لعناية الاستاذ/ كبر ... مع الحب

صديقي شهاب..حبابك
كتر خيرك على الهدية الحميمة..و الإهداء كمان..شكلك اهلي الدقون وروك حاجة..ياخي نحن لاقين نعرف حاجة في الدنيا ام قدود دي..؟

عارف الزولة دي..من دون ناس مالي كلهم..عندي معاها صدفة عجيبة..و هي العمل التالي..و تمت اضافتو لليوتوب في يوم 9يوليو2011..!!
طبعا ده تأريخ بيكون كتير من الناس ما قاعدة تتوقف عندو كتير..و احتمال بعد شوية تنساهو عدييل..!



طبعا حاجات كتيرة الزول بيعاين ليها..من ضمنها الإخلاص و التقاني و الإتقان في الأداء..و حاجات تانية ما ح نقولها تب..
كتر خيرك من تاني يا صديقي..
كبر

يا سلام يا شهاب جبت الوجع لاهل الوجع
حبيبنا كبر زي الكاشف اخو مسكون بشيطان انغام الصحراء الكبرى.
ح نشهد مبارة رائعة جدا بين الانغام الساحل و الصحراء

تسلموا المهدي و المهدى اليه

شهاب سلامات و بالاذن . . باقي ما ممكن تطلق الكاروشة دي هنا و برضو تكون ب(لعناية) . . . loool

الله يستر يا كبر من 9 يوليوهات تانية في ما تبقي من المدعو السودان . .

مزيكة Sidibe الجندرية و وجع السماع ليها خليهو - ركز معاي في المسرح و الأوديانس و أرضية المسرح و الخلفية من الجهتين في كل عروضا - المزيكا أبداً ما نغمة و طرب و هاشمية بس . . دي صياغة وجدان و فعل حياة و ده السر المقدس لأي 9 يوليو لو يعلمون.

حكمة الله عندنا في وطننا الحدادي مدادي ده رقصة اسمها (البخسة)!! . . ليهم الله . . (البخسة و الرقصة).

شكراً شهاب . .

Quote: حبيبنا كبر زي الكاشف اخو مسكون بشيطان انغام الصحراء الكبرى.

ثروت..حبابك يا صديقي..
ياخي العالم دي فيها انسانية ما عادية..!
ياخي ناس يقول ليك مهرجان لمكافحة الملاريا.. تلقاهم شالوا جيتاراتهم.. و الهارب..و ام كيكي..يطربوا ليك العالم لمن يعرف حاجة..و بعد داك يذكروهو يقولوا ليهو الملاريا كل يوم بتكتل افريقي أو افريقية..!
طائفة اهلنا الحماليين (العتالة يا ثروت)..ياخي الناس دي لمن تغني ليهو تشتهي انك تكون عتالي عدييل..
ده غير الثيمات الإجتماعية و الثقافية و الجمالية..يعني ما عندهم قشة مرة..و منهم اتعلمت أنو الفن مش طرب و بس..و انما قضايا و فضاءات عديدة..!
صدقهم قاعد اكتشفوا..لمن يغنوا في ارضهم ووسط جمهورهم.. التفاعل بيكون عالي جدا..و برضك لمن يمشوا يغنوا في عواصم العالم الحية..بروكسل.. امستردام..فينا..مونتريال..باريس..روما..نيويورك..ياخي ديل في اي حتة تلقى الجمهور قطع ايديهو بالصفقة..امو سنقراي.. الناس بتقيف ليها وقفة شرف متلها و متل أي رئيس دولة..!
و ده كلو من الصدق مع الذات..ثم مع الفن..ثم مع الرسالة.. ثم مع الجمهور..
وليد عبد الحميد (كوش)..اشتغل مع الليجند على فاركة..و قال لي حكمة قاعد اقولها طوالي.. قال لي ناس مالي ديل نجاحهم أنهم اي خريج أو خريجة مزيكا عندهم.. بيطالبوهو يكتب بحث تخرج عن الة شعبية.. عشان كده لم يقدموها للعالم بتحس فيها الصدق..!
و بيني بينك.. المزيكا و حاجات تانية كمان..!
غايتو اخوك الكاشف حضر ليهو كونسيرت لسالف كيتا في كالقري..و لغاية هسع قاعد يدافر عشان امو سنغراي تجي هنا..و كن جات علي التذكرة و البنزين كمان.. المفاي شنو على قول قيقراوي..؟..
لو كنت املك امر على اهل السودان..مزيكا مالي دي كان خطيتها في مقرر المدارس من الإبتدائي و ماشي..و كفانا تغريب ياخي..!

