يا وليد هاك شوف محمود وأتحداك لو ما بكيت..

http://m.youtube.com/?client=mv-google&rdm=4o.../watch?v=JOJnfFPTNOM

تم الفيديو ده لي نهايتو يا وليد وشوف محمود اللي أقام الدنيا ولم يقعدها بيعمل شنو..
وخلي عاطف يشوف معاك تاني..
وبالله لاحظ لي واحد من بعامات المسرح لما حاول ينزل الزول المرضان بي محمود شوف محمود سوا شنو؟؟؟

غايتو يا محمود إنت يوم بتوقف قلبي..

ود الفاروق كيفنك
ياخي الرابط دة ما شغال
كدي شوف لينا طريقة

Quote: ود الفاروق كيفنك ياخي الرابط دة ما شغال كدي شوف لينا طريقة

البوست معنون بي إسم وليد إنت الحشرك شنو ....

عمري دا كلو أعلم فيك و ما نفع ... عليه العوض و منو العوض

عمر الفاروق إزيك

يا عمر ارفعها تاني كدي

Quote: البوست معنون بي إسم وليد إنت الحشرك شنو .... عمري دا كلو أعلم فيك و ما نفع ... عليه العوض و منو العوض عمر الفاروق إزيك

يا ابو حسين

انا وطارق جبريل ده جيبنا واحد

يا جماعة الرابط ممكن ما يشتغل..اخوكم شغال من الموبايل - ما تقرا الكلام ده إسمارت هي..- وعليه يا أمشو قوقل وأكتبو المشهد الذي أبكى الجماهير محمود عبد العزيز وبعد داك أي زول فيكم يكسب فينا الأجر ويجي يختها هنا بي الطريقة المرتبة..
عموما اللينك من موبايلي شغال..
شوفو الأغنية لحدي نهايتا ةبعد داك نتكلم

يا ود جبريل عارفك بكاي..ومن لقيت البكا ده جيت جاري:-).. يا حبوب بكانا ده مااا بتقدر عليهو..ورده حمرا ساي ما فيهو:-)..
إزيك ياخ

يا ابو حسين..
تبببببكي بس..:-)
خلاص وليد وآخرون ياخ..

عمر الفاروق يا أخوي رابطك دا ودانا هنا

ما مشى بعيد يا ابو خسين..
انا خوفت يمرقكم في بلدا تاني ونبقى في ده الهكر والحقو عمر الفاروق مهكككر.. :-)

نكتفي بما أورده أرباب!!




_
شكرا يا أبو حسين ياخ!

ود وقفت الخيارات بعد ما تنتهي الأغنية ....؟؟؟؟

بجيب ليك حاجات ما حلوة يا ما حلو إنت .....!!!!!

اهاقصرنا

أها بعد ده كان ما بكيتو تكونو إتلومتوا معاي..

ود الصايم والأرباب ما قصرو..

تخريمة
ياخ حوووتة ده مرييييح للأعصاب..

Quote: أها بعد ده كان ما بكيتو تكونو إتلومتوا معاي..

عمر الفاروق
سلام

نزيدك بكاء

شغل يا ود الفاروق ياخي

ده كلام مكتوب هناك للما بشوفوا

Quote: اغنية الفات زمان-- في لفتة انسانية أثبتت عظمة مكانة الفنان الانسان محمود عبد العزيز لحظة جلوسه أرضا على خشبة المسرح مع احد معجبيه من ذوي الاحتياجات الخاصة وهذا إن دل إنما يدل على تواضع محمود وحبه لجمهوره.. وكم انت كبير ياحوتة.. المسرح القومي 2011/6/18

يا أرباب الحوووووت ده حكاية..
من 88 لحدي الليلة الكييرف حقو ما نزل وشعبيتو في زيادة رغم كل الظروف المحيطة بيهو..

عمر الفاروق ...
ولو انك قاصد وليد المبارك لكن ياخي انت زول بالجد راقي وتعرف كيف تسمع

Quote: من 88 لحدي الليلة الكييرف حقو ما نزل وشعبيتو في زيادة رغم كل الظروف المحيطة بيهو..

في سنة 85 و86 كنت بضحك على واحد صاحبي بقول ليهو عليك الله في واحد فنانو المفضل محمود عبدالعزيز
في الوقت داك كان في فنانين طالعين في الكفر وساحه بها وردي وابو اللمين صديقي هذا يقول فنانة المفضل محمود
فكنت اضحك عليه تقريبا في سنة 87م حضرت له حفل في منزل الراحل المقيم الفنان الفاضل سعيد
في سطوح منزلهم العامر وفي تلك الليله الجميلة بدايتها كانت زفة من الشارع جماعة الفنان محمد احمد عوض
وخلو المنزل وهم بغنو الى ان طلعو السطوح وطوالي في المكرفون والساوند وغنوا لنا ( سالم الناس إلا لي ما مدّ إيدو ما هو عارف ماهو حاسي كيفن بريدو )
وكان فاكهة تلك الليله الممثلل بخيت البعيو وبعدهم مسك المايك الشاب الهزيل
صاحب البنطلون الابيض والقميص الاحمر يقولون له محمود عبد العزيز الذي كنت اضحك عليه من قبل
وقتها عملت إعادة كل حساباتي بعد ان اعطيت نفسي فرصة كافية لسماعة جيدا
وفعلا هو من كسر قاعدة سمح الغناء في خشيم سيدو في السودان
وعمل لنفسة بصمة غناء خاصة امكن تكون امتداد او فيها ريحة لي احمد ربشة والهادي الجبل
.
.
ياعمر الفاروق سوف يتربع محمود الى ان يترك الدنيا وبالمناسبة لولا محمود ما كان في حاجة اسمها فرفور في الساحة الفنية
ولكن تخيل وللاسف اخونا محمود عبد العزيز للان لايعرف قيمة نفسة ولا يعرف انه ثروة قومية
( محمود بوب مارلي السودان )





بالجنبة
ياعمر الفاروق اها رايك شنو في الذكريات دي ما محتاج ليك كم صورة كدا من الارشيف بتاعي

