Post: #1
Title: منظر مخجل في خطاب عبد الجليل في دار المؤتمر الوطني
Author: محمد جلال عبدالله
Date: 11-25-2011, 05:38 PM
الراجل بيلقي في الخطاب وكل لحظة والتانية الجماعة بقاطعوهو تكبير وتهليل
دي ما القصة ... الراجل قال ليهم حنديكم إقامات وحيكون في تعاون اقتصادي
وحيكون في قنصلية سودانية محترمة في الكفرة وبنغازي بالإضافة للسفارة في طرابلس
قام واحد من الكيزان وبهستيرية
تكبييييير ... والجماعة يكبروا
تهليييييييييييل .. والجماعة يهللوا
الزول ده من حماستو لمن أكمامه نزلت وبانت ضراعاتو
وعبد الجليل سكت شوية بسبب الموج الهادر من التكبير والتهليل
هسي الزول ده يقول عننا شنو بالله؟
يقول جيعانين أول ما جبنا ليهم سيرة الكشكوش قاموا ما صدقوا؟؟!!
بعدين الغنية دي والرقيص بعد خطاب عبد الجليل وقبل خطاب البشير برضو مافي داعي ليها!!!
ياخواننا الناس دي ما عندها بروتوكول ولا في زول يعلمها البروتوكول؟؟
والحفل ده مشهود وفيه سفراء أجانب ومنقول على الهواء!!!
|
Post: #2
Title: Re: منظر مخجل في خطاب عبد الجليل في دار المؤتمر الوطني
Author: بلدى يا حبوب
Date: 11-25-2011, 05:59 PM
Parent: #1
الاخ / محمد
Quote: عدين الغنية دي والرقيص بعد خطاب عبد الجليل وقبل خطاب البشير برضو مافي داعي ليها!!!
ياخواننا الناس دي ما عندها بروتوكول ولا في زول يعلمها البروتوكول؟؟
والحفل ده مشهود وفيه سفراء أجانب ومنقول على الهواء!!! |
انت ناسى المؤتمر فى النادى الكاثلويكى سابقا و ( المؤتمر الوطنى حاليا ) يعنى اصلو محل رقيص
تحياتى
|
Post: #3
Title: Re: منظر مخجل في خطاب عبد الجليل في دار المؤتمر الوطني
Author: محمد عمر الفكي
Date: 11-25-2011, 07:05 PM
Parent: #2
الاخ محمد تحية طيبة
انتوا اي حاجة لازم تبركلوها، العفوية دي ما سمعتوا بيها، ناسنا ديل والله العظيم لو لموا في بقرة بني اسرائيل كان باعوها وفي ناقة صالح لاكلوا كبدتها وفي عجل السامري لصهروه وباعوا ذهبه والعجب لو لموا في خروف سيدنا ابراهيم ، والله كل سنة الابو يجر ليهو واحد من اولاده ويضحي بيهو
|
Post: #4
Title: Re: منظر مخجل في خطاب عبد الجليل في دار المؤتمر الوطني
Author: SAMIR IBRAHIM
Date: 11-25-2011, 07:50 PM
Parent: #3
والله مفروض يخجل عبد الجليل .. بالله قول ليهو ما حرام عليك تحرم الديمقراطية علينا وتحللها علي نفسكم في ليبيا ... الراجل ده ممثل لحكومة انتقالية لشعب انتفض ضد الديكاتوريات والحكم العسكري ويجي بقوة عين يجلس مع حكومة عسكريه والشعب السوداني بيعتبرها حكومة ديكاتاورية .
تخريمه: يا ممثلي شعب ليبيا المنتفض علي الديكاتورية هل الحرية حلال عليكم وحرام علي ابناء السودان ؟؟
|
|