كبر

Quote: مزيكة Sidibe الجندرية و وجع السماع ليها خليهو - ركز معاي في المسرح و الأوديانس و أرضية المسرح و الخلفية من الجهتين في كل عروضا - المزيكا أبداً ما نغمة و طرب و هاشمية بس . . دي صياغة وجدان و فعل حياة و ده السر المقدس لأي 9 يوليو لو يعلمون. حكمة الله عندنا في وطننا الحدادي مدادي ده رقصة اسمها (البخسة)!! . . ليهم الله . . (البخسة و الرقصة).

سماعين..حبابك يا صديقي
نجضتنا نجاض.. على قول الشماشة..
دي الحاجة يا صديقي التي جعلتني.. احرص على الفرجة في مزيكا مالي..و كل فيديو عندهم فيهو مفاتيح كتيرة للقراية..و العجيبة انها ممكن تخدم اغراضك كلها سواء كان تشريح لظواهر اجتماعية.. ثقافية.. جمالية..الخ..
و بتعجبني فيهم الأمانة و الإنحياز لحاجاتهم العميقة المامكن تنشاف للمشاهد الغريب..و بيقوموا يقاربوها ليك..و يخطوها في صيغة سهلة لا تملك معها الإ ان تندهش..!
الحاجة اللاحظتها يا سماعين..مثلا امو سنغراي.. نفس التجاوب البيحصل في مالي .. ممكن يحصل في بلاد اخرى ما عندها حتى جوار مع مالي..!
و السبب انو ناس مالي ، برغم فقرهم المدقع ، حريصين على تقديم روحهم كما هي..و في هذا يكمن التجاوز..



زمان النت و اليوتوب خصوصا يسر لينا..التواصل..و لا اخفيك.. اي دولة في افريقيا دي بحثت في المزيكا بتاعتها بفهم تقاطع ثقافات و معرفة للدنيا و الزمان..و اكتر ناس لقيتهم ما جادين كلوكلو .. اهلنا ناس موريتانيا.. ياخي ديل عندهم استلاب اظرط من حقنا..!
مادة الفنانة حواء بيلو.. المرفقة.. هي اثيرة و حبيبة الى نفسي..عارف ليه؟.. ببساطة لأني زول راعي ساكت.ز سرحت..و عشت في الخلا كتير خلاص..و المادة دي فيها الخلاء مجسد بصورة مذهلة.. القرع.. الهدوم الملونة.. البقر..وضع العصاية على الأكتاف (كما يفعل الفرفور في الفيديو).. ابتسامة البينات الصغيرات (ياخي دي العالم كلو لو ادوهو مليارات مقنطرة من الدولارت ما ح يقدر يجسد التلقائية دي..)..الأوتار الحنينة..!
اهو حاجات زي لمن تشوفها بتديك رحمن القلب..و انك كانسان.. لمن تفكر ليك في شوف..بتلقى ناس شافتو ليك..و تتأكد انك فعلا حقيقي و صادق..!
البخسة..حاجة مدهشة للغاية..لكن اكتر حاجة بتدهشني و فيها تعبيرية مدهشة هي رقصة الكرنك.. لمن تكون هناك في الخلا..مش بتاعة المسارح..
و اوعدك اضيف ليك بخسة هنا.. لمن نرجع تاني..
كتر خيرك..و ياريت تواصل معانا الونسة يا خي..

كبر

صديقي كبر

هل تريد ان تسمع سؤال مريد البرغوثي" إن كان هناك حياة قبل الموت" موسيقى؟

" سيا" تعني الموت بلغة البمبارا... ولكن الاغنية تتحدث عن كيف تعيش حياتك فرحا... وتموت وأنت مبتسم

أسمع...



سلامي وأحترامي لجميع المتداخلين، ولسيد البوست استاذنا كبر

شهاب كيفينك

وفي جوحة الموسيقيه الرائعه دي نستظل شويه,,,من هجير الاستلاب!


