الهلالاب و المريخاب (العقلاء فقط) ...

يعني عاجبكن الحاصل دا ؟
البدايات المتشابهة تقود لنفس النهايات , هاهو الموسم بدا يشبه سابقه و اللي سبقه و ... إلخ
لا تغيير لا معالجة لمشاكل المواسم السابقة
لا مجالس ادارات تدير بطرق سليمة و علمية
لا مصادر دخل معروفة وواضحة لا تسويق تجاري لإسم وعلامات الناديين
لا مدارس سنية لا ناشئين
لا تسجيلات بطريقة فنية بل سماسرة و صحفيين واصحاب مصالح
نفس الضلال القديم و العوة و التنافس في الفارغة وعلى صفحات الجرائد و انتصارات زائفة لا معنى لها
اداريين مؤهلاتن جيوبهم و القدرة على اطعام افواه جيوش المطبلاتية و الصحفيين المبارينهن

الجمهور البتعد بالملايين دوره وين في اختيار مجالس الادارات؟
ودوره وين في المساهمة المالية في تسيير امور الناديين وخصوصا ان الصرف بلغ ارقام فلكية
عشان ما يتحكم في النادي من لايملك سوى المال ولا شيئ غيره
لا بصيرة لا خبرة لا قدرات ادارية واحيانا لا اخلاق حتى

على الرغم من اهمية العوامل التانية من لاعبين واجهزة فنية و صحافة و اتحادات و غيرو وغيرو
تبقى الادارات هي العامل الرئيسي في نجاح او فشل النادي
الادارة السليمة الواعية هي التي تعمل بنجاح على توفير و تطويع العوامل الاخرى لمصلحة النادي
و العكس ايضا

ازمة انديتنا تبدأ من الادارات و ما بقصد كاسماء فقط بل كنظام
غض النظر عن من هو الرئيس و نايبه و السكرتير السؤال عن كيف تم انتخابه ؟
و ماهي اللوائح الحيعمل بيها؟
وكيف تتم محاسبته اذا اخفق ؟
وكيف تتوفر ليه الميزانية وكيف تتم محاسبته عليها نهاية دورته ؟
و
و
و
و .. إلخ

يا عمك كلامك ده لا ينطبق على المريخ العظيم ..

مريخابي مجنون

يازول الموسم الفات نحنا
جايبين العلامة الكاملة
كلامك دا قولوا لناس البنيه .


مريخابي
زي الزول الفوق دا.

Quote: كلامك دا قولوا لناس البنيه .

Quote: مريخابي زي الزول الفوق دا.

مريخابى
زى الزول فوق الفوق دا.

غايتو نحنا من العقلاء ..
لم يكن في السابق وجه للشبه بين المريخ والهلال ولن يكون لاحقاً ..
والما بتلحقو جدعو ..
لكن يا ود البشرى بي البوست دا انت قاصد المريخ ولا الهلال ..؟؟؟

انت يا ود البشرى ما سمعت بي شركة المريخ ..
وقرارات الفيفا الجديدة ..
عليك الله يا ود البشرى الطفى النور منووووو..؟؟؟

يا ود البشري

سلام الله عليك

الجماعة التلاتة التحتك ديل نادي ليهم طلحة

يا شباب انا ما كاتب البوست دا كمقارنة بين الهلال و المريخ
لكن ...
كدي جاوبوني على الاسئلة التالية:
ما هي مصادر دخل المريخ - غير جيب جمال الوالي
رايكن في موضوع الحضري و حكاية العقد الصوري و مسالة انو يقيف شهرين ويجي على الملعب طوالي
رايكن في اغلب تسجيلات المحترفين هل تمت برؤية فنية - الثلاثي التونسي مثالا
الانسحاب من كاس السودان شنو مبرراتو و هل مقتنعين بيهن
هل يوجد حاليا في المريخ -ادارة و جماهير و اجهزة فنية و صحافة من يقجدر على قولة لأ و دا غلط لجمال الوالي
مسالة كل سنة بجهاز فني شكل و احيانا جهازين تلاتة في نفس السنة هل دا يدل على ادارة سلبمة



عموما الموضوع ليس للمقارنة زي ماقلت و طالما شايفين مريخكن تمام التمام و ماشي كويس
سمح مبروك عليكن
ادونا خاتركن وكدا

سلامات...كلام سليم ياود البشري

كل سنة يتكرر نفس السيناريو

صرف مليارات في لاعبين لا يسووا ملاليم...

