لماذا لم تظهر فيلسوفات في تاريخ الفكر اليشري(توجد استفهامات جندرية!!)

هي مجرد ملاحظة عابرة ذكرها المفكر اللبناني الدكتور علي حرب في كتابه (نقد النص)،حيث ابان ان تاريخ الفلسفة يخلو من اي فيلسوفة انثى . لقد اثارتني هذه الملاحظة فنقلتها الى مثقفة صديقة متعصبة جدا جندريا ،فطفقت توالي ذكر اسماء اناث تعتقد انهن فيلسوفات ولكن عند التمحيص النهائي اقتنعنا معا بانهن غير ذلك ،لذا فتحت هذا البوست ليتحفنا من يتوفر على مثال ما كي نخرج من هذه الدايلما الجندرية !!!.


نقطة النقاش : يقول استاذ الفلسفة علي حرب انه يرجع السبب لهذه الظاهرة الى ان المرأة اعتادت ان تكون موضوعا للرجل اما الفلسفة فتحتاج لذات وهو دور لا يناسب الانثي ..

هيباتياالعذراء .. فيلسوفة و الله و كمان من الاغريق .. أهلا ..
لكن برضو .. واحد من مليون ..
موضوعك دسم جدا ..

برضو في واحدة ناشطة سودانية في مجالي المعارضة و حقوق الانسان ..
مشهورة جدا ..
تقيم علاقات وطيدة مع كافة شعوب الأرض ..

برضها فيلسوفة .. كبيرة ..

طبعا عشان نقول انو فلان او فلانة دي فيلسوفة او فيلسوف يحتاج لكثير من الشروط منها انتاج المفاهيم ومن ثم افتتاح حقل مفهومي علي الاقل كما يذكر الفيلسوف الفرنسي جيل دولوز ..عشان كدة اي زول حقو يقول لينا انو فيلسوفتو دي قالت شنو ..

طبعا هناك بعض الفلاسفة والمفكرين قد ضاع انتاجهم عبر التاريخ رغم ذيوع صيتهم الفلسفي . عموما المسالة عاوزة حبة اجتهاد في موضوع الفيلسوفات دا.

Dina Khalid


Because we do not know if (it) is she or he

يا كوستاوي وعبد الجليل يا اخواني ما طبعا الفيلسوفات الزى ديل كتار طبعا على طريقتنا السودانية .. ما تعريف الفلسفة سودانيا ذاتو مدنكس . كدي خلونا من جنس ديل وانتكلم في الفلسفة العديل ما المدنكسة

يبدو ان هذا الراي يغضب الكثير من النساء، فلقد اثرت هذه القضية مع صديقة مثقفة وجندرية فافاضت في الحديث عن تاريخ الفكر الذكوري الذي حذف الكثير من جهود النساء عبر التاريخ دون ان تمنحني اي مثال حقيقي عن فيلسوفة عبر التاريخ في اي من الثقافات او الحضارات

الأخ صهيب السلام والتحية

في كتار بس إنتو ما جايبين خبر ساي

فما تغمطوا حقنا في الفلسفة ...

زمان أخدت كورس بتاع ومن اند جندر ستديس كان الله مد في الأجل
بجيك تاني و أشارك بتعريف الأنا المعجبة بيهم شديد....
إلي ذلك الحين شوف الرابط ده
http://www.women-philosophers.com/Women-Philosophers-Index.html

فيه تاريخ الفيلسوفات من 2500 BCE

كوستاوي

Quote: Because we do not know if (it) is she or he

بالله الموضوع ده ما put to rest yet
غبت عن متابعة البورد لفتره من الزمن
و آخر عهدي بيه كان سارة عيسي و دينا في كرسي رودا مردا
و قايلاكم جبتو النجيضة (علي قول الناس هنا)

دينا فيلسوفة و معاها بصمتي بالعشرة كمان

Quote: المرأة اعتادت ان تكون موضوعا للرجل اما الفلسفة فتحتاج لذات وهو دور لا يناسب الانثي ..

والسبب الذكر؟؟؟

ياخ....
أي فيلسوف في الدنيا مما خلق الله الأرض وما عليها فلسفتو هي فلسقة أمه ....
يعني في النهاية كل الفلسفات مستقاة من الأنثى وهي المكمل للذكر
ولولاها لما كان هو....

يعني آدم كان ممكن يهر ليه بني آدم...؟؟؟؟
ولكن حواء وهي كما ورد إلينا وهي من ضلعه أنجبت هابيل وقابيل وتوأمتيهما وقد تكون أنجبت غيرهم والله أعلم...
:. إذن النظرية صحيحة أقلو في نظري
ومن أختلف معي يعود لشعاري....
ونتفاوض...



الشايقي

http://www.youtube.com/watch?v=WjNosdjuv7s

فاوضني بلا زعل

[email protected]
http://alkatwah.com

.

الأخ صهيب التحية مجدداَ

Quote: اما الفلسفة فتحتاج لذات وهو دور لا يناسب الانثي ..

ما فهمت الكاتب (الماعمل الهومورك بتاعة في الفلسفة قبل كتابة المقال) قاصد شنو بذات دي...
ممكن الرابط عشان نفهم هو قاصد شنو بالظبط ؟

دم بخير

والله قصة الرابط دي اعملا ليك كيف ما عارف ..لكن احاول اشرح ليك انو كيف الانثي ترتاح لدور انها تكون موضوع لذات اخرى وهي الرجل .
طبعا اي فكرة تحتاج لذات مفكرة اي عقل فاعل وهذا العقل يجب ان يتوفر على موضوع ..مثلا فلسفات الوجود موضوعها الوجود يعني الحاجة البشتغل عليها الفيلسوف . اما بخصوص كيف تكون المرأة موضوعا فهي استعارة اخذها المفكر اللبناني ضمنيا من كيفية اشتغال الية الحب والعواطف والعلاقات بين الرجل والمرأة فدوما موضوع الرجل هو المرأة وجمالها ،فكأنما وضع الفيلسوف الرجل مكان الذات المفكرة والمراة الموضوع المفكر فيه اي الموضوع .

انا ما عارف لو انو الواحد يقدر يتخيل وكان علي حرب يريد ان يقول ان المراة يمكنها ان تتفلسف ان تبادلت الدور مع الرجل احيانا، اي ان تحتل الموقع الايجابي في العلاقة بينها والرجل اي ان تتحول لذات وليس موضوعا ..ما عارف اكون نجحت في الاستعارة ولا لا ..

..