يا جماعة محمود دة مولود بسنونو
ومن زمان كبيييير

انا اصلو بوستات محمود دى بتريحنى فى حنانى

ولي يا ولي..
ما بكذب عليك وما تتخلع انا مع محمود بتقلب زول تاني:-) وأي زول بعرف إنو بحب محمود أو متصور معاهو فبحترمو شهر لي قدام..
انا على قناعة إنو لعيبة الكورة خصوصا ابناء الأحياء القديمة أحسن ناس بسمعو فنانين وليهم اليد العليا في لفت إنتباه الناس لي فنانين ماف زول جاب خبرهم..
محمود إسطورة يا وليد وصوت فريد وحيد مميز حد الجن....زول صوتو بطلعو من صرتو ما حلقو ياخ..
واحدة من أسباب حبي لي مدينة بحري بعد أمدرمان إنها إحتضنت الولد النحيف الرهيف عالي الحساسية حووووووتة..
أردم صور يا وليد وأحكي عن شمس المزاد الود محمود الإنسان والفنان..
محمود يتلاعب بهذا المدعو المايك أيما تلاعب..
محمود يتلاعب بهذا المدعو الصوت أيما تلاعب..
محمود يتلاعب بالمدعوة الحنجرة أيما تلاعب..
محمود والله قاعد يطرب نفسو قبل الاخرين..
بحب الغنا وبستمتع بيهو..
ما بيعرف الغنا الهابط..
بيغني الحاجات أحسن من أسيادا..
محمود ده عالم خوارق..
ومعجزة من معجزات الكون ده..

Quote: ما بيعرف الغنا الهابط.. بيغني الحاجات أحسن من أسيادا..

هابط شنو ياو الفاروق ياخي دا في زواج شقيقتك جمال فرفور طلع قعد يغني اغاني بنات مع هاجر كباشي
اسكت بس والله تبلو في لباسك عديييييييل
طبعا فرفور غنى العجب حبيبي قبل محمود وبنفس طريقتها
لكن بالله عليك شفت كيف محمود غناها وعمل ليها طعم و نكهه خاصة
امكن في كلام ناقص كتير فيها لم يسجل في الشريط بسبب المصنفات وكان يغنيها للخاصة فقط
اذا قلتليك حاجة ما بتصدق ياعمر الفاروق انا الان مابحب ولا بتحمل اشوف محمود حتى واذا كان ماري بالشارع
محمود بداخلة مليون محمود مرات ماتعرف تضحك له ولا تبكي
ازيدك شوية بس ماتتخلع زي ما بتقول
في مره في حفلة جوة بيت بالشعبية غنيت انا ومحمود وجمال فرفور
بس دائما بخزلني صوتي الضعيف دا . شفت من اليوم داك
انا حاسي تاني مافي فنان زي اصلا ولا سائل حتى في الامبراطور محمد وردي هههههههههههه



بالجنبة
يا عمر الفاروق محمود لسه زمنو ما جى الله يطول في عمرو عشان الاجيال الجاية تستمتع بيهو

وليد عبد اللطيف ياخ ما تجدعنا بتلفونك كدا..

عندي معاك استشارات ربما تصل درجة البزنس عديل كدا ..

0567440158

محمود العربي

الفاروق سلام ومحبة


مافي إي حاجة ممكن تتكتب في الحوت و تديهو حقوا
الناس الما بتسمع محمود و ما بتعرفو يوم من الأيام
حيندموا ندم شديد أنو كان عندهم فرصة لحضور
حفلاته لايف و حينها لن يجدي الندم و لن تكفيهم
الحسرة و الدموع.

محمود عبد العزيز اهم ظاهرة كونية حصلت للسودان
محمود اهم من رفع علم 56 و اهم من كل البطولات
الزئف لهذا البلد الملعون .
محمود هو الآمل و انكساره لكل هولاء الشباب الذين
ترونهم بعيونكم .
محمود صوت احلامهم و رجاهم و صوت الانتصار
الوحيد الذي يتعلقون فيه و به وسط خيبات عظيمة
تقبض على صدورهم .

محمود ... محمود و كفى


طبعاً الكلام الفوق دا يا الفاروق ما ليك ابداً .

يا نابري..
انا زاااتة كلام لي روحي ما عايز..
أنضم في محمود وعفيت ليك الباسطة:-)..
عندك بوست جاييك في اليومين ديل بس ألقا لي نت غير الموبايل ده عشان نسمع سوا جن انا عارفك سمعتو قبل كده..


تخريمة
يا أمجد عندي تسجيل فيديو لي محمود في حفل في الأبيض رووووعة ومحمود لسة يافع بس للأسف في السودان وخةفي يكون ضاع

وليد ..
اكيد في اللمات والمناسبات الخاصة محمود عندو غنا البنات وده ديدن كبار الفنانينفي القعدات الخاصة..القصداو إنو محمود في الحفلات العامة والإعلام بيظهر بي الأغاني المليانة..بالمناسبة في تسجيلات لي وردي بيغني الجلابية مع بلوبلو..
أغنية العجب حبيبي كان مفروض يسجلوها أولاد البيت قبل محمود بالمناسبة..

يا عمر الفاروق ياخ انا ما بكيت لى فنان في الدنيا دي قدر ما بكيت لى محمود عبد العزيز

اعتبروني خلاقة يعني بحب محمود عبد العزيز مع جيل بيعتبروا أولادي

وبتكسر فيه كسير الشباب المنسي جواي ..

.بحب جرأتو البتخليهو يجيب للغنية روح من روحو الضايعة دي وينسج ليها نسيج من خيالو الممتد زي حقول خضرا وندية ممتدة في شاطي نيل ..

وتبقى كيان جديد وقايم بي زاتو ، ولا سائل في شي الا الناس البسمعوهو ...

الله يخلي ليك البتحبهم جيب لى غنية ما (بلومكم) ...وبعدها حاغفر ليك ما تقدم من نبك وما تأخر (هههه) ....الغنية دي مافي ...وعندي فيها كتلة خاااااصة ودموع مدسوسة

وليد تطير عيشتو .... داير تبكّيهو ... نحن ذنبنا شنو؟

ياخي دا يبكّي الحجر ....









... المهم ....

تبارك يا صاحب..
ياخ انا مبسوووط منك ..لييي ما عارف لكن إنت زول مرييييح..

انا بحب محمود + بحب اسمع غناهو..





•••••••••••••
طالباك كدا حق شهرين

شكرا يا فاروق

___

للاخت تماضر
ما بلومكم

يا تماضر ازيك..
الاغنية دي بالذاااات ومعاها نور العيون
في الصيف عااادي بمشى ساعة ونص واكتر بدون ما احس بالزمن لأني بكون مشغلاهم واعيدهم واعيدهم
الفات زمان دي بالجد بفتوتني برررا الزمن والحوالي..
محمود بررررررريدو لأني حاسي انسان عااااادي بسيط
انسان انسان ..
 


