داير لى بوردابى يفسّر لى الحلم دا!

حلمت ليلة البارحة :
أنا راكب حصان ..لكن الحصان بتحرك بأربعة لساتك !
بعدين شفت ناذر الخليفة يحمل صحن مليئ بالكوارع...
لكن فجأة ظهر لينا ثعبان ....السنى دفع الله قام شال المسرح القومى
ضرب بيهو الثعبان....فى نفس اللحظة فى طيارة طارت !!

بعد داك شفت الحكومة راكبة حصان

سلام يا أبا القاسم وأبشر؛

حسب تفسيري لحلمك أنّك تنتصر على عدو (ركوب الحصان) عبر وسيلة حداثية (أن الحصان يسير على أربع اطارات) وقبل أن تجني ثمرات هذا النصر من بعد لياقة (الكوارع) من العدو (أفسّر طبق الكوارع من ناذر بالراحة من بعد تعب وفقاً لقوله تعالى: "فَلَمَّا جَاوَزَا قَالَ لِفَتَاهُ آتِنَا غَدَاءَنَا لَقَدْ لَقِينَا مِن سَفَرِنَا هَذَا نَصَبًا") يقوم العدو تاني يفرفر" (ظهور الثعبان؛ فالثعبان بالحلم عدو غالباً) لكنّ صديقاً (السني) ينجدك ومرّة أخرى عبر وسيلة حداثية (المسرح). أما الطائرة فأفسّرها بالفكاك (فكّوهو وطار) نهائياً من مسكة هذا العدو، فأبشر.

أما الحكومة تركب حصان فما نقول فيه إلا "الله يكضّب الشينة" لكنّني أرجو أن أطفّف (ههه) في تفسيره بأنّك تقصد بالحكومة المدام وذلك يستقيم (أي تحظون كأسرة بسعة في الرزق ونصر على الأعداء). أمّا إن كانت الحكومة هي الحكومة الواااحدة دي، فلا حول ولا قوّة إلا بالله؛ اللهم إلاّ أن نطفّف بافتراض أنّك رأيتها في المنام أنّها راكبة الحصان "قلب أم قلب" أو أنّك واصلت الحلم حتى رأيتها تقع من فوق ذلك الحصان ولا يستقيم التفسير (لحاجة في نفس يعقوبي) إلا بذلك.

يا زول دي محاولة تأويلية ساكت فنستغفر الله لنا ولك مقرّين بقوله الحق "قَالُواْ أَضْغَاثُ أَحْلامٍ وَمَا نَحْنُ بِتَأْوِيلِ الأَحْلامِ بِعَالِمِينَ"

Quote: حلمت ليلة البارحة : أنا راكب حصان ..لكن الحصان بتحرك بأربعة لساتك ! بعدين شفت ناذر الخليفة يحمل صحن مليئ بالكوارع... لكن فجأة ظهر لينا ثعبان ....السنى دفع الله قام شال المسرح القومى ضرب بيهو الثعبان....فى نفس اللحظة فى طيارة طارت !!

دكتور / قور


بس ورينا الحصان نوعو شنو


كديش .... برذون ام حجر

عشان نقدر نظبط ليك الحلم

يا دكتور

تعرف أمسك في تفسير عادل البدوي شكله الراجل علامة في التفسير

من هنا وماشي كان حلمنل لينا اي حلم بنرسلوا ليهو عشان يفسروا

عزيزى عاصم

Quote: يا دكتور تعرف أمسك في تفسير عادل البدوي شكله الراجل علامة في التفسير من هنا وماشي كان حلمنل لينا اي حلم بنرسلوا ليهو عشان يفسروا

أتفق معاك.... لكن فيهو ريحة ثيوقراطية ..
يعنى هناك التفسير المادى للأحلام
زى تفسير ود القاضى ....أها
حتى الآن ظهرت لينا مدرستين فى تفسير الاحلام فى البورد
المدرسة الثيوقراطية وزعيمها ومؤسسها عادل البدوى
والمدرسة المادية ومؤسسها هو ود القاضى ...
أنا بقول أنت ما تستعجل سنطلب مهما الاثنين ارسال
النسخة الكاملة للمدرسة .....

ود الباوقة
تحية واحترام

Quote: دكتور / قور بس ورينا الحصان نوعو شنو كديش .... برذون ام حجر عشان نقدر نظبط ليك الحلم

حصان مجلّق ...يعنى بلغة البقارة حصان ضنبو قصير فويق الارض
بعدين عندو غريّة بيضاء ....
أهايا معلم ظبط الحلم انشاء الله ....دى آخر فرصة ..ياهو دا الفضل لينا
الحلم ....عليكم بالحلم !!!

