هنا نتحاور و نتعرف على آمنه محمد عبد الرحيم ... مرحبا بالجميع

Post: #1
Title: هنا نتحاور و نتعرف على آمنه محمد عبد الرحيم ... مرحبا بالجميع
Author: طارق الكوتش
Date: 04-14-2009, 07:16 PM
Parent: #0

تتشرف قناة الكوتش و من خلال برامج التوثيق و التعارف ان تقدم
الاخت و الزميله عضو اليوم الحار والتى حجزت مكانها هنا فى هذا
المنبر قبل ان تنال كلمة المرور المهندسة آمنه محمد عبد الرحيم
ونتمنى منها ومن خلال هذا البوست ان توثق لكل فترات حياتها بمختلف
مراحلها وان تحدثنا عن الطفوله و فترات الدراسه والعمل المختلفه
و تكلمنا عن اصدقائها وذكرياتها و احلامها ......>>>>>>>>>>>>>

اذا مرحبا آمنه و مرحبا بالجميع ضيوف و محاورين
وفى البدء و كمدخل ياريت شئ عن السيرة الذاتيه

Post: #2
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-14-2009, 07:24 PM
Parent: #1

يا ابو الشباب خلعتني والله ،،،
دا شنو بدون مقدمات كدا وكمان في عز المحاكم والشبك،،،

الليلة وووووووووووووووووووووووووب ( علي قول ابراهيم)

Post: #13
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Sahar Tageldeen Elsheikh
Date: 04-14-2009, 10:44 PM
Parent: #2

امنة والله اتشرفنا بى معرفتك

من هذا المنبر اسمحى لى اسلم على الشباب(عارفة الكلمة دى بتزعلكم)

اها متابعين معاك قبل مالبوست يتهكر ولا تجيهو كبة

Post: #3
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: sara Eltayeb suliman
Date: 04-14-2009, 07:29 PM
Parent: #1

مرحبا أمونة,,,

Quote: تتشرف قناة الكوتش و من خلال برامج التوثيق و التعارف ان تقدم
الاخت و الزميله عضو اليوم الحار والتى حجزت مكانها هنا فى هذا
المنبر قبل ان تنال كلمة المرور المهندسة آمنه محمد عبد الرحيم
ونتمنى منها ومن خلال هذا البوست ان توثق لكل فترات حياتها بمختلف
مراحلها وان تحدثنا عن الطفوله و فترات الدراسه والعمل المختلفه
و تكلمنا عن اصدقائها وذكرياتها و احلامها ......>>>>>>>>>>>>>

اذا مرحبا آمنه و مرحبا بالجميع ضيوف و محاورين
وفى البدء و كمدخل ياريت شئ عن السيرة الذاتيه

ومنتظرين سردك الاكيد حا يكون ثري بالاشياء الجميلة...

ونحن نجلس القرفصاء...

Post: #4
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: sara Eltayeb suliman
Date: 04-14-2009, 07:36 PM
Parent: #3

أمونة...

Quote: الليلة وووووووووووووووووووووووووب ( علي قول ابراهيم)

افووووووووووووو (حقت صلاح مختار)

نحنا كمان ناس الليلة وووووووووب!!!

Post: #5
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-14-2009, 08:15 PM
Parent: #3

Quote: وفى البدء و كمدخل ياريت شئ عن السيرة الذاتيه

آمنة محمد عبدالرحيم مواليد ام درمان ،،،
الوالد موظف بالمعاش ووالوالدة ربة منزل(ربنا يخليهم يارب) ،،،
لي سبعة اخوة (ثلاثة اولاد واربع بنات)
مراحل التعليم: الابتدائية مدرسة سلاح المهندسين ،،، المتوسطة مدرسة ام درمان الاميرية ،،، ثم مدرسة ام درمان الثانوية
الجامعة: كلية الهندسة – معمار 1995-2001
العمل: شركة تكنو الاستشارية (مجموعة عبد المنعم مصطفى وشركاءه سابقاً) فبراير 2002 حتى يانير 2005
شركة اشرف وصلاح للاستشارات الهندسية فبراير 2005 حتى اكتوبر 2005
الشركة السودانية الاردنية للالمنيوم (البتراء) اكتوبر 2005 حتى مايو 2007
الاشراف على مبني شركة سابل للتسويق الالكتروني مايو 2008 حتى سبتمبر 2008 (هنا قابلت سارة)
حالياً محاولة بداية عمل خاص

Post: #6
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: طارق الكوتش
Date: 04-14-2009, 08:29 PM
Parent: #5

Quote: حالياً محاولة بداية عمل خاص

ربنا يوفقك

متابعين و منتظرين
- التوثيق لكل مرحله بالتفصيل
- نقاط التحول الرئيسيه فى حياتك
- كل شئ قابل للنشر
يلا احكى > نحن معاك

Post: #7
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: sara Eltayeb suliman
Date: 04-14-2009, 08:40 PM
Parent: #6

هلا أمونة...
Quote: الاشراف على مبني شركة سابل للتسويق الالكتروني مايو 2008 حتى سبتمبر 2008 (هنا قابلت سارة)

هنا أنا تشرفت بمعرفتك يا آمنة...

وحا أتكلم عن علاقتي بيك وإنطباعك الأول عني و و و و...

بس لما تصلي المرحلة دي في السرد...

نحنا متابعيييين ومنتظريين...