لا يوجد منهج مدروس...عشوائية كاملة

هذا ما كان من امر الهلال

أما المريخ فإنهم علي ظل الهلال هم سائرون

يتبعون أفكار و مدربي ولاعبي الهلال ..بل حتي ومن هم في غرفة تسجيلات الهلال لن يفلتوا منهم بإستخدام سلاح المال البغيض...وكأنما أفكار ورؤية الهلال هي الصحيحة,,,لذا لا يتقدم الهلال ولا ظله المريخ


خارج الخط: تعجبت جدا لاحتفال المريخ بالممتاز...وكأنما خصلوا علي كاس افريقيا( مش طلعوا من التمهيدي )

Quote: غايتو نحنا من العقلاء .. لم يكن في السابق وجه للشبه بين المريخ والهلال ولن يكون لاحقاً .. والما بتلحقو جدعو .. لكن يا ود البشرى بي البوست دا انت قاصد المريخ ولا الهلال ..؟؟؟

سؤال للأخ يوسف الدفينة بخصوص الما بتلحقوا جدّعوا ...
والسؤال بخصوص الإدارة طبعاً ...

السؤال هو:
أين المستندات التي تؤكّد استلام عصام الحضري لمستحقاته ؟



ـــــــــــ
قلت لي شنو ما بتلحقوا وشنو كدة جدّعوا ... غايتو الاختشوا ماتوا !!!

الاخ ود البشرى و ضيوفه لكم التحية

مشكلتنا تبدأ من راس الهرم الاتحاد و الذى لا يعمل بصورة ممنهجة و مدروسة و تغيب عنهم روح الانضباط يعنى كل ماشى بالبركة

اما الاداريين فحدث و لا حرج و غايتو اهو مكان للشهرة و تسهيل اعمالهم و من خلفهم مجموعة من السماسرة همهم ملى الجيوب

اما اخوانا الوصيفاب و القالوا نحن ماشين صاح فهم اصحاب المقولة المشهورة الكاش يقلل النقاش و هم من ادخلوا هذه الثقافة الى رياضتنا

فزاودوا على وارغو من الاهلى القاهرى و الذى رفض ان يزيد على نصف مليون ليدفعوا له ما يقارب التلاتة مليون

و أظنهم قد دفعوا للدافى راتب سنة كاملة و هو خارج السودان فقط حتى لا يسجله الهلال

و دفعوا للحضرى راتب 10000 فى الشهر مع انه عقدهم 5000 دولار و بعد دا بدون ايصالات و هم ماشين صاح

و الامثلة كثيرة و فى كل مرة نشوفهم طايرين من الادوار التمهيدية بعد ما يدفعوا دم قلبهم

العزيز ود البشرى تحاياي

من غير فلسفة ولا تنظير من غير مؤسسية ما بنمشي لي قدام والمؤسسية دايرة ممارسة والممارسة فهم صعب لكنو ما مستحيل بس الفيلم كلو كيف الناس تبدا تحاول؟ اولا بالتبادي واهم حاجة الواقعية يعني معرفة قدر النفس وبعد داك الناس تمشي لي قدام وبرغم انوالحل ساهل لكنو مستحيل بي الفهم القدامك ده