ما لاحظتي معاي الجكس مافي في حفلاتو دي؟
مافي واحد بجي عشان يجكس ولا فاضي ليهن ههههههه بالجد البنات شكلهن محرومات من إبداع محمود في الحفلات الزي دي

يا تماضر خلينا نتفق على حاجة سمح؟ حق محمود ده براااهو..ومع إنو معاوية ضييع علي ليلى غفران بس حب محمود ده القاسم المشترك الأكبر ويا قول رياضيات سنة رابعة ق.م.أ
أديك سر يا تماضر؟انا إتكيفت ليك مرة في حياتي وقرررببببت أصاحبك:-) يوم لقيت في قاسم مشترك في أغنية انا بعتبر أي زول بيحبها هو زول راقي..عرفتيها؟؟؟؟ااااي صاح هي أغنية سمحة الصدف حلوة الظروف..مرة جيتي هبشتيها وقلتي بتك بتريدا..اليوم داك انا ردتك وردت بتك وردت أبو أهلكم زاتو..
يا تماضر صدقي أو لا تصدقي لحدي أسة انا ببكي محمود..ما ببكي رتيان على حالووو نووووو ببكي فرحان بيهو ومليان بيهو..محمد ده هذب سمعي..محمود ده رسم ذكريات الماضي الجميل حقي..كل أغنية ليهو بترجعني لي مواقف حياتية مختلفة..المدرسة..الشارع ..الجامعة..البيت..الليل.. الشتاء..الصيف..المطر.
ما بلومكم في ظنونكم يا طمطم ياخ..وانا أصلي زول من قمت طيييب أسألوا العرفوني فيكم

يصرف لتماضر إحترام شهرين وزيادة مني أربعة يوم

تحياتي وسلامات الأخ وليد عبداللطيف

لا أحبذ بل وأتجنب الدخول في نقاش لا يخدم الغرض الأصلي للبوست - أى بوست -
رأيتك تخاطبني في بوست الأخ محمد المرتضى / عاصم البنا ولم أشأ الرد عليك هناك لنفس الأسباب التي ذكرتها للأخ سعد حيث أنني لا أريد أن أساهم في إنحراف البوست عن وجهته الأصلية . وفي ذات الوقت شعرت أن مجمل تقييمك به خلط لابد من من جلاؤه
أشكر ( الصديق ) عمر الفاروق أن فتح هذا البوست وأتاح بذلك لي فرصة لألصق لك مداخلتي به ،
( تلفق مع موضوع البوست ما تلفق ) عمر الفاروق يضرب ( صلعتو في أقرب حيطة )

Quote: الاخ عاطف عمر ... السلام عليكم احيانا زي مابتقول التجاهل او الفططان زي ما بقول اخونا عمر الفاروق يلعب دور كبير في الدبلوماسية في التعامل واذا انا في يوم اقتطعت جزء من كلامك واضفت تعليق في بوست سابق بيني وبين عمر الفاروق وانت زعلت جدا وقلت هذا شيء يخصك انت وعمر الفاروق و هو صديقك وتعبر له زي ما تعبر وتنسى تماما ان اي كلمة هنا ملك للجميع وممكن الناس ترجع لها او تستدل بها في اي وقت كان اكيد طبعا اذا قلتو كلام في الخاص بينكم مافي واحد يستطيع او له الحق في التعدي على الخصوصيات لذلك عدم ردي لك او فطي ليك كان مبني على انك زول محترم واعرف من تعرفهم ولك علاقات بهم وكما يقولون اهل الفن ( انا في شخصك احترم اشخاص وطبعا عندي احترامك خاص ) هنا الفط مبني على تقدير مني لشخصك الكريم لان مهما تقول او تغلط معي يستحيل طبعا اقول كلام ما في محلة مهما وصلت الى درجة من الزعل لذلك سكوتي او تجاهلي لكلامك احتراما لك ليس إلا ... لذلك انا هنا اضع الاستاذ عاصم البناء في نفسي موقفي ولي اسباب كثيرة دعته تجاهل اخونا عمر الفاروق وعدم الرد عليه امكن حفاظا على اشياء كثيرة يراها هو في نفسة ولو اني اعرف واعلم تمام من هو عمر الفاروق وكيف يدافع عن نفسة وكيف يقتص حقة في حال التعرض اليه .. ولكن اخي عاطف لما اي واحد يأتي ويقول لماذا لم ترد على عمر الفاروق معناها واضح وصريح افتكر وهذا قد يقود عمر الفاروق وتحريك اشياء في نفسة امكن تكون خامده او نائمة وهذا الحديث قد يثيرها ويصحيها لذلك قلت لي اخي عمر الفاروق مثل هذه الاشياء اسمها سلوك توجيهي قد يقودك الى اتجاه من غير ما تشعر وترد وانت في قمة الزعل والتوتر وتطلق طلقات قد ترجع اليك اصابتها ... اخي عاطف عمر لذلك اقدر الصداقة التي بينك وبين عمر الفاروق ولكن اتمنى ان يدافع عمر الفاروق عن نفسة وعن رايئة دائما ...

- أولاً كتر خيرك على الكلمات الطيبة التي ذكرتها في حقنا واحترامك لنا وأرجو أن أكون عند حسن ظنك وعند حسن ظن الأحباب المشتركين بيننا
- عمر الفاروق ( الذي لم ألتقيه في حياتي ) من الأشخاص القريبين لنفسي أو قل من الشخصيات المحبوبة لدى ، لكنك تخطئ خطأ كبيراً إن ظننت أن مواقفي أو آرائي أياً كان موضوعها تخضع لمزاجي أو لعواطفي . يعرفني المقربون مني ، أرائي الواضحة قد أفقدتني علاقات وأفقدتني أشخاص لكنها بالمقابل أكسبتني احترامي لنفسي وأكسبتني توازني الداخلي . لهذا لقد صدرت مداخلتي في ذاك البوست للأخ عاصم بتعريفه بنفسي وأننا- عاصم وأنا - أبناء مدينة واحدة ومزاج واحد ، يعني بالحسابات العادية البسيطة ( عاصم أقرب لى من عمر الفاروق ) ومع ذلك قد رأيتني أقول رأيي الذي ( تجاهله في النهاية أيضاً ) أخونا الفنان عاصم
- لم أزعل ( حتى بدون جداً ) من إقتباسك لمداخلتي لكنني رأيتك تستخدمها خارج الصياغ الذي أردته لها. أنا قصدت بتلك المداخلة ممازحة وأنت إقتبستها وكررت إقتباسها لتثبت بها أشياء لا علاقة لها بها لذلك رأيت أن أصوبك ، وكان حديثي معك في منتهى الهدوء وهذا نصه