Post: #8
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-14-2009, 09:07 PM
Parent: #7

مرحلة الطفولة

دي طبعاً من أجمل المراحل في حياة الجميع....
أنا اتولدت في بيت جدي لامي في الفتيحاب مربع 2... ولأني اتسميت على حبوبتي (ام امي التي وافتها المنية قبل ولادتي بعام) بقيت مصدر اهتمام كل خيلاني ... وكل واحد فيهم كان بحاول يعبر عن حبه للوالدة الراحلة في شخصي ... الحاجة دي خلقت فيني صفة العناد لأني اتعودت اصر على كل طلباتي عشان متأكدة انو في زول في النهاية حا يلبيها ...
بيتنا كان كبير شديد (بيوت امدرمان القديييييييييمة) مقسمة لي اربعة اجزاء ،،، جزء الاول (الديوان) ... الجزء التاني بيت جدي... الجزء التالت بيتنا ... الجزء الاخير بيت اخوان امي (خيلاني) الرابط بين الاجزاء الاربعة
حوش النص ،،، حيث كنا نلعب،،، ولأني كنت البت الوحيدة وسط مجموعة اولاد(اولاد خيلاني وخالاتي) كانت كرة القدم واحدة من لعباتي المفضلة ،،،

Post: #9
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: طارق الكوتش
Date: 04-14-2009, 09:22 PM
Parent: #8

Quote: بيتنا كان كبير شديد (بيوت امدرمان القديييييييييمة)

ما اروعك يا امدرمان
ما احلاك يا سودان

Quote: كانت كرة القدم واحدة من لعباتي المفضلة ،،،

والآن الى اى قبيله تنتمين > للازرق النشوان ام للاحمر الحيران

Post: #10
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-14-2009, 09:32 PM
Parent: #9

Quote: والآن الى اى قبيله تنتمين > للازرق النشوان ام للاحمر الحيران

الازرق عشقناه منذ الصغر،،،

وفي واحدة من مباريات الهلال وأنا لسة ما بعرف الف باء كورة
كان عاجبني ليك مصطلح الزول دا متسلل ... دخل قون في الهلال زعلت زعل
وشبكت ليك خالي الزول دا متسلل ياخي ... خالي ضحك فيني شدييد وقال لي
انتي عارفة متسلل دي يعني شنو ...؟؟ وطبعاً شرح لي كيف الزول بكون متسلل،،،

Post: #11
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: طارق الكوتش
Date: 04-14-2009, 09:38 PM
Parent: #10

Quote: الازرق عشقناه منذ الصغر،،،

Post: #12
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: صلاح ليون
Date: 04-14-2009, 10:01 PM
Parent: #11

تسجيل حضور ومتابعة

Quote: الازرق عشقناه منذ الصغر،،،

بداية قوية ولاعزاء للأحمر ..

Post: #14
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-15-2009, 08:35 AM
Parent: #12

سلاااااام ،،،
أنا جيييييت ،،،

ومعليش للتأخير ،،
والمشاركة في بوست التعرف على الأخت آمنة ،،،

رغم إني وأنا بأقرأ المداخلات ،،،
أحبطت ،،،
وزعلت ،،،،
(وش محبط وزعلاااان ،،)

Post: #15
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-15-2009, 08:41 AM
Parent: #14

أحبطت ،،
لما قريت ،،
Quote: الازرق عشقناه منذ الصغر،،،

وزعلت ،،
عليك ،،
ما منك يا آمنة ،،

الأزرق ما شبهك ،،،
لكن ،،
حال الدنيا ،،
نعمل شنو ؟

بعدين،،
طالما عشقتوه منذ الصغر،،
يبقى أكيد غُرِر بكم ،،،

أصبري ،،
وأحتسبي ،،،،

Post: #16
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-15-2009, 08:55 AM
Parent: #15

Quote: اها متابعين معاك قبل مالبوست يتهكر ولا تجيهو كبة

سحر شنو يا بتي ،،، والله لكن لو البوست دا حصل ليه حاجة تاني ما بقدر احوم بي جاي
الليون
Quote: تسجيل حضور ومتابعة

مرحباً بك حضوراً ومتابعة

هومي،،،

Quote: سلاااااام ،،،
أنا جيييييت ،،،

مرحبا مرحبا ،،، بعدين يا صديقي اختلاف الالوان لن يفسد للود قضية

ونواصل ،،،

Post: #17
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-15-2009, 08:57 AM
Parent: #16

مراحل الدراسة ما قبل الجامعية

طبعاً يا جماعة بعد ما كملنا اللعب في البيت والروضة بدت مرحلة المدرسة والقراية ،،، فكانت مدرسة سلاح المهندسين الابتدائية اولى محطاتها ،،، اكتر حاجة كانت مضايقاني في قصة المدرسة دي إنها حرمتني من أجمل عادة (الشاي باللقيمات) كانت عندنا جارة في الحلة بتعمل اللقيمات كنت بمشي كل يوم الصباح بدري اقعد جنبها عشان ترمي اللقيمات حقتي لاني بتكيف شديييييييد من طريقة عمل اللقيمات (ما كنت برضى اشيل من الجاهز لازم تعمل لي حقتي قدامي) وطبعاً لما نزلت المدرسة ما كان في زمن عشان اعمل كدا يا دوبك بشرب الشاي بااااااااااارد واجري عشان الحق الطابور،،،،،،،

Post: #18
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-15-2009, 09:10 AM
Parent: #17

آمنة ،،
Quote: لاني بتكيف شديييييييد من طريقة عمل اللقيمات

أها ،،
إنشاء الله تكوني إتعلمتِ تعمليها ،،

غايتو لما نسجل ليكم زيارة في البيت ،،
أهم شي اللقيمات مع الشاي ،،
وتعمليها إنتِ ،،
ما تشتريها من ست الشاي ،،

عشان نحكم ،،

Post: #19
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Hisham Magzoub
Date: 04-15-2009, 10:50 AM
Parent: #18

امنه متابع بشغف

ارجو عدم اهمال التفاصيل

Quote: حقتي لاني بتكيف شديييييييد من طريقة عمل اللقيمات

بمناسبة اللقيمات ممكن تكون واحده من خيارات العمل الخاص

Post: #20
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-15-2009, 08:35 PM
Parent: #19

ود المجذوب حبابك ألف،،،

Quote: بمناسبة اللقيمات ممكن تكون واحده من خيارات العمل الخاص

انت عارف لو بنضمن نقدر ننافس يبقى مكسب طن،،،،،

Post: #21
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-15-2009, 08:38 PM
Parent: #20

