ليلة السبت ( امسية شعرية غنائية ) السبت وكل سبت ببيت الفنون

السبت وكل سبت نحلق سويا وفي مسرح بيت الفنون بأمسية ( ليلة السبت ) وفيها :


اصوات غنائية شابة ومبدعين في نظم الكلمة شعرا ...

ليلة السبت امسية تتنوع فيها الفنون ..

وفيها ايضا نقدم السبت .

اهلا بكم في بيت الفنون ..










______________________________
بيت الفنون بالخرطوم بحري شارع الانقاذ مقابل الكرين

السبت وكل سبت

كم اتمنى ان اصل الخرطوم لانتظم معكم في برامجكم الهادفة

ليوفقكم الله في مسعاكم ...

صلاح غريبة - الرياض

لفيف من الشعراء وعشاق الشعر على موعد اليوم السبت مساءا مع الامسية الشعرية ....



اهلا بكم

تتخلل الامسية اغاني للفنان ياسر مبيوع

تقود الامسية الشاعرة نضال حسن الحاج

وقد كانت امسية الامس من اروع الامسيات وجادت لنا الشاعرة نضال بقصيدتها ( انا بكرهك )


انا بكرهك
بس بكرهك..!
انا بكره اليوم الصنع قلبا يكورك ويندهك
انا بكره الوطن البلم شرف الغرام المنتهك
من ياتو باب طليت علي ما كنت اصلا بشبهك
انا بكرهك
انا شلت ريدك في القليب وسقيتو من دم العروق
صنقعت دليت النجم دنقرت كبيت نور وشوق
وعصرت موية الانتظار ختيتا في وجع الحروق
وكان النتيجة تبيع هوي هو اريتو كان سويتلو سوق
انا بكرهك
من وين اجيب ليك الدموع
من وين اصنقر حيل كلام كان امنيات قلبو الرجوع
من وين اذا هتك الضلام حيل خيلي القالك شموع
لكني مجبور اطردك واقفل وراك باب الضلوع
شديت رحالاتي ومشيت وكتين هتك حيلك هواي
ارتحت في موجي ورسيت
لا حرك الموج البحر
لا صد فلبي ولا قسيت لكن طلعت خيال عشم
ضمخ رؤى الوجع المميت
انا بكرهك
قدر اشتهاي
انا بكرهك
قدر الغرام الكان زمان كابت مساماتي وهواي
انا بكرهك
قدر اني ما لودت بيك كريات شراييني ودماي
انا بكرهك
قدر اني غنيتك غناي
من وين دخلت علي مدن شاخت من الوجع الاليم
من وين طرقت جدار قلب لقح هوى العشق العقيم
من وين سخت شمسك علي
كانت سماي مليانة غيم
فتق جراحــاتي
فتق جراحاتي وامش
خليني في لهب الجحيم
انا قلت ليك..
انا بكرهك
قدر المواسم الشادة خيل الريد عليك
انا بكرهك
قدر المصائب الحارسة بوابات مجيك
انا بكرهك
نفس المساحة وحجم قلبي الكان تملي بيشتهيك
بقى بكرهك
واتوكل ارحل مني فوت
حرمان علي قلبي الكلام
كان غيرك اجتاحو السكوت
خليهو قلبي الاندفن
تنسج عليه العنكبوت
اوخلي.... من بعدك يموت
الموت اخير......
من اني افضل
في رحابك وفي رجاك
انا كنت لو غاب القمر دائما بضوي
ضلام دناك
وانا كنت لو غيمك رحل
بطلع عشان اسكن سماك
وانا كنت لو بردك نزل
بوقد صوابعي لهب حداك
لكن منو القدر كدا
والله لو انا في محلك
بنسج الشمس احترام
واهديها ليك متمددة
بفتح كراريس الكلام
اختار حروفي واجردا
بنبش قبور المستحيل
كلمات شكر متفردا
لكن خسارة على قلب
حباك بلا ما يعرفك
انعل ابو القلم العلي دفتر غناك دمو انسفك
انعل ابو الشعر الغشاني وغنى فيك والفك
منعول غناي
منعول غناي كان ما امتطيت خيلي وبقيت اتاسفك
بتاسفك وكتين عيوني بسوقن الشوق لي انتظارك
لما ليلي يسوق محاسنو وينهزم عندك نهارك
لما ابكي انهزامي عشان ابارك انتصارك
لما كوكبي ساب مدارو رحل عشان يسكن مدارك
كنت مالي زمان ومالك
لكن وحاتك بكرهك
ندمان
ندمان على عمرا معاك ضيعتو
ضيعتو في غفلة زمن
ندمان علي
دمعا سكبتو على رضاك بلا تمن
انا كنت بحلم في وجودك ينكسر خاطر الشجن
لكن رضاي عليك عشم ابليس قصاد جنة عدن
انا بكرهك
كلما يطول ليلي ويواتيه العذاب
انا بكرهك
كل ما القلم يركب مصاعب الدنيا
يمشي على الكتاب
انا بكرهك
كل ما الفراق كتل مضامين العشق سدالو باب
انا بكرهك
قدر العيون ما تلبس التوب الزراق
تتوضأ موية الانتحاب
انا بكرهك
من كل باب انا بكرهك
واتوكل ارحل من جواي
غلطان اذا قلبك هداك قال ليك حا تفضل غناي
غلطان اذا عقلك رضخ لي ظن يقول انك حداي
والله ما فارق معاي
انا كنت ناوي اجملك
بس كنت ناوي اجملك
وامسك مضامين اللغات
من فيض حروفي اكملك
ترحل علي درب العشم
بي زاد هواي احملك
وكتين اخش قلبك جرا
واقطع قليبي وادملك
ندمان منو
انا غايتو ما ندمان عليك
اتوكل ارحل من جواي عيش العذاب الباقي فيك
ولو قلبك اتجرأ رجع
حقك تلومو علي مجيك
شان قلبي انت مليتو دم
ياخ فلبي انت مليتو دم
ما عادلو باقي يسبو ليك
على كل حال
انا بكرهك
عدد الحصى وعدد الرمال
انا بكرهك
عدد الصواب والاحتمال
انا بكرهك
عدد الحقائق والخيال
انا بكرهك
عد الشنة وعدد الجمال
انا بكرهك
عدد الاجابات والسؤال
انا ابكرهك
عدد الشعر ماسنة سيف الارتجال
انا بكرهك
عدد اللي ممكن والمحال
انا بكرهك
عد ما زمان قت ليك تعال
انا بكرهك