هلا بالشباب العقلاء منهم و الـ .. تانيين
دكتور ياسر المشكلة ليست في المال في حد ذاته
المصيبة ان صاحب المال وبما انه بدفع فبشوف انه الكلمة الأولى والاخيرة يجب ان تكون عنده في البفهم و المابفهم فيه
ومن حوله لا يجرؤوا على قولة لأ إما خوفا او طمعا
و الأمثلة في الناديين كتيرة
وللامانة طالما صاحب المال يدفع فما في البقدر يقول ليه راسك وين
يجب ان تستقل الاندية ماليا و تعتمد على مواردها الذاتية
و تكون الادارة محترفة و محاسبة وتترك الأمور الفنية للمختصين و كذلك الشؤون القانونية و المالية وسائر متطلبات تسيير العمل يجب ان تترك للمختصين
ألا يبعث على الأسى منظر البرير و هو بحلف اللاعبين؟ أو منظره مع المحترف الكاميروني في العربية
هل دا عمل اداري محترف و محترم
هل طريقة تعاقدات الوالي مع الحضري و البدري وغيرهن بها ذرة من الاحترافية او الفهم الاداري
شكوى المريخ على الهلال في سادومبا وكابوندي هل من قدمها يفقه مقدر ذرة في اللوائح
أخخخ يا دكتور اقول ليك شنو ولا شنو
وجع القلب كتير

يا حيدر صدقت والله اذا هي خربانة من كبارها
الاتحاد الجهة المناط يها صياغة اللوائح و اجازتها من الجمعية العمومية تقوم بتكسيرها و تجاوزها قبل الآخرين
بمثابة رب البيت ضارب الدف للأندية فليهم حق اللرقصوا

اشرف علي اليمين كلامك ياهو زاتو الدايراقولو وما عارف اصيغوا كيف الله يفتحها عليك
المؤسسية نعم و صاح صعبة لكن ما مستحيلة
لكن لابد منها كان دايرين نمش لاقدام


دفينة

Quote: انت يا ود البشرى ما سمعت بي شركة المريخ .. وقرارات الفيفا الجديدة .. عليك الله يا ود البشرى الطفى النور منووووو..؟؟؟

كدي شكلك عايز تقول ليك حاجة فيها فايدة اخيرا
اها نورنا الله ينور عليك بحكاية شركة المريخ - اي تفاصيل ؟ المساهمة كيف و منو ممكن يساهم ومجلس الادارة ح يتكون كيف ... إلخ
وان شا الله تكون خطوة ع الطريق الصحيح

صديق صالح ياخوي اي جزء من عبارة "العقلاء فقط" ما وقع ليك ؟

قوم لف بلا هلال معاك ...



مريخابي شايف المريخ ده احسن من برشلونة لوماسوء الحظ ..

Quote: عشان ما يتحكم في النادي من لايملك سوى المال ولا شيئ غيره لا بصيرة لا خبرة لا قدرات ادارية واحيانا لا اخلاق حتى

الزميل ود البشرى ... مع الأسف ما أوردته في الكود أعلاه هي حقيقه لن نستطيع تجاوزها .. الآن إتحاد الكرة سيطبق دوري المحترفين الموسم القادم
وهذا يعني نقلة كبرى في مفاهيم إدارة الأندية الرياضية وصناعة كرة القدم .. وبموجب لائحة الفيفا ستصبح هذه الأندية عبارة عن شركات مساهمة عامة أو خاصة وهذا يتطلب إداريين متخصصين في أندية المحترفين وإيضآ سيتطلب تغيير النظم المحاسبية لهذه الأندية.. وإعادة تقييم أصول الأندية الثابتة و المنقولة وإيضآ لابد من حصر العائد المالي ك Revenue يوضح دخل النادي السنوي حيث مطلوب أقرب ثلاثة ميزانيات قبل أن تطبع سندات الأسهم وطرحها للشراء وهذه الميزانيات ستحدد قوة الأسهم وأسعارها .. بموجب تلك اللائحة سيصبح اللاعب مجرد موظف في ناديه .. آمل أن يكون هنالك الكادر الإداري المتخصص في إندية المحترفين وبالعدم مطلوب إبتعاث إداريين لتلقي كورسات في إدارة الأندية حيث تةجد أكاديميات في إنجلترا وألمانيا وأميركا. ولك الشكر لهذا الطرح الضافي.