Quote: الأخ وليد عبداللطيف تحياتي دون الدخول في سجالك مع الأخ عمر الفاروق وحيث رأيتك تعيد إقتباس ما كتبته أنا في هذا البوست أقول لك بالصدق كله أن ما كتبته أنا وقمت أنت باقتباسه أكثر من مرة قد كتبته في إطار ( مزاح ) مزاح أثق أن علاقتي بعمر الفاروق تسمح به لذلك أرى أن إستدلالك به لتقوية أى حجة لك لا معنى له مع جزيل شكري أرجو تفهمك

- حاشا لله أن أسعى إلى فتنة ، رأيت تجاوزاً ( للأعراف المنبرية ) فحاولت أن ألفت نظر ( عضو المنبر ) عاصم البنا له . كلنا تعلمنا في هذا المنبر من ملاحظات من سبقونا . ذكرت أسباب إهتمامي برد عاصم على مداخلة عمر الفاروق للأسباب المذكورة في البوست ولا حاجة لي في تردادها هنا. ومع ذلك لم أكن الوحيد الذي رأى ما رأيت بخصوص هذه الواقعة .
- أتفق معك عن مسؤوليتنا عن كل حرف نخطه وأنا مسؤول مسؤولية تامة عن كل حرف أخطه حتى في حالة كوني مازحاً

أرجو أن تكون الصورة قد وضحت لك
_____________________

الفاروق عمر

- عافي ليك لله والرسول ما ترد على المداخلة دي التي هى للأخ وليد
- و ( خصيمك ) الرسول يوم الموقف العظيم ما تجيب سيرة الأخ الفنان عاصم البنا في هذا البوست حتى لا أتهم بـ ( فتنة ) أخرى

بجيك راجع لي المحتفى به محمود عبدالعزيز
فهو من تغني في حفل زواجي في 13/02/1989
في الخرطوم بحري - حلة حمد

عاطف عمر..
سلامات..
اول مرة اكتشف انك من جماعة الردود التمبسية والفاروقية..
عيب لي الردود الملاسية؟
الفرق بينهم زي الفرق بين شكة حقنة الحصان وحقنة التطعيم..
مع فارق حرورية الدواء...


هسه عمر يجي يرد ليك ما يعادل صفحة:)

غايتو كتابة النعاس بتكون كعبة خلاص
الناس بتكون في وادي وانا في وادي
اكتب لي رد..كل سطر ما عندو علاقة بالتاني..
ودونكم نقتي الفوق دي..
لو فهمت منها حاجة يا عاطف عمر بلاي فهمني معاك ينوبك ثواب..

سااااارة
النافعة ما ضارة

عندي ود أختي صغيرووووون كدا
كان بيكون لابد يسمع في الكلام الداير حولو
يسمع مثلاً أنو ( فلانة ) أهملت في دروسا
والناس قاعدين يلوموا فيها ويوجهوها
يقوم ( يختلق ) ليهو شكلة معاها
وطااااااخ يلصق ليها

" أمشي يا مهملة في دروسك ويا ........."
يقوم يسمع ليها الكلام كوووووولو

وعلى ذات النسق

" أمشي يا عروسة إنتي ........ "

بالله إنت نعسانة؟؟ تصدقي كنت قايلك لسع ( غمرانة ) ؟؟






__________________________


أها لقيتيني كيف

حالة كوني ملاسياً ؟؟؟

ههههههههههه يا عاطف لقيتك متابع
خليت ليك خشم ناس تايسا ملح ملح ههههههههه

سارة البارة (الياء منع من ظهورها الثقل)..
إنتي لو محمود عقد عليك عديييييل ولاااا دقيقة ما بديك خليك من شهر..

عاطف يا عمر..
غايتو الأيامات دي متجدددع فيني :-) لا خليت لي شتارة لا طيارة :-)..
عندك واحد من حلين عشان تعدل أوضاعك معاي..
الأول ترسل لي شريط الفيديو حق عرسك فيما يتعلق بي يوم محمود وما بيناتنا ودي الشريط لي ناس التلفزيون يعملوا ليك فيهو الشبك البيغطي خلق الناس داك..
التاني
إنك تحووول لي شريط العرس في كاسيت وترسلو الرياض مع أقرب زول..
أي حاجة غير كده انا مضطر أجيب سيرة اللي بالي بالك..

عمر الفارووووووووووووووووووووووغ

كافتيرا القدس/ دي كانت بعد التفتيش بتاع سوبا والزمن كان 1986 (لا حولااااا) اها مشينا (ضهب ساكت) لقينا ليك حفلة بي واحد اسمو محمود عبد العزيز، أها اخوك سمعوا بي جاى وفتحت خشمي لي يوم الليلة. أها لمن كنا في المعارضة كنا بنشغل ليك اغانيو طوالي في إذاعة التحالف، قامو جماعة من القيادات احتجو على الموضوع دا، أها قام المذيع محمد خليل عمل ليك برنامج ما يطلبه المقاتلون، اها المقاتل دا لو طلب ليهو اغنية بتاعت (حسن جالون ودا فنان محلي في ريفي سنار) محمد خليل يقوم يشغل ليهو محمود عبد العزيز لحدي ما المقاتلين ذاتم بقوا يطلبوا ليك محمود عبد العزيز.

أها بي خصوص البكا:

عارف الحاجة العملا محمود دي ما ها هينة ابداً، والأهم كلو إنو ما عملا عشان يظهر بيها، ياخي دي حاجة طبيعية وأي زول بيكون لاحظها، وبعدين حكاية إنو (يهبهب ليهو) لمن الزول تعب وعرق دي البتوريك إنو الزول دا احساسو عالي كيف.

غايتو الزول دا لو إنتو معجبينو ديل ما حصلتوا وخليتو يهتم بي نفسو وبي صوتو وفنو، إعجابكم وبكاءكم دا بلوا واشربو مويوت وما في زول حيغفر ليكم.

