الطاقيه.....

مصطلح تم تداوله فى حوار امامى ولم استطيع ان استنبطت معناه
وعشان احكى الحوار يبقى لازم احكى الحتوته البديت فى اول شهر فى سنة 2009 عشان تشوفوا الصوره بوضوح تااااااااااااااااااااااااااام كانها 3 دايمنشن
وحتجنب ذكر اسم الجهه عشان مافى داعى يمشوا يعتقلوهم لان الدار بينى وبينهم الحوار هم اشخاص برغم انتمائهم لمؤتمر الوطنى فهم على درايه بمدى المهزله البيعيشها الوطن
دوما بنغلط غلط فادح لمن نخلط الشغل بالتعامل الشخصى
وكرمان شخص معين ذو مكانه مقيمه لنا بنجازف بعمل شغل يفوق طاقتنا على وعد بان الحق سوف يستحق فى الموعد المحدد
وبنجتهد وبنعصر على رويحتنا وزمنا والمعانا وبندين وبندخل ناس تانيه ليس لهم معرفه بالتفاصيل كرمان انجاز العمل الضرورى لدى هذه الشخصيه التى تعمل فى جهه حكوميه
والشغل اصلا تم فى هذه الجهه الحكوميه
الشخص البيكون فى وظيفه حكوميه مفروض لمن يكون مسئول عن قسم معين وعايز شغل خارجى له ميزانيه لا يستهان بيها يضمن ناسه وميزانيته قبال يورط الاخرين فيه
لان فى الاول والاخر هو ما حيخسر اى شى زى زولنا وغير انه مسكنا الماسوره ما عمل شى
كان الجهه الحكوميه كان نحنا بقينا فى مواجهه بعض بلا اى مقدمات والشخص الاتسبب فى كده بما ان شغله العايزه تم يبقى الباقيين يحرقوا بجاز
تصرفات مكرره ومعاده ومخزيه من قبل الكثير من الموظفين فى مناصب ليها سلطه فى جهات حكوميه
والضحيه هو الشخص الاتقدم بالعمل ونفذه من جلده الحى
حتى الجهه الحكوميه اسهل شى تقول مافى ميزانيه مافى قروش مافى مافى مافى
يعنى نطرشق نتفقع نتسجن هم ماليهم اى ذنب
فعلا الذنب من الشخص البيتهور ويشتغل على وعد لفظى ما اكتر ولو حتى مكتوب المحاكم لا بتخارجنا لا بتحلنا
المهم السنين مريت وعديت وفترنا وكملنا الصبر والطرق كلها عشان نخارج قروشنا وبعد سنه ونص طلع لينا جزء من المبلغ
اليوم دا وانا بستلم الشيك اظنهم دايرين يغمروا يا تجيهم ذبحه
تقول متصدقين بيها وانها ما من حقنا الفات عليه الفوت وبقى بخساره
غايتو اول امس مشيت ليهم وانا معطنه غضب لدرجه الغليان
ولمن جيت ادخل وبدى زول الامن يعمل لى حركات نص كم ودايره تصريح واذن كنت حلفها لاخرها ويحصل اليحصل
وشكله لمن لقى الشرار بيطاير منى خلانى ادخل
ما عرفت الله بيحبهم انى ما لقيت الزول المالى المسئول ولا المدير حق المصلحه زاتو ولا الزول الاصلا دبسنا فى الوضع دا
وقفت فى حوشهم وقربت اكورك من الغيظ ولو كان فى يدى قنبله كان فجرتها
لانهم خسرونا اضعاف المبلغ لان الاطراف الدخلناها للإتمام الشغل رفعت فينا قضيه وكسبتها مع غرامات قريبه من المبلغ زاتو
وليه وعشان شنو
لو فعلا ما عندهم الاشتغلنا ليهم قروش كان ما زعلت
لكن هم صرفينها على نفسهم وناسهم واحتياجاتهم الفارغه والمليانه
تانى يوم لمن مشيت لقيت الزول المالى فى اجتماع
طوالى لصقت لى فى كرسى وقعدت
قولت يا انا يا هو اليوم
3 ساعات اتورمت من الانتظار
لكن كانت انتظار وشمار
اى زول يجى داخل بيفت له شمار وبيطلع
لقيت ان الشغلانه حتى بينهم ما جايبه حقها
يدوا العايزين يدوا ويجلوا العايزين يجلوا
وكنت بحاول احرص انى ما اتبادل الحوار عشان ما اغلط فى زول من زعلى
لكن لمن فاض بينى قولت ليهم نحنا الغلطانيين سكتنا
قام زول قال لى كيف يعنى
قولت ليهم سكتنا وهم بيسرقونا من سننننننننننننننين وبيسرقوا حق الشعب كله
فجعتا الناس سكتت
وما ردوا عليه
قولت بينى وبين نفسى كان اعتقلونى كان ذبحونى ما فارقه
ما ضربوا الاعور فى عينه قال ليهم ماهى خربانه خربانه
وبعد فتره جات زوله ظريفه وبتديت تتونس وتانى طرحوا موضوع الحقوق والمستحقات وخلافه
.......
يتبع

الغريبه انى لمن وضحت استيائى من الحكومه
قالت لى نحنا مؤتمر وطنى
وان النساء دايما بتحتج على الازمه والضيق المالى لكن لمن ينزلوا السوق بيشتروا حاجات ماليها اى فايده
وانى لو عاينت للعده العندى بلقى دا حاصل
قولت ليها اصلا انا ما عندى عده
ودا ما بيدى مبرر ان المسئولين ينهبوا خير البلد لمصلحتهم
قالت ان دا ما ذنبهم
لمن مثلا موظف كبير فى جهه حكوميه يبدأ مشروع معين بيفيد المصلحه والناس الاعلى منو زى الوزير التابع لمصلح يقول له ابشر ونفذ وتكون ليسه الماليه ما اديتهم حتى الموافقه على ميزانيته او تكون عشمت الوزير وتانى خذلته يبقى دى ما غلطت الجهه المعنيه
...
اكيد ما غلطتهم
دى غلطت البيصدقهم اصلا
....
ومنها حكيت من مجريات وظيفتها انها بتقدم ميزانيه سنويه لقسم التابع ليها ولمن مشيت تصدقها كان فى مدير تانى مقدم برضو ميزانيته
وعاين فى ميزانيتها لقى مبلغها بسيط قال ليها دا شنو العملاه
قالت له مالو
قال ليها صلحى ميزانيتك دى
قالت له كيف يعنى
قال ليها ضيفى فيها شنو وشنو وشنو ( ما متذكره الامثال الضربتها)
قالت له لكن الشنوات دى ما بنستعملها اضيفها لشنو
قال ليها عشان تصلحى ميزانيتك مبلغها كده بسيط
قالت له لكن دا الاصلا بنحتاجه
قال ليها برضو صلحيها
وحتى القدمت ليهم الميزانيه مستغربين ويسئلوها متاكده ان القروش دى بتكفيكم ولا نزيدها
غايتو فى مصالحهم قلوبهم بتكون حنينه لطيش على ناسهم
وقالت انها طلعت بكيس صغير وزولنا التانى فتح ظهرية العربيه وردمها قروش تبع ميزانيته المتصلحه
قام ضحك زول وقال الطاقيه
قامت قالت له ياها الطاقيه
وقعدوا يضحكوا كلهم
وانا الشمار حرقنى اعرف معناها وخجلت اسئلهم
عشان كده جييييييييييييييييييييييييييييييييييييييييييييييييتهم يا ناس الطواقى والخبر والتصليح
فهمونى يعنى شنو طاقيه
عسى ولعلى نطقطق زيكم