طيب راجلها الأول طلقها لى شنو...؟

اتكلمت الناس كتير عن الطلاق. لكن السؤال الغريب والعجيب..
لما يجى واحد يسألك هو طلقها لى شنو..؟

سيبكم من انتا عاوز ترتبط بى مطلقة ليه؟ ومالهن البنات الصوغار كملن؟
لاحظو كويس انى ما بتكلم عن نفسى. قلت ليكم يا شباب انو ماعندى قروش . لى ثيب او بكر..والحمدلله على كل حال
طيب ضروى الناس تعرف سبب الطلاق شنو..؟ مش ممكن يكون فى اسباب كده لا يمكن اعلانها..؟
الخواجات الماعندهم دين. الواحد فيهم يكون مرتبط سااااى بلا عقد. ولا لمة ولا ضبايح. ولا دق ريحة ولا طار..لما البينو وبين
صديقتو ينتهى. يطلب فى ادب من العالمين احترام الخصوصية الكانت بينهم..لانو باختصار الحكاية انتهت.

اما احنا. فـ جزء كبير مننا لازم يعرف الحاصل. امك وابوك وحتى سيد الدكان ممكن يفتح خشمو. وينظر فى الموضوع. ويطلب..ليكم فتوى على الهواء فى الاذاعة من شيخ فلان..لاعادة ليالى العمر بينك والمدام.!!
والسؤال طلقها لى شنو..يفترض فى الاساس ان المطلقة دائما
على خطأ وانها السبب فى خراب الدار العامرة. وكأنو سى السيد مافيهو شق ولا طق..

طبعاً فى حاجة تانية غريبة - عندنا برضو-
انو اللقب( مطلقة) يفضل فى رقبة الزولة لحدى ما ربنا يرزقها بى زول تانى. الجماعة لما يجيبو سيرتها يقولو ليك
طليقة فلان الزمان داك ياخ. ايوه كان ماخدها ورجعها بعد تلاتة يوم. لى بيت اهلها..!

الاستاذ محمد عوض

لك التحية الطيبة و التقدير

بسم الله نبتدى لك هذا البوست .

لمن يريد ان يرتبط بامرأة له ان يتحرى عنها و لكن لنرى توجه القرآن الكريم فى هذا الامر :


( عسى ربه إن طلقكن أن يبدله أزواجا خيرا منكن مسلمات مؤمنات قانتات تائبات عابدات سائحات ثيبات وأبكارا) التحريم آية (5)


و قال رسول الله صلى الله عليه و سلم و حديث الرسول صلىى الله عليه و سلم لا يناقض الاية بحال من الاحوال :

فقال (يا جابر أتزوجت؟

قال: نعم!

قال: تزوجت بكراً أم ثيباً؟

فقال: بل ثيباً، فقال النبي صلى الله عليه وسلم: هلا تزوجت بكراً تلاعبها وتلاعبك)، وفي رواية: (تداعبها وتداعبك)، فبين له أن البكر يميل قلبها إلى الذي مسها أولاً، والذي يبني بها يكون أحب الناس إليها، فالبكر هي أولى النساء التي لا بد أن يتخيرها الرجل.


ثم نأتى لنرى ماذا قال الناس و كيف ردت عليهم امرأة :


قالوا : أشهى المطي ما لم يركب

وأحب اللآليء ما لم يثقـــ ب

وأنشد بعضهم :

قالوا نكحت صغيرة فأجبتـــــــهم

أشهى المطي إلي ما لم يركب

كم بيــــــن حــبة لؤلؤ مثقوبــــة


فأجابته امرأة

إن المطية لا يلـــذ ركوبها

حتى تذلل بالزمام وتركبا

والدر ليس بنافع أربـــــابه

حتى يؤلف بالنظام ويثقبا

نظـــــمت وحبــــة لؤلؤ لم تثقب

حبابك يا ابو الطيب. منور بوستينا الطالق ده. وكلامك بقول انك زول خبرة ومزواج وجربتهم الاتنين ثيبات وابكارا. يا حليلى انا الملخوم ساكت
لحدى هسه.

Quote: و قال رسول الله صلى الله عليه و سلم و حديث الرسول صلىى الله عليه و سلم لا يناقض الاية بحال من الاحوال : فقال (يا جابر أتزوجت؟ قال: نعم! قال: تزوجت بكراً أم ثيباً؟ فقال: بل ثيباً، فقال النبي صلى الله عليه وسلم: هلا تزوجت بكراً تلاعبها وتلاعبك)، وفي رواية: (تداعبها وتداعبك)، فبين له أن البكر يميل قلبها إلى الذي مسها أولاً، والذي يبني بها يكون أحب الناس إليها، فالبكر هي أولى النساء التي لا بد أن يتخيرها الرجل.