المحطة التانية كانت مدرسة امدرمان الاميرية المتوسطة ،،،،،،،،دي بقى كانت أحلى فترة وعرفت فيها مجموعة جميلة شديد،،،، كنت الوحيدة من مدرستي الشالوني في مدرسة الاميرية زعلت في الاول شديد عشان كل صاحباتي ما حيكونو معاي ،،، لكن بعد فترة قصير كنت مصاحبة نص المدرسة تقريباً....... شلة الضحك والفرفشة ( سارية الصادق، نجلاء حامد، سماح ابراهيم ، رانيا جعفر، وسلمى عبد الكريم.... يا حليلم والله ) ،،،،،،،
من المواقف الما بنساها في المرحلة دي موقف مع استاذة الجغرافيا الجديدة في سنة تانية........ اول يوم جات داخل الفصل فجأة وبدون مقدمات قالت وين اولة الفصل ؟؟؟؟......اتلفت مع الناس زي الما بعرفها صاحبتي قالت لي يا بت ما تقفي علي حيلك (فوقفت والخوف بعينيها) ........ وين كراستك؟؟؟؟؟؟؟؟ ولأني لم اكن من انصار الجغرافيا ولا من انصار عمل الكراسات (ما كنت بعمل غير كراستي الرياضيات والانجليزي).......اتلفت يمين شمال ما في زول اسعفني بي رد........ هبت ليك فيني ما عندك كراس ... واضح انك مهملة وواضح كمان انو الفصل دا حيتعبني ...... المهم كمية من الكلام الكبار داك والخلاصة إنها عايزة كراستي الحصة الجاية ....... وبدأ العداء بيني واستاذة الجغرافيا......... طبعاً البنات ما قصرو معاي وكل واحدة شالت الكراس يوم وكتبت قدر ما تقدر ورسمنا الخرط وفي اليوم المحدد كنت جاهزة للمواجهة والتي كلفتني قراية درس اليوم باليوم لمادة الجغرافيا التي- اكرهها جداً- ذلك العام لانو الاستاذة كانت متلحاني كل حصة تشيل وتسأل ويا ويلنا لو غلطت ساي تعاقب ليك الفصل كله....

Post: #22
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-15-2009, 09:17 PM
Parent: #21

موقف تاني ما بنساه ،،، ايام الامتحانات التجريبية في تالتة متوسط وأنا جاية الصباح من البيت (مدرسة امدرمان الاميرية تقع جنوب سجن امدرمان (سجن النساء حالياً) والمواصلات البجي بيها بتنزلني في شارع الاربعين يعني بدق لي مشوااار لحدي ما اصل المدرسة،،، ايام الامتحانات بستقل المشوار في تلحيق الحاجات الما قريتها... وفي ذلك اليوم وانا احمل كتابي في الصباح الباكر وبالقرب من مركز شباب امدرمان وانا اهم بعبور الطريق إذا بدراجة تاتي من الاتجاه المعاكس وفجأة القى نفسي طريحة شارع الظلط وعجلة واقعة جنبي وولد مخلوع وسيارة مفرملة على بعد سنتمترات من رأسي..... الحصل انو الولد خبتني بالعجلة وكان ممكن العربية الوراه تكمل على الموضوع لولا ستر ربنا وانتباه سائقها.... وطبعاً اللمة والناس والبقول ودوها المستشفى ممكن يكون في كسر ... واحد تاني يا بت انتي كويسة شوفو بتاع حركة ... المهم انا بسرعة وقفت وقلت ليهم ياجماعة انا كويسة ... شبكوني ليك لا لا لازم تمشي المستشفى ... لكن انا اصريت وقلت ليهم انا محصل لي امتحان ياجماعة والله ما حاسة باي وجع... المهم وصلوني لحدي المدرسة ولحدي مكتب المديرة وحكو ليها الحصل ... اصريت ادخل الامتحان لكن رقبتي كانت شغالة اتجاه واحد بس يعني ما بقدر اتلفت يمين ولا شمال ...وعدت على خير ومن يومها وانا بمشي اي امتحان وما في في شنطتي غير القلم عشان حتى لو سولت لي نفسي فتح كتاب ما القاه ...

Post: #23
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: sara Eltayeb suliman
Date: 04-15-2009, 11:12 PM
Parent: #22

يا آمنة,,,

Quote: كانت عندنا جارة في الحلة بتعمل اللقيمات كنت بمشي كل يوم الصباح بدري اقعد جنبها عشان ترمي اللقيمات حقتي لاني بتكيف شديييييييد من طريقة عمل اللقيمات (ما كنت برضى اشيل من الجاهز لازم تعمل لي حقتي قدامي)

يعني إنت قديمة في القعاد مع ناس اللقيمات...

بس أنا متأكدة إنك ما بتعرفي تعمليها لحدي هسي...

Post: #24
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-16-2009, 08:43 AM
Parent: #23

من القراءات الأولية لشخصية آمنة ،،
لاحظت الآتي :

1) إسمها آمنة محمد ،،
وأنا إسمي إبراهيم محمد

2) هي من أمدرمان ،،
وأنا برضو ،،

3) درست المتوسطة في أمدرمان الأميرية ،،
وأنا برضو ،،،

4) في المتوسط ،، كانت أولة الفصل ،،
وأنا برضو ،،

5) في المتوسط ،، صدمتها عجلة ،،
وأنا برضو ،،
(بس أنا صدمتي كانت شديدة مشيت على إثرها المستشفى ،،)

6) كانت ما بتحب الجغرافيا ،،
لكن أنا كنت بأرتاح ليها ،،

(سبحان الله ،،،)

ده لسة في بدايات التعرف عليها ،،،
ما معروف الأيام حا تظهر شنو تاني ،،،،

Post: #25
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Hisham Magzoub
Date: 04-16-2009, 09:37 AM
Parent: #24

)
Quote: في المتوسط ،، كانت أولة الفصل ،،
وأنا برضو ،،

جائز

Post: #26
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: صلاح مختار
Date: 04-16-2009, 10:08 AM
Parent: #25

آمنه
متابعين

Post: #27
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-16-2009, 10:32 AM
Parent: #26

هشام مجذوب ،،
Quote: جائز

جائز دي قاصد بيها منووو ؟؟؟
آمنة ؟
ولا أنا ؟
ولا الإثنين ؟؟

سريع ، سريع ..

Post: #28
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Hisham Magzoub
Date: 04-16-2009, 12:29 PM
Parent: #27

ابراهيم

Quote: جائز دي قاصد بيها منووو ؟؟؟
آمنة ؟
ولا أنا ؟
ولا الإثنين ؟؟

سريع ، سريع ..