مستورة حالي وراك وفوت
يا دابو ليلك همو طال
مستورة حالي وراك وفوت
يا دابو ليلك همو طال
عاى كل حال
انا بكرهك

ويشارك في الامسيات الشاعر سعد الدين ايراهيم

ياريتني للشاعرة بشاير خالد عبد الماجد


ياريتني
ياريتني كان بقدر أجيك..
و ياريت ولو ياريت تفيد..
كان قلبي دايرك و مشتهيك..
بهواك شوق..
ليل و شروق..
بهواك يا عمري الوحيد..
بهواك يا كل الهنا..
و يا ضحكة الروح و المُنى..
يا عمري كان الحب ده ريد
جرح فروع السوسنه..
شلتك غُنى..
شلتك غُنى..
و بكت الورود
شكت معاي ليل العنا..
و شالت معاي توب الحداد
سكنت توابيت حُبنا..
و قلبي مشى في جنازتو ديك
غرد ترانيم عُمرنا..
و شُلت جوارحي و عقلي راح
راح لي زمن بيضُمنا..
و قلنا الصبر على البعاد
قلنا الحنين حيلمنا..
بس قلبي غلبو خلاص يدُق
في غُربه قاعده تهدنا..
و قال برضو دايرك و مشتهيك
رغم التعب رغم العنا..
إنتا الطبيب و إنتا الحبيب
و إنتا الجرح و إنتا الدوا..
.....
بشاير خالد عبدالماجد

الحبيب علاء حيمورة الله يديك العافية فأينما حل الإبداع نجدك حاضرا ,,,, تنمنياتي لكم بالتوفيق في كل مساعيكم لنشر الإبداع ،،، غايتو الإجازة الجاية احجز لي كرسي من هسة ,,,


تحياتي : ياسر العيلفون

جعل الله أيامكم كلها حبلى بالإبداع

شكراً لأنكم تعملون على رفع الوعي
وتدحضون القبح بالجمال


وفقكم الله

ياسر يا عيلفون يافنان يا راقي

اريتك تبقى طيب انت

تسلم يا حبيب وياريت لو عجلت بالاجازة لتكون واحد من المساهمين في هذا اليوم الجميل ...

الله يرد غربتكم

حلو اها ورونا يوم السبت دا 10 \12 البرامج شنو وتبدا الساعة كم

علاء الدين حيمورة تصدق انا بكرهك!!!!!