Post: #1
Title: سؤال .. هل البرير مازال رئيساً للهلال ؟؟؟
Author: أسامه الكرور
Date: 12-07-2011, 05:54 PM
صراحه أنا محتار
الإتحاد الأفريقى أصدر عقوبات بشأنه من ضمنها الإيقاف لمدة عامين
ومازال البرير يؤدى مهامه كرئيس لنادى الهلال كما نرى
هل الإستئناف المقدم يوقف تنفيذ العقوبه ؟؟؟
هل العقوبه تشمل منافسات الإتحاد الأفريقى فقط ؟؟
أم أننا أننا تعودنا أن نُجِلَ من تدينه المنظمات العالميه .. ونرفض الإنصياع لها ؟؟
وسير سير يا البرير
|
Post: #2
Title: Re: سؤال .. هل البرير مازال رئيساً للهلال ؟؟؟
Author: omer osman
Date: 12-07-2011, 06:01 PM
Parent: #1
مساء النور ياسعادتك ......
شوف دي مداخلة لي في بوست اخر :
Quote: سلام ياصبري ......
قالوا التاجر لمن يفلس بفتش دفاترو القديمة
بالله دي مش قمة العجز والفشل نادي كبير زي نادي الهلال
يقعد يضيع في زمنو في كلام فارغ زي ده بصمة علاءالدين ومش
عارف شنو !!!!! طيب بالمرة خليهو يفتح ملف 2 و 12 أو الثعلب وكندورة !!!
وفي الاخيرة دي خليهو يجيبني انا عمر عثمان ده شاهد إثبات !!!!
ياصبري جمال الوالي يتخبط في إدارة نادي المريخ وبقدر ما حقق ثورة في المنشآت
حقق مثلها فشل في فريق كرة القدم وتطوير وتحديث العمل الاداري بالنادي ، لكن بصراحة
عند مقارنته بالامين البرير فالفرق شاسع والبون كبير ...... وزي ما بقولوا اجيك من الاخر
انا مريخابي وبقول الامين البرير افشل رئيس في تاريخ الهلال والامين البرير اقصر واقل
قامة من ان يكون رئيس نادي بحجم ومكانة نادي الهلال .........
الشعب يريد إسقاط البرير ... ارحل ارحل بلا علاءالدين والمصباح السحري معاك |
الهلال يكلِّف المستشار القانوني رسمياً بتحريك ملف بصمة علاء الدين
|
Post: #3
Title: Re: سؤال .. هل البرير مازال رئيساً للهلال ؟؟؟
Author: أسامه الكرور
Date: 12-08-2011, 05:54 PM
Parent: #2
سلامات يا سيد عمر
تعرف أنا دخلت البوست دا وبدأت فى الرد
لكن لقيت الموضوع ما بستحق
وبقى لى كلام البرير دا زى كلام المشجعين بتاعين أكشاك الجرايد
بتاعت ميدان الأمم المتحده زمان ....
هذه إنصرافيه وهروب من الواقع
ولسه مافى زول جاوب لى على سؤالى
|
Post: #4
Title: Re: سؤال .. هل البرير مازال رئيساً للهلال ؟؟؟
Author: محمد البشرى الخضر
Date: 12-08-2011, 09:00 PM
Parent: #3
ايوة يا الكرور لسة البرير رئيس و يمارس نشاطه وهبالاته بصورة علنية و بحضور قادة الاتحادالعام ومن داخل مكاتبهم
صافح اللاعبين في مباراة القمة الأخيرة و كان حاضر في تسجيلات اللاعبين
عدد من الهلالاب رافضين لاستمراره في الرئاسة وتجمهروا في دار النادي و هتفوا ضده
وصفهم مطبلاتية البرير بأهم انصار الأرباب
|
Post: #5
Title: Re: سؤال ... هل البرير مازال رئيساً للهلال ؟؟؟
Author: على محمد الخير
Date: 12-09-2011, 08:54 AM
Parent: #4
تحياتى اخى اسامة ،،
القبح الذى جاء به رئيس الهلال والذى تناولته وسائل الاعلام بالاستنكار والادانه فى حينه... ثم اثبات هذا الفعل المشين وانزال العقوبات بحق هذا الرجل من قبل الاتحاد الافريقى ... اكدت بما لايدع مجال للشك ان الرجل لا يصلح لقيادة مؤسسة عملاقة مثل نادى الهلال ... وحقيقة كنت اسأل نفس السؤال الذى عنونت به هذا البوست .. اما يزال الرجل رئيسا لنادى الهلال ؟؟
واذا افترضنا جدلا ان هذا الرجل عكليته وراسه قوية ... اين ادارة الهلال من ذلك التصرف ...؟ بل اين العقلاء من محبى نادى الهلال... ؟ الرجل بفعلته هذه وكما سبق ... اساءة للهلال... واجمع الكل بان تصرفه كان ارعنا!!... لذا كان اقلاه ان يتقدم باستقالاته بنفسة قبل ان تقيله ادارة الهلال!!... حقيقة هناك اشياء تحدث فى بلادنا تفوق كل ما يمكن تصوره من سوء يمكن حدوثه ... سيظل هذا السؤال قائما الى ان يترجل هذا الرجل عن قيادة الهلال..؟؟ وكنا من قبل فى احدى البوستات التى تناولت هذا الامر قد سالنا عن مؤهلات البرير لقيادة الهلال .. فلم نجد ما يشفى غلنا ... وان كان هذا الامر تناساه الجميع وكانه لم يحدث شى فعلى الرياضة فى بلادنا الف سلام ... والان فقط اجد تبريرا قد يخفف من مغصتنا لى فى عدم تمكن الهلال من احراز كأس خارجية... طالما ان قيادته على شاكلة من يستخدمون ايديهم بدلا عن عقولوهم... واخر دعوانا ( اللهم اجرنا فى مصيبتنا يارب العالمين ..)