طبعا" انت

ناس امنه ديل لسع صغار على تقلص شخصية الاول البعملوها الاباء لاولادهم

Post: #29
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: sara Eltayeb suliman
Date: 04-16-2009, 04:45 PM
Parent: #28

واصلي يا آمنة...

منتظرينك...

Post: #30
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-16-2009, 09:04 PM
Parent: #29

ابراهيم‘‘‘
Quote: ده لسة في بدايات التعرف عليها ،،،
ما معروف الأيام حا تظهر شنو تاني ،،،،

وستظهر الايام الكثير ،،،

خليك قريب (وش الكوشت)

Post: #31
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-16-2009, 09:08 PM
Parent: #30

Quote: جائز

هشام والجوائز،،،
لنا عودة

Post: #32
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-16-2009, 09:18 PM
Parent: #31

Quote: آمنه
متابعين

حباب اللماح

Post: #33
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-19-2009, 06:26 AM
Parent: #32

Quote: وستظهر الايام الكثير ،،،

وأهو الكثير بدأ يظهر ،،،

إبراهيم أول واحد بيدخل المنبر من الصباح ،،
وآمنة برضو ،،،

في إنتظار المزيد ،،

Post: #34
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-19-2009, 06:30 AM
Parent: #33

Quote: والله معليش أنا كان مفروض اسد وردية المساء
لكن اصبت بنوبة صداع نصفي اليومين الفاتو

حاجة غريبة ،،،

آمنة أصيبت بنوبة صداع نصفي اليومين الفاتو ،،
وأنا برضو ،،،

Post: #35
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-19-2009, 06:34 AM
Parent: #34

Quote: آمنة أصيبت بنوبة صداع نصفي اليومين الفاتو ،،
وأنا برضو ،،،

انتي جااااااااادي؟؟؟؟

والله ألف سلامة عليك
لكن بالجد حاجة غريبة....

Post: #36
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-19-2009, 08:27 AM

اما المرحلة الثانوية ........ مدرسة امدرمان بنات.......... دي بقى دايرة ليها بوست برااااااااها لاننا من سنة اولى فيها اتعرفنا على جامعة الخرطوم عن طريق اساتذة التدريب ( ناس تربية جامعة الخرطوم) المدير كان مضحي بي فصلنا والفترتين مدينا ليك لي اساتذة التدريب ديل ...... صاحبناهم وكانو بحكو لينا عن الجامعة .... وبالجد كانو شاطرين شديد واستفدنا منهم كتير.... بكونو دفعة88 أو 87 تربية بالمناسبة لانو الكلام دا كان سنة 92-93....

المرحلة الجامعية
شهر واحد سنة 96 نزلنا الجامعة،،، وبعد جرجرت الكلنك والتسجيل وغيرو جيت عشان اشوف معمار السجم الشالوني فيها دي(انا يا جماعة كانت رغبتي كهرباء لكن النصيب)،،، واول ما دخلت ليك الكلية وسألت وين ناس اولى معمار قالو لي شغالين امتحان ،،،، يا اخوانا قولو بسم الله امتحان شنو؟؟؟ قال شنو امتحان قدرات...!!!! قدرات قال.... وطبعاً طلعنا مجموعة كبيرة ما كنا عارفين موضوع القدرات دا،،،، المهم عملوا لينا امتحان ملحق في اليوم التاني (ملاحق من اولها)....
في اليوم التاني جينا عشان نمتحن .... قعدنا في شكل دائري ...والامتحان كان على جزئين... الجزء الاول ختونا لينا حاجات كدا في تربيزة وقال شنو كل زول يرسمها من زاويتو..... والجزء التاني كان تخيلي... غايتو ضحكنا ضحك شدييييييييد... وطلعنا من الامتحان بقرار موحد(أنا وايمان وعزة) وهو التحويل الفوري من القسم دا...
الوحيدة الكانت لها شجاعة تنفيذ القرار هي عزة سيداحمد(حولت كهرباء) وانا وايمان اترددنا لحدي الفرصة ما ضاعت واتوكحنا في معمار .... وبجيكم لسنة البرليم والحصل فيها

Post: #37
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: صلاح ليون
Date: 04-19-2009, 08:41 AM
Parent: #36

Quote: ده لسة في بدايات التعرف عليها ،،،
ما معروف الأيام حا تظهر شنو تاني ،،،،

من الاول خالص لو لاحظته
هي هلالابية وانت مريخابي..
فلو حولته انت ممكن ننتظر الايام حاتظهر شنو تاني..

Post: #38
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-19-2009, 09:06 AM
Parent: #37

ليون ،،
Quote: من الاول خالص لو لاحظته
هي هلالابية وانت مريخابي..
فلو حولته انت ممكن ننتظر الايام حاتظهر شنو تاني..

بالنسبة ليها هي ،،
توصلنا من الأول لأنه غُرر بها ..
يعني ما بيدها ....
وبالتالي هلاليتها ما مأخوذة في الإعتبار ،،

Post: #39
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-19-2009, 09:10 AM
Parent: #38

أمسك ،،،
Quote: انا يا جماعة كانت رغبتي كهرباء لكن النصيب

سبحان الله ،،،

آمنة النصيب ضيع منها كهرباء ...
وأنا النصيب جابني كهرباء ،،

آمنة إنت مولودة شهر كم ؟؟
(ما قلت سنة كم ،،،)

Post: #40
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-19-2009, 10:24 AM
Parent: #39

Quote: آمنة إنت مولودة شهر كم ؟؟
(ما قلت سنة كم ،،،)

اوع بس تقول لي إنك مواليد شهر خمسة يوم 17

Post: #41
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-19-2009, 10:44 AM
Parent: #40

آمنة ،،،
Quote: اوع بس تقول لي إنك مواليد شهر خمسة يوم 17

وش مطير عيونو ،،،
جد جد ،،،

برج الثور *
27/4

آمنة مواليد برج الثور ،،
وأنا برضو ،،

_______________
* بالمناسبة ، أنا لا أؤمن بالأبراج ،،
وإنما هو مجرد categorization

Post: #42
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-19-2009, 11:06 AM
Parent: #41

أنا مولود يوم 27/4
وآمنة مولودة يوم 17/5

يعني الفرق بيناتنا أقل من شهر ،،

بالله شوف ،،

Post: #43
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-19-2009, 11:11 AM
Parent: #42