الآخ صهيب
اعذرني لقصر الاجابة ولكن هناك عدد مقدر من الفيلسوفات في التاريخ لا ادري من اين اتى هذا الكاتب اللبناني بذلك الرأي القاطع
بعض الامثلة
ارستوكلييا Aristoclea وهي تلميذة فيثاغورث.
الصينية زهاو بان Ban Zhao.
اريتي السيرينية Arete of Cyrene وهي واحدة من جماعة الفلسفة السايرينية وتلميذة والدها ارستبوس السيرينيز
الاميريكية ميري وايتونز كالكينز Mary Whiton Calkins .
لا ادري الم يسمع الكاتب اللبناني بمارجريت كافينديش Margaret Cavendish دوقة نيوكاسيل شاعرة وكاتبة وفيلسوفة وعالمة عاشت في القرن السابع عشر وبداية الثامن عشر زهي وحدها تكفي لانها متميزة ليست اميز من كثر سبقنها او عاصرنها او اتين بعدها ولكنها كانت مميزة.
في القرن التاسع عشر والقرن العشرين القائمة تطول ولو كان عندي وقت كنت انزلت لستة طويلة بما لا يقل عن مائة .
لذلك قل لصديقتك الجندرية ان ( تنوم قفا ) لان الفكر الذكوري لم ولن يسيطر على الحياة الثقافية والادبية والفلسفية لانه وببساطة يوجد قطبان يديران هذا العالم ولها ان تقرأ رواية (ورق الحائط الاصفر ) للكاتبة الامريكية شارلوت بيركنز جلمان Charlotte Perkins Gilman وهي تعد فيلسوفة ايضا وكاتبة ورائدة للحركة النسوية .
مودتي
اسامة

سوف اعاود للتعليق على مداخلة الاخ اسامة محمد عشان اقول رايي باستفاضة

ان كلمة فيلسوفة لم تدخل اي لغة بعد ، ففي العربية لم يسبق ان استعملت هذه المفردة لانه لم تنبغ فيلسوفات في الماضي بينما نبغت شاعرات واديبات وفنانات ، طبعا يوجد مشتغلات في مجال الفلسفة منذ فجر التاريخ ولكن حتى في هذه الحالة يصار لغويا فقط الى تذكير اللفظة مثل الاستخدام الفرنسي la philosophe للذكر وle philosophe للمراة . ان الفلسفة لم تزل وقف على الرجال تماما كالنبوة كما يقول علي حرب.
هناك بعض الامثلة التي ذكرت
مثل هيباتيا العذراء ولكن للاسف فهذه الاخيرة هي بالاساس عالمة رياضيات في جامعة الاسكندرية القديمة ما قبل الاسلام ،صحيح انها كانت تلقي محاضراات في شرح فلسفة افلاطون ولكن الامر لم يتجاوز ذلك .فالشارح الاكبر لافلاطون نفسه اف########ن كاتب التاسوعات لم يطلق عليه لقب فيلسوف.
سوف نوالي التعليق تباعا على فيلسوفاتنا المفترضات تباعا يا اسامة

اما بخصوص الصينية بان زهاو فانها لم تكن اكثر من مؤرخة اكملت اعمال اخيها المسجون اضافة لاهتمامها بالفلك والرياضيات وهو ما قالته عنها الويكيبيديا
Bān Zhāo (45–116 CE) (Chinese: 班昭; Wade–Giles: Pan Chao, fl. 1st century), courtesy name Huiban (惠班), was the first known female Chinese historian. She completed her brother Ban Gu's work as he was imprisoned and executed in the year 92 BCE. because of his association with the family of Empress Dowager Dou. It was said her works could have filled eight volumes. Apart from being interested in history, she also had great interest in astronomy and mathematics

ولم تزد سوى الوكيبيديابعد ذلك سوى انها الفت كتاب حول النساء تحضهن على طاعة ازواجهن كما تفضل للمراة المتزوجة ان لا تكون متعلمة مثلها
يا ناس انحنا دايرين فيلسوفة عديل كده مش واحدة طاردنها من اخر التاريخ مافي زول عارفها قالت شنو ولا كتبت شنو!!!!!!.":

وطبعا نفس ردنا على اسامة ينطبق على رابط فردوس جامع
فمن اول نظرة الى قائمة الرابط تكتشف ان الموقع قد حشد كل العاملات في حقل المعرفة باعتبارهن فيلسوفات
فمثلا ان القائمة قد اوردت اسماء كل زهاو بان الصينية وهيباتيا المصرية وكما اوردنا اعلاه فان الاولى لم تكن اكثر من مؤرخة وعالمة فلك اما الثانية فلقد كانت عالمة رياضيات اضافة لكونها شارحة لفلسفة افلاطون
يا اخوان فسلسوفات قوقل ديل ما ينفعوا معانا فقوقل يجمع النطيحة والمتردية وما اكل السبع انحنا دايرين فيلسوفة عديل كده قالت شنو وكتبت شنو

الاخ صهيب
اولا اعتذر للمرة الثانية عن الرد القصير ولكن حتى لا تختلط عليك الامور اود ان اوضح لك من كلامك

Quote: حقل المعرفة

نعم جميع حقول المعرفة هي فلسفة. هل تعريف بسيط للفلسفة بانها حب الحكمة يكفي؟ يا عزيزي لو لم يقرأ الكاتب اللبناني لفيلسوفات فاقرأ انت حتى تقتنع انا شخصيا كنت اجزم بذلك الاعتقاد وهو عدم وجود فيلسوفات ولكن قرأت لكافيندش وجيلمان وحتى جورج اليوت الكاتبة الانجليزية تعد فيلسوفة فهي انتجت دراسة متكاملة في رواياتها ومكاتباتها عن الحياة ولذلك يمكن ادراجها ضمن الفيلسوفات وكما تعلم فكلمة الفلسفة في حد ذاتها تحدي للفلاسفة فما هية الفلسفة جدل قائم حتى الان ولكن لن يقودنا هذا الى ان نغمط حق النساء ممن اضفن علم او معرفة جديدة في حقل الانسانية .
نقطة ثانية كلمة فلسفة لا يوجد لها مقابل في اللغات الحية ولكن تمت استعارتها لجميع او معظم اللغات الحية واصبحت جزء من تلكم اللغات.

* بالمناسبة : الدين زاتو فلسفة.
لك التحية من على البعد لكن ما عا########ي زعلة الجندرية صاحبتك وزي ما قلت ليك العالم فيهو اتنين راجل ومرة وما بمشي بدونهم وبدون مساهماتم الاتنين.
ودي العميق
اسامة

في واحدة متعصبة جندريا ناقشتني في الموضوع دا وحتى الان مصرة انو رابعة العدوية فيلسوفة ماقدرت اقنعا انو الاخيرة دي متصوفة وشاعرة وما ممكن تكون فيلسوفة ..التصوف طبعا تجربة روحية وكشفية يعني مسالة قلب والفلسفة دي مسالة بتاعت عقل
ديكارت بيقول انو العقل هو اعدل الاشياء قسمة وحقيقة انو التجربة تؤكد ان النساء عموما اعقل من الرجال لكن ندرة الفيلسوفات دي تحير