كبر كيفينك....
وزولتك الجبتها لينا في اول فيديو بعد بتاع شهاب البلا صور داك

ورائها جوز لوز خطير جدا!!خلاني اعرف معاني عبارتك دي(ههههههههه)

Quote: طبعا حاجات كتيرة الزول بيعاين ليها..من ضمنها الإخلاص و التقاني و الإتقان في الأداء..و حاجات تانية ما ح نقولها تب..

(هههههههههه(بلا اتقان بلا استهبال معاك...انت الحكومه قاعده جنبك ولا شنو؟!
(ههههههههه)بالله الجوز ده ماشاء الله تبارك الله....التقول منحوتات ربانيه!!
البنيات ديل لما يدقن الارض باقدامهن السياقن بس طفايات قاعه لمحناها رغم الرداء الطويل!
والخصر و الفندوق...قادر الله....قلت محنوتات ربانيه بس!!


وعارف اجمل ما فيهن بنيات مالي ديل انه الحمد لله لحسه ثقافة الكريمات ما وصلتهن
الوانهن ابنوسيه وبشره تبهر الناظرين!!وياهن صاحبات القد المياس بس!!


عارف يا كبر....وشهاب وثروت وكل المشار كين في البوست
نحن مشاكلنا كشعب اننا تخلينا عن ثقافاتنا المحليه
الكانت بتجمل تكويناتنا الجسمانيه وبقينا سجم برماد!!

اما الافارقه المتمسكين برقصاتهم ومصارعتهم وغيرها من الفنون
حافظت على اجسادهم بتكوينات جميله خرافيه بتنعكس على باقي حياتهم
وآدائهم الجنسي حيث نسائهم ورجالهم مشاركتهم فاعله وغنيه في العمليه
وبالتالي سعادتهم المنعكسه على وجهوهم وفنونهم تدل على انهم شعوب سعيده من جوها
مش سعاده باهته سجمانه زي حقتنا!!

يا اخي الناس ديل مش فنانينهم بس زي ما قال كبر
الجمهور نفسه منور من جواهوا...رغم الفقر!!ربنا يزيدهم!



اها قلت لي يا كبر:

Quote: اهلنا ناس موريتانيا.. ياخي ديل عندهم استلاب اظرط من حقنا..!

يجازي محنك يا كبر(ههههههههههه)!
يا اخي على الاقل ما عندهم خفاض فرعوني!!(ههههههههه)

يا كبر يا اخوي نحن حقنا داك خليه ساكت!!
وحاتك ما لاحقوا زول.


يمكن في الموسيقي المروتانين استلبوا
الا في بقية حياتهم وحاتك ماخدين من الافريكانيه افضل سماتها!

صحيح بحبوا الشحم في نسائهم.....لكن رشاقة رجالهم وازنه العادله(ههههههه)

يا زول شعب ساقط في حياته الداخليه
فنونه كلها بتكون سجمانه!

شعبو ناجحه في حايتها الداخليه عطائها بكون مميز وظاهر!!
اها الله يدينا بس!!


اسمعتا اوبرا لما قالت لو غلبها تعمل رجيم ماشه موريتانيا(هههههههه)!


مقوله تسحتق الدارسه من قبلنا نحن ناس القوام الهريري(بضم الهاء نسبة
لمقولة ودع هريره ان الركب مرتحلا)(ههههههههههه)!!

سلامي للجميع
تراجي
اسماعيل
ثروت
وصاحب البوست

الاسطورة "سالف كيتا" في " سان كا نا" ومعناها بلغة البمبرا " السماء تمطر!"... موسيقي تخليك تشم الدعاش في عز الهجير


سالف كيتا اسطورة بحق وحقيقة، هو من نسل مؤسس الامبراطورية المالية سينوجاتا كيتا ودا في مالي معناهو انو من المحرم عليهو انو يبقى مغني !!، ولازال ابناء المؤسسين بتمتعو بإحترام كبير جدا هنا في مالي وبتقييد كبير برضو، لكن ساليف كيتا اتحدى التقاليد، واتحدى انو مولود البينو، ونقل الموسيقي المالية للعالم كلو، ساليف كيتا رمز وأسطورة وإنسان بحق حقيقي..