اماااااااااااااااااااااااااااك

بالله محمود نكت الناس ديل كلهم !!


يا عمر من ما قمت في الكورة عاجبني ادورد
وفي الغناء عاجبني محمود

والاتنين مسميهم ربها كل في مجاله

يا عمر عاين سارة قالت شنو ؟

Quote: محمود بررررررريدو لأني حاسي انسان عااااادي بسيط انسان انسان ..

عليك الله ... شفت الفرق بين الفنان والمؤدي

محمود ده "ولى" الا شويييييه كده ... و بتمها لو الله اداهو العمر

صادقنا يا إسماعيل..
ياخ والله ده كلام لذيذ جدا..أخوك بضحك ليهو 31 ساعة..
هي لكن إنتو مقاتلين الطرب ليكم شنو؟ أدوهم قيقم ولا خلف الله حمد..
ثم إنو إنت مننننن86 بتعرفف الضهب؟؟؟
محمود يستاهل تمرقا ليهو في همشكوريب خليها القدس

الاخ .. عاطف عمر ... سلامات

Quote: أنا قصدت بتلك المداخلة ممازحة وأنت إقتبستها وكررت إقتباسها لتثبت بها أشياء لا علاقة لها بها لذلك رأيت أن أصوبك ، وكان حديثي معك في منتهى الهدوء وهذا نصه

تعرف ياعاطف طبعا انا من الناس الممكن تتابع اي شيء مكتوب هنا
لانها دي متعتي زي ما الناس متعتها سماع الاغاني وقراية الشعر اها متعتي القراية
شوف انا وانت ما اظن حصل تلاقي بينا ورغم عن ذلك احترم كل ما تكتب هنا بل عندما ارى اسمك
احب ان اعرف ماذا كتبت ..
فعلا انا قطعت كلامك ولكن كنت المح لي اشياء اخرى واريد ارسالها عن طريق كلامك
عمر الفاروق زول اخ واحترمه جدا وفي اول حديث بيننا قلت له انت زولي رغم اننا اختلفنا في مواضيع كثيرة
ولكن هذا لايمنع اني اكن له كل الاحترام و الود واحترم شجاعتة في الاراء التي يمتلكها حتى واذا اختلفت معها
وانا ما عايز اشكر ليك عمر الفاروق هنا عشان ما يكون كسير تلج وراسو يكبر ويتكبر ويتطنقع علينا بعدها
لكن ممكن اقول عمر الفاروق مشاغب في كتاباته وممكن تثيرك وتجذبك اليها وتستمتع بها
بذكرني الراحل المقيم الشاعر الهلالي الكبير ( ابو امنه حامد )
ياعاطف البينا عامره

يااا حليل بوستيني الهامل..:-)
غايتو يا عاطف و وليد أديتوني إحساس إنو ده ميدان الكورة..ونظام طالعني في بوست عمر :-)
يعني تكاكو هناك وتجو تبييضو لي هنا:-)

يااا حليلي ده كلو عشان مامثقف يا عاطف مش؟ طيييييب مننننن بكرة دي بقرا ليك عن الفكر البلشفي السلفي:-)

شيف ده بالله، انت كاكيت في دار الرياضة؟


----
صباح الخير فاروغنا و ولي،
محمود مافيهو كلام،
و الصادق جاب زبدة الكلام، لو محمود سمح بذلك طبعا
الزول ده ثروة قومية في طريقها للاهدار كغيرها
و الله انه لامر محزن

و دي ، عشان ما تردموني
بقيتوا تتغابوا العرفة يا رهط!


http://www.youtube.com/watch?v=IIm2mGThVbI&sns=em

اول مرة (ولحد الان الاخيرة) اشوف محمود عبد العزيز كان سنة 87 فى حفلة فى الديم (المقابلة العمارات) وكنا شلة من الداخلية لكن ما ضهب والله
الشاهد انى والصديق حاتم بخيت اندهشنا جدا لروعة اداء هذا الشاب النحيل المتميز عن فنانين حفلات الاعراس البتموها وصلات بالاورغ ولا الساكس
لدرجة اننا مشينا سالناه عن اسمه وابدينا له اعجابنا - اول ما رجعنا الداخلية حكينا للصديق وليد القرود (زميل البورد خليل) بهذا الاكتشاف المذهل
وباننا حضرنا حفلة بود اداءه شبيه بزيدان وكانت تلك المقاربة لاغراء خليل بمتابعة اداء هذا الشاب , الا اننى وبصراحة كنت اتوقع مجدا ومسيرة
فنية اكبر من تلك التى هو عليها الان



المفروض ان نشجب هذا السلوك , التقاعس عن العمل مهما كانت الاسباب
جمعية محمود فى القلب اخطات
العمل زى العبادة , هذا ما يجب ان نربى اجيالنا عليه ولا اعتقد فى تعارض بين الفن والطرب
ومسئوليتنا تجاه اعمالنا

_______________________
عمر الفاروق حليت مسالة ال 12 الف ريال
ولا لسة محتاجها

يا سعد الدين ياخ نحن بسطونتنا حااايمة وسمع محمود إجباري..
تخريمة..
شكرا معاوية يا حسين على الوصلات..

محمود فنان من الطراز الاول وانسان من الطراز الاجمل
عمر الفاروق اب صلعه مالك علينا من الصباح ياخ

Quote: الفات زمان دي بالجد بفتوتني برررا الزمن والحوالي..

الفات زمان دي يا ساره انا مرقتني وليوم الليله ما رجعت
الكلمات اللحن الاداء .. ابداع ليس بعده ابداع
غنية تهز الروح من جووووووه ب 100 وجعه علي مقياس رختر

Quote: يااا حليل بوستيني الهامل..:-) غايتو يا عاطف و وليد أديتوني إحساس إنو ده ميدان الكورة..ونظام طالعني في بوست عمر :-) يعني تكاكو هناك وتجو تبييضو لي هنا:-) يااا حليلي ده كلو عشان مامثقف يا عاطف مش؟ طيييييب مننننن بكرة دي بقرا ليك عن الفكر البلشفي السلفي:-)

الفاروق عمر
ياخ أنظر لنصف الكوب المليان
قصدك الناس يختلفوا بي هناك ويجو يتصافوا هنا
فأى فخر تريده أكثر من هذا لبوستيك ؟؟؟
ألف بين قلوب وأزال سوء فهم