الاخ اسامة تحية خاصة
انا معاك انو في مرحلة معرفية من تطور الفكر البشري ان كل اقسام العلوم كانت تعد جزء من الفلسفة ..الرياضيات،علم النفس ، الكيمياء او الخيمياء والفلك خصوصا هذا الاخير فلوتلاحظ لو كنت من المشتغلين في الحقل الفلسفي انو كل فلاسفة الاشراق والغنوض هم فلكيين بالاساس لانهم كانوا يقيمون تصورهم عن الاله رجوعا لتصورهم للافلاك (الله فلك كبير تدور حوله افلاك البشر والحيوانات وغيرها).
ولكن في مرحلة متقدمة حدث قطع معرفي ..يعني اتفرزت فروع المعرفة عن بعضها وصارت الفلسفة تعني الاشتغال لانتاج المفاهيم وفتح حقول مفهومية لم تحرثها الانسانية. طبعا كلامك صحيح انو عشان تعرف منو الفيلسوف او الفيلسوفة اولا عليك ان تعرف الفلسفة ،ولكن في اي من تعريفات الفلسفة لا يمكن ان يكون العمل في اطار حقول معرفية اخرى كاف لتصنيفك كفيلسوف .
انا اقدر انو يكون في امراة ذات عمق يؤهلها كي تكون فيلسوفة ولكن هل توفر لها الانتاج الكافي لتصنيفها كذلك. مثلا كنط انتاج مفهوم المتعالي وافتتح حقل نقد العقل في كتابه
نقد العقل الخالص او المحض حسب ترجمة موسى وهبة او نقد العقل المجرد حسب ترجمة احمد الشيباني وخلى كل العالم يتاثر بمفهوم المتعالي وكتبت الفلسفة من جديد على ضوء كانط.فوكو قام باجتراح مفهوم الخطاب والبنية وقام بافتتاح حقل البنيوية وكتبت الفلسفة بعده تحت اصداء منطوقاته ..وكذلك الكوجيتو الديكارتي افتتح عالما جديدا ..هوسرل ،هيوم ،هيجل ،ماركس وهلم جرا فكل واحد من ديل عندو المفاهيم العارفنهاكلنا والحقول التي افتتحها امام اعين المعرفة الانسانية .
نقطة هامة ..اكيد انا ما خاتي مسالة عدم وجود فيلسوفات كمسلمة بحث اريد اثباتها بس انا عايز انو اي زول يجيب لينا اسم فيلسوفة يثبت لينا انها فيلسوفة
مع تحياتي لك يا اسامة

مرة تانية مع مداخلات الرقشة دي

Quote: وفتح حقول مفهومية لم تحرثها الانسانية

لو ارتكزنا على هذه النقطةمن مداخلتك دراسات الجندر والدرسات النسوية تم حرثها بواسطة الجيل التاني من الحركة النسوية . طيب انت ما دام الا (تشوفي) ادخل هنــــــــــــــــــا وشوف مقدمة عن كافنديش وجدلها عن المادية ولو ربنا سهل بجدع ليك حاجة تانية .

بالمناسبة رابعة العدوية ممكن تكون فيلسوفة على حسب ما وصلنا منها.

الأخ صهيب السلام والتحية

Quote: يا اخوان فسلسوفات قوقل ديل ما ينفعوا معانا فقوقل يجمع النطيحة والمتردية

و حتى ما أكل السبع ممكن بحصافتك و إطلاعك تعرفه.

لما جبت الرابط كان في بالي رد ذي بتاع الأخ محمد عثمان الحاج

Quote: تحياتي، ياخي ماكان أحسن تستشير قوقل قبل ما تتفح البوست؟ أحسب هؤلاء الفيلسوفات من ماقبل الميلاد وحتى الآن:

و الأخ أسامه

Quote: يا عزيزي لو لم يقرأ الكاتب اللبناني لفيلسوفات فاقرأ انت

فهؤلاء الفيلسوفات في قوقل و في كتب الفلسفة موجودات لمن أراد البحث والتقصي.
و الويبسايت أعلاه للبروفيسور Kate Lindemann وهي بروفيسور في الفلسفة...
إستعين بقوقل لتعرف المذيد عنها و عن عملها العظيم في التبصير بالنساء الفيلسوفات.

السيد قوقل أدامه الله ذخر لنا أحد أعظم ثورات القرن وشخصياَ إستبصرت منه الكثير من كتب, مقالات, يوتيوب فيديو تعليمية و ترفيهية أيضاً...الخ
و كل العلوم ترقد بسلام في بطن هذا القوقل, مافي حال إستذادي بيستغنى عنه اليوم و هو مرجع و وسيلة تعليم متبعة في كثير من الدول المتقدمة .
الجامعات , دور البحوث العلمية و الحكومات توثق , تنشر و توعي عن طريق الإنترنت...
نرجع لموضوعك...

Quote: اي زول يجيب لينا اسم فيلسوفة يثبت لينا انها فيلسوفة

في الرابط الجلبته أعلاه و اللسته الإتكرم بيها الأخ محمد عثمان في البوست الثاني فيلسوفات لا يغمطهن حقهن إلا مكابر.
لم أثبت فلسفتهن أنا و لا الأخ محمد عثمان.
أنا لا أحمل آي درجات علمية في الشأن تؤهلني لذلك...
أصحاب هذه الدرجات فعلوا و ما بوجهة نظر , بدراسات و معايير أنا لا أفقه فيها الكثير.
و إذا فعلت أنا و قلت مثلاَ سقراط ما فيلسوف بيكون تنظير مني ساي!!
فيا أخي ... كاتب الكتاب للأسف ما عمل الهومورك بتاعه.
بستغرب من كتاب الكتب المفروض يكونوا علي قدر من المسؤلية العلمية و الفكرية.
للآن بفترض إنه كتابة الكتب تلزم الكاتب البحث و التمحيص , و لا الزمن إتغير و بقت مجرد أفكار ووجهات نظر؟

لصديقتك أقول....
إنتي صاح و سقراط ذاته إتعلم الفلسفة من الفيلسوفات العظام Asphasia , Diotima و Pythia
راجع كتاب Diogenes Laertius: Lives of Eminent Philosophers, Volume II
يا صهيب...
الكلام ده تاريخ ما آراء.

.............................
الأخ أسامه
سؤال لو سمحت ...صورتك محيراني الزول ده
ساجد و لا مغطس راسه في الرملة

Quote: ساجد و لا مغطس راسه في الرملة

الاخت فردوس تحية طيبة
دي ما ياها الفلسفة ذاتها ...
انتي شايفة شنو ؟ بالجد سؤال غير تعسفي ...

كل الود
اسامة

Quote: انتي شايفة شنو ؟ بالجد سؤال غير تعسفي ...

ممكن جداً يكون ساجد...
لكن ماممكن يكون حجم رأسه أصغر من باقي جسم.
وممكن يكون رأسه مغطس في الرملة أو جزء زي أطراف قدمه مثلاً.
غلبتني كلو كلو و ما عارفت.

المنطق بقول إنه فوتوشوب :)
و الله أعلم

الاخوة اسامة وفردوس معليش اقطع ليكم الونسة
ابدأ بالاخ اسامة
طبعا الرايط بتاع مارجريت كافنديش اثارني جدا (اطلعت عليه ) واكيد انو عندها الملامح الاساسية للفيلسوف خصوصا كما قلت رايتها حول المادية والله والاشياء وملكة المعرفة ، كمان اكيد انها ما بتشتغل على مفاهيم اخرين رغم انها عاصرت ديكارت وهوبز وهم عمالقة القرن السابع عشر الس الفلسفيين.
بس الغريبة انو ما عندها اثر كبير على فلسفة تلك الحقبة وان ذكر الرايط ان جون لوك قد تاثر بها ..انا ما داير اقول انها وقعت في ظل المطر بتاع ديكارت وهوبز عشان ما نعيد الاسطوانة المشروخة
بتاعت التاريخ الذكوري وكدة. عموما لنا عودة حول موضوع كافندش بس القى وقت اشوفها قالت شنو كويس.

