Post: #1
Title: يقولليك مالاقي آكل وتلقاهو مشغل حبشيه في البيت
Author: محمد فرح
Date: 11-20-2011, 08:17 AM
طفق يشكو سوء حاله وأحواله وغلاء الأسعار والحال المايل وووو مرجعاً سبب كل هذا البلاء للسياسات الحكوميه الخاطئه التي أوصلت إقتصادنا للحضيض وبين الحين والآخر يتوقف قليلاً ليلعن أحد الوزراء او القيادات الحكوميه
سألته : معقول وضعك يكون بالسوء ده
فأجاب : وأكتر من كده كمان
قلت ليهو طيب ماتطلع الحبشيه المشغلها عندك في البيت دي وتكون وفرت 400 او 300 ألف وبالمبلغ ده أكيد ميزانيتك حتتصلح
توقف عن الشكوى ورد قائلاً : لكن المدام حتزعل شديد
مثلنا بقول (من حمدو زادو) .. بصدق مؤسف أن ترى من لايحمد الله .. لاينظر إطلاقاً للنعم التي لديه بل فقط بنقم ويسب ويلعن
وضعنا أفضل من عشرات الأمم وبحمد الله مافي سوداني ببيت جيعان إطلاقاً ووضعنا الإقتصادي أفضل من امم كثيره جداً
|
Post: #2
Title: Re: يقولليك مالاقي آكل وتلقاهو مشغل حبشيه في البيت
Author: ود الباوقة
Date: 11-20-2011, 08:28 AM
Parent: #1
انا بعرف واحد من اكبر تجار البصل في ولاية نهر النيل
قال ما تقابلو وتسالو الاحوال كيف . يرد
زي الزفت والحمد لله
اظن نحن الشعب الوحيد الفي الغني يلعن وفي الفقر يتعن(.........) ويلعن
شكرا اخونا محمد فرح
مؤونة 23 سنة من الود
|
Post: #3
Title: Re: يقولليك مالاقي آكل وتلقاهو مشغل حبشيه في البيت
Author: محمد فرح
Date: 11-20-2011, 08:58 AM
Parent: #2
ود الباوقه
تمحن بالجد
الناس ديل خليهم يتاوقوا على جيراننا في اثيوبيا وللا ارتريا وللا مصر وللا تشاد
وللا يعاينوا لي جيراننا في جنوب السودان عشان يعرفوا النعمه الهم عايشين فيها
مؤونة عشرة أعوام من الود
|
Post: #4
Title: Re: يقولليك مالاقي آكل وتلقاهو مشغل حبشيه في البيت
Author: ود الباوقة
Date: 11-20-2011, 09:05 AM
Parent: #3
Quote: الناس ديل خليهم يتاوقوا على جيراننا في اثيوبيا وللا ارتريا وللا مصر وللا تشاد
وللا يعاينوا لي جيراننا في جنوب السودان عشان يعرفوا النعمه الهم عايشين فيها |
كمان الادهى وامر مناضلي الكيبورطات
اها ديل معظمهم ضاربين الفيش والجكن والمشروبات الغازية
و الروحية
وزهجانين كمان
شفت المحن دي كيف
وشكرا
|
Post: #5
Title: Re: يقولليك مالاقي آكل وتلقاهو مشغل حبشيه في البيت
Author: مريم بنت الحسين
Date: 11-20-2011, 09:12 AM
Parent: #3
الاخ محمد فرح... تحية
وليه ما نعاين للعرب الزيينا .. ناس الاردن الما عندهم ربع الموارد العندنا.... ؟
بعدين، هل المقصود انه احنا وضعنا ببقي احسن لما الشغالات يمشوا...طيب لو المدام دي شغاله هي زاتها... يقعدوا في كوشه؟
هل الكلام ده بعني انه مافي ازمة اقتصادية وغلا.. وده كله مننا؟
بس الغلطان المرحوم والله!
