النظام العام ينظم حملة ضخمه لمحاربة الظواهر الشاذه بشارع النيل

الشارع السوداني كان ومازال وسيظل من أطهر شوارع العالم
ودولتنا دولة رساليه ذات مشروع حضاري
لكن ظهرت مؤخراً أشياء غريبه بشارع النيل كان لزاماً التصدي لها بحزم وقوه
بالأمس قام النظام العام بحملة ضخمه جداً بشارع النيل لمحاربة الظواهر السالبه والدخيله على عاداتنا
قوام الحمله 5 بكاسي من قسم المقرن وعربتان تتبعان لشرطة النجده وعربتان تتبعان لشرطة المباحث
كثيرين حدثوني عن إمتعاضهم الكبير من الإنفلات الذي يشاهدونه في شارع النيل الخرطوم والملابس والأزياء الغريبه التي يرتدينها الفتيات هناك لذا كان لزاماً على قوات النظام العام التدخل السريع لفض هذه الظواهر الدخيله والغريبه على مجتمعنا المحافظ .
قبل عدة أيام ناقشني أحدهم عن شارع النيل وذكر أن الحكومة تريد هذا الإنفلات لإلهاء الناس عن ضغوط الحياه والمعيشه
إستغربت جداً جداً لحديثه الغريب وتفكيره السطحي
شكراً قوات النظام العام .. أدام الله عطائكم

هذه الحمله لن تكون الأخيره وأتمنى من رواد هذا الشارع الإلتزام بقيمنا السمحه وعاداتنا الجميله حتى لايعرضوا أنفسهم للمساءله

السلام عليكم ،

بل سحقا قوات النظام العام !

ياتو ظواهر شاذة في شارع النيل !؟ .. قاعدين نمشي شارع النيل ده وما شفنا اي ظواهر شاذة في العلن ، علما بإنو مكان عام والناس شايفين بعض بعملو في شنو ، اللهم الا إذا انتو مصرّين تحاكمو نوايا الناس !

أما الكلام عن اللبس ، فده موضوع اتناقش مليون مرة قبل كده .. البتشوفو انت ما لايق ، ما بي الضرورة اشوفو انا ما لايق برضو ! ، وبعدين الفتاة بتطلع من بيتهم لابسه لبسها ده ، يعني بموافقة ولي امرها .. إنتو الدخلكم شنو ؟


بي المناسبة الزول القلت اتناقش معاك قبل كم يوم ده ، حقو تفكر في كلامو ده تاني .. لأنو شارع النيل ده فعلا بقى المتنفس الوحيد تقريبا للشباب .. وانتو عارفين كويس انو الشباب ديل كان ما اتنفسو إحتمال كبير ينفجرو ! .. والنتيجة ما حتكون كويسة.


حقو تتركو الشباب ما تركوكم ياخ !

أخ حسن
أنا قبل فتره شربت شاي بشارع النيل
في البدايه كان الوضع طبيعي وفجأ ه بدأ الشباب والفتيات يصلوا والشارع إمتلأ عن آخره
أغلب الفتيات كانوا مرتدين بناطلين ضيقه جداً بدون طرح إطلاقاً وإسكيرتات قصيره إقتربت أن تصبح جكسا في خط سته
وبأم عيني شاهدت عربه تخرج فتاه من فتحة سقفها وتصرخ
دي كلها مشاهد ماصاح في حقنا وأمر محير جداً إنو البنات ديل أهلهم يخلوهم يطلعوا باللبس ده
والغريب إنو الفتيات بكونوا قاعدين في الشارع حتى ساعات متأخره من الليل
ماعشان السياسيه وعشان الشباب يخلوا الحكومه في حالها الحكومه تتخلى عن مشروعها الحضاري

مؤونة عام من الود

الاخ محمد
تحياتي
اين هو المشروع الحضاري التي تتحدث عنه؟

بالجد انا عاوزة اعرف ما معني المشروع الحضاري لو سمحت!!!

حملة؟
المفروض ينظمو حملة فى الاول من داخل وسطهم لأن فى الاصل رجال شرطة النظام العام
من اسواء البشر على المستوى الاخلاقى. وهم ذاتهم فيهم كلام.
وبعدين يااخى الكريم مالو البنات ما يلبسن على كيفهن. يعنى ما وصلت
لدرجة انو الواحدة تجى بى مايوه وتنط فى تبللط فى النيل. والحكومة
لو كانت بتفهم كويس عليها ان تستفيد من درس لبنى احمد حسين
وما تدخل رقبتهافى اى بنطلون حايم.

والله نفسي اشوف التفويض الاداكم ليه الله ده عشان تدخلوا الناس الجنة بالبوليس !!!!

انتوا ما معترفين ب : انا اهديناه السبيلين اما شاكرا وايما كفورا

بالغت يا محمد فرح ..!!