بخصوص رابعة العدويةالقصة بتبقى صعبة شوية لانو الاثار الواردة لنا حول مذهبها الصوفي لا يتيح استقاء تجربة عقلية تاملية وما اذا كانت تجربة التامل الباطني التي يمكن ان نلمسها لدى ابن عربي يمكن ان نكتشفها لدى رابعة العدوية وا ن كان ارث ابن عربي نفسه لا يؤهل لذلك وان اطلعت قبل ايام علي كتاب لمفكر فرنسي يقارن بين هذا الاخير وفيلسوف التفكيك الفرنسي الكبير جاك دريدا بعنوان التصوف والتفكيك يناظر مفهوم الحق لدى ابن عربي وكينونة النص لدي دريدايعني هناك نسق راتب الشيخ الاكبر.طبعا موضوع رابعة العدوية دا مهم خالص عندما ننتقل لحقل الفلسفة العربية والاسلامية لانو في الحتة دي قوقل ما حيتفع وحتكون صاحبتنا دي هي القشة الوحيدة .
اما موضوع اليحوث والدراسات الجندرية التي حرثها الجيل الثاني فالقصة بسيطة ففي الحقبة الثانية فقط قد توفر الاطار الثقافي والاجتماعي الكفيل بتطور هذا الاتجاه اما الجيل الاول فلم يجدقابلة

صهيب يا صديق ..شكلك ما عارف كيف تعمل إقتباسات ..طيب ما كنت تسأل هههههههه

Quote: يبدو ان هذا الراي يغضب الكثير من النساء، فلقد اثرت هذه القضية مع صديقة مثقفة وجندرية فافاضت في الحديث عن تاريخ الفكر الذكوري الذي حذف الكثير من جهود النساء عبر التاريخ دون ان تمنحني اي مثال حقيقي عن فيلسوفة عبر التاريخ في اي من الثقافات او الحضارات

وما زلت عند رأيي ، ووعدتك أن أتفرغ للرد عليك بإستفاضة ..

خلينا هسه نبدأ بفيلسوفتى المفضلة ( رابعة العدوية ) ..

وحا أجى أقول ليك ليه هى فيلسوفة .

اها يا فردوس يا اختنا بت جامع وبعد ان بحتنا كوم فيلسوفات اسامة وطلعنا منو حتى الان واحدة فقط الجدة مارجريت كافندش من القرن السابع عشر ..كمان لحدي بكرة الصباح نفتش كومك انت لكن من اسع عليك الله طلعي لينا ناس هيباتيا ونسوان فيثاغورت ديلك وزهاو بان الصينية وارستوكلييا اليونانية ومن شاكلتهم .
برضو عليكي الله خشي لينا على العم قوقل وسلمي عليهو خليهو يديكي عشرة عشرين فيلسوفة عربية ومسلمة علًَََ بس بالعربي ما بالانجليزي
اما بخصوص كلامك عن علي حرب فهو يعي ما يقول جيدا وبالمناسبة كلامو دا ما جابوا من عندوا بل هو تعليق على تعليق بهذا الخصوص لجيل دولوز وهو فيلسوف فرنسي من فلاسفة ما يسمى بما بعد الحداثة من شاكلة ميشال فوكو ودريدا وعشان تقتنعي زوري عمنا قوقل واساليهو عن دولوز ..الخوف يطلعوا ليكي جزار ولا عراف بعد ماطلع لينا ناس بان زهاو فلاسفة

شكرا يا اخ صهيب على الصبر معانا رغم قلة مشاركاتي والله مزنوق وما حا افضى الا شهر ستة الجاي لو ربنا هون بس بخش اتاوق واطلع.

Quote: ما عندها اثر كبير على فلسفة تلك الحقبة

كان عندها اثر داخليا في انجلترا يعني واوربا وكتبها تُدرس في الجامعات وانا بصراحة ما قريت ليها الا قريب لكن عندها انتاج فلسفي ممتاز .
كان قصدي من ادارج موضوع الدرسات النسوية والجندرية ان اوضح لك بان من (تعب ) عليها نساء بغض النظر عن البيئة او الظروف التي نشأن بها المهم انهن انتجن واجمل شئ في هذا الموضوع ان انتاجهن يخص قضيتهن فضربن عصفورتان بحجر واحد (ازدات المعرفة وحقولها ، وكسبن هن قضية طالت معركتها ).
انا ما عارفك وين لكن لو كنت في اي مكان غير السودان كانت توفرت لك كتب ومراجع (تعمل ليك صلعة زي حلاتنا كدة ) .
اقدر فيك الاهتمام بموضوع الفيلسوفات ولكن اعتب عليك بناءك نتيجة ( عدم ظهور الفيلسوفات ) باعتمادك برأي الكاتب اللبناني وحده . فالحقيقة انهن ظاهرات ولكن لمن يبحث .
خيط اخر
روزي بريدوتي (تكتب Rosi Braidotti) لو لقيت ليها اي انتاج اقرأ ليها . عجيييييييييييييييييييبة

معليش وقتي خلص وراجعين للدرش تاني.
مودتي
اسامة

العزيزة امنة كيفك انشاالله كويسة
ومالك جاية متاخرة مع انو كنت متوقع انك اول واحدة تنط لي في الموضوع دا
عموما انو عربيا ما عندكم حاجة ..غايتو في واحد اسمو اسامة مشكورا طلع ليكم واحدة انجليزية من القرن السابع عشر وما زالت المفاوضات جارية لاضافة اخريات
اها الدور عليكن (اي عليكن) لحرث حقل الثقافة العربية والاسلامية لاستخراج واحدة اثنين ثلاثة وطبعا في الحتة دي قوقل يمتنع
بخصوص رابعة العدوية انا ما عندي مانع ندخلا ليكم المنافسة لكن ما حتنافس ونصيحتي ما تحرجوا الحجة دي فهي راضية بدورها في اطار تجربة الكشف والعشق الالهي ..مع تحياتي

يا صهيب ..

كدى أولا عرف لى الأربعة مفاهيم دى ، عشان نمشى لى قدام :
1- الحكمة
2- التصوف
3- الفلسفة
4- المعرفة

( عشان ما عندى وقت ولا مزاج ..أمشى لعمنا قوقل )

Quote: انا ما عارفك وين لكن لو كنت في اي مكان غير السودان كانت توفرت لك كتب ومراجع (تعمل ليك صلعة زي حلاتنا كدة ) .

هههههههه...أكيد ما حا تكون زى صلعة أخونا الفيلسوف صهيب .

يا اخوانا ما تزوغوا من الموضوع الاساسى
العنوان واضح فيلسوفات فى تاريخ الفكر البشرى
يعنى البشرية كلها بتعرفهم ...
ذى سقراط وافلاطون وارسطو او الفارابى وبن سينا وووووالخ
فلاسفة ولدوا الفلسفة مش اشتغلوا بيها ولا درسوا عليها
انتجوا فكر ومش اشتغلوا وحضروا البروفسيرشيب فى المنتوج منها !
فلاسفة اعلام وعلامات فارقة فى التاريخ البشرى ..
انا فهمت كدا ..
اسم يكونوا كل الناس عارفنو وما يمشوا يفتشوا فى الكتب او يقوقلو
او عرفتو محصورة على اصحاب التخصصات ..

يعنى بين اشهر عشرة فلاسفة فى العالم لا توجد امراة .. مثلا ...
صهيب ييسأل لييه ؟؟ دا مش سؤال واضح !!!