عزيزى الاستاذ عادل
عاصف التحايا

Quote: أما الحكومة تركب حصان فما نقول فيه إلا "الله يكضّب الشينة" لكنّني أرجو أن أطفّف (ههه) في تفسيره بأنّك تقصد بالحكومة المدام وذلك يستقيم (أي تحظون كأسرة بسعة في الرزق ونصر على الأعداء). أمّا إن كانت الحكومة هي الحكومة الواااحدة دي، فلا حول ولا قوّة إلا بالله؛ اللهم إلاّ أن نطفّف بافتراض أنّك رأيتها في المنام أنّها راكبة الحصان "قلب أم قلب" أو أنّك واصلت الحلم حتى رأيتها تقع من فوق ذلك الحصان ولا يستقيم التفسير (لحاجة في نفس يعقوبي) إلا بذلك.

يا أخى لقد حُظيت فى حياتى بقراءة كتب تفاسير الأحلام
كما قرأت كتاب منطق الطير ....فى تفسير الأحلام ..
و كنت محظوظاً أن أقرأ كافة اساطير الاغريقية وخرافات القبائل والمجموعات الاثنية
لم أجد متعة بمثل ما وجدت فى تفسيرك....أنصحك يا أخى أن تتفرغ تماماً لهذا الابداع
و(النجر) ...يمكن ربنا يرزقك ..أكون الحلّام وتكون انت المفسر لأحلامه ..يعنى كل يوم أنا بحلم وانت تفسر
وننتفع سوياً يا أخى الكريم ...
لكن يا عادل أنا نسيت الحكومة راكبة حصان ..والحصان كمان بعضى ....الاخيرة هذه قد نسيتها ...
طيب اذا سلمنا جدلاً بتطفيفكم ..وجزاكم الله خيرا على التطفيف ، بعد أن جنحتم اليه قسراً... ..
هل ظاهرة العض فى الحلم عندها علاقة بالعض المدامى ...وما تفسيركم لو أننى حلمت بالحصان وهو يعضنى
جزاكم الله خيراُ

قور ...سلامات ...

Quote: حلمت ليلة البارحة : أنا راكب حصان ..لكن الحصان بتحرك بأربعة لساتك ! بعدين شفت ناذر الخليفة يحمل صحن مليئ بالكوارع... لكن فجأة ظهر لينا ثعبان ....السنى دفع الله قام شال المسرح القومى ضرب بيهو الثعبان....فى نفس اللحظة فى طيارة طارت !!

معناها انك حاتنجح في أمر انت سعيت ليهو واما ظهور اخونا ناذر في الحلم فده ماعنده علاقة بالحلم لانه الكوارع دي حقة اخونا زهير والحلم ده يكون ظهر ليك بالغلط ..لذلك اعتبر الكوارع دي ماحقتك ..
واما الثعبان فده عنده اكتر من تفسير وقالوا اذا اسود فده شر واذا بلونه العادي فده يعني خير والله اعلم..
فإذا كان شر معناه كفاك عنه السنى دفع الله او واحد سمين وعنده جضوم واذا خير فمعناه السني دفع الله او الزول السمين طيروا منك وظهر ليك في شكل طيارة وطارت ..

والله اعلم ..

Quote: حلمت ليلة البارحة : أنا راكب حصان ..لكن الحصان بتحرك بأربعة لساتك ! بعدين شفت ناذر الخليفة يحمل صحن مليئ بالكوارع... لكن فجأة ظهر لينا ثعبان ....السنى دفع الله قام شال المسرح القومى ضرب بيهو الثعبان....فى نفس اللحظة فى طيارة طارت !!

قور سلام

ركوب الدابة أو اى وسيلة نقل في المنام تعني السفر أو الانتقال من حال الي حال
والثعبان عدو وقتل الثعبان يعني الظفر بالعدو ..

وبالنسبة للطعام هل دعاك صديقك الي الاكل معه اذا دعاك فهذا تأكيد علي السفر

وتفسير ركوب الحكومة الحصان رحيلهم ..

----------
ربما ستنتقل الي حال افضل !!

حُصان مِتْدردِقلو بِترْتار ودبيب يِرْزعوهو بِالمسرح القَومي! الخراااابا

أوصي بِتغَيير الغِطاء بِإثْنَين ويجوز تخفيف وجبة العشاء



أقول ما قد قرأت وأسْتغفِر الله لي ولك

والله يا عم ابو القاسم ضحكتني ضحك
يا اخي الناس تحلم يسقوا فيها في اللبن انتا حلمك جايبو له دبايب.
نصيحتي لك ما تاكل فول قبل ما تنوم

يا محمد يا ولدى

Quote: والله يا عم ابو القاسم ضحكتني ضحك يا اخي الناس تحلم يسقوا فيها في اللبن انتا حلمك جايبو له دبايب. نصيحتي لك ما تاكل فول قبل ما تنوم

حسى أنا قلت ليك أتعشيت !!
يا ولدى نحن ضاربين القوا متل باقى أهل السودان...

