هل هكذا وصل الحال بـ بعض السودانيين فى السعودية ( تفوو على كده )

تفووو على كده حكومة اهانت السودانى و خلت اللى ما يسوى يضحك علينا

موضوع عادي يامحمد الامين
إنت غايظك التعليقات اسفل الفيديو !!!


والحكومة علاقتها شنو في الكلام ده؟

الاغتراب ده من ماقمنا موجود



انت عايز الناس كلها تكون تمام ؛عشان ما يجرحو شعورك؟

بطّل حركات المثقفين دي؛والراجل ده راعي ابل ويجاهد ويجابد
عشان يعيش وليداتو
وجاي تتفتف عليهو !!!

Quote: موضوع عادي يامحمد الامين إنت غايظك التعليقات اسفل الفيديو !!! والحكومة علاقتها شنو في الكلام ده؟ الاغتراب ده من ماقمنا موجود انت عايز الناس كلها تكون تمام ؛عشان ما يجرحو شعورك؟ بطّل حركات المثقفين دي؛والراجل ده راعي ابل ويجاهد ويجابد عشان يعيش وليداتو وجاي تتفتف عليهو !!!

عادى ؟؟؟؟ عادى يا بشير احمد ؟؟؟

عادى تشوف ابوك فى المنظر ده ، ينزل على راسو بعر الدواب و تقول لى عادى

التعليقات اسفل الفيديو تعبر عن اصحابها ، و ديل انا ما لى علاقة بيهم

علاقتى بالسودانى (العادى ) عندك ده و بالشخص الصورو

الاغتراب زمان ما زى اغتراب ، اسه

المغترب زمان كان بيطلع بتحنيس من بلدو ، اسه المغترب بيحنس عشان يطلع من بلدو ( عرفت دخل الحكومة ولا لسه )

راعى ، راعى مافى مشكلة ، و الرعاة ساس و راس

لكن الـ فى الفيديو ده ما عادى ، ابدا ما عادى

الراجل ده اتبهل بيهو عشان محتاج ، لو ما حكومة الزفت دى جوعتو ، كان لم شنطتو و رجع بـ كرامتو على وليداتو

و حاسب من البعر ما ينزل على راسك .. و عيب انك تقول عادى

أبداً ما عادى, وما طبيعى كمان.
هل هو أمر عادى أن يصير السودانى مضحكة
لضعاف العقول من الأعراب مثلاً؟؟!!!

المصيبة مش في الحاصل في خارج البلاد ولكن المصيبة أنهم أخذو ويأخذون كل المشاريع والخوف من أن يحصل في الداخل ما نراه في الخارج ونكون خدما في أرضنا....
ربنا يسترنا من الجايات

Quote: الراجل ده اتبهل بيهو عشان محتاج ، لو ما حكومة الزفت دى جوعتو ، كان لم شنطتو و رجع بـ كرامتو على وليداتو و حاسب من البعر ما ينزل على راسك .. و عيب انك تقول عادى

سلامات يا محمد الأمين..


الراجل دا ما هبلو بيهو!! بتخيل لي من يومو أهبل ودي طبيعة الناس فيهم النجيض والعوير

لأنو ببساطة هو الوداهو يخش تحت الجمل شنو؟

حكاية إنو محتاج دي ما جايبة حقها لأنو ما بتخيل لي لو ما عمل الحركة دي السعودي ح يطردو من الشغل..

ولو إفترضنا ح يطردوهو, مش أحسن ليهو يرجع السودان ويتهان هناك رغم إنو الإهانة مرفوضة في أي مكان

لكن إهانة في البلد أحسن ليهو من إهانة العرب البدو ديل...

وبرضو عاااااااادي...

تحياتي
رضوان

الزول ده رضى المهانة والمذلة لي روحو
ومش ده وبس في كم فيديو في اليوتيوب على نفس الشاكلة
والعربشن ديل لو انت محترم نفسك بحترموك أو ما بتعدوا عليك
والمثل بيقول: لو ما وطيت راسك ما كان في زول ركب فوقو

افتكر ممكن الناس تأخذها في سياق عشرة وتواصل متكامل بين هذا السوداني وهولاء الاعراب

ربما تكون العشرة طويلة وطيبة ومرفوعة فيها الكلف للدرجة الممكن هو - اي السوداني - بسوى فيهم اكتر من كدا