Quote: الشارع السوداني كان ومازال وسيظل من أطهر شوارع العالم

!!!

سلام يا ممحمد
و ماذا عن الظواهر الشاذة في أروقة الدولة ابتداءً من القصر الجمهوري و إنت نازل. أليس الفساد و أكل أموال الناس بالباطل ظاهرة شاذة؟ أليس موت الناس جوعا و فقرا ظاهرة شاذة؟ أليس مظهر مدارسنا و مستشفياتنا ظاهرة شاذة؟ أليس الظلم ظاهرة شاذة؟ أليس منظر قوات الأمم المتحدة ترتع في بلادن ظاهرة شاذة؟ لو أردنا تعديد الظواهر الشاذة الأولى بالجهد في ما تبقى من بلدنا المنهك المنتهك والله مجلدات ما تكفينا تقول لي بنات لابسات كيف و ما عارف شنو.

" بعض الناس يضايقهم أن يروا فتاة لا تلبس الحجاب لكن لا يهمهم ان يروا طفلا لا يلبس حذاء في شواع بلدي "
د. عبد المنعم ابو الفتوح
القيادي الاسلامي المصري المفصول من جماعة الاخوان المسلمين

Quote: إقتربت أن تصبح جكسا في خط سته

ياخى الله يرجعنا للايام ديك
كانت أيام الناس نفوسها نضيفة

...........

الحاجة اللى عايزة كشة نظام عام حكومتكم الفاسدة المفسدة دى
حكومتكم اللى بى كثرة الفساد أصبحت لابسة مايوه عديل وبكينى فى نص شارع الظلط وفى الاحياء وفى كل الشوارع خليك من شارع النيل
بلا قرف معاكم

عليكم اللة محمد المشرف ماليهو حق يقاطعكم....

ياخ إنت كلامك الطارشو لينا هنا مقتنع بيهو....

ياخ إحترمو عقولنا شوية....

أحسن حاجة في بوستك دة طلت الرائع حمور....

الاخ محمد فرح

هل تعلم انه في الشريعة الاسلامية لايجب ان تقوم السلطة بهذا الدور

هل تعلم ان هذا هو دور المجتمع هو الذي يقوم وهو الذي يقيم، هو الذي يعاقب المسئ المقصر وهو الذي يعطي الجزاء الحسن للمحسن.
ويمكن للدولة ان تكرم المحسن ان شاءت لتشجع دون ان تتعرض للمقصر في خاصة تدينه وعبادته.
دعوا آليات المحتمع الفطرية السمحة تعمل. قدموا للناس الدعوة افتحوا ابواب الخير أدعموا الجمعيات والمناشط التي تعلي قيم الخير في الناس لتتحرك دواخلهم تجاهها حباً لا خوفاً حبا للقيم لا خوفا من سلطان.
قدموا القدوة والنموذج. اعينو الناس على الشيطان ما تعينو الشيطان عليهم.
اقول قولي هذا وانا استند الى آراء فقها وعلماء, استناداً على الشريعة السمحاء.
في الدولة الاسلامية المجتمع يجب ان يضطلع بالدور الاعظم في مناشط الحياة والسلطان لا يتدخل في تفاصيل حياة الناس ، إلا بمقدرا التشجيع وفتح والدعم ولكن لاسلطان لها على ماذا يلبسون وتفاصيل حياتهم.
وأدعو الله ان تتكرر هذه العملية ...
ومن الان فلتبحث الدولة او الحكومة عن وسيلة اخرى ترفع بها هذه القيم في المجتمع بغير سلطان القانون.
أقول هذا القول وانا من دعاة الى الحجاب.

مع تحياتي

Quote: " بعض الناس يضايقهم أن يروا فتاة لا تلبس الحجاب لكن لا يهمهم ان يروا طفلا لا يلبس حذاء في شواع بلدي "

يا كيزان يا وهم ما تسيبو الناس في حالا
الشعب السوداني ده من اكتر شعوب العالم معاناة من انعدام وسائل الترفيه
الذهاب الي شارع النيل او الحدائق هو قمة ما يمتلكه هذا الشعب البائس ليرفه عن نفسه
انتو يا كيزان لا خيرا منكم لا كفاية شركم
حتى في شارع النيل الوس خان و غير مهيأ ده جايين لاحقننا؟!