ــــــــــــــ
كونوا اننا نكون عايزنهن يكونن فيى (الفيلسوفات) ,,
دا ما بعنى انهن فيى مش ؟؟

Quote: . المرأة اعتادت ان تكون موضوعا للرجل اما الفلسفة فتحتاج لذات وهو دور لا يناسب الانثي ..

طيب ما كان براااحة ممكن تكون فيلسوفة فى الذات اللهى فيها موضوعا للرجل ؟
اى فى مكان ما اختارت ان تكون ذاتا .. لكن دا برضو ما حصل
لانو امهر واشهر الطباخين فى العالم هم رجال ...
امهر واشهر مصممين الازياء وهى المواعين البتكون فيها موضوعا للرجل هم ايضا رجال !!
امهر واشهر مصففى الشعر والمكياج وهى ادوات موضوع المراة للرجل ايضا رجال !!
اشهر وامهر مشخصين مشاكل الجنس واعضاء المراة ونفسيتها رجال !!

انا افتكر انو نفس المنطق دا هو الما خلى انو يكون فى فيلسوفات نساء ...
هناك خلل كامل صاحب النوع و تحديد وتوجيه مهاراتو منذ بدء الخليقة ..
منذ ادم وحواء
اذا اعتبرناهم نقطة بداية ... خلل ذى ما بقولوا ناس صهيب منهجى وبنيوى فى علاقة
الطرفين المشكلين للمجتمع ككل وهم المراة والرجل ..

بدل نحوم حولوا خلونا نعترف بيه ... عشان البشرية تقدر نعالجو ..













ــــــــــــــــ
كلامك صاح يا صهيب ماااااافى ... لكن دا ما ناتج من قصور فى المراة
بقدر ما هو خلل صاحب المجتمعات دى من بداية تكوينها ..
لو اديتنى اقل من 8 من عشرة فى اجابتى دى بخسسسسسسسرك !
لكن لو الخلل دا اتعالج الا تشوفوا ليكم كوكب تانى ....

مع دينا خالد كدي نوقف الميتوس ونتكلم لوقوس حبة
الغريبة يا دينا انو ناس فردس وامونة مختار ما حاسين بالمشكلة الاشرتي ليها دي
هم ما حاسين بصعوبة وغرابة الحفريات بالبقومو بيها دي في سبيل ايجاد فيلسوفة
الا ساعدهم واحد راجل اسمواسامة (وتصوري يبدو انو زول مشغول خالص) طلع ليهم واحدة اسمها مارجريت كافندش ولسع شغال معانا في الموضوع دا ..وطبعا دي اسمها سياسة دس الرؤوس في الرمال وطبعا حس الطمأنينة بعدم وجود مشكلة حاجة مريحة لكنه ايضا شعور مدمر وما بعفي في النهاية من القيام بانجاز ما لم ينجز ..يعني جدول الاعمال الفكري والتاريخي حيظل قائم قائم .طبعا الناس فلسفيا في العالم بقوا شغالين في اللا مفكر فيه ونحن لسع بنفكر في البنفكر فيهو من عشرة الف سنة وما عارف كم سنة لقدام!!!.
بخصوص انو نشوف لينا كوكب تاني اصلو شغالين فيها لحدي ما تحلو انتو المشاكل العاملينها ليكم ناس امونة وفردوس او نريحكم منهم ونسوقم معاناهههههههههههه؟.
طيب يا دينا انت ما كويسة ما لو ناس كوستاوى وفردوس جادعنك(وجه ضاحك)
خالص التحية

وبالمناسبة يا دينا انت مالك قلبك قوي كدة
فانتي بدون الكلام دا شاكين انك she or he
لكن بعد الكلام دا حتى ناس امونة صحبتك حياكدوا انك
he and not she
طبعا في الحالة دي حنسوقك معانا(وجه ضاحك)
التحايا مجددا

طيب خلينا نرجع لامونة وحابدا بتعريف الفلسفة ..
(انا عارف انك قاصدة شنو بخصوص هذه التعريفات يعني دايرة تدخليني ميدانك وتخرجيني من ميداني لكن ما مشكلة )
في البداية بيقولو ليك انو الفلسفة هي كلمة يونانية من مقطعين فيلو وسوفي يعني الكلمة بالعربي هي حب الحكمة ..لكن بعدين بتكتشف انو الكلمة دي اتومولوجيا حملت الكثير من المعاني عبر تاريخها ،يعني خدوش المعني في جسد الكلمة (فلسفة) قد ترك الكثير من الظلال الحافة والمحيطة حول الكلمة لغويا واصطلاحيا ..عموما البعنينا هنا المعني الاصطلاحي للكلمة وهو الاشتغال في مجال توليد المفاهيم واشكالية المعنى اما عبر توليف الحقول المفهومية القديمة او افتتاح حقول مفهومية جديدة.
طبعا كدة نكون عرفنا الحكمة by definition وانت اكيد ما عايزة المعنى اللغوي ولكن الاصطلاح ..
حسنا ..ان لمصطلح الحكمة اشكالية ذات تعلق ببيئة الفلسفة العربية والاسلامية ،فلو يذكر المشتغلون في حقل الفلسفة عربيا واسلاميا ان المواجهة الاولى بين الفلسفة والعلوم التقليدية كانت حادة ومريبة خصوصا بعد الانتكاسة السنية في عهد المتوكل فانجرف تيار المعتزلة بمحصلته المعرفية والفلسفية وكذلك انحدر نفس الامر ليشمل التاريخ المتاخر الى عهد الغزالي وابن رشدوانهزام الاخير امام التيار التقليدي المحافظ ..لذا يقل استخدام كلمة فيلسوف وفلسفة لصالح كلمة حكيم وحكمة ..يعني يا امونة كلما تجدين في كتب الكلام والفلسفة الاسلامية في ذات الوقت كلمة حكمة يعني بقصدوا الفلسفة بعد الهجوم عليها من التيار المحافظ الارثودوسي المسيطر ودونك كتب الامتاع والمؤانسة لابو حيان التوحيدي وقصة ابن مسكويه وتهافت الفلاسفةللغزالي والفهرست لابن النديم وكتب الفرق للبغدادي والشهرستاني وغيرهم ما حتلقي غيرانو الحكمة هي الفلسفة..دي انتهينا منا ولا عندك كلام!!؟.
بعدا دا نخش على تعريف المعرفة ،والاخيرة دي ما فيها خلاف كبير فكل ما تراكم انسانيا وبشريا عبر التاريخ هو معرفة ايستميولوجيا وايديولوجيا يعني المعرفة الخاطئة والمعرفة الصحيحية كلو معرفة ..مثلا نسبية انشتين هي معرفة على قدم المساواة مع اسطورة الغول والعنقاء والخل الوفي ،
وكذلك نظرية الكم هي معرفة مثلها مثل الفيداس والهيبانوشادز ..يعني اي حاجة بتراكمها التجربة الانسانية هي معرفة.
اما بخصوص تعريف التصوف ولانو دا الكمين الناصباهو انتي بالذات بخلي بعد الصلاة...

يا صهيب انت زول نظرك ضعيف ساكت ونحن نقول الحمد لله جعل اول فيلسوفة ومفكرة من النساء تكون من السودان وبوردابية كمان
براها بتجيك اصبر عشان تقعدك فى علبك اوع تقول لى منو لما تشوفها ت آمن براك
الله هونينى

وقبل ما نمشى لقدام كمان لازم نعترف بالظروف الموضوعية التى يمكن أن تصنع فيلسوفا ..