لاشئ يمكن ان يقال بعد حديث المصطفى عليه السلام.-اذا ثبتت صحته- ولكن هناك ملاحظة ان النبى(ص) تزوج
اولاً بالسيدة خديجة رضوان الله عليها ولم تكن بكراً..
ومسألة ان البكر تحن لمن مسها اولاً ذكرتنى بقصة القردوعصرتو وهى قصة لا يمكن سردها هنا..
وعموماً قصة الحنين دى..خطرة وتجعلنا نفكر فى ما يمكن ان تواجهه الفتاة اذا فكرت فى اقامة علاقة
قبل ان تتزوج.

Quote: ثم نأتى لنرى ماذا قال الناس و كيف ردت عليهم امرأة : قالوا : أشهى المطي ما لم يركب وأحب اللآليء ما لم يثقـــ ب وأنشد بعضهم : قالوا نكحت صغيرة فأجبتـــــــهم أشهى المطي إلي ما لم يركب كم بيــــــن حــبة لؤلؤ مثقوبــــة فأجابته امرأة إن المطية لا يلـــذ ركوبها حتى تذلل بالزمام وتركبا والدر ليس بنافع أربـــــابه حتى يؤلف بالنظام ويثقبا نظـــــمت وحبــــة لؤلؤ لم تثقب

طبعاً الشعر ده ما وقع ليا. اصلو..انا لسه صغير ياخ على جنس الكلام ده
ولما اركب بس من موقف جاكسون بحمد ربى مية مرة

>>
غايتو المشكلة البجد لو قام راجلها التانى طلقا برضو

Quote: غايتو المشكلة البجد لو قام راجلها التانى طلقا برضو

الاخ سيد البوست
تحياتى وسلامى

الطلاق ممكن يكون مطلب الزوجة وممكن يكون الزوج رفض طلاقها الا اذا دفعت ليهو الخلع اى اموال للنجاة بفسها بزواج كرهتو لاسباب كثيرةومتعددة منها الخيانة ومنها الخروج عن الدين ومنها الكذب ومنها السقوط الاخلاقى وكذا بعض الزوجات يفعلن نفس الشىء سقوط اخلاقى وخيانة لكن فى الاغلب الاعم ولان العصمة فى يد الزوج وبالتالى الضرر معظمه يقع على المرأة حتى الشكوك والظنون تتجه ناحية المرأة وبسؤالك الذى فتحت به البوست ينسجم مع القول الذى يتجه صوب المرأة متشككا وكأن الطلاق امرا يشين اليها وهى قد تكون صاحبة الطلاق كطوق نجاة ومخلص من ازمات الزوج الذى طلقها سواء استجابة لمطلبها او فاتحة الخير التى تنتظرها بفارق الصبر والمرأة الزوجة اكثر الطرفين حرصا على مؤسسة الزواج ودائما ما تضغط على نفسها وتقدم تضحيات لاستمرار زواج فاشل وتعطى فرص كثيرة املا فى الاصلاح ولكن دائما الرجل يستغل الدين ومسألة العصمة فى يده ورخص التعدد زريعة للطلاق او التعدد
وانا بسأل سؤال لماذا تصر بعض النساء بطلب الطلاق وطيب مرأته ليه قالت ليه طلقنى؟

والزواج بطيخة صيفى الزوجين الرجال والنساء مهما

يمكن هي الطلقته و رفضت تقعد معاه؟. ما شرط اتطلقت عشان هي كعبه. احتمال تكون افضل انسانه في العالم لكن ربنا ابتلاها بزوج حقير سكير اها تقعد معاه ولا تمشي في حال سبيلها؟ ربنا شرع الطلاق للاسباب الزي دي و الطلاق ما حرام.

Quote: يمكن هي الطلقته و رفضت تقعد معاه؟. ما شرط اتطلقت عشان هي كعبه. احتمال تكون افضل انسانه في العالم لكن ربنا ابتلاها بزوج حقير سكير اها تقعد معاه ولا تمشي في حال سبيلها؟ ربنا شرع الطلاق للاسباب الزي دي و الطلاق ما حرام

سلام Dania
ما اختلفنا. واصلاً فكرة البوست ليه كتار بفضلو يسألو بطريقة عبيطة عن سبب الطلاق. يعنى انفصال تم بكل هدوء وبلا محاكم
تانى فى داعى الناس تفضل تبحت فى شأن خاص.؟
بخصوص النظرة للمرأة المطلقة اظن انو اهلنا زمان كانوا اكثر تسامحاً تجاه المرأة - ايوه كانو بشلخوها- وبدقو شلافيفا - لكن بحترموها..اكتر من الحاصل هسه. وممكن عادى الواحدة تعرسها نص الحلة وتطلقا. وتلقى عيالها زى الامم المتحدة. وبعد ده كلو عايشين
فى توافق تام.