آمنة مولودة يوم (7) عشرة ..... (7+10)
وأنا مولود يوم (7) وعشرين .... (7 + 10 + 10)

أمنة لها (7) أخوة
ونحن عددنا (7)

سبحان الله ،،

Post: #44
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-19-2009, 11:20 AM
Parent: #43

ابراهيم ،،،
وبالمناسبة
أنا بقيت خالة لاول مرة يوم 27/4/1998

ما قلت ليك بتجيب ليها حاجات كتييييييييير

ــــــــــــــــــــــــــــــــــــــــ
*اذن يا ابراهيم نحن بير في برج الثور

Post: #45
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-19-2009, 11:33 AM
Parent: #44

آمنة ،،

تعرفي ،،
صديقة زوجتي جدا ،،
إسمها آمنة ،،

وبرضو برج الثور ،،،
(بس خليني أتأكد مولودة يوم كم ،،)

Post: #46
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Tahani abdalla Attia
Date: 04-19-2009, 12:21 PM
Parent: #43

سلااااااااااااام آمنة

بوستيك رائع شديد و أروع حاجة (اللقيمات)

Quote: (انا يا جماعة كانت رغبتي كهرباء لكن النصيب)،،،

يا خساااااااااااااااارة

ده من سوء حظنا

الآن ندعوك تقرئي الكهرباء بعد كده

Post: #47
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-19-2009, 01:01 PM
Parent: #46

Quote: الآن ندعوك تقرئي الكهرباء بعد كده

تصدقي يا دكتورة أنا لحدي تالتة كانت عندي الرغبة احول
وكنت مستعدة ارجع من اولى،،،
بس الحجة وقفت لي واستعملت الحقوق القدسية بتاعتها،،،

Post: #48
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-19-2009, 01:54 PM
Parent: #47

آمنة ،،

في إطار المصالح المشتركة ،،

أسماء أخوانك ،،
سريع ،، سريع

Post: #49
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-19-2009, 02:41 PM
Parent: #48

ابراهيم،،،
Quote: أسماء أخوانك ،،
سريع ،، سريع

بالترتيب التصاعدي ...
ميادة -الحتالة-
نورا
ايمان
مرتضى
سيد
اخلاص
وليد

Post: #50
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-19-2009, 02:48 PM
Parent: #49

العناوين البارزة لسنة اولى ....
ايمان حسن وشلة الداخلية...الاندرلاب وشلة المجمع... أنا والعربي...
التفاصيل:
اربع طالبات سكن الداخلية من دفعة 95 معمار... ايمان حسن طه..
اخلاص رمضان.. أمل الطاهر(زوجة هيثم عبدالله صديق الكوشت).. وشخصي الضعيف....
مع ملاحظة انو انا وايمان من سكان العاصمة(طبعاً على زمن كانت الداخلية
من حق ابناء الاقاليم فقط ... سكان العاصمة بعملو استضافات ايام الامتحانات
بس)،،، انا وايمان سجلنا في الداخلية في يوم واحد ... وعملنا رايحين لحدي
ما نزلو اسماءنا في لستة الناس الما مستحقين للسكن(اكتر من شهرين ما
سجلنا حضور في الداخلية) ...تاني يوم طواااااااااالي جبنا شنطنا
ويا البركس جاك بلاء..وطبعاً شكلة يومية في باب الداخلية عشان ندخل...
الهدف الاساسي من الداخلية كان البرمجة والكورة واسبوع المهندس...
ياخي كانت ايام جميلة بالجد...

Post: #51
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: طارق الكوتش
Date: 04-19-2009, 04:39 PM
Parent: #50

Quote: البرمجة والكورة واسبوع المهندس...

مجرد احساس :
شكلك كده يا آمنه كنت بتبرمجى بالبرلومات
وبدقى الحكم فى الكوره
وبتبيعى سندوتشات فى اسبوع المهندس

Post: #52
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-20-2009, 06:13 AM
Parent: #51

Quote: بالترتيب التصاعدي ...
ميادة -الحتالة-
نورا
ايمان
مرتضى
سيد
اخلاص
وليد

ميـادة : بنت أختي
نــور : أختي الكبيرة
ايمـان : بنت خالتي وفردتي الدخلنا الجامعة سوا
إخلاص : أختى الصغيرة (توفيت في سنتها الأولى)
وليــد : ولد خالي

Post: #53
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: طارق الكوتش
Date: 04-20-2009, 08:06 AM
Parent: #52

Quote: ميـادة : بنت أختي
نــور : أختي الكبيرة
ايمـان : بنت خالتي وفردتي الدخلنا الجامعة سوا
إخلاص : أختى الصغيرة (توفيت في سنتها الأولى)
وليــد : ولد خالي

سبحان الله
وبحثا عن العلاقات المتميزه داخل حرم جامعة الخرطوم
حنشوف الآن علاقة عادل امين و حنفى شمس الدين بالرقم 40 وده كان بحضور
ملك الارقام السيد ابوضفيره :

عادل امين : يا ابوضفيره المجلس الاربعينى لاتحاد الطلاب فيهو كم عضو
ابو ضفيره : 40 طالب
حنفى شمس الدين : سبحان الله
حنفى شمس الدين : امدرمان فيها شارعين رئيسيين واحد اسمو المورده و التانى شنو
ابوضفيره : شارع ال 40
عادل امين : سبحان الله
عادل امين : اقل نجاح فى اى ماده كم
ابو ضفيره : 40 درجة
حنفى شمس الدين : سبحان الله
حنفى شمس الدين : النفساء بعد الولاده بتقوم من سريرها بعد كم يوم
ابو ضفيره : 40 يوم
عادل امين : سبحان الله
عادل امين : ام اربعه و اربعين ... اسمها ام اربعه و شنو
ابوضفيره : اربعين
حنفى شمس : سبحان الله

وعندها تركهم ابو ضفيره وهو يردد فى سره سبحان الله

Post: #54
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: طارق الكوتش
Date: 04-21-2009, 06:32 PM
Parent: #53