|
Post: #10
Title: Re: يقولليك مالاقي آكل وتلقاهو مشغل حبشيه في البيت
Author: محمد فرح
Date: 11-20-2011, 10:17 AM
Parent: #5
Quote: وليه ما نعاين للعرب الزيينا .. ناس الاردن الما عندهم ربع الموارد العندنا.... ؟
بعدين، هل المقصود انه احنا وضعنا ببقي احسن لما الشغالات يمشوا...طيب لو المدام دي شغاله هي زاتها... يقعدوا في كوشه؟
هل الكلام ده بعني انه مافي ازمة اقتصادية وغلا.. وده كله مننا؟ |
أخت مريم
للأسف الشديد انا بعرف بيوت بكون فيها قريب الخمسه بنات وبعد ده جايبين حبشيه
النسوان إكتسبوا كسل مبالغ فيهو بسبب الحبشيات
والمشكله إنو الناس بتدعي المعاناه وبتحسروا على الماضي بالرغم من إنو حاضرنا رغم معاناتو إلا أنو أسهل بمليون مره من الأمس
اما بالنسبه للأردن ياأستاذه مريم فديل لو كان عندهم معارضه مسلحه وعملاء ومرتزقه وأحزاب لاهدف لها سوى (مكاواة) الحكومه كان حق الرغيف يكون ماعندهم
لكن للأسف كثيرين لايريدون لهذا الوطن أن يلتقط أنفاسه أبداً
ما أن تطفيء الحكومة جهة حرب إلا وسارعوا بإيقاد نار بمكان آخر
مؤونة عام من الود
|
Post: #6
Title: Re: يقولليك مالاقي آكل وتلقاهو مشغل حبشيه في البيت
Author: Alshafea Ibrahim
Date: 11-20-2011, 09:18 AM
Parent: #3
محمد فرح وضيفه ود الباوقة :
أن نعترف بالأخطاء والقصور سيكون عملا جيدا في سبيل الحل ... ما ذكرت من دول ... كنا نبعد منها بعد مسافات وحقب وازمنة .... كنا نملك مشروع الجزيرة ومؤسساته من مطاحن ومحالج ومعاصر زيوت ، مشروع الرهد ، السوكي ، أبونعامة ألخ ... كم كان عدد العاملين فيها ؟ كم النازحين من قراها للخرطوم ؟ أين القمح والزيت والبقوليات المحلية الصنع ؟ فتح الرحمن البشير ، الشيخ مصطفى الأمين ، عليهما رحمة الله وآخرين ؟
أصبحنا فعلا وبفضل سياسات شيوخ اللا وطني أقرب للصومال ولا توجد أي مقارنة مع أثيوبيا الدولة الجاذبة للاستثمارات العملاقة .... شوفوا ناس ( أشرف الكاردينال) ....
يجب أن نعترف بأننا جوعى ، مرضى ، وحكومتنا فاشلة هابطة .... وتعالوا للحل ..
الشفيع
|
Post: #7
Title: Re: يقولليك مالاقي آكل وتلقاهو مشغل حبشيه في البيت
Author: فتحي الصديق
Date: 11-20-2011, 10:02 AM
Parent: #6
محمد فرح يضع معايير جديدة لقياس الوضع الاقتصادي للسودانيين ....
طيب لو قلت ليك في واحد من سكان الخرطوم يشتري (المصران ) بالمتر ..رأيك شنو ؟؟
|
Post: #9
Title: Re: يقولليك مالاقي آكل وتلقاهو مشغل حبشيه في البيت
Author: محمد النيل
Date: 11-20-2011, 10:16 AM
Parent: #7
إختشى ياخى يا محمد فرح
أولا إنت كشفت حال زول أكيد عارفك بتكتب فى المنبر
وتانيا كلامك غلط
بل فعلا دليل تدهور إقتصادى
يعنى الزول دا لما عين الشغالة معاه فى البيت كان وضعه كويس
ولما البلد إتدهورت بسبب فظائع حكومتكم فشل يغطى حق الشغالة
دا معناهو شنو؟؟؟؟
إنت بتدافع عن كيزانكم ول بتكشف فى فشلهم زيادة؟؟؟؟؟؟؟؟؟؟
وثم تانيا 400 الف يعنى شنو؟؟؟؟
ياخى على الأقل خلى عندك تعاطف مع اللى ح تفقد شغلها دى
وكمان ود الباوقة جاي جارى فرحان
والله غايتو
فهم مغلوط
|
Post: #19
Title: Re: يقولليك مالاقي آكل وتلقاهو مشغل حبشيه في البيت
Author: محمد فرح
Date: 11-22-2011, 09:13 AM
Parent: #9
محمد النيل
انا لابدافع عن كيزان ولا يحزنون
انا عكست ليك الواقع ومافي داعي للشتيمه
|
Post: #11
Title: Re: يقولليك مالاقي آكل وتلقاهو مشغل حبشيه في البيت
Author: Alshafea Ibrahim
Date: 11-20-2011, 10:22 AM
Parent: #7
يافتحي
المصران أكل البطران ... أسواق بالخرطوم معروض فيها كوارع الدجاج وأحشائه بالكوم .... تشيل ليك كم ساق دجاج تغليهم مع بصلة وفتة بالهناء والشفاء
الشفيع
|
Post: #13
Title: Re: يقولليك مالاقي آكل وتلقاهو مشغل حبشيه في البيت
Author: محمد فرح
Date: 11-20-2011, 11:49 AM
Parent: #7
| Quote: طيب لو قلت ليك في واحد من سكان الخرطوم يشتري (المصران ) بالمتر ..رأيك شنو ؟؟ |
معناها الزول ده بحب المصران شديد
|
Post: #12
Title: Re: يقولليك مالاقي آكل وتلقاهو مشغل حبشيه في البيت
Author: محمد فرح
Date: 11-20-2011, 11:17 AM
Parent: #6
الشفيع ابراهيم
دائماً نظرتك سوداء لأبعد الحدود
|
Post: #8
Title: Re: يقولليك مالاقي آكل وتلقاهو مشغل حبشيه في البيت
Author: شرف الدين آدم إسماعيل
Date: 11-20-2011, 10:08 AM
Parent: #1
الاخوة المتداخلون / ...