فمثلا : هل أتيح للنساء نفس مستوى التعليم والمعرفة التى أتيحت للرجل فى كل عصور التاريخ ؟
فحتى عصر حبوباتنا كان التعليم حكرا على الرجال ، وكان تعليم المرأة يعتبر ضياع زمن ومسخرة .

بعدين فى الوقت الذى كان الرجل يتفلسف ، ويتفرغ لللإطلاع وتأليف الكتب وتوليد المفاهيم و توليف الحقول المفهومية ..
كانت المرأة محبوسة فى حقل المطبخ والأعمال المنزلية خدمة لربها الرجل ، ومنهمكة فى توليد وولادة وتربية الأطفال .

الفلسفة تحتاج إلى تفرغ تام ، وإختلاء بالنفس والعقل ، وهدوء ...فكيف يتنسى للمرأة الحصول على هذا ( الجو ) مع صراغ الأطفال ـ وخدمة بعلها وتلبية طلباته ؟

يا امونة زي بديتي تنخي حبة ..وظهرت حكاية الظروف الموضوعية وموضوع المطبخ وكدة..
وطبعا دا كلو انحنا ما ناكرنو ،ماهو اولا نقر بالظاهرة وبعدين نشرحها ونعرف اسبابها ما من قولة تيت ننكرها ..وبعد داك نقعد نلت ونعجن في البطلعنا منها.
اها عشان نواصل معاكي ..انشا الله اقتنعتي انو رابعة العدوية ما فيلسوفة ولا نواصل !؟؟
طيب نواصل ..
فبعد ما انتهينا من موضوع الفلسفة والحكمة والمعرفة نخش طوالي في موضوع التصوف ولان التصوف لا يتوفر علي تعريف متفق عليه خلينا نقلب الظاهرة ذاتا..
اولا التصوف طبعا ما فلسفة ولكن له فلسفة ..يعني شنو ؟.
مثلا هناك مايسمي بالفلسفة االسياسية وهي في العمق ليست سياسة ،وكذلك فلسفة العلوم الى اخره .والى جانب ذلك هناك فلسفة التصوف وفي ذلك فان هنري كوربان مفكر فرنسي الجنسية يعد موسوعة في هذا المجال ،اما عربيا فطبعا الجابري له اجتهاد كبير حول ذلك في ثلاثية نقد العربي (خصوصا البنية) وكذلك من المفيد قراءة رسائل اخوان الصفا .
بالطبع ان التصوف يمتاح من تجربة عالمية قديمة فهو تجربة روحية ذات بعد انتروبولوجي ..فالمسيحية انتجت هذا النموذج ( العارف ايكهارت مثلا يقارنه البعض بابن عربي بل وللامانة فقد طرف نفس اسئلة التصوف الاسلامي وعلى راسها مفهوم التاليه السالب او negative theology )
طبعا للتصوف جذر في المجتمع الاسلامي وهي ظاهرة الزهد التي اشتهر بها البعض من الصحابةوالتابعين ..يسميهم البعض باهل الصفة او اخرين من لابسي الصوف تعففا . ولكن التجربة الصوفية الحديثة في الاسلام فان جذرها يبدأ بعد الصراع بين ال البيت والامويين والعباسيين وها هنا استلف الشيعة في اطار الصراع الايديولوجي من بعض التيارات خارج فضاء الثقافة العربية من فارسية ويونانية وغيرها من ذلك الفلسفة الهرمسية والافلاطونية المحدثة بقيادة اف########ن كاتب التاسوعات الشهير . طبعا ان الفيثاغورثية يمكن ان تكون جزء من الافلاطونية القديمة او المحدثة . ان هذه الفلسفة تسمى احيانا بالاشراقية او احيانا اخري بالغنوصية حسب مصدرها سواء فارسي او يوناني . واحد يقول ليك انو التصوف والتشيع حاجة واحد .. طبعا لا ..وان امتاحوا معا من نفس الاناء المعرفي ولكن لاغراض مختلفة التصوف لاغراض روحية والتشيع لاغراض ايديولوجية ..دا عن فلسفة التصوف .
اما االتصوف نفسه فهو تجربة روحية تعتمد على الذوق وملكة استخدام القلب وهذا الاستخدام نفسه يختلف حسب نوع التصوف

الأخ صهيب السلام والتحية,

Quote: لماذا لم تظهر فيلسوفات في تاريخ الفكر اليشري

لاحظ للفكر البشري و كلامك أدناه

Quote: عشرين فيلسوفة عربية ومسلمة علًَََ بس بالعربي ما بالانجليزي

Quote: ما طبعا الفيلسوفات الزى ديل كتار طبعا على طريقتنا السودانية .. ما تعريف الفلسفة سودانيا ذاتو مدنكس . كدي خلونا من جنس ديل وانتكلم في الفلسفة العديل ما المدنكسة

إنت شايت علي وين علي قول الناس هنا؟

في عنوان البوست قلت لم تظهر فيلسوفات في تاريخ الفكر البشري و بإقتناعك بكلام أسامة(في و احدة فقط الأقريت بيها دي)
يكون موضوع البوست إنتهى و ممكن يتحور موضوع النقاش لي ما مشهورين ليه أو ليه عددهم أقل.

Quote: برضو عليكي الله خشي لينا على العم قوقل

قوقل ده ذي ما قالوا ليك كان تدخله إنت قبل فتح البوست
بما إنك كُتُبي (ما من أنصار قوقل حفظه الله)
راجع كتاب
Diogenes Laertius: Lives of Eminent Philosophers, Volume II
إذا إستطعت إليه سبيلا

Quote: عليك الله طلعي لينا ناس هيباتيا ونسوان فيثاغورت ديلك وزهاو بان الصينية وارستوكلييا اليونانية ومن شاكلتهم .

معليش يا صهيب أنا لا حأطلع و لا حأدخل وما خبّازة العيش ده ولا أحب التنظير في أمور غير ملمة بكل معاييرها.
كما ذكرت سابقاً

Quote: أنا لا أحمل آي درجات علمية في الشأن تؤهلني لذلك... أصحاب هذه الدرجات فعلوا و ما بوجهة نظر , بدراسات و معايير أنا لا أفقه فيها الكثير. و إذا فعلت أنا و قلت مثلاَ سقراط ما فيلسوف بيكون تنظير مني ساي!!

Quote: وما زالت المفاوضات جارية لاضافة اخريات

غايتو ما دام كاتبك اللبناني ما عارف أبجديات الفلسفة القاشر بيها بكتاب لا أستغرب
أنه هنا في البورد تُمْنَح و تُمْنَع فيلسوفات شرف الفلسفة بي كيبورداتنا العظيمة(دايرين وش متحير)
و كما ذكرت آنفاً

Quote: الكلام ده تاريخ ما آراء

متعوب فيه شديد من ناس كرسوا حياتهم ليه وعندهم معايير علمية عالمية للتصنيف.

دينا الفيلسوفة (بترشيح كوستاوي وتثنيتي) سلام:)

Quote: العنوان واضح فيلسوفات فى تاريخ الفكر البشرى يعنى البشرية كلها بتعرفهم يعنى بين اشهر عشرة فلاسفة فى العالم لا توجد امراة .. مثلا ... صهيب ييسأل لييه ؟؟ دا مش سؤال واضح !!!

