستحقون ابدا مثل هذا الاستقطاب واعلان الحرب في اشياء هم بعيدون عنها تماما
وتورثهم الموت والدمار

الله يحمي السودان وشعبه

لكن صدقوني

فحركة خليل قد انتحرت

Quote: الله يحمي السودان وشعبه

سلام يا بيلو
وتعال ياخي ورونو ماذا هناك في امور البلاد والعباد
وياعز الدين اذا ثبت فعلا بان خليل هو من مارس هذه الهجمة فانه مدان والف مدان
ولكن كل هذا لايعفي السلطة ويعفيها من المسئولية فهي ايضا تغذي الكراهية والحرب والفتن
ويجب ان تذهب بدون تردد...فهذا الوطن يا بيلو صار لا يستحمل لقد بلغ سيله الزبي
وضاقت حلاقته علي ابريائه والغلابة

اللهم الطف بنا...

امن المواطنين هو الاولوية
ارجو ان يلتزم المواطنين بالكرفيو حفاظا على سلامتهم

Quote: امن المواطنين هو الاولوية ارجو ان يلتزم المواطنين بالكرفيو حفاظا على سلامتهم

هلا ياراوية والف سلام
وفعلا امن المواطنين هو الاولية والاولية القصوي

Quote: اللهم الطف بنا...

هلا يا سوسن
ولطف الله بالجميع
وحتي اعلان حظر التجوال الفجائي حتما سيحدث ربكة وكارثة في معايش الناس
ومصالحهم وستشل المدينة تماما...ولكن اعتقد بانه قرار صائب حتي يقي الجميع من القتل والرصاص
ودمتي يا سوسن

Quote: وياعز الدين اذا ثبت فعلا بان خليل هو من مارس هذه الهجمة فانه مدان والف مدان ولكن كل هذا لايعفي السلطة ويعفيها من المسئولية فهي ايضا تغذي الكراهية والحرب والفتن ويجب ان تذهب بدون تردد...فهذا الوطن يا بيلو صار لا يستحمل لقد بلغ سيله الزبي وضاقت حلاقته علي ابريائه والغلابة

عندما تفشل حكومات وقيادات فانها تفتعل المصايب لتقع فوق رؤوس الشعوب المسكينة...ان لم تستدرج السلطات هذا الفصيل فانها سهلت اما باهمال واستخفاف او بغرض وصوله الي العاصمة وهي التي تعرف بما اعلنه الفصيل بانه قادم الي الخرطوم ؟؟؟ هل استعراض العضلات وتاكيد القوة للحكومات يستوجب ان يكون ذلك علي جماجم الشعوب ؟؟ كيف ستقنع هذه السلطات الشعب بانها قادرة علي حماية حدود بلاد تعتبر الاطول في القارة الافريقية وبطول الاف الاميال وهي لا تقدر علي ايقاف قوات تقطع بضع مئات الكيلومترات في بلد مسطح لتصل الي عمق البلاد الي العاصمة وفي زمن امتلاك الاشخاص العاديين لاقمار صناعية وزمن غوغل ايرث وووووووووووو؟؟؟
انه تروييع للبشر لتاكيد سطوة وهيلمانة

Quote: عندما تفشل حكومات وقيادات فانها تفتعل المصايب لتقع فوق رؤوس الشعوب المسكينة...ان لم تستدرج السلطات هذا الفصيل فانها سهلت اما باهمال واستخفاف او بغرض وصوله الي العاصمة وهي التي تعرف بما اعلنه الفصيل بانه قادم الي الخرطوم ؟؟؟ هل استعراض العضلات وتاكيد القوة للحكومات يستوجب ان يكون ذلك علي جماجم الشعوب ؟؟ كيف ستقنع هذه السلطات الشعب بانها قادرة علي حماية حدود بلاد تعتبر الاطول في القارة الافريقية وبطول الاف الاميال وهي لا تقدر علي ايقاف قوات تقطع بضع مئات الكيلومترات في بلد مسطح لتصل الي عمق البلاد الي العاصمة وفي زمن امتلاك الاشخاص العاديين لاقمار صناعية وزمن غوغل ايرث وووووووووووو؟؟؟ انه تروييع للبشر لتاكيد سطوة وهيلمانة

سلمت يا باش ولا اضافة

كيكي سلامات ومشتاقون..

لا أعتقد أن هذا العمل المسلح قد قامت به حركة العدل لوحدها ولكن هنالك من معهم ولكن لا يريد إظهار نفسه لأن العملية فيما يبدو منظمة للغاية وكذلك السلاح المستخدم ويدل على كثافته أنه سلاح موجود داخل الخرطوم ومنذ زمن وهو نفس السلاح الذي بحث عنه وزراء الداخلية المتعاقبون لإنه من غير الممكن أن يتحرك هذا السلاح من تشاد وحتى الخرطوم وهنالك أسراب الطيران التي ما زالت تقصف قرى دارفور .. لا أريد أن أستبق الأحداث ولكن يبدو أن الدكتور خليل أسُتخدم أسواء إستخدام لتنفيذ مخطط ما فإن نجح فبها وإن لم ينجح فتظل المحاولة قائمة لوقت آخر ..