مرحب بيكـ كتيــر يا ايمان

Quote: الطلاق ممكن يكون مطلب الزوجة وممكن يكون الزوج رفض طلاقها الا اذا دفعت ليهو الخلع اى اموال للنجاة بفسها بزواج كرهتو لاسباب

احتمال كبير فعلاً يكون قرار الزوجة واحتمال برضو يكون قرار مشترك وبكامل الرضا من الطرفين..المشكلة دايماً فى ناس حلة ورا وكلاماتهم. بس حكاية النسوان البدفعو للرجال عشان يطلقوهم دى ما اظنها وصلت للسودان.
احنا دايماً البندفع فى الاول وفى الآخر

Quote: والمرأة الزوجة اكثر الطرفين حرصا على مؤسسة الزواج ودائما ما تضغط على نفسها وتقدم تضحيات لاستمرار زواج فاشل وتعطى فرص كثيرة

بتفق معاك فى كل كلمة هنا. وانا عارف وشفتا كتير. نوعية رجال اولاد ستين ك ل ب الواحد فيهم قاعد زى السلطان ياكل ويشرب وبالليل كمان
احتمال كبير يلقى كورية اللبن تحت عنقريبو.. وماعارف المسكينة بتدبر..ليهو اللقمة دى من وين؟بس شنو تلقا الواحدة صابرة وساترة حالها

Quote: وماعارف المسكينة بتدبر..ليهو اللقمة دى من وين؟بس شنو تلقا الواحدة صابرة وساترة حالها

عارف وفايت اضانو ومرات بيقول ليها اخوك الفى السعودية داك كابى قروشو فى حماته ولا اخوك القاعد فى البيت الكبير جايب نسابتو ولا اختك الشغالة وقروشها مطرة وما عندها التصرفوا عليهم ما تخليهم يرسلوا ليك انتى المحمولة وعندك الاطفال وفعلا دا البحصل الزوجة تتصل اها مصارف المدرسة اللقمة غالبانا هدوم العيد الايجار قصر وناس برة يرسلوا والشفقة تقطع القلب تقول لى ما عارف عارف وبهندس ليها كمان

والراجل البدفعوا ليهو دا قاعد وبسمع فى كلامك دا وقابض ما عشان اى شىء بس كدى لؤم فى عدم قدرتوا وعدم استطاعتو بالله الرجال ديل اسال منهم النسوان بوروك ليهم كويس

Quote: عارف وفايت اضانو ومرات بيقول ليها اخوك الفى السعودية داك كابى قروشو فى حماته ولا اخوك القاعد فى البيت الكبير جايب نسابتو ولا اختك الشغالة وقروشها مطرة وما عندها التصرفوا عليهم ما تخليهم يرسلوا ليك انتى المحمولة وعندك الاطفال وفعلا دا البحصل الزوجة تتصل اها مصارف المدرسة اللقمة غالبانا هدوم العيد الايجار قصر وناس برة يرسلوا والشفقة تقطع القلب تقول لى ما عارف عارف وبهندس ليها كمان والراجل البدفعوا ليهو دا قاعد وبسمع فى كلامك دا وقابض ما عشان اى شىء بس كدى لؤم فى عدم قدرتوا وعدم استطاعتو بالله الرجال ديل اسال منهم النسوان بوروك ليهم كويس

شحاد وعينو قوية كمان؟
غايتو انا بعرف النوع البجى داخل البيت ومعاهو شلة من اصحابو وينهر
ياوليه سوى الغدا..!! والعجب انو ما بعرف يجيب كيس خضار ولا قطعة لحمة..
وبرضك عاوز اى حاجة جاهزة..
عموماًالنصيحة كده وبدون تحيز المراة السودانية اكبر مدبرة على وجه الارض
عندك ماعندك بتراعى ظروفك.وما بتفضحك..وقليل جداً فيهن المسنوحات

Quote: قال الأصمعي للرشيد بلغني يا امير المؤمنين أن رجلا من العرب طلق في يوم خمس نسوة الرشيد:إنما يجوز ملك الرجل عن أربع نسوة فكيف طلق خمس نسوة؟ الأصمعي:كان للرجل أربع نسوة،فدخل عليهن فوجدهن متنازعات وكان سئ الخلق فقال:إلى متى هذا النزاع؟ ما أخال هذا الامر إلا منك يقول ذلك لإمرأة منهن.أذهبي فأنت طالق،فقالت لة صاحبتها:عجلت عليها الطلاق،ولو أدبتها بغير ذلك لكان حقيقا فقال لها:وأنت طالق فقالت لة الثالثة:قبحك اللة،فواللة لقد كانتا إليك محسنتين وعليك مفضلتين فقال:وأنت أيتها المعددة أيادهما طالق أيضا فقالت الرابعة:ضاق صدرك عن أن تؤدبهما إلا بالطلاق فقال لها:وأنت طالق أيضا وكان ذالك بمسمع جارتة فقالت لة:واللة ماشهدت العرب عليك وعلى قومك بالضعف إلا لما بلوة منكم قال وأنت أيضا طالق أيتها المؤنبة طالق إن إجاز زوجك فأجابة من داخل بيتة:قد أجزت ...قد أجزت

شوفو الزول الطغيان ده بالله؟
انا نفسى اعرس واحدة فى يوم واحد...