السلام عليكم ورحمة الله تعالي وبركاته ..
Quote: وضعنا أفضل من عشرات الأمم وبحمد الله مافي سوداني ببيت جيعان إطلاقاً ووضعنا الإقتصادي أفضل من امم كثيره جداً
|
اولا ... الحمدالله حمدا كثيرا علي جزيل نعمه , والتي لا تحصي ولا تعد..
نعم , الحمدالله , وضعنا افضل من كثير من الامم.. ولكن هل هذا هو مربط الفرس ؟
ربما يكون صاحبك من النوع المتبرم .. ولكن هل الاوضاع الاقتصادية بهذا القدر من الافضلية ؟
ارتفاع في اسعار السلع الغذائية بصورة شبه متواصلة , تزايداعداد المتبطلين , عدم وجود فرص عمل..
ارتفاع سعر صرف الدولار مع الندرة.. والكثير من مظاهر التدني الاقتصادي ...
Quote: الناس ديل خليهم يتاوقوا على جيراننا في اثيوبيا وللا ارتريا وللا مصر وللا تشاد
وللا يعاينوا لي جيراننا في جنوب السودان عشان يعرفوا النعمه الهم عايشين فيها
|
البخليهم يتاوقوا شنو ؟
انت ما قاعد تمشي مايو؟ ولا امبدات ؟ الحلة الجديدة؟ ناس الخرطوم..
خليك من النازحين داخليا...
لكن مسألة انو مافي زول بينوم جيعان .. خليها شوية .. لانها مسألة نسبية..
لانو مثلا , ما عندك فائض زكاة .. عشان نقيس بيهو الاكتفاء الذاتي وعدم نوم السودانيين كلهم شبعانيين..
وما جات الحكومة يوم وقالت ان الميزانية حققت فائض ...
طبعا دا ممكن يحصل في اي بلد الا عندنا في السودان...
ثم الاهم من ده كله هل الاكل هو كل شيئ ؟ عند المواطن السوداني ؟
بمعني ..هل طموح السودانيين تقتصر فقط علي الاكل , ثم النوم شبعانين ؟
وين التعليم ؟ الصحة ؟ العمل ؟ الضمان الاجتماعي ؟ المساكن الملائمة ، الخدمات . ..., الخ
طبعا الموضوع ممكن يجر معاهو حاجات كتيرة...
لكن ... الافضل ليك تتناول البوست بتاع صاحبك ده وتقصره علي جحده هو بالنعمة..
لان في ناس ظروفها اسوء من ظروف صاحبك ده وبتقول الحمدالله...
لكن برضو ارجع واقول التعميم قد يكون مخلا ...
Quote:
كمان الادهى وامر مناضلي الكيبورطات
اها ديل معظمهم ضاربين الفيش والجكن والمشروبات الغازية
و الروحية
وزهجانين كمان
شفت المحن دي كيف
|
ده يفسر علي انه شنو؟
وهل انت الرازق ؟
القليل من الموضوعية في تناول الاشياء وتفسيرها ... مطلوبة ومفيدة...
التعديل لاخطاء املائية
|
Post: #14
Title: Re: يقولليك مالاقي آكل وتلقاهو مشغل حبشيه في البيت
Author: فدوى الشريف
Date: 11-20-2011, 12:56 PM
Parent: #8
وخصوصا الايامات دى السلطة رخيييصة وراقدة
الحد لله على هذه النعمة
شيئ افضل من لاشيئ
|
Post: #15
Title: Re: يقولليك مالاقي آكل وتلقاهو مشغل حبشيه في البيت
Author: سيف النصر محي الدين
Date: 11-20-2011, 01:33 PM
Parent: #14
هههههههه
الكيزان بقى دمكم خفيف خالص.
ده من شنو يا ربي؟
يكون من السلطة الهبطرش دي؟
|
Post: #16
Title: Re: يقولليك مالاقي آكل وتلقاهو مشغل حبشيه في البيت
Author: Alshafea Ibrahim
Date: 11-20-2011, 02:26 PM
Parent: #15
خلاص يامحمدفرح ...