Quote: أوصي بِتغَيير الغِطاء بِإثْنَين ويجوز تخفيف وجبة العشاء

دا الكلام

أستاذ أحمد
تحية واحترام

Quote: وتفسير ركوب الحكومة الحصان رحيلهم ..

يا زول فال الله ما فالك ..الحيكومة دى كان رحلت تانى نوع الحلم دا نلقاه وين؟؟

يا ود القاضى
تحية عاصفة

Quote: واما ظهور اخونا ناذر في الحلم فده ماعنده علاقة بالحلم لانه الكوارع دي حقة اخونا زهير والحلم ده يكون ظهر ليك بالغلط ..لذلك اعتبر الكوارع دي ماحقتك ..

انصحك بشدة أن تكتب المسرحيات الساخرة
حسى الكوارع دى عرفتها كيف دى كوارع سهير ...
دى كوارع اضيضاص ...
طبعاً يا أستاذ ود القاضى انت صاحب مدرسة شهيرة فى تفسير الأحلام
السؤال هو لماذا لا تقوى النساء تفسير أحلام الرجال
على سبيل المثال حتى الآن لا توجد بوردابية واحدة حاولت تفسير حلمى ...
فى واحد قال لى ...عندكم كتاب جديد بعنوان ( الحلم والنوع ) يمكن تحدثنا بسيط عن الكتاب
أفادنا الله بحلمكم وعلمكم

استاذ قور ..سلامات ..

شكلك ياقور داير تجيب لينا مشاكل مع النسوان ديل ونحن اصلاً اصحاب سوابق ..

Quote: السؤال هو لماذا لا تقوى النساء تفسير أحلام الرجال

تفسير الاحلام داير عقل كبير وكامل ومادام المره ناقصة عقل ودين - كما يقولون - لذلك مقدرة تفسير الاحلام تكون راحت مع الحتة الناقصة من العقل - والله اعلم -

Quote: فى واحد قال لى ...عندكم كتاب جديد بعنوان ( الحلم والنوع ) يمكن تحدثنا بسيط عن الكتاب أفادنا الله بحلمكم وعلمكم

انا ماعايز انشر غسيل كتابي ..لكن ليك منى نسخة اذا كتبته وطبعته ..


تحياتي ،،

أروع حوار بين الذكر والأنثى أروع جدال بين الذكر والأنثى.. :

قال لها ألا تلاحظين أن الكـون ذكـر ؟ فقالت له بلى لاحظت أن الكينونة أنثى !

قال لها ألم تدركي بأن النـور ذكـر ؟ فقالت له بل أدركت أن الشمس أنثـى !

قـال لهـا أوليـس الكـرم ذكــر؟ فقالت له نعم ولكـن الكرامـة أنثـى !

قال لها ألا يعجبـك أن الشِعـر ذكـر؟ فقالت له وأعجبني أكثر أن المشاعر أنثى!

قال لها هل تعلميـن أن العلـم ذكـر؟ فقالت له إنني أعرف أن المعرفة أنثـى!

فأخذ نفسـا ً عميقـا ً وهو مغمض عينيه ثم عاد ونظر إليها بصمت لـلــحــظــات وبـعـد ذلك.

قال لها سمعت أحدهم يقول أن الخيانة أنثى. فقالت له ورأيت أحدهم يكتب أن الغدر ذكر.

قال لها ولكنهم يقولون أن الخديعـة أنثـى. فقالت له بل هن يقلـن أن الكـذب ذكـر.

قال لها هناك من أكّد لـي أن الحماقـة أنثـى فقالت له وهنا من أثبت لي أن الغباء ذكـر.

قـال لهـا أنـا أظـن أن الجريمـة أنـثـى. فقالـت لـه وأنـا أجـزم أن الإثـم ذكـر.

قـال لهـا أنـا تعلمـت أن البشاعـة أنثـى. فقالـت لـه وأنـا أدركـت أن القبـح ذكر.

تنحنح ثم أخذ كأس الماء فشربه كله دفعة واحـدة

أما هـي فخافـت عنـد إمساكه بالكأس مما جعلها ابتسمت ما أن رأته يشرب

وعندما رآها تبتسم له قال لها يبدو أنك محقة فالطبيعة أنثـى.

فقالت له وأنت قد أصبت فالجمال ذكـر. قـال لهـا لا بـل السـعـادة أنـثـى.