لو قال ما مشهورين أو أنا ما عارفهم كان حيكون المقام مختلف وردودنا مختلفة.
لكن مافي كلو كلو في تاريخ الفكر البشري دي بكوز موية وعليه شاي سادة بالنعناع ما بتتبلع.

Quote: انتجوا فكر ومش اشتغلوا وحضروا البروفسيرشيب فى المنتوج منها !

Kate Lindemann
ما ذُكِرت هنا كفيلسوفة...
ذُكِرت كَمُعَرِفة لهؤلاء الفيلسوفات!!!
يعني البروفيسورشيب بتاعها كان في منتوج الفيلسوفات المجموعات في صفحتها في اللنك أعلاه.
ذكرتها و قلت لي صهيب يقوقلها عشان يعرف إنه موقعها ما آي كلام و يذخر بمنتوج العالم في الشأن وليس المنظر.

Quote: يعنى بين اشهر عشرة فلاسفة فى العالم لا توجد امراة .. مثلا ... صهيب ييسأل لييه ؟؟ دا مش سؤال واضح !!!

لا صهيب ما قال ما مشهورات و ذي ما وضحت ليه أعلاه هو قال مافي وشتان ما بين الشهرة و العدم.

أما المداخلة دي

Quote: طيب ما كان براااحة ممكن تكون فيلسوفة فى الذات اللهى فيها موضوعا للرجل ؟ اى فى مكان ما اختارت ان تكون ذاتا .. لكن دا برضو ما حصل لانو امهر واشهر الطباخين فى العالم هم رجال ... امهر واشهر مصممين الازياء وهى المواعين البتكون فيها موضوعا للرجل هم ايضا رجال !! امهر واشهر مصففى الشعر والمكياج وهى ادوات موضوع المراة للرجل ايضا رجال !! اشهر وامهر مشخصين مشاكل الجنس واعضاء المراة ونفسيتها رجال !!

ده موضوع مختلف تماما و ممكن يُناقش ويُنَظَّر فيه إلي أن تقوم الساعة

و لو الله هون بجي أنظر معاكم في ليه دي.
أصلوا قيقراوي كان فاتح ليه بوست بيصب في نفس المجرى
أفتكر انو دا كلام معقول برضو .. مش!؟

و سئل سؤال شائك من عينة موضوع البوست الجديد
(أشير لبوست صهيب الحالي بعد إتيان الأخ أسامة بفيلسوفة إقتنع بها الأخ صهيب ليتحول البوست إلي لماذا الفيلسوفات ما مشهورات أو قليلات)
سؤال قيقراوي كان من الأكثر إبداعاً النساء أم الرجال ولماذا.
أها موضوع البوست الجديد و موضوع قيقراوي و كلام آمنه مختار أدناه ديل مادة خام أزلية لتنظير أزلي.

Quote: الفلسفة تحتاج إلى تفرغ تام ، وإختلاء بالنفس والعقل ، وهدوء ...فكيف يتنسى للمرأة الحصول على هذا ( الجو ) مع صراغ الأطفال ـ وخدمة بعلها وتلبية طلباته ؟

و إيدي معاكم لو الله مد في الأجل
أرد علي قيقراوي و أشارككم بالتنظير هنا.
..............................................

صهيب قلت من باب من كان له فضل علم وليس إيماناً مني بالمشاركة في منح أو نزع الفلسفة عن الفيلسوفات أشاركك ب
-الفيلسوفة إنهدوانا السومرية الأكادية (دي مثال لفيلسوفة من حضارات عربية قديمة) وهي من أقدم الفيلسوفات اللائي أُرخ لهن 2354 BCE

راجع كتاب
Kings of Akkad: Sargon and Naram-Sin
-أيضاًالفيلسوفة أقانيس في 1875 BCE وهي من الفراعنة القدماء.

لا حولااااا أنا كتبت الكلام ده كله... يا صهيب قومت لي نفس كيبوردي

ازيك يا فردوس يا بت جامع ..يبدو انو يوم الجمعة كان حافل
بس اكمل ردي علي امونة بت مختار وارد عليكي
بالمناسبة دينا ختت النقط فوق الحروف
وتجونا تمسحو النقط تاني
بتعرفي سيزيف من الاسطورة الاغريقية !؟.
اكيد حتلقيهو في قوقل(وجه ضاحك)
مع التحايا

الأخ صهيب
مداخلتك أعلاة تهكم غير مقبول من جانبي.

ذكرت في مقدمة البوست أني درست كورس عن شؤون الجندر وتتطرق الكورس للتعريف بدور المرأة
الفلسفي و الفيلسوفات في التاريخ ...
أتيتك برابط لبروفيسور كيت وكان مشار إليه في الكورس سيلابس كأحد المصادر العلمية.

نصحك الأخ محمد عثمان بالقوقلة
و إستنكرت أنت القوقلة وقلت أنا قوقلته الصفحة بتاعة كيت.
حاولت أوضح ليك حتة إنه عالم النت اليوم أصبح لا بد منه
ووسيلة متبعة علي كل مستويات الدول المتقدمة ... حقيقة
لا ينكرها إلا مكابر.


فتك بعافية.
و رب قوقلة خير من ألف جهل.

.

.

الاخت فردوس العفو لي الله والرسول
زعلك والله دبرس بي شديد
بعدين ما تكوني حنبلية شديد كده
طبعا زي ما انتي عارفة مثل هذه البوستات بتكون جافة
لانها بتناقش امور فلسفية بهتما بيها قلة ولو ما اتخلل الموضوع
روح دعابة ######رية بكون الموضوع تقيل خالص
لكي العتبى وخلي الروح رياضية وقي وقلاوية الزعلتك دي حامشي اسيع فوق واحذف ارتحتي
بعدين المسالة الثانية انحنا زاتو ما مصدقين انو في ناس بصبروا علينا في بوست زي دا
يعني مقدرين خال
خالص التحاياونواصل