يا عادل والله قريت كلامك عن المتطلبات للفيفا دي حكاية صعبة جدا بواقعنا الحالي
و المشكلة الكبيرة في بقية الاندية اهو كدا كدا الهلال و المريخ ممكن يدبروا حالهن بشكل او بآخر
اما حكاية ابتعاث كوادر ادارية للتدريب فدي اقرب للخيال
لكن للاسف دا الطريق الوحيد ولا بديل له لو شئنا ان يكون لنا اندية محترمة بمعايير الكاف
آن الأوان للناس تقيف وقفة جادة تو ستارت أوفر بطريقة صحيحة


ود القاضي قلت لي احسن من برشلونة !!!
تعرف انت تعتبر الجمهور المثالي لإداريي هلال مريخ و جوقتهم من المطبلاتية و الصحفيين

عادل يا صديق سلامات

Quote: وإعادة تقييم أصول الأندية الثابتة و المنقولة وإيضآ لابد من حصر العائد المالي ك Revenue يوضح دخل النادي السنوي حيث مطلوب أقرب ثلاثة ميزانيات

والله يا عادل يا أخوي مع قصة الدفع شي فوق التربيزة وشي تحت التربيزة...وشي بإيصالات وشي بدون..غايتو الميزانية دي إلا تكتبها ليك وداعية...لانو الزول البيدفع دا ذاتو لو بيراجع الميزانية دي ما كان دفع قرش واحد للاعب ما بيستاهل....لكن لانو المنابع غير واضحة...يبقي من الطبيعي عدم السيطرة علي الميزانية ولذلك تطير الطيور بأرزاقها كل عام...ورزق المجانين.....

تحياتي

Quote: والله يا عادل يا أخوي مع قصة الدفع شي فوق التربيزة وشي تحت التربيزة...وشي بإيصالات وشي بدون..غايتو الميزانية دي إلا تكتبها ليك وداعية...لانو الزول البيدفع دا ذاتو لو بيراجع الميزانية دي ما كان دفع قرش واحد للاعب ما بيستاهل....لكن لانو المنابع غير واضحة...يبقي من الطبيعي عدم السيطرة علي الميزانية ولذلك تطير الطيور بأرزاقها كل عام...ورزق المجانين.....

العزيز الفاضل د ياسر ..
نعم لابد من التحضير لثلاث ميزانيات لطرح أسهم الأندية وهذه الفترة المالية الزمنية أستقيتها بحسب قواعد المحاسبة العربية .. أما بحسب قواعد المحاسبة الأمريكية فالمطلوب ميزانية خمس سنوات حتى يمكنك طرح الأسهم للبورصات .. !! أما إذا كان هنالك أية خلل محاسبي يتعلل به البعض فأن القانون يتطلب إبراز هذه الميزانيات حتى تتمكن من طرح الأسهم. ودمت

Quote: يا عادل والله قريت كلامك عن المتطلبات للفيفا دي حكاية صعبة جدا بواقعنا الحالي و المشكلة الكبيرة في بقية الاندية اهو كدا كدا الهلال و المريخ ممكن يدبروا حالهن بشكل او بآخر اما حكاية ابتعاث كوادر ادارية للتدريب فدي اقرب للخيال لكن للاسف دا الطريق الوحيد ولا بديل له لو شئنا ان يكون لنا اندية محترمة بمعايير الكاف آن الأوان للناس تقيف وقفة جادة تو ستارت أوفر بطريقة صحيحة