فقالت له ربمـا ولـكن الحـب ذكـر. قال لها وأنا أعترف بأن التضحية أنثـى.

فقالت له وأنا أقر بأن الصفـح ذكـر. قال لها ولكنني على ثقة بأن الدنيا أنثى.

فقالت له وأنا على يقين بأن القلب ذكر.

ولا زال الجـدل قائمـا ً ولا زالت الفتنة نائمـة وسيبقى الحوار مستمرا ً طالما أن . . . السؤال ذكر والإجابة أنثى فمن برأيكم سوف ينتصر على الآخر ؟.؟.؟.؟.؟.؟



(جاتني في رسالة في الإيميل

والله يا عصام
يا أخوى
الظاهر عليك بكلام دا تقصد أنثى وذكر الانسان مش كده ؟
فى الحياة العادية ...مش كده ...طيب فى الحلم كيف؟

Quote: أروع حوار بين الذكر والأنثى أروع جدال بين الذكر والأنثى.. :

الانثى بتظهر فى شكل حصان فى الحلم ....
غايتو أنا ما عارف..... حلمى دا زى لسع عندو باقى

دكتور

حلمك دا لس ناقص . فيهو باقي

حاول كملو الليلة بالليل وجيبو تاني

وشكرا

يا ود القاضى

Quote: تفسير الاحلام داير عقل كبير وكامل ومادام المره ناقصة عقل ودين - كما يقولون - لذلك مقدرة تفسير الاحلام تكون راحت مع الحتة الناقصة من العقل - والله اعلم -

دا كلا قوى!!
لكن ليه بنحلم بيهم!

Quote: لكن ليه بنحلم بيهم!

قبل العرس يستاهلوا ونستاهل...
السؤال الصح ليه بعد العرس ماقاعدين نحلم بيهم ؟!!

السلام عليكم يا قوم،

روى ابن "تلاتة سير" في كتابة المعروف "كيد الأنام في تفسير الأحلام" في الصفحة التالية للغلاف الأخير ما يلي:
(ركوب الحصان يدل على سفر قاصد إلا إذا كان الحصان أسود فإنه مشكلة. فإن رأي شخص نفسه يركب حصاناً وقُدِم له طعام يشتهيه فمعنى ذلك أنه بالغ مقصده لا محالة. أما الثعبان الذي يقتل بالمسرح القومي فهذا بالتأكيد ثعبان معادٍ للثقافة السائدة وما المسرح إلا انعكاس لما يحمله صاحب الحلم للمسرح القومي من مشاعر) أ.هـ.

سلمت أستاذنا من الهلاويس ...

يا دكتور سلامات
الاحلام مدارس
وفي مدرسة الاحلام حسب يوجين اونيل
دي حلم تعبيري وفي التعبيريه وانت ضليع في هذا العلم حدد شخصيه ناذر وابعادها
اما الحصان عند سيرفانتيس ودون كشوت هو اسبارتاكوستا (انت تعلم من هو اسبارتاكوستا) وموقعو من الاحلام
اما الحكومه وركوب الحصان ده ركوب راس

سلام قور ..

غايتو ما عارف .. لكن أنا قبل كدة (قبل الورة المصرية) حلمت لي حلم كدة حكيتو هنا .. ظهروا لي في الحلم حسني مبارك وأنور التكينة ورئيس المخابرات داك .. المهم ما تمت كم يوم وبعدها قامت ثورة 25 يناير أطاحت بي حسني مبارك وأنا لي هسي شاعر إني مسؤول مسؤلية أخلاقية عن شهداء الثورة دي .. هههه

غايتو أمسك في أخونا ود البدوي لأنو أنجض زول في الحتة دي ...

بالمناسبة إنت متأكد إني كنت شايل كوارع ؟! اليد التانية كان فيها شنو طيب ؟!!

كدي زور الرابط دا :

حلم غريب بحاجة لتفسير : هل الرئيس حسني مبارك عندو ...لجابو هنا شنو ؟؟!!!!

ومعاهو دا .. ودا تحديدا الجاب أجل حسني مبارك :

حلم تاني بحاجة لتفسير عاجل : الفنان بادي محمد الطي...طبلة والكورس مصري !!

up

معذرة استاذ قور .. ليس لدي تفسير لحلمك ده أو غيره
فما يعجبني أنساه قبل أن يصيح الديك وما يزعجني أقول
أضغاث وكفى الله المؤمنين شر الاحلام .. تداخلت لأن لدي
سؤال:

قلتا الحكومة راكبا حصان؟!
مجلس الوزراء والله مجلس الثورة
وكلهم في حصان واحد؟!

ناس المحليات ما شفتهن في الحلم ده؟