بس نعمل شنو معاك ؟؟
( الشتارة ) جارية في دمك


_____________________


وليد عبداللطيف

البيناتنا أكتر من عامرة يا حبيب
ولا إنفصام لها
مترعة محبة واحترام
يكفي أنكم أهل بحري
أصهاري
وأخوال أبنائي

Quote: صادقنا يا إسماعيل.. ياخ والله ده كلام لذيذ جدا..أخوك بضحك ليهو 31 ساعة.. هي لكن إنتو مقاتلين الطرب ليكم شنو؟ أدوهم قيقم ولا خلف الله حمد.. ثم إنو إنت مننننن86 بتعرفف الضهب؟؟؟ محمود يستاهل تمرقا ليهو في همشكوريب خليها القدس

هاهاهاهاهاها هااااي
اردم المقاتل دا بالحته الفيها الحديده لووووووول
تعرف يا عمر اذكر ليك قصة بخصوص اخوك الصادق دا :-
مرة كدا تقريباً تسعينات كان في مزيكا في المركز الفرنسي
فرقة افريقية و اظن معاهم شرحبيل المهم الافارقة ديل كبو
مزيكا نحنا لما اتحيرنا مافي بت او ولد قاعد في كرسي
الناس دي كلها حتتو حت الجن افريقي عربي و افرنجي اخوك
المقاتل الصادق دا (شوف عيني) رقص لما وقع الارض نفس ما
فيهو جريناهو ياااابس إلا رشيناهو بالموية .
هسي ما عارفو يتذكر القصة دي ولا ما يتذكره لوووووول
و لو اتذكره حتكون دي اول مرة الصادق يعرف مساهمتى في
انقاذه ذاك اليوم ههههههههههههههه .

بالمناسبة يا الصادق لو عندك ذكريات عن الحوت و غرفة
فواد عبد الرحيم متع بيها عمر الفاروق دا ياخ عمر
لو دخلته ليهو بالحوت ممكن تستعمروا رسمي .

Quote: يااا حليل بوستيني الهامل..:-) غايتو يا عاطف و وليد أديتوني إحساس إنو ده ميدان الكورة..ونظام طالعني في بوست عمر :-) يعني تكاكو هناك وتجو تبييضو لي هنا:-)

هههههههههه
لاتنسى ياعمر الفاروق عاطف عمر يحمل الجنسية البحراوية
عاطف عمر ليهو الدهب يتوزن ياااااااخ
وعشان حبك لبحري ممكن نديك الحنسية البحراوية انت كمان ياعمر
اي شيء عندنا مختلف مازلنا في بحري نحتفظ بحياة الريف




بالجنبة
شايفك فوق تحدثت عن اغنية الجلابية
هل تصدق الشاب الذي اتكتبت به هذه الاغنية من والدته موجود ومولود بحي الاملاك
وطبعا فرفور هو من قام بانعاشها واخراجها للناس مره اخرى وكان بغنيها زمن بغني شعبي
وحتى غناها في بيت ناس عصمت عبد الرحمن ود ابوعنجه اكيد تعرفة ( في بانت امدرمان )
وبعده استلمتها ندى القلعة
من قلبي اديتك امانة من قلبي وروحي وحنانه
رفعتك اسمى مكانه .. يا الحبك اثر عليّ
حبيبي بسحروك ليّ

احمد يا تيجاني..
كدي النبدا ليك بي الأهم ..محمود ملحوووووق:-)
ال12 الف دي كانت لما السيخ نازل..أسة بقت16 الف..

يا معاوية حسين أسميك منو؟ المتقذ من الضلال؟؟ الغنية وصلت مع الشكر من أمس لليلة اتسمعت 15 مرة حبة تلاتة مرات يوميا ...شكريا شكريا شكريا



أو كما قال الهنود

أما أنت يا عمر الفاروق فواضح انو سوء تفاهمنا الأزلي داك حيتحسم بالحوت ...شكرا على البوست الحنين.

رسالة لحمود عبد العزيز مطرب أفريقيا والقارات المجاورة الأول

عكس الريح
[email protected]