صحيح لو اخذت في اطارها الحالي فقط يمكن ان تفسر تهبيل بهذا الرجل البسيط وانتقاص لكرامة اى سوداني

لكم وافر احترامي

دعنى اختلف معاك اخى الكريم الانسان كرامته يجب ان يحافظ عليها حتى لو كان فى بلدو
لا علاقه للحكومات بالتصرفات الشخصيه دا زول امكن اخذ الامر بحسن نيه بس فهو مسئول
من تصرفه بالتاكيد لو حسبها صاح كان رفع اسهمنا

ده برضو على نفس الشاكلة
الظاهر أهلنا ديل بتعاملوا بعفوية زايدة
والبدو الطير ديل ما بيصدقوا يصوروهم ويضحكوا بيهم

يعني انت موجعك البعر النزل في راس الزول ده!!!
اهو نحنا بنعجن البعر ده بيدنا عشان نصرر بيهو الغنم
والنياق
الزول ده مافي شخص جبرو عشان يعمل الحاجة دي
وتفتكر لو ماعمل الحاجة دي ح يقولوا ليهو خلاص امشي اهلك؟

مجال عملي بيطري وشفت حاجات كتيرة من السودانيين الشغاليين في مجال
الابل ومؤجرين الابل دي عشان يبيعوا لبنها وماعندهم علاقة بكفلاهم

وتلقاهم شغالين بيكنسوا في الزبالة دي؛وفي نهاية اليوم بيستحموا
وبغيروا ملابسهم والسعوديين بجو يقعدوا معاهم وبياكلوا معاهم العصيدة بملاح
الروب
وسمن علي عسل .

استجابة لطلب اخونا/الطيب عبدالرحيم خلف الله
تم سحب الفيديو...

_________

العايز اقوله كما تفضلت اخي الطيب
الناس ديل تعاملوا بعفوية بدون ضغط من شخص اخر؛


والمثقفين هنا خايفين علي مشاعرهم الرقيقة ...
التعامل بواقعية وشفافية بيكون مريح دون دفن الرؤوس في الرمال.

تحياتي أخي محمد الأمين

أسمح لي بأن أقارن ما جرى لزولنا في الفيديو الذي كان مصدر إمتعاض وفشل للبعض وزعل للكثيرين ، أقارنه بما يوجد في هذا المنبر الجامع، أنماط من البشر وفي كل الإتجاهات.

في تقديري أن زولك كان عفوي جداً في مسرحية المفتاح وهو لم ولن يندم على تصرفه بل العكس تماماً تجده مبوسط ستين قيراط إذ روح عن نفسه وعلى من حوله ولا يخالجني الشك بتاتاً في أن الكومبارس الذين حوله كانوا يتناوبون معه الدور في البحث عن المفتاح.. فلا غبار..،

أخونا المصور في الفيديو الذي أتي به الأخ محمد جلال، ده بقى أبو العفوية ذاتها وكان يتصرف بسجيته الفطرية مع إخوته السودانيين من حوله بدليل أن أحدهم كان يناديه : "تعال قرب قرب يا إبن الخال" ، بلكنة أهلنا الرشيدة في شرق السودان، كانوا في (ساعة سمر) وكان هذا نصيب صاحبنا المؤدي في الفيديو.. ولا غبار،

أما الفيديو الآخرالذي شارك به أخونا بشير أحمد، فقد أخذ فيه صاحبنا الغاضب من صديقه اليمني على حين غرة وصور دون إرادته بدليل أنه لم يكن يتلفظ بما تلفظ به، لو كان يعلم بأنه يجري تصويره من الشخص السيء الذي صوره وسوئته تمثلت في نشر المادة!

جميعنا يحسن الظن بأخونا بشير أحمد الذي لم ينتبه جيداً لبعض الكلمات التي خرجت من غضب المتحدث في الفيديو (تحت الغضب) ..
أمل وبكل طيب خاطر من أخي بشير أحمد أن يراجع هذه المادة، وارجوه بإسم جميع من يدخل على هذا البوست (الجاذب عنوانه) أن يمسح هذا الفيديو من مشاركته وإستبداله بآخر، والأمثلة كثيرة ومتوفرة في هذا الهواء الطلق ليختار،

تحياتي،،

شكرا لمروركم جميعا ، سوف اعود للرد ان شاء الله