فوق لحين عودة آمنة لتمتعنا بالذكريات
والقصص و الحكاوى و لتدهش جمهور اليوم الحار

وبرضو نظل منتظرين لنتعرف على آمنة المهندسة و الانسانة بت امدر
وياريت فى اى مرحلة تحدثينا عن اصدقائك فى الحدود الممكنة

يتبع

Post: #55
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-21-2009, 08:19 PM
Parent: #54

Quote: وبرضو نظل منتظرين لنتعرف على آمنة المهندسة و الانسانة بت امدر
وياريت فى اى مرحلة تحدثينا عن اصدقائك فى الحدود الممكنة

من المواقف الما بنساها في الداخلية... نهاية الامتحانات في سنة اولى (ناس هندسة خلصو قبلنا ونحن كان باقي لينا امتحان واحد) ... أنا وايمان وسامية(صديقة مستضافة في الداخلية لمدة يوم) في غرفة 8 القرشي(داخلية البرالمة من مختلف الكليات)الطابق الارضي نجلس حول طاولة في نص الغرفة... فجأة اصوات ناس بتجري في الطابق الفوق وصراخ ... اولى فكرة خطرت ببالنا انو الطابق الفوق اتهدي وطوالي قمنا جارين برا الغرفة... وقدام غرفة المشرفة اتلمت كل الداخلية في شنو يا جماعة .... قالو في جنية ظهرت في الطابق الفوق ... وبما انو ايمان كانت النوع البخاف من ضلو في الحالات دي... دخلت لينا في حالة هستيرية وما عرفنا نتصرف معاها لحدي ما جوا سناير هندسة ساقوها معاهم غرفتم وبقو يقرو ليها في القرآن ويحنسو فيها... نحن بجاي متصدين للموضوع ودايرين نعرف اخره... طبعاً كل الناس قاعدين في الحوش وزول راضي يدخل غرفة مافي...
وبدت الاشاعات ..البركس دي من زمااااااان مسكونة... الداخلية دي كانت مقابر اظنها.... وفجأة وفي عز الجوطة دي اتلفت وقلت ليهم يا بنات (س ، ص) ديل مش قاعدين الليلة فوق في 35 ... ما نزلو؟؟...!!! وانتبهنا فعلاً انهم ما نزلو مع الناس الجايطة دي... وبقينا في موقف لا نحسد عليه ...اقترحت رانيا نطلع نشوفهم ... كان اقتراح مرفوض من الجميع نحن ما عارفين فوق حاصل شنو...؟؟

Post: #56
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-21-2009, 08:21 PM
Parent: #55

بعد مدة جات واحدة صحبتنا من بنات علوم... وقالت انو القصة كلها من تأليف واخراج (س و ص)... وبدأت تحكي ونحن نسمع باستغراب.... نزلت (س وص) لتناول الشاي في الكشك قرب الداخلية ... وفي طريقة العودة حملت س قطعة فحم معها... سألتها ص لماذا حملتها؟؟ اجابت س الليلة بنات علوم ديل حاوريهم ...حاميننا النوم بي الجوطة العاملنها... جلست س في الغرفة وبدأت تسحق قطعة الفحم حتى صارت مسحوق ناعم... فمسحت به وجهها وكفيها... ثم ارتدت عباية سوداء اللون وطرحة سوداء اللون ووضعت حمرة على شفتيها... ومن شباك الغرفة وعبر البلكونة الي شباك غرفة بنات علوم الكانو مدورين الكاست وشغالين غني ورقيص شديد احتفالا بنهاية الامتحانات... وقفت قصاد الشباك وبقت تعاين ليهم وتبتسم ... اول واحدة لمحتها اغمى عليها والتانية بقت تصرخ.... وفجأة الموقف خرج عن السيطرة (صحبتنا طبعاً رجعت الغرفة وقفلوها عليهم)وبقو منتظرين الامور تهدأ...
تاني يوم كل الناس خات شنطها قدام الباب استعداداً لمغادرة الداخلية المسكونة... ونحن طبعاً نمنا بالموضوع وما في زول عرف العملت كدا منو رغم انو المشرفة ابدت شكوكها في ناس 35 لكن اين الدليل؟؟؟

Post: #57
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-21-2009, 08:54 PM
Parent: #56

الاندرلاب وشلة المجمع،،،
نظراً لتواجد برالمة المجمع الطبي (كانو شلتي الاساسية) في علوم
فقد شهد الاندرلاب تجمعاتنا طيلة السنة الاولي... كمان ناس هندسة
كانو بياخدو لابات في علوم.... نجي الصباح نعمل اتندس في كافتريا
هندسة وممكن نمر على معمار نشوف الحاصل وطواااالي على علوم....
وفي تجمعات الاندرلاب ظهرت كمية من المصطلحات والنكات السريعة....
واحد يقول ليك ماهي العلاقة بين الكمساري وشجرة المنقة؟؟؟
أو ما هو الفرق بين التمرة والكباية؟؟
وفي يوم والناس داخلة امتحان في ال exam hallواحد قال ليهم
العلاقة شنو بين الexam والزيرة الجنبها دا؟؟
فكروا في الاجابة لحدي ما نجيكم (سارة وسحر ممنوعين من الصرف هنا)

Post: #58
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Hisham Magzoub
Date: 04-21-2009, 09:55 PM
Parent: #57

Quote: فكروا في الاجابة لحدي ما نجيكم (سارة وسحر ممنوعين من الصرف هنا)

يا امنه يابتى اعمامك ديل ما تدخليهم فى اختبارات زى دى

خلايا المخ بتاعتهم بدات تموت

Post: #59
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-21-2009, 10:30 PM
Parent: #58

Quote: خلايا المخ بتاعتهم بدات تموت

افووووووووووو
هشام يا ولدي الناس ديل عاملين (عمرة).....(وش ابراهيم البضحك داك)

Post: #60
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-22-2009, 06:09 AM
Parent: #59

آمنة ،،،
Quote: افووووووووووو
هشام يا ولدي الناس ديل عاملين (عمرة).....(وش ابراهيم البضحك داك)

إنتِ ،،
كدة

بس ،،

برضو ما قلت لينا ،،
Quote: العلاقة شنو بين الexam والزير الجنبها دا؟؟

Post: #61
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-22-2009, 08:27 AM
Parent: #60

معقولة يا ابراهيم،،،
في دي تحديداً كنت معتمدة عليك

كيف ما تعرف انهم الاتنين( بسقطو)

Post: #62
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-22-2009, 09:06 AM
Parent: #61

آمنة ،،
Quote: كيف ما تعرف انهم الاتنين( بسقطو)

طيب ،،
Quote: ماهي العلاقة بين الكمساري وشجرة المنقة؟؟؟

Post: #63
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-22-2009, 09:52 AM
Parent: #62

Quote: طيب ،،

Quote: ماهي العلاقة بين الكمساري وشجرة المنقة؟؟؟

ديل بقا الاتنين بصفرو....