الزميل الفاضل ود البشرى
طالما إختار الإتحاد العام السوداني لكرة القدم تطبيق لائحة المحترفين على دوري كرة القدم فهذا القرار يضعه على مفهوم تعريف قاعدة أل amatur and non- amatur وهي القاعدة التي تفتقت ذهنية مخططي نشاط كرة القدم في السودان حيث يعتبر لاعبي الأندية الكبرى خليط مشترك لهذه القاعدة والتي أصبح اللاعبون فيها مقسمون ما بين هواة و محترفين .. فيصبح بموجب هذه القاعدة لنأخذ نادي الهلال مثلا لاعبون هواة يلعبون بجانب لا عبين محترفين يلعبون لنفس النادي ولكن يتميز أللاعب المحترف بمخصصات مادية أعلى و بعقودات تضمن له حقوقه المادية بجانب التأمين الصحي و المرتب الكبير و السكن بينما يظل اللاعب الهاوي في نفس النادي محرومآ من هذه المزايا لأنه لاعبآ غير محترف ! ربما يفوق أداءه ونجوميته أداء زميله المحترف وتبقى حقوقه المادية رهينة بعطائه في الملاعب كعطية مزين بتشديد الياء.
ففي لائحة الفيفا للهواة غير المحترفين تحدد ألا يتقاضى اللاعبين الهواة إية مقابل مادي تجاه ممارستهم لرياضة كرة القدم! ولكن هل تستقيم هذه القاعدة في أنديتنا ذات القاعدة الجماهيرية الكبيرة بأن يتقاضى اللاعبين المحترفين حقوقهم المادية كاملة بينما يحرم منها الهواة! حسب قواعد الفيفا ..!! وبالمناسبة لقد أثبت اللاعبون الهواة في أنديتنا الرياضية أنهم الأفضل أداءآ من المحترفين.

???

غايتو يا ود البشرى بي طرحك للموضوع دا
يكفي انك تكون هلالابي

كما يكفي انو يوسف الدفينة مريخابي ومن لف لفه
وكويس انهم شايفين المريخ كدا كويس شديد
الواضح انو الحفلة بتاعت انصاف مدني عجبتم شدييد والاحتفال بالممتاز
ونسوا وتناسوا خروجهم المذل لهم وللسودان من الدوري التمهيدي بتاع ابطال افريقيا
وخروج هلال الملايين من دور الأربعة افرحهم لدرجة أنهم نسوا خروجهم من المولد بدون حمص
كاس الممتاز دا خليهم يشيلوهو

معلق مباراة القمة قال الهلال والمريخ اتلاقوا 30 مرة في الممتاز
قال الهلال فاز 15 مرة والمريخ فاز 6 مرات واتعادلو في الباقي
نحن حا نصبر عليهم تاني كم سنة عشان يحصلوا الرقم دا
هو باقيلك حا يحصلوهو - الله أعلم

الصادق

Quote: سؤال للأخ يوسف الدفينة بخصوص الما بتلحقوا جدّعوا ... والسؤال بخصوص الإدارة طبعاً ... السؤال هو: أين المستندات التي تؤكّد استلام عصام الحضري لمستحقاته ؟ ـــــــــــ قلت لي شنو ما بتلحقوا وشنو كدة جدّعوا ... غايتو الاختشوا ماتوا !!!

كدي يا صبري طه ادينا مستندات مستحقات لاعبي الهلال الهلال بالعملة المحلية هيثم مصطفى الذي قال لاعبي الهلال قاعوا ثم مستندات الدعيع ثم مستندات يوسف محمد ثم مستندات من هددوا بشكوى الهلال للفيفا ..؟؟
بعدين اضيف ليهم مستندات الفنادق التي اشتكت الهلال وجزت دخل مبارياته ..؟؟
بعد هذا تعال يا صبري طه اسأل عن ناس ومستندات العملة الصعبة واعتقد بان هذا شعراً ما عندك ليهو رأس لان الوالي كفى ناس البيت وبادر بدعم الجيران كمبادرة لحسن النوايا ...

ودالبشري
عشان نفتك من النقه الكتيره اقترح ان الوالي يشتري المريخ ويبقي زي ابراهموفتيش بتاع تشيلسي
يعمل اي حاجه ومحدش يقدر يكلمو
فدياس
هلالابي عاقل لحدي ما يبداء التنافس الافريقي

في زول عاقل يا ود البشري
ممكن يشجع هلال - مريخ !!!





