Post: #1
Title: بنطلون كاروهات!
Author: سامى عبد الوهاب مكى
Date: 04-04-2007, 08:14 AM
بنطلون كاروهات!
كنا في بداية المرحلة الثانوية حينها وبدون أي مقدمات رجعت موضة الكاروهات...فجاءه أصبح بنطلون الكاروهات جميل ولا ادري ما لذي يجمل هذه الأشياء مرة أخرى في عيون الناس بعد أن يطويها النسيان..اهو حال الموضة كما يقولون؟؟
يبدو كذلك فلا منطق يحكم الموضة وها نحن نرى ما هو أشبه بالشارلستون يعود مرة أخرى وملابس أخرى وتعود ملابس تلبسها الفتيات أشبه بالرحط الموصوف في القصص وربما تعود أشياء اندثرت منذ وقت طويل..
المهم فكرت في تفصيل بنطلون كاروهات وفعلاً بحثت عن القماش المناسب وطلبت من عمك عبد الوهاب (والدي) قيمة القماش والتفصيل فا مرني بأن أخذ ما أريد من قروش من دولاب ملابسه ، وبعد فتح الدولاب خطرت ببالي فكره وهي لماذا لا أفتش في الرف التحتاني حيث يحتفظ بكل ما هو قديم من بدل أكل عليها الدهر وشرب وإصابتها (العته) ولا أرى جمالاً لها غير وصفه لها في حينها وكيف اشترى هذه من لندن بـ 30 جنيه وتلك من سويسرا وأحاديث الجنيهات القوية وقتها ووو.
بدأت التنقيب ويا لدهشتي وجدت بنطلون كاروهات في غاية الجمال بل أكاد أجزم بان أي من(ترزية) العهد الجديد لن يتمكن من (خياطة) شبيه له.
أخذت غنيمتي بسرعة ولم اخبر (عمك) بذلك ولم ياسالني إذا كنت قد أخذت النقود أم لا!
نكمل لاحقاً
|
Post: #2
Title: Re: بنطلون كاروهات!
Author: عمر الفاروق
Date: 04-04-2007, 08:56 AM
Parent: #1
سامي كاروهات:
سلامات يا زول..
خالي الأكبر " المطيع" عندما تم تعيينه موظفاً في بنك النيلين في الستينيات أقسمت لي والدتي متعها الله بالصحة والعافية إنه إشترى 98 قميص و60 بنطلون وعندما اجبتها :
يا حااااااااجّة سيبي الهجمي والرجمي ..أمسكتني من يدي وذهبت بي للغرفة حيث كانت تحتفظ بشنطة كبيرة فيها ملابس جديدة جداً وقالت:
" والله يا ولدي دي شنطة خالك انا محتفظا بيها لأنو خالك كان " حنكوش زي ما بتقولوا" ولا يلبس القميص إلا لمرة واحدة فقط ويرميه ..
دار هذا الحديث بيننا وانا طالب في الجامعة في السنة الثالثة عام 1998 ومتوجه للجامعة ..
ما ان ذهبت الوالدة للمطبخ إلا وتوجهت انا للشنطة الكنز ووالله يا سامي وجدت فيها من الملابس الأنيقة ما جعلني أقوم بتبديل ملابسي ولبس بنطلون كان يسموهو " الشامو" وتفصيله كان شارلستون فلبسته مع قميص وتوجهت للجامعة ..
يا سامي في ذلك اليوم وقف الحناكيش والحنكوشات مبهورين من لبسي وانا الفقير لله ود امدرمان المبشتن بينما جكسالرياض والعمارات ينططون اعينهم مبهورين :
من ويييييييييييين الشياكة دي يا عمر !!!؟؟؟
ويييييييييييين خيطت البنطلون ده يا عمر ؟؟؟
عمر لكن القماش ما خطييييييييييييييييييييير ..لالالالالالا ما تقول لي !!!
وليتهم لو يعرفون ان البنطلون الذي كنت البسه كان عمره ثلاثون عاماً بالتمام والكمال ..
ياخ اقول ليك حاجة يا سامي؟
ناس زمان ديل راقيين
|
Post: #3
Title: Re: بنطلون كاروهات!
Author: سامى عبد الوهاب مكى
Date: 04-04-2007, 09:38 AM
Parent: #1
Quote: ياخ اقول ليك حاجة يا سامي؟
ناس زمان ديل راقيين |
راقين الساااااهلة دي والله يا عمر شكلهم عاشوا ولبسوا واكلوا وشربو ورفهو ومافضلو حاجة للبعدهم إلا ننكتا جنس نكيتنا دا.
|
|