خالص الود ...

Quote: اعلان حظرا للتجول في الخرطوم..!!!! (

اللهم يا الطف الالطاف ..نَجِنَ مما نخاف..
عارف انا بكتب في الكلام دا وقلبي مقبوض شديد..حماي مقطوع في بحري، وهو ساكن الموردة.. ترك والدته الكبيرة في السن وزوجته الحديثة الوضوع، في الصباح الباكر، ليقف الحظر بينه وبين منزله..
لم يكن امامه سوى ان ارسل ايميل الى كل اشقائه واقاربه في كل من السعودية، الامارات، تونس، فرنسا، مصر، وكل مدن وبوادي السودان.. يسأل عن احوال اهله في الموردة، ويرجوهم مده باخبارهم، اذا تيسر لهم ذلك..

Quote: am in Bahry with Khali Alnour, mobile lines are extremely busy, if you heard anything from Almourada please e mail it to me, I will keep my e mail connected.

احيييييييييي يا بلد..

Quote: احيييييييييي يا بلد..

نعم يا حليمة
والف حيييييي عليك يا بلد

ولطف الله بالجميع

Quote: ولكن يبدو أن الدكتور خليل أسُتخدم أسواء إستخدام لتنفيذ مخطط ما فإن نجح فبها وإن لم ينجح فتظل المحاولة قائمة لوقت آخر ..

هلا يا مجاهد
ود خليل ارتكب اكبر خطا استراتيجي سياسيا وعسكريا
واضاف للانقاذ عمر وقوي دون شك...
قضية دارفور ذهبت بعيدا في اروقة المجتمع الدولي وحققت مكاسب عديدة ولكن ما جري اليوم في الخرطوم
امر موغل في الانتحارية والبلادة الاستراتيجة

..
.
تراجى يا عميلة ..
مبسوطة وجاى تطرشنى جهلك دا هنا ..

عارفه الاحداث دى بدت تذكرنى باحداث الاثنين الاسود
وخليل ابراهيم بتاعكم دا مصر ما يفهم ولا يعقل
دايما بضحى بالقضية وبتحرك فى المكان والزمان الخطأ

على العموم الطيران الجوى وقواتنا المسلحة لن تسمح تفرط
فى مكتسبات المواطن والدفاع عنه عشان ما تتكرر مأساة الاثنين 2 أغسطس


ولمن واحد يقول او _ نحنا _ نقول قواتنا المسلحة لانها حريصة
على امن المواطن وعلى الاقل ما بفكرو يقتلو الابرياء من طرف
وهمهم الدفاع عن المواطن ومكتسباتها ..

_________________

لو الحركة دى اخمدت اليوم او بكره .. ابدى اعيدى حساباتك
شوفى انت محتاجة كم فيزا هجرة لاولاد دارفور وكم دولار بتحتاجى عشان
تدعمى اسر المسجونيين والمعتقلين .. منهم
اقلو العاصمة تفضى شوية .. وسوق ليبيا ببقي بتاع جلاية

الله يلعن ابو فهمكم .. ومعاكم خليل ابراهيم

Quote: ولكن كل هذا لايعفي السلطة ويعفيها من المسئولية فهي ايضا تغذي الكراهية والحرب والفتن

هلا يا علاء
والف تحية

وهذه يا علاء
هرجلة استراتيجية حكومية وخليلية...!!!

عبدالكريم يا عزيز..

طلعت مشوار وعقلي وقلبي مشغول. ورجعت ولقيت الأمر كله غير مفهوم
لا أؤيد أن قوات العدل والمساواة هي قوات تشادية.
ومن البديهي أن تتحرك هذه القوات من تشاد لأنها قوات حركة وليس جيش نظامي.
وجميعنا نعرف أن دول الجوار (أي جوار) تدعم حركات التحرر..
حتى ناس الإنقاذ ديل أنفسهم دعموا الهاربين من الأخوان المسلمين في مصر وفتحوا لهم معسكرات تدريب والظواهري واسامة بن لادن أمًنوا على ذلك..
وهو نفس الإتهام الذي كان يطال قوات التجمع الوطني ويقال أنها قوات أريترية.. ويكاد يقسم ناس الإنقاذ أنهم ألقوا القبض على أريتريين مع الأسرى..