....
بوست جميل لكن مين يسمع ؟؟

سلامات ود البشرى
إن شاء الله بسط

Quote: الجمهور البتعد بالملايين دوره وين في اختيار مجالس الادارات؟

سؤال وجيه
في الغالب يقتصر دوره على التشجيع بتعصب
والإنقياد وراء خارطة طريق رسمتها له صحف أكثر تعصبا ...





إحتراماتي
مريخابي شبه عاقل

Quote: كدي يا صبري طه ادينا مستندات مستحقات لاعبي الهلال الهلال بالعملة المحلية هيثم مصطفى الذي قال لاعبي الهلال قاعوا ثم مستندات الدعيع ثم مستندات يوسف محمد ثم مستندات من هددوا بشكوى الهلال للفيفا ..؟؟ بعدين اضيف ليهم مستندات الفنادق التي اشتكت الهلال وجزت دخل مبارياته ..؟؟ بعد هذا تعال يا صبري طه اسأل عن ناس ومستندات العملة الصعبة واعتقد بان هذا شعراً ما عندك ليهو رأس لان الوالي كفى ناس البيت وبادر بدعم الجيران كمبادرة لحسن النوايا ...

يا سلام ياخ ... طيّب شايفني جيت داخل البوست وإتجدّعت للناس بإدارة الهلال ولاّ الفهم شنو ؟

إدارتنا سجمانة ورمدانة ومعترف برأيي الصريح ...

إنت بتقدر تعترف ولاّ شارعك اتجاه واحد دة ما عندك ليهو مجال لإخفاقات إدارة المريخ ؟!

Quote: يعني عاجبكن الحاصل دا ؟ البدايات المتشابهة تقود لنفس النهايات , هاهو الموسم بدا يشبه سابقه و اللي سبقه و ... إلخ لا تغيير لا معالجة لمشاكل المواسم السابقة لا مجالس ادارات تدير بطرق سليمة و علمية لا مصادر دخل معروفة وواضحة لا تسويق تجاري لإسم وعلامات الناديين لا مدارس سنية لا ناشئين لا تسجيلات بطريقة فنية بل سماسرة و صحفيين واصحاب مصالح نفس الضلال القديم و العوة و التنافس في الفارغة وعلى صفحات الجرائد و انتصارات زائفة لا معنى لها اداريين مؤهلاتن جيوبهم و القدرة على اطعام افواه جيوش المطبلاتية و الصحفيين المبارينهن الجمهور البتعد بالملايين دوره وين في اختيار مجالس الادارات؟ ودوره وين في المساهمة المالية في تسيير امور الناديين وخصوصا ان الصرف بلغ ارقام فلكية عشان ما يتحكم في النادي من لايملك سوى المال ولا شيئ غيره لا بصيرة لا خبرة لا قدرات ادارية واحيانا لا اخلاق حتى على الرغم من اهمية العوامل التانية من لاعبين واجهزة فنية و صحافة و اتحادات و غيرو وغيرو تبقى الادارات هي العامل الرئيسي في نجاح او فشل النادي الادارة السليمة الواعية هي التي تعمل بنجاح على توفير و تطويع العوامل الاخرى لمصلحة النادي و العكس ايضا ازمة انديتنا تبدأ من الادارات و ما بقصد كاسماء فقط بل كنظام غض النظر عن من هو الرئيس و نايبه و السكرتير السؤال عن كيف تم انتخابه ؟ و ماهي اللوائح الحيعمل بيها؟ وكيف تتم محاسبته اذا اخفق ؟ وكيف تتوفر ليه الميزانية وكيف تتم محاسبته عليها نهاية دورته ؟ و و و و .. إلخ

كلام سليم 100%

التوقيع : عمر عثمان مريخابي من عصر ماقبل جمال الوالي