المناصير وصلوها الخرطوم

قبل شوية دورت مسيرة في ميدان جاكسون قواممها أكثر من 200 شخص

الآن و بقلب الخرطوم ميدان جاكسون مسيرة مناصرة للمناصير شباب لا يحملون اسما غير السودان و لا يعملون لقضية سوى رفعة السودان و الشرطة تحاول فضها.... الرجاء من الجميع القريبين من الميدان ان يتحركوا لنصرة الشباب و القضية... التحية لكم و للمناصير اللذين هم شرارة ثورة السودان
شبــاب لأجـل الـتـغيـــر·.»شـــرارة

ما ضاع حق وراه مطلب
قبل يومين وزير التربية بنهر النيل قال انو لا الرئيس ولا نائبه يمكن ان يزورا المعتصمين في ميدان حكومة الولاية بالدامر والاستماع لهم..
المناصير وفروا المشوار على الرئيس وجوا لحدي الخرطوم
اها نشوف رأي الوزير شنو

سلام يا عمر
ربنا ينصرهم على من ظلمهم
النظام دة ما بيتحمل عصيان مدنى لمدة يومين و حيسقط

رسالة قوية للبشير
يا حقوقنا يا التغيير

الموت الموت ولا الجبروت

تنهد تنهد عصابة السد

Quote: النظام دة ما بيتحمل عصيان مدنى لمدة يومين و حيسقط

لمن كتبت انا بوست عن محاولة البعض ركوب قضية المناصير واستغلالها لمآرب اخرىالدينا قامت وما قعدت
المناصير عندم عشرة مطالب ليس بينها اسقاط النظام
لكن البعض يصر على امتطاء قضية المناصير



ــــــــــــــــــ
عادل فضل المولى
عساك طيب..... زمن طويل ماشفناك في سودانيز اونلاين
عساك بخير انت والاسرة

Quote: لمن كتبت انا بوست عن محاولة البعض ركوب قضية المناصير واستغلالها لمآرب اخرىالدينا قامت وما قعدت المناصير عندم عشرة مطالب ليس بينها اسقاط النظام لكن البعض يصر على امتطاء قضية المناصير

الأستاذ على ميرغني، والله بالجد أنا ما عارفك
شايت وين؟! وقريت ليك قبل كدا بوست واقع شتم
في المتضامنين مع قضية المناصير، وبعدين
شايفك عامل فيها الولد أبو الفهم، طيب يا الفالح
لو شوفت الفيديو بتاع نجلاء دا، ثوار المناصير بقولوا:

رسالة قوية يا البشير
يا حقوقنا يا التغيير

دي قاصدين بيها شنو في رأييك؟

تحياتي

الاخ النذير
انا شايت مع الحق المطلق.. يعني لمن المعارضة تكون غلطانة انا ضددها وما مع المؤتمر الوطني
ولمن المؤتمر الوطني يكون غلطان، انا ضددو وبرضو ما معي المعارضة

Quote: وقريت ليك قبل كدا بوست واقع شتم في المتضامنين مع قضية المناصير

راجع الكتبتو انا تلقى كلامك دا ماصاح

Quote: وبعدين شايفك عامل فيها الولد أبو الفهم، طيب يا الفالح

والله انا كتبتو الشايفو صاح اذا انت شايفو غلط من حقك.. بدون شتيمة
لانها اسهل شئ

Quote: لو شوفت الفيديو بتاع نجلاء دا، ثوار المناصير بقولوا: رسالة قوية يا البشير يا حقوقنا يا التغيير

براك قلت فديو نجلاء سيد احمد .. ومع احترامي ليها
بس اعتقد انها مصنفة حزبياً وثانيا كيف تصادف وجودها مع قيام المظاهرات
توارد خواطر.. ولّا صدفة غريبة

الاخ النذير
الناطق الرسمي باسم المناصير اكد انهم ماحينقلوا الاعتصام الى الخرطوم
ياربي يكون النقلو منو....
ماداير ابقى ابو الفهم ولا الفالح