الآن وبدون تنظير قطعا سيكون هناك ابناء من الزغاوة من ضمن الأسرى. وسيقول الإنقاذيون أنهم زغاوة تشاديين وليس زغاوة سودانيين. وكل ذلك لخدمة أغراضهم التي لا تخفى على أحد.

حتى ولو قبض على تشاديين مع أسرى العدل والمساواة. في رايي أراها (واحدة بواحدة) والبادئ أظلم..



* تعرف في الموضوع ده كله المزعلني شنو؟
ناس الإنقاذ لقوا سبب يطلعوا بيه في راسنا كمان وكمان. وإنه د. خليل تلميذ الإسلاميين هو من قام بذلك

Quote: ناس الإنقاذ لقوا سبب يطلعوا بيه في راسنا كمان وكمان. وإنه د. خليل تلميذ الإسلاميين هو من قام بذلك

هلا يارجا
واكيد يارجا الانقاذ ستلعب علي اوتار هذا الحدث وقد بدات بالفعل
ورغم اعتراف العدل والمساواة رسميا وهي حركة سودانية بانها هي من نفذ هذه العملية
الا ان الاعلام الرسمي في الخرطوم يردد بان هولا تشاديين واعتقد ان ذلك ضروري لهم لاستقطاب الكثيرين
واشاعة التدخل الاجنبي...
الوضع فعلا معقد ومربك
ولكن الشاهد بان الانقاذ وزي ما قلتي انتي ستجدها فرصة لممارسسهة فن جديد من فنونها في الالتفاف واللولوة بعيدا من حتمية الحل الجذري لموضوع دارفور الذي وصلت دوشكاته اليوم الي قلب امدرمان..!!

Quote: الا ان الاعلام الرسمي في الخرطوم يردد بان هولا تشاديين واعتقد ان ذلك ضروري لهم لاستقطاب الكثيرين

سوء ادارة للاعلام وعشوائية التنفيذ نراه في تصريحات متضاربة بهوية المتمرديين فوزير الداخلية ومسار واخرون يذكرون انهم "تشاديون" وقادة الجيش والشرطة وخبراء عسكريون يذكرون انهم متمردون وان هويتهم ستحدد بعد التحقيقات مع الذين تم القبض عليهم ...ما زالت في ذاكرتي الهرجلة الاعلامية في يوليو 76 وكيف تضاربت التصريحات عن هوية المعارضون فقيل انهم ارتيريون ونال هؤلاء ظلم شديد...في كلا الحالتيين انها ادانة للجهات الامنية فكيف يقطع هؤلاء الاف الاميال ليصلو الي عمق عاصمة فيها من الجيش والقوات النظامية عدة الاف .. لقد وصل هؤلاء امس الي الكباري والجسور كما جاء في الخبر والصور وانهم لم يكونو يستهدفون امدرمان ولكن الخرطوم وانهم بعد ساعات من بدء المعارك وصلو كبري النيل الابيض ؟؟؟؟؟ كيف ؟؟؟

Quote: احمد موسى يا راجل ما قلت سوداني جديد انت؟؟البخليك تردد كلام ناس السودان القديم ده شنو؟؟؟ Quote: ملعون أبوكي كراسي ..وسُلطة ......... المواطن البسيط حصل ليه ترويع ما بعده ترويع ............ والتحية لقواتنا المسلحة للدفاع عن أمننا العام

تراجـــي : سودان قديم منو سودان جديد شنو؟؟؟؟ ليه دايماً تصري تنقلي للآخرين إنك بتعرضي خارج دارة الحاصل ؟؟؟؟ البلد فها مواطنون يموتون دونماسبب وأنتي تُردين كببغاء شاخ صوته
(سودان قديم/جديد...سودان قديم/جديد...سودان قديم/جديد...سودان قديم/جديد...)........وتتعاطين البارد من مشروبات أجنبة بينما تتعاطي الأُسر هنا الخوف والهلع ......و راجــــــــع ليك حرف حرف من الخرطوم المرعوبة الحزينة بموت أُسرها لكندا السعيدة نوعاًما بما يحدث

Quote: لقد وصل هؤلاء امس الي الكباري والجسور كما جاء في الخبر والصور وانهم لم يكونو يستهدفون امدرمان ولكن الخرطوم وانهم بعد ساعات من بدء المعارك وصلو كبري النيل الابيض ؟؟؟؟؟ كيف ؟؟؟

نعم يابوس
والف تحية
والازمة دي عكست خلل رهيب وقاتل والمهاجمين وصلوا بعيدا في العمق الامدرماني وكانت داناتهم علي مرمي حجر من كل الكباري ومداخل الخرطوم من صوب امدرمان...والشي البحير اكثر كيف لسلطة تدعي بانها تعلم بتحركات مضادة قبل عدة ايام وتشبك المدينة تفتيش رهيب وفجاة يكون المهاجم امامك يضرب لفت ورايت ومن طرف (عجبي)