إختشوا ِشوفوا العالم حولكم

ادناه بعض الصور من شارع النيل (أقصد شارع البحر الأحمر)


>










لو كنتوا حاكمين مصر كان لغيتوا حاجة اسمها سياحة

الاخ محمد فرح

الشرع يدعو الناس للالتزام بالحسنى وليس بالقانون اذهبو للناس في البيوت وفي الجامعات وفي النوادي وادعوهم بالحسنى
هذا الدور الذي تقوم به السلطة والقانون ليس دورها في الدولة الاسلامية هو دور المجتمع.
لان المجتمع اذا استقام يرى الاعوج اعوج والعديل عديل .. وتتنزل قيم الاسلام بآلياته الخاصة به لان المجتمع هو الذي يعقاقبك اذا كان سلوكك مشين بالعزلة والرفض والحصار. المجتمع هو الذي يكرمك ويرفعك مكانتاً ويجعل رأيك مسموعا اذا كنت ملتزماً بالقيم والاخلاق وغيرها. وعلى الدولة ان تعينهم بأن تفسح للمجتمع مثل هذه المناشط بل وتدعمهاز ( يعني ميزانية البكاسي والنظام العام دي حقوا الناس تدعم بيها مشروعات تعلي من القيم التي يود الناس ترسيخا في المجتمع. وبالتالي تتعالج مثل هذه الظواهر والامر ما عايز عجلة.
دعوا الناس ياتوا الى دين الله حباً ويمارسوا الطاعات حباً لله وهوفا منه وليس خوفا من السلطة.

هل تعلم انه في الدولة الاسلامية لايجوز لك ان تفعل هذا، ولكن المطلوب منك ان تفعل آليات المجتمع لاعلاء قيم الدين. بعد ذلك سوف يقوم المجتمع بدوره في هذا الامر.

أرجوكم ما تستفزوا الناس لمكاواتكم أن يخالفوا أوامر ربهم. لا تعينوأ الشيطان عليهم بل أعينوهم على الشيطان.

الكلام دا بقولوا استناداً الى الشريعة السمحاء. واستناداً الى آراء فقهاء يعلمون غاية السماحة في الاسلام.

فأرجوكم خلوا بين الناس وربهم.

تحياتي
انا من دعاة الحجاب وبشدة ولكن ايضاً يجب الاقناع بالحسنى والقدوة والين والترغيب. أعلم انه فرض.

Quote: هل تعلم انه في الدولة الاسلامية لايجوز لك ان تفعل هذا، ولكن المطلوب منك ان تفعل آليات المجتمع لاعلاء قيم الدين. بعد ذلك سوف يقوم المجتمع بدوره في هذا الامر.

تحياتي ياقلبناالنابض
وينها يا بتي الدوله الاسلاميه ؟؟؟!

دي دوله بوليسيه


اسلاميتهم تتمظهر فقط في حجاب النساء .

التنفيس الجنسي بالاعتداء على النساء
كلما تمظهر الشخص بالدين كلما علا من نوازعه و رغبته في التشفي و كأنه يعاقب الاخرين على خياره الشخصي.
كل ما ضغطه الرغائب المتوحشة كلما استقصد النساء

اسلاميتهم تتمظهر فقط في حجاب النساء .


والله الكيزان ديل حيرونا ،أنا ما عارف حساسيتكم شنو مع النسوان ؟؟

الغريب أن هذه الحساسية لا تجدها في تعاملهم مع الأولاد المتشبهين ؟؟؟

أنتو تكونوا قوم ....... قطع شك

حسبنا الله ونعم الوكيل

اتدعو بهذه الصورة البائسة المجتمع السوداني

الطاهر للتفسخ والمجون والعربدة


اخونا محمد فرح معا من اجل استكمال المشروع الحضاري

في وطن العفة والعفاف

ولا مكان للمستلبين بيننا ...

اردم

الاخ محمد فرح

ده عمل جميل الشعب يستحق
طلعوا عين ابو الشعب كله
عشان يقوم عليكم يطلع دين ام الكيزان ديل




زيديني عشقاً زيديني

تحياتي أخت تسنيم
بالتأكيد المشروع الحضاري جاء ليعلي قيمنا الدينيه والإسلاميه ومحاربة العادات الدخيله والضاره وظواهر الإستلاب الثقافي التي إنتشرت في أغلب المجتمعات العربيه
المشروع الحضاري جدار صلب في وجوه من يريدون أن يمشوا فتياتنا عراة في الشوارع
من يريدون أن يعود زمن البارات وبيوت الدعاره
الخرطوم بحمد الله من أطهر العواصم حالياً
تقريباً العاصمه الوحيده التي يندر جداً أن تشاهد بها فتاه لاترتدي حجابها تاجاً على رأسها

مؤونة عام من الود

أتمنى أن لايدخل البعض نفسه في زمرة اللذين يحبون أن تشيع الفاحشه
وإنه والله لجرم عظيم
لو توقف الناس عن النهي عن المنكر عندها يكون الموت أفضل بكثير من الحياه

Quote: قبل عدة أيام ناقشني أحدهم عن شارع النيل وذكر أن الحكومة تريد هذا الإنفلات لإلهاء الناس عن ضغوط الحياه والمعيشه إستغربت جداً جداً لحديثه الغريب وتفكيره السطحي

والغريبة انه الكشة جات بعد مناقشتك على طول ..سبحان الله
نيتك واصلة .