|
Post: #6
Title: Re: سؤال ... هل البرير مازال رئيساً للهلال ؟؟؟
Author: محمد البشرى الخضر
Date: 12-09-2011, 09:21 AM
Parent: #5
| Quote: اين ادارة الهلال من ذلك التصرف ...؟ |
اي ادارة هلال يا علي الله يهديك
مجموعة الكذابين عديمي الشخصية البلا خجلة او استحاء طلّعوا بيان تتصدره آية قرآنية كريمة يتبعها كذب صريح بأن البرير لم يرتكب ما نسب إليه
و اضافوا بكل بياض العين الفي الدنيا انهم سياقضون كل من أثار او يثير الامر في الصحف!!
ديل عار على الهلال و تاريخه و عار على الجمعية العمومية التي اتت بهم وعار علينا جميعا كهلالاب ان خليناهم يستمروا في مقاعدهم دقيقة واحدة بعد البيان الكاذب
|
Post: #7
Title: Re: سؤال ... هل البرير مازال رئيساً للهلال ؟؟؟
Author: حيدر بشير
Date: 12-09-2011, 01:46 PM
Parent: #6
الاخ أسامة و ضيوفه الكرام
لكم التحية
ايوة نعم رئيس للهلال و بعلم ادارة الاتحاد يعنى خربانة من كبارها
بس المحيرنى الزول دا ما عنده اى احساس واحد الكاف يصدر قرار بايقافه عن العمل لسوء السلوك يجى بى كل قوة عين يقول دا قرار افريقى
و دا معناه انه فى السودان اى سوء سلوك مقبول و حاجة عادية مش قلت ليك خربانة من كبارها
و المشكلة التانية اذا كان قاعد يقدم للهلال حاجة فيها الفائدة يمكن كان الناس تنسى ليه شوية
لكن هو حتى فى داخل مؤسسة الهلال لا يقدم الا امثال تورية و اتوبونج
و الله مشكلتنا مشكلة و الورطة الدخلنا فيها دى يحلنا منها رب العالمين
و رحم الله الهلال بعد ان اصبح ضيعة فى ايدى البرير و الكارورى و معاونيهم
|
Post: #8
Title: Re: سؤال ... هل البرير مازال رئيساً للهلال ؟؟؟
Author: أسامه الكرور
Date: 12-10-2011, 06:24 PM
Parent: #7
الأخوه محمد البشرى .. على محمد خير .. حيدر بشير
شكراً للمرور والتعليق
نحن متفقون تماماً
بس الحيره مازالت .. وأظنكم تحتارون معى
هل وجود البرير على رئاسة النادى حتى الآن قانونى
وهل هم فى إنتظار نتجة الإستئناف ؟؟؟
والهلال مشارك فى البطوله الأفريقيه
إذا تجاوزنا محلياً .. هل يستطيع البرير مخاطبة الإتحاد الأفريقى بوصفه رئيساً للهلال ؟؟؟
وأخيراً .. أليس فى نادى الهلال رجلٌ عاقل يتكلم بصوتٍ مسموع ؟؟؟
|
Post: #9
Title: Re: سؤال ... هل البرير مازال رئيساً للهلال ؟؟؟
Author: على محمد الخير
Date: 12-10-2011, 10:13 PM
Parent: #8
ونحن محتارين معاك ... بل اشد حيرة  ...؟؟
|
|