ما تزعل ... أنا زاتي عندي شغالة حبشية وأخرى فلبينية .... واحدة للمدام والأخرى للعيال .... أها شفت الرفاهية كيف ؟؟؟ وعاشت الطماطم والعجور الهبطرش .... وما عاوزين سكر ولا زيت ولا دقيق ولا مضاد حيوي ... نأكل سلطة بس ...
أها أخبار جمهورية الكيزان (2) شنو ؟ إن شاء الله وجدتم شركاء .... يا أخ منتظرين النشكيل الوزاري عشان نبتهج ونفرح معاكم ....
الشفيع
|
Post: #17
Title: Re: يقولليك مالاقي آكل وتلقاهو مشغل حبشيه في البيت
Author: عمر صديق
Date: 11-20-2011, 02:57 PM
Parent: #16
الاخ محمد فرح
تحياتي
ولا اعتقد ان وجود الحبشيات في المنازل ينفي وجود الضائقة المالية
ولاينفي اخطاء السياسات القاتلة التي ادت الي تراجع اوضاعنا الاقتصادية
رغم ان وجود هذا العدد الهائل من العمالة الحبشية في البلاد ودون اي ضوابط
هو نفسه دليلا علي قصور السياسات الحكومية
|
Post: #18
Title: Re: يقولليك مالاقي آكل وتلقاهو مشغل حبشيه في البيت
Author: Nasr
Date: 11-20-2011, 03:57 PM
Parent: #17
| Quote: يقولليك مالاقي آكل وتلقاهو مشغل حبشيه في البيت |
إذا كان أفقر من تعرف من السودانيين مشغل حبشية في البيت
ففي الجانب الآخر (الذين لا تراه إلا من خلف زجاج عربيتك المرفوع دوما)
هناك سودانيين يحسدون هذه الحبشية علي وضعها هذا
وهم (ووفقا للإحصائيات التي تصدرها حكومتك ذاتها) غالبية
(أنا خايف إنت ذاتك تكون مشغل حبشية من إسترزاقك ببيع مثل هذه الأوهام)
|
Post: #20
Title: Re: يقولليك مالاقي آكل وتلقاهو مشغل حبشيه في البيت
Author: رانيه محمد الشيخ
Date: 11-22-2011, 09:35 AM
Parent: #18
فى نوعيه من الناس عندها وما بتحمد
وفى نوعيه من الناس ما عندها وبتحمد
اينعم الانسان مفروض يعاين للاقل منو عشان يحس بالخير العايشه
لكن دا ما بينفى اننا ما نعاين للاحسن منا ومفروض نكون احسن منهم لولا سوء الاداره والتنظيم والتخطيط والطمع وغياب الضمير
فى ابتلاءات من ربنا سبحانه وتعالى بنرضى بيها
لكن فى ظلم من اصحاب السلطه للشعب ما بنرضى بيه
|
Post: #21
Title: Re: يقولليك مالاقي آكل وتلقاهو مشغل حبشيه في البيت
Author: محمد أبوالعزائم أبوالريش
Date: 11-22-2011, 12:33 PM
Parent: #20
المصيبة إنو كان في (كل شئ) ... بقدرة قادر أصبح (لا شئ)
بعدين يا جماعة الخير إنتو بتناقشو في منو؟
محمد فرح؟ أكذب من عرفته سودانيز أونلاين.
الأقرب للتصديق إنو المثال الجابو ده فرية منو (شئ إعتاده واعتدناه منه)
|
Post: #22
Title: Re: يقولليك مالاقي آكل وتلقاهو مشغل حبشيه في البيت
Author: Safia Mohamed
Date: 11-22-2011, 02:54 PM
Parent: #21
Quote: للأسف الشديد انا بعرف بيوت بكون فيها قريب الخمسه بنات وبعد ده جايبين حبشيه
النسوان إكتسبوا كسل مبالغ فيهو بسبب الحبشيات |
!!! ????
|
Post: #23
Title: Re: يقولليك مالاقي آكل وتلقاهو مشغل حبشيه في البيت
Author: عصام دقداق
Date: 11-22-2011, 03:03 PM
Parent: #22
دائما نحن السودانيين ننسى الماضي القريب ولانشكر الله علي ماوصلنا الية من نعم وتنمية واتصالات وطرق وكباري والخ
ودائما ننظر للاخرين ونريد ان نصبح مثلهم بين ليلة وضحاها
والعافية درجات
|
Post: #24
Title: Re: يقولليك مالاقي آكل وتلقاهو مشغل حبشيه في البيت
Author: خالد عبد الله محمود
Date: 11-22-2011, 03:19 PM
Parent: #23
الله يسامحكـ يا بكري .. 
|
|