أدرك تماماً أن الألقاب في بلادي ورسائل الدكتوراة والأستاذية تمنح عشوائياً وكيفما اتفق لحيثما اتفق إلا في بعض الحالات الأكاديمية النادرة لبعض الكفاءات العملاقة في بلادي. أما الصفات الأخرى فتطلق على عواهنها وتصبح ......
وسط هذا الإفتراء على الألقاب الفنية يبقى هناك لقب حقيقي يجب أن يمنح لمطرب سوداني موهوب ومبدع وساحر وهو الفنان العملاق محمود عبد العزيز الذي دون شك هو مؤهل لأن يكون مطرب أفريقيا والقارات المجاورة الأول وهو بحق يستحق ذلك ويتخطاه إلى ما أكبر وأعظم لولا ظروف الوطن القاهرة وظلم ذوي القربى وأصدقاء السوء.
في مقال سابق تحدثت عن مستنسخ بشري لمطربنا الرائع محمود عبد العزيز ووضحت أن الإستنساخ هو إنتاج نسخة مشابهة للأصل أو مطابقة لمعظم مواصفاته و هو بالتأكيد يحاكي الأصل ولكن لا يحمل قيمته الحقيقية. ولقد عرف العالم منذ القدم الإستنساخ في جميع أشكاله فيما يتعلق بالفنون و غيرها. فعلى سبيل المثال يتم استنساخ الأعمال الفنية للمبدعين كاللوحات والتماثيل والكتب وأيضاً قطع الغيار وحتى الإنفعالات وأشكال الهوس المختلف. كل هذه المستنسخات نحن في السودان نجيد صنعها و نتفوق فيها على جميع أنواع التكنولوجيا العصرية. فإذا تمخضت لديك فكرة عبقرية و قررت فتح دكان في زاوية منزلك العامر أو شراء ركشة أو دفار أو خلوة تستجلب فيها الخدام لفك العمل و العارض أو فتح محل اتصالات أو بلياردوا سيتم لا شك استنساخ عجيب لهذه الممارسات الأعجب و ستجد كل من حولك (قدّر ظروفك).
وفي زيارة سابقة لي للولايات المتحدة الأمريكية لحضور مؤتمر طبي ذهبت علي هامش المؤتمر لمحل تجاري لأحد الإخوة ويقوم ببيع منتجات سودانية أصلية ومستنسخة وحينها قررت شراء شريط كاسيت لمطربنا العملاق محمد ميرغني و آخر لمحمود عبد العزيز لإهدائهم لطبيبة أمريكية كانت قد زارتني بالسويد و التقت بالأستاذ محمد ميرغني أثناء قضائه لإجازته معي بالسويد و استمعت تلك الدكتورة لأغنياته و أعجبت بها أيما إعجاب واستمعت أيضاً لشريط كاسيت لمحمود عبد العزيز وذكرت لي بالحرف أن هؤلاء المبدعون لو كانوا في نيوأورلينز لفاقوا مايكل جاكسون شهرة. بعد أن تحصلت في ذلك المحل الكائن بڤرجينيا على شريط حلو العيون لمحمد ميرغني لم أجد للأسف شريط لمحمود عبد العزيز وعندما رأت البائعة الحزن النبيل على عينيّ قالت لا تحزن فلدي البديل. تملكتني الدهشة في البدء إذ أنني كنت أعتقد أن البديل يكمن فقط في الدواء و الإسبيرات لكنني استدركت بأن البديل ربما يكون نسخة سوداء لشريط محمود الأصل إلى أن فوجئت بالبائعة تزيل الغلاف الشفاف عن شريط أصلي وتدخله في الجهاز لأستمع لمحمود عبدالعزيز. فقلت لها في تعجب بالغ ما معنى هذا؟ قالت لي هذه نسخة أصلية لجنين بشري تم استنساخه من محمود ومثل هذه العمليات تجرى للعديد من الفنانين فمستنسخ فرفور مثلاً الآن في الأسواق ومستسنسخ زكي جمعة لا يزال في المختبر الفني (مين زكي جمعة دة؟) و حيث أنني وعدت الدكتورة العزيزة بشريط محمود قمت بنزع صورة الغلاف و قدمته لها. أعجبت الدكتورة الأمريكية بمستنسخ محمود على أنه محمود ولكن عندما اقتضت الأمانة العلمية اخبارها بالحقيقة - فلقد كنت أخشى أن يصاب مستنسخ محمود بالشيخوخة المبكرة كما حدث للنعجة دوللي فتظن الدكتورة فينا الظنون - اعتذرت لي بأدب عن قبول النسخة المستنسخة لمحمود لأنها مسألة مبادئ بالنسبة لها و طالبت بالأصل الذي وعدتها أن يأتيها قريباً بالبريد.
وأنا أستعيد كل هذه الذكريات شاهدت مطربنا العظيم محمود عبد العزيز صاحب أكبر شعبية تحصل عليها مطرب سوداني على مر العصور وصاحب الأداء الجميل المتفرد من نفس الولاية الأمريكية التي رويت القصة أعلاه منها مع فرق عظيم. كان ذلك عبر برنامج أغاني وأغاني التي كان محمود، رغماً عما بدا عليه من إرهاق وتعب وجسد نحيل مرهق، بطلها وسيدها دون منازع. وأنا على يقين أن القائمين على أمر البرنامج أرغموه بطريقة ما على الحضور والمشاركة لكسر الرتابة عن البرنامج ومنحه وهجاً جديداً لكن كل ذلك كان على حساب الأسطورة محمود عبد العزيز. أحس بأن هذا الشاب يحاربه أدعياء الفن ويضعون الشوك في طريقه وتحاربه السلطة وتعرضه لمهانات عديدة لا يستحقها. محمود يجب أن يلقى الرعاية من الدولة ومن أهل الفن بمختلف توجاتهم ومن كل الأمة وأنا من هذا المكان أوجه له دعوة صادقة ومن القلب أن يحضر للبحرين بعيداً عن الفن والأصدقاء والمعجبين في زيارة خاصة أعده فيها بأن يعود بعدها لوطنه كما كان رائعاً ونقياً وجميلاً ومعافياً من كل سيئات الآخرين ليصبح بحق وحقيقة فناناً عالمياً بلغة سودانية جديدة ومتفردة.
وانا أكتب هذا المقال وردتني رسالة من الشاعرة الجميلة سلمى على محمد الحسن والمقيمة في دنفر - كلورادو بالولايات المتحدة الأمريكية وهي تعتبر أن محمود لم يخلق له مثيل في ساحتنا الغنائية وتحدثت في رسالتها عن كل مارويته أعلاه وختمت الرسالة بقصيدة رائعة مهداة لمحمود أفرد لها هذه الساحة عبر مدخل للخروج تعبيراً عن مدى الحب الصادق لهذا الشاب الفريد والموهوب بحق وحقيقة وأبسط دليل على ذلك هؤلاء الملايين من المعجبين الذين لم ينل عشرهم أي مطرب سوداني منذ فجر التاريخ.
مدخل للخروج:
بتأملك
و اتحدى بيك كل البيقول
كان وإنتهى و أرجع وأقول
مين بشبهك
وأتحدى بيك كلّ القديم
والجاي جديد والقال نساك
والقال سلاك والودّعك
واتأملك
وألقاك عصفوراً حنين
في رقة ساكن عشتك
ألقاك زي كروان بتصدح
بالجمال في كلمتك
والقاك شامخ زي جبل
كل الصعاب ما هزّتك
وألقاك زي طفلاً صغير
همّك غناك و فكرتك
صابك رشاش
من ناس قراب
شوّش عليك وأربكك
خلاك شارد في حزن
همّاً تقيييل العذّبك
و طريق صعاب
و فراق قراب
هدّاك لمن أنهكك
بس إنت أقوى من الأسى
وربك كريم ما بهمّلك
والقالو فيك وقالو ليك
مابضرك ابداً بينفعك
والناس قلوبا معاك وليك
وإن كان عترت بنسندك
بنكون معاك ونقيق وراك
كل القلوب الحبّتك
راجياك ترجع زي زمان
وانشالله يوم ما نفقدك
بنغني ليك وندعو ليك
و مستحيل كان نخذلك
قول لينا صافينا الوداد
ورينا إيه الغيّرك؟
إن كان فقدت عزيز عليك
مكتوب مسطّر يسبقك
حزنك عليو ما هو البيفيد
بيكفيهو صافي مودتك
أهديهو إحساسك إليو
أهديهو صادق دعوتك
وإن كان جفاك زولاً عزيز
أنسى وأبد ما يأثّرك
خليهو "في ستين" يروح
خسران و ما بيستاهلك
وإن كان ألم أو كان ندم
مابسوي يسرق بسمتك
ما تحمل الأسي في القلب
واهتما لينا ب صحتك
ما تشيل هموم
ما تجافي نوم
عيش الفرح في دنيتك
عايشين أمل يوم بكرة بيك
والجاي أحلى ومافي شك
آلاف معاك بتخاف عليك
و قلوب كتيرة بتعشقك
خايفين و قلقانين عليك
متلهفين لي فرحتك
ماشين وراك
شايلين غناك
ومغرمين بمحبتك
أسعدت مليون بي غناك
ياريتنا نقدر نسعدك.
(سلمى على محمد الحسن)
 

عصام جبر الله
واحد من ألقاب محمود البي تحت تحت وما لي أي زول..بينادوهو بي الصحابي..