سلامات يا علي ميرغني
وشكراً على السؤال
والحمد لله نحن بخير
وبخصوص مطالب المناصير وتحويرها أو ركوب الموجة
فليس هناك تناقض
ففي تونس تسببت صفعة(أم كف) في تغيير نظام
في مصر طلعو الشباب دايرين شوية حريات وتوظيف ومحاصرة الغلاء والنتيجة معلومة
في ليبيا طلع بعض اهالي معتقلين في سجن ابو سليم بعد اعتقال السلطات للمحامي الوكلوه ودورت الاحتجاجات بعد داك في بعض المدن حتى انتهت الى زوال النظام - زي ما انت عارف
لكن الغريب ناس اليمن
جوا احتفلوا بي ثورات تونس ومصر ليكتشفوا انو عندهم واحد تنطبق عليه شروط الازاحة وقاموا دوروا فيهو لحدي ما مشى مشيتو النُص دي
وكمان ناس سوريا برضو طلع شباب يطالبوا بالحرية لكن المعاملة بالقسوة قادت لتغيير الشعارات من الحرية الى اسقاط النظام
لكن هنا عندنا الحكومة ما بتخاف من الشعب زي ما قالها احمد ابراهيم الطاهر
قال نحن بنخاف من الله (بس) ولا نخشى الشعب
ولو الكلام دا صحي كلمهم قول ليهم خلو ناس المناصير يعبروا عن مطالبهم، ولو في ناس برضو عندهم مطالب تانية خلوهم برضوا يعبروا لأنو الشعب ما حيعمل حاجة تخوف الحكومة..
يا علي ميرغني
لو الحكومة ما عندها حاجة خايفة منها خروج الشعب ما بسوي ليها حاجة ولى أيه..

Quote: ففي تونس تسببت صفعة(أم كف) في تغيير نظام

لا فض فوك يا عمر

للمناصير تحية واجلال
وكامل التضامن مع المناصير ملح الارض
وقضيتهم هي قضية اساسية تتكامل مع الالاف من القضايا الجزئية التي يعاني منها هذا الشعب في كل الوطن
ولحل كل هذه القضية العنوان الاساسي للحل هو ازالة هذا النطام المجرد

Quote: لا فض فوك يا عمر

شكرن يانازر

Quote: ولو الكلام دا صحي كلمهم قول ليهم خلو ناس المناصير يعبروا عن مطالبهم، ولو في ناس برضو عندهم مطالب تانية خلوهم برضوا يعبروا

البوعزيزي عبر عن قضيتو اللهي في نفس الوقت قضية كل شباب الشعب التونسي
لكن للمناصير قضية تخصهم ولها خصوصيتها ويضرهم ان ادخال القضايا الاخرى فيها
ماعارف حكاية انو الزول لازم يقول كلام يعجب الناس او يبقى ما مع المناصير دي سببها شنو
شخصيا اجريت حوار مع المتحدث باسم لجنة المناصير الرشيد طه الافندي وطرحت عليهو نفس الكتبتو في سودانيز اولاين
الغريبة بعد نزول الحوار شكرني على ما جاء فيهو واعتبرو في صالح قضيتهم

حكاية (قول ليهم) دي مافهمتها.. اذا كان الضمير (هم) ديل ناس الحكومة... بقول ليك انا ماعندي علاقة بيهم
وانا واحد من ضحايا الصالح العام.... وصدقني لو كنت منهم ماكنت يختشي من خيار انا اخترتو
واذا كنت قاصد ناس تانين وريني ليهم علشان اعرف ح اقدر اكلمهم ولا لا

سلامات يا علي

Quote: حكاية (قول ليهم) دي مافهمتها.. اذا كان الضمير (هم) ديل ناس الحكومة... بقول ليك انا ماعندي علاقة بيهم وانا واحد من ضحايا الصالح العام.... وصدقني لو كنت منهم ماكنت يختشي من خيار انا اخترتو واذا كنت قاصد ناس تانين وريني ليهم علشان اعرف ح اقدر اكلمهم ولا لا

ما تتحسس ساكت
وهل يخفى عليّ اتجاهك
بس القول هنا بحكم مهنتك