اما الفرق بين التمرة والكباية
فالكباية بتتمر لكن التمرة ما بتتكبكب....

Post: #64
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Hisham Magzoub
Date: 04-22-2009, 10:56 AM
Parent: #63

Quote: ديل بقا الاتنين بصفرو....

طيب ما فى شجر كتير بصفر

Post: #65
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-22-2009, 11:02 AM
Parent: #64

طيب ،،
ماهي العلاقة بين وليد القرود ،، والهلال ؟؟،،

Post: #66
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-22-2009, 05:40 PM
Parent: #65

ابراهيم،،،

Quote: طيب ،،
ماهي العلاقة بين وليد القرود ،، والهلال ؟؟،،

دي نخليها للكوشت يجي يقولها ليك....

ـــــــــــــــــــــــــــــــــــــــــــــ
تخريمة... الزول دا ما ظاهر ولا بهناك ...
الحاصل عليه شنو؟؟؟

Post: #67
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-22-2009, 05:43 PM
Parent: #66

أنا والعربي:
طبعاً ياجماعة نحن في سنة اولى طلعو لينا بي موضوع مطلوبات الجامعة (عربي ودين
وثقافة اسلامية)... قمنا وقعدنا واحتجينا ... لكن ما في حل... لما جا الامتحان
نحن في معمار دخلنا كتبنا اسماءنا وطلعنا... وطبعاً ملحقونا زي الماحاصل شي...
وتزامن الملحق مع عرس اختي (العرس كان الخميس والملحق يوم السبت) ... وجيت
الامتحان وأنا ما عارفة الموضوع شنو....كنت متخيلة عربي الثانوي داك بخارجني...
المهم دخلنا الامتحان ولقيت ليك نفسي سطوحي فوق الشجرة ... قلبت الورقة يمين
شمين ما في طريقة الكلام التقول لاتيني... ولأني نعساااااانة اتكيت في الدرج
واديت ليك نومة لحدي ما صحوني الشباب وهم طالعين من الامتحان ... اتوكلت وجمعت
الورقة فااااااااااااااضية الا من اسمي... وطبعاً ترأست قائمة السقوط التي ضمت
تسعة اولاد وأنا وما كان من صحباتي الا أن اطلقو علي لقب آمنة عربي.... وامتحنا
تاني بعد ما اتخرجنا ...

Post: #68
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-22-2009, 05:57 PM
Parent: #67

ما بقدر اتجاوز سنة اولى قبل ما اتكلم عن شخصيتين،،،،
ايمان حسن طه: من اول الناس العرفتهم في معمار .... ايمان وبشهادة
جميع من قابلهافي هندسةمن أجمل الشخصيات الممكن تقابلها(خلق واخلاق)....
قضينا مع بعض احلى سنين وأروع ايام ابتداءأً من هندسة مروراً بالبركس
وانتهاءاً ببيت ناس ايمان في المؤسسة بحري..... ما اتفارقنا انا وايمان
في زرزرة امتحانات او تسليم الا في السنة الاخيرة بسبب زواجها بنهاية
العام الرابع لنا في الجامعة.... المقولة المشهورة لي ايمان والتي
اكملنا بها الجامعة وكل ما نتزرة في تسليم أو امتحان نرددها (على المرء
ان يسعى وليس عليه ادراك النجاح)...
أكيد حتسمعو اسم ايمان في كمية من المواقف القادمة....

Post: #70
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-22-2009, 06:11 PM
Parent: #68

اخلاص رمضان: صديقتي ورفيقة اولى داخلية(تخلت عن الداخلية من سنة تانية)...
ورفيقة عمل في الفترة الراهنة...أكتر حاجة بقدر اقولها عنها إنها فعلاً تجسد
مقولة الصديق وقت الضيق.... ومن أجمل صفاتها الوضوح ...واضحة جداَ وما بتجامل...
وبرضو حتسمعو اسمها في مواقف جاية...

Post: #69
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: طارق الكوتش
Date: 04-22-2009, 06:09 PM
Parent: #67

Quote: ماهي العلاقة بين وليد القرود ،، والهلال ؟؟،،

قسطنطين لحقهم امات طه

Post: #71
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: طارق الكوتش
Date: 04-22-2009, 06:23 PM
Parent: #69

Quote: من المواقف الما بنساها في الداخلية... نهاية الامتحانات في سنة اولى (ناس هندسة خلصو قبلنا ونحن كان باقي لينا امتحان واحد) ... أنا وايمان وسامية(صديقة مستضافة في الداخلية لمدة يوم) في غرفة 8 القرشي(داخلية البرالمة من مختلف الكليات)الطابق الارضي نجلس حول طاولة في نص الغرفة... فجأة اصوات ناس بتجري في الطابق الفوق وصراخ ... اولى فكرة خطرت ببالنا انو الطابق الفوق اتهدي وطوالي قمنا جارين برا الغرفة... وقدام غرفة المشرفة اتلمت كل الداخلية في شنو يا جماعة .... قالو في جنية ظهرت في الطابق الفوق

فى القرشى جنية

من سكان هذه الداخلية فى واحدة من احل سنين العمر
عمر حسين + النور جابر + ياسر المر + محجوب جكس +
مدثر الرشيد + احمد هاشم + طارق الكوتش > غرفة واحدة
وفى الطابق الفوق >>>>>>
ذكريات بطعم خاص جدا

كم اشتاق اليكم يا رفاق

Post: #72
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: طارق الكوتش
Date: 04-22-2009, 06:27 PM
Parent: #71

الله يخليك ياآمنة رجعتينا لاحلى ايام العمر
واصلى ونحن متابعين و مستمتعين بمزاااااج

Post: #73
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: sara Eltayeb suliman
Date: 04-22-2009, 07:23 PM
Parent: #72

سلااااااااااااااااااااااااااااااام أمون...