دكتور معز..
بخخخختك والله إتصورت مع محمود..
مقالك جميل ومرتب ويحتاج أن يصل لأبعد من سودانيز..
بالمناسبة سلمي دي هي البت الكتبت لي محمود أغنية الود الشفت؟؟
شوفتها في قناة امدرمان ..بت حليوونة وإمكن خلتني أشوفا حليوونة بعد سمعت رأيها في محمود وهي بتوصف فيهو..
سعد الدين البسطوووونة محمداك يا اخوي:-)

لو سمحت يا عمر الفاروق

عايز اغنية حلوة الصدف وسمحة الظروف

اول اغنية سمعتها لمحمود زماااااان

يا سلالالالالالالالالالالالالالالالالالالالام ياخ

شفت الفن بعمل شنو


اسع اخر مرة شفت تماضر دي بتكتب بتين ؟
ومعز ده اخر مرة علق هنا بتين

انا غايتو عيييييييييييييييييييييييييييييك

Quote: بالمناسبة يا الصادق لو عندك ذكريات عن الحوت و غرفة فواد عبد الرحيم متع بيها عمر الفاروق دا ياخ عمر لو دخلته ليهو بالحوت ممكن تستعمروا رسمي .

سفيان يا حبيب

طبعاً يا خ كيف ما متذكر يوم المركز الفرنسي، وبعد داك بي يومين مشينا مع نفس الفرقة، كانو رابين حفلة في الإنقاذ (الحلة ما الثورة)، وكانت حفلة عجيبة.



بالنسبة لي عمر الفاروغ (فحدي معاهو محمود وبس) بعد داك ناهيييي، ولو لميت ليك فيهو مطرف بعيد من محمود إلا افرزونا بي مقاس (الجزم)، هو غايتو (كان ما اخاف الكضب) أنا ذاتي السميتو (عمر الفاروغ).


تخريمة لي عمر الفاروغ:

كدى خليني من المقاتلين هو في زول سمع محمود دا بإنتباه كده ممكن ما يكون اسروا الصوت العجيب والمزازييك البتحير.


بالمناسبة وين اشرف الحلبي (الزول دا بيحب محمود بطريقة عجيبة)

يا خلللي..
إسمها سمحة الصدف حلوة الظروف..مالك شقلبتها..
وانا أصلي ما قادر أصف..كللللل الحصل..
أصلو الحصل ما بتوصف لا بي حرف لا بيغنا..صابر سنة..وفي لحظة بس نلقاك هنا..
بالله شوف سمحة الصدف حلوة الظروف..

وزي ما قال وليد ..دي غنية مناسبة لي لمة الناس الهنا من تماضر لحدددي الصادق..:-)

تخريمة..
أسة في زمتك يا مكاتل فرحان بي التسمية؟؟؟طبعا انا زول في المنبر ده ما بفرز وبشووووت ساي فممكن عادي تكون نبزتني في حتة وأجي أشكرك في حتة :-)

Quote: تخريمة.. أسة في زمتك يا مكاتل فرحان بي التسمية؟؟؟طبعا انا زول في المنبر ده ما بفرز وبشووووت ساي فممكن عادي تكون نبزتني في حتة وأجي أشكرك في حتة :-)

انا ما متذكر الموضوع كان شنو، لكن على العموم دا زاتو بيوري انك زول حقاني (وحوتي طبعاً)، وما بتلخبط الكيمان، وهذا (بابُ في ضبط النفس وتهذيبها لا يمتلكه الكثير من الناس)، المهم خلينا فرحانين بي محمود الانسان زي ما فرحانين بي صوتو.

وكدي كلمنا زيادة عن انسانيتو لانو دي حاجات مهمة جداً إنو الناس تعرفا.

هسه لمن زيدان دا مات بعد داك عرفنا حاجات انسانية نادرة، فمن حقنا نعرف عن محمود اكتر.


البوست دا شيلو معاك الربع الجاي

Quote: ال12 الف دي كانت لما السيخ نازل..أسة بقت16 الف..

يا ود الفاروق , دى متوالية شيطانية اظنها !!!!
بعدين ياخ السيخ لزومه شنو ؟ داير تبنى سجن انت
عيب لى البناء قليل التكلفة

شايفكم فوق قلتو الحوت بغني غناء الناس احسن منهم صح؟

بقول ليك مش احسن منهم و بس لا مفروض إي اغنية حقت زول
محمود غناها طوالي يخليها .



في حاجة مهمة :-
ابتسامة محمود و ضحكتو مفروض تكون شعار مهم للإنسانية كلها .

Quote: شايفكم فوق قلتو الحوت بغني غناء الناس احسن منهم صح؟ بقول ليك مش احسن منهم و بس لا مفروض إي اغنية حقت زول محمود غناها طوالي يخليها . في حاجة مهمة :- ابتسامة محمود و ضحكتو مفروض تكون شعار مهم للإنسانية كلها .

كدى بالمناسبة دي يا سفيان نزّل لينا اغنية الخالدي (اتعلمنا من ريدا) بي صوت محمود في اغاني واعلانات بتاع رمضان الاخير.

Quote: شايفكم فوق قلتو الحوت بغني غناء الناس احسن منهم صح؟ بقول ليك مش احسن منهم و بس لا مفروض إي اغنية حقت زول محمود غناها طوالي يخليها . في حاجة مهمة :- ابتسامة محمود و ضحكتو مفروض تكون شعار مهم للإنسانية كلها .

كدى بالمناسبة دي يا سفيان نزّل لينا اغنية الخالدي (اتعلمنا من ريدا) بي صوت محمود في اغاني واعلانات بتاع رمضان الاخير.