والله بوست حلو شدييييييييييييييييييد...

متابعين بكل حواسنا ومنتظرين بكل لهفة....

بالجد أكتر شي زعلني لما mDSL خرب اني ما حا اتابع بوستك...

Post: #74
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-22-2009, 07:40 PM
Parent: #73

سرورة،،،،

مشتاقيييييييييييين يا بتنا

Post: #75
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-22-2009, 07:44 PM
Parent: #74

الكوشت،،،

Quote: من سكان هذه الداخلية فى واحدة من احل سنين العمر
عمر حسين + النور جابر + ياسر المر + محجوب جكس +
مدثر الرشيد + احمد هاشم + طارق الكوتش > غرفة واحدة
وفى الطابق الفوق >>>>>>
ذكريات بطعم خاص جدا

كم اشتاق اليكم يا رفاق

رفقة الداخلية ما بتتنسي
وهي فعلاً ذكريات بطعم خاص جداً

Post: #76
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Hisham Magzoub
Date: 04-22-2009, 08:45 PM
Parent: #75

بوست رائع جدا" امنه

متابع بشغف

Post: #77
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-23-2009, 06:14 AM
Parent: #76

Quote: قالو في جنية ظهرت في الطابق الفوق

Quote: من سكان هذه الداخلية فى واحدة من احل سنين العمر
عمر حسين + النور جابر + ياسر المر + محجوب جكس + مدثر الرشيد
+ احمد هاشم + طارق الكوتش > غرفة واحدة
وفى الطابق الفوق ...

إذن اتعرفت الجنية جاية من وين ،،،

Post: #78
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-23-2009, 06:24 AM
Parent: #77

Quote: ماهي العلاقة بين وليد القرود ،، والهلال ؟؟،

Quote: قسطنطين لحقهم امات طه

في علاقة تانية ،،

القرود مولود في الأول من أغسطس
والهلال مغلوب من الأول من أغسطس

وااااااااك

Post: #79
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-23-2009, 07:21 AM
Parent: #78

Quote: بوست رائع جدا" امنه

متابع بشغف

ود المجذوب سعدنا بالمتابعة
تشكر يا هندسة

Post: #80
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-23-2009, 07:26 AM
Parent: #79

Quote: في علاقة تانية ،،

القرود مولود في الأول من أغسطس
والهلال مغلوب من الأول من أغسطس

وااااااااك

في سؤال عن هل توافق على اقامة مبارة الاول
من اغسطس في استاد المريخ ؟؟؟
اجاب القرود( يجوز مع الكراهة)

Post: #81
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: ابراهيم محمد الحسن
Date: 04-23-2009, 07:31 AM
Parent: #80

Quote: اجاب القرود( يجوز مع الكراهة)

في دي القرود معاه حق ،،

تبقى عليكم إثنين ؟ ،،
أغسطس ،،
والمريخ ،،،

Post: #82
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: حمد محمد احمد
Date: 04-24-2009, 01:47 PM
Parent: #81

الباشمهندسة امنة
لك التحية وانت تتحفينا بهذه الذكريات الرائعة

ابراهيم مداخلاتك تضيف رونقا لاي موضوع

Post: #83
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-24-2009, 06:07 PM
Parent: #82

واخيراً ظهر مهندسنا الكبير حمد ،،،
ألف حمدلله على السلامة يا هندسة

Post: #84
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Amna Mohamed Arh
Date: 04-24-2009, 06:15 PM
Parent: #83

ووصلنا تاااااااانية بعد تعب،،،
شهر واحد 97 ...نزلنا عامنا الثاني في الجامعة والذي استمر شهر
واااااااااحد وبعده قفلت الجامعة لمدة 9 شهور....وفي هذه المدة
توطدت علاقتنا بالمجمع الطبي ومجمع شمبات نسبة لمنع الناس من دخول
السنتر....
اغلاق الجامعة في التوقيت دا وقع لينا في جرح لاننا كنا شغالين مشروع
القياسات ... اتخيلو كان مفروض ناخد قياسات شنو؟؟؟ مبنى الشئون
العلمية ... لما قفلت الجامعة انا وايمان ورقنا من الداخلية ما
بارانا...وحمدنا ربنا عشان اتحلينا من الموضوع حتى ولو(الي حين).....
وبالمناسبة ايمان برضو ما كانت رغبتها معمار كانت عاوزة تحول كيميايئة....
السبب في اغلاق الجامعة كان انتخابات الاتحاد (طبعاً نحن دفعتنا دخلت
الجامعة ومرقت بدون ما تشوف اتحاد) ....
سنة تانية كانت بداية علاقتي بصديقي العزيز محمد حسن.... من الناس
المريحين جداً في التعامل ... كنت بستعين بيه في كل مشكلة تمر بي في
الحياة.... محمد صاحب لسان لازع جداً لكنه صادق جداً.... كانت لنا مجموعة
اصدقاء جميلة من كليتي اقتصاد وقانون... وبحكم انتماء محمد لجمعية
اصدقاء المكفوفين اصبحت صديقة لمجموعة كبيرة منهم في الكليتين اذكر
منهم هشام ووليد ومحمد عمر والصادق... بالجد كان لمحمد الفضل في
معرفتي بعالم المكفوفين الرائع والملئ بالتفاصيل المدهشة....

Post: #85
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: Sahar Tageldeen Elsheikh
Date: 04-24-2009, 06:39 PM
Parent: #84

متابعيييين ياامونة والله سردك ممتع جد

لكن بتبالغى معاى..كده انا بسقط فى الامتحان

من اسى انا مسجلة بداااايل

واحتمال اعيد السنة

Post: #86
Title: Re: هنا نتحاور و نتعرف على آمنه محمد عبد الرحيم ... مرحبا بالجميع
Author: طارق الكوتش
Date: 05-08-2009, 03:28 PM
Parent: #85

فوووق حتى عودة صاحبة الشأن
عشان نتعرف بيها و بكل مراحل حياتها
ومنتظرين