الاخت فردوس التحايا مجددا
انت يا فردوس مشكلتك واحدة وهي انك بتعتقدي انو بمجرد ما تخشي قوقل وتلقي اسماء بتاعت فيلسوفات مرصوصة رجوعا لقوقل خلاص انحنا مفروض نصدق ونبصم بالعشرة وطبعا انا وانت وغيرنا عارفين طريقة قوقل ..وزي ما قلت ليك بلم المتردية والنطيحة وما اكل السبع .
طبعا انت زعلانة عشان بتعتقدي انو ما اخذتك ماخذ الجد بخصوص قائمة قوقل الجبتيها انت والاخ محمد عثمان الحاج..لا دا ما صحيح فانا من اول ما جبتي اللستة الاولي دخلت اليها وعملت كليك على عينة عشوائية فتصوري ماذا وجدت؟.
اولا زهاو بان مؤرخة وعالمة فلك
هيباتيا عالمة رياضيات وشارحة لافلاطون
ارستوكلييا شارحة لفيثاغورث وعالمة رياضيات
وبالمناسبة الان دخلت على لستتك وعملت كليك علي واحدة اسمها ايما غودمان تصوري وجدت شنو ..
ايما غود مان مهاجرة روسية الى الولايات المتحدة مهتمة بمسالة التحليل النفسي لفرويد وكتبت عدة مقالات وتلقي محاضرات علي المتعلمين من الطبقة الفقيرة والمتوسطة واكثر حالة ملفته انها اصدرت مجلة اسبوعية .
يا فردوس عشان النا س يستفيدو من جهدك اعملي زي اسامة ..اشيري لواحدة بس من مئات فيلسوفاتك ديل وقومي بعرض فلسفتها او الرابط الذي يقوم بذلك زي مسالة مارجريت كافنديش ..وبالمناسبة انا اسامة دا ما بعرفو لكنو عمل حاجة تاريخية وجهد فكري ما ساهل فهو قد عرفني والقاري والقارئة السودانية والعرب المتابعين لسوادانيزاون لاين لفيلسوفة اسمها كافنديش ودي مسالة ما كانت حتحصل لو ما انفتح البوست دا،يعني انتو حقو تفتشوا اسامة دا وتلقوهو وتكرموه ,والله العظيم انا جادي في المسالة دي لانو انتو بتتكلموا عن المراة وحقوقها بكسل يقيظ حتى الكافر كما يقول المصريون.
وبعدين صحبك محمد عثمان الحاج داك عمل عملية اخير منو انت ..فلقد زبط لستة قوقلية ما تخرش المية انا زاتي عجبتني في نظاما ..وبعد داك ما عارفين اهو الان في الماء ام في الهواء .
يا فردوس والله انا برضو مشغول ..اي ما زي اسامة ولكن ما بقدر اخش على كل لستك البتجيبيها دي
لكن بقترح ليك اقتراح عشان نستفيد ويستفيد الناس المتابعين معانا البوست (انا ما مصدق انو يخشو قريب اربعمائة للان) انك تستعرضي فلسفة الفيلسوفة العرضتيها مؤخرا الفيلسوفة إنهدوانا السومرية الأكادية
ونختبرها معاك ما اذا كانت فيلسوفة ولا لا ..اتفقنا ؟.
ولله حيرتونا يا نسوان..
نسكت مدني تغرق ..نتكلم يقولو مجنون..
سمعي دي قبل كدة
مع التحايا

الأخ الـكريـم صهيب حامد

لك التحـايا ولمتـداخـليـك الـتقـدير

ولـك الـشـكـر عـلـى إبـتـدار الـنـقـاش حـول هـذا الـمـوضـوع الـهـام. ولا أرى إطـلاقـا أى غـضـاضـة فـى الـسـؤال الـمـشـروع الــذى طـرحـتـه ولـكـنى وبـكـل الإحـتـرام لا أوافـق عـلـى صـياغـة الـسـؤال القـطـعـيـة. فـقـد ظـهـرت نـسـاء فـلاســفـة كـثـر ولـكـن إمـا تـم الـتـعـتـيـم عـلـيـهــن أو لـم يـجـدن الإهـتـمام أو طـغـت عـلـى أسـمـائـهـن عـلاقـاتــهـن الإجـتـماعـيـة والـعـاطـفـيـة. وذلـك لأن الـمـجـتـمع يـنـظـر إلـى الـمـرأة بـمـنـظار الـرجـل ويـحـكـم بـمـنـطـقـه الـمـتـحـكـم فـى نـمـط الـتفـكيـر الإجـتـماعـى بـما فى ذلك النسـاء أنـفـسـهـن. وتـدلـيـلا عـلـى ذلـك كـنـت قـد قـمـت بـدراسـة إسـتـطـلاعـيـة حـول تـشـكل الـقـناعـات نـتـيـجـة للإيـدولـوجـيـات اللاشــعـوريـة الـمتـرسـبـة فـى اللاوعـى (وهـو مـوضـوع أتـمـنى أن أجـد الـوقـت لـطـرحـه). الـمـهـم فـى الـمـوضـوع أن فـصـلا كامـلا للدراسات الـعـلـيـا بـجامـعـة بـوسـطـن بـه 47 طالـبـة وطـالـب إشـتـركوا فـى الـدراسـة بــطـرح عـدد مـن الأسـئـلـة عـلـى مـسـتـطـلـعـيـن مـن الـجـنــسـيـن وأعـمار مخـتـلـفـة. وقـد كانـت الإجـابات مـذهـلـة. فـمـثـلا عـنـد وصـف شـخـصـيـة المـديـر الـعام لـمـؤسـسـة كانت الإجـابة وسـط النسـاء بحـوالـى 72% وصـفـا لرجـل؛ دون تـخـيل إمكانـيـة تـقـلـد إمـرأة لمثـل ذلـك المـنـصـب. وهـذا مـثـال واحـد فـقـط.

امـا مـاقـاله

Quote: المفكر اللبناني الدكتور علي حرب في كتابه (نقد النص)

فأنـا أولا لا أدرى مـن هـو حـتى لا أظلمـه. ولكـنـه لايمـكن أن يكـون مـفـكـرا وهـو يـصـدر حـكـما قـطـعـيا. لأن مـن أبـجـديات الفـلـسـة وعـلـم الـمـنـطـق والـنـظـريات العـلـمـيـة وحـتى فى نـقـض الـبـيـنات الـقانـونية: أن الأحـكام التـعـميـمـية الـمطـلـقـة تـحـتاج إلـى إثـبات نـقـيـض واحـد فـقـط لـهـدم مـثل ذلك الـحـكـم أو تـلـك الـنـظـريـة. لـقـد ظـهـرت نـسـاء كـثـر مـمـن إشـتـهـرن بالـفـلـسـفـة وكانـت لـهـن إسـهـامات عـميـقـة فى تـأصـيـل الـفـكـر الإنـسـانـى. أمـا أنـه لـم يـحـط بـهـن أو يـكلـف نـفـسـه عـناء الـبـحـث عـنـهـن فـذلك قـصـور مـنه ويـحـسـب عـلـيـه. فهـو لم يـضـع حـتى إحـتمال وجـود إمـرأة واحـدة بـتلك المواصـفـات! وهـذا كاف لنـفـى صـفـة المـفكـر عـنـه؛ لأنـه لم يفـكـر فـى إحـدى الأبـجـديـات. إضـافـة إلـى أنـه لـم يـدرس المـتوفـر مـن الـفـكـر الإنـسـانـى.

سـأحـاول أن أسـوق بعـض النـماذج لوسـمـح لـى الـوقـت وظـروف إلـتـزاماتـى. وكـما قـلـنا تـكـفـى واحـدة فـقط لـهـدم تـعـمـيـمـه!

ولـك الـشـكـر مـرة أخـرى,

ثم ثانيا يا فردوس عشان شنو قافلة لينا البوست بتاعنا ؟.
بس عشان لقيتو ليكم فد فيلسوفة من القرن الرابع عشر وهي ظاتا في طور التحقق
ودا طبعا انتصار تاريخي لحركة النساء يكفيهم مليار سنة لقدام !!!.
اولا ان الدافع الاساسي لفتح هذا البوست وكما ذكرت اعلاه ليس اثبات فرضية محددة عن خلو حركة الفكر من نساء فيلسوفات ..لا بل العكس ان الهدف هو اثبات وجود فيلسوفات ولكن ما بطريقتك دي يا فردوس بل بطريقة الاخ اسامة ..تمشي تجيبي لينا فيلسوفة عدييييييييل كدة..اراؤها مفاهيمها خصوصيتها الفلسفية انتاجها الفلسفي الى اخره.
اما مسالة انو موضوع البوست ينط من البحث عن فيلسوفات الي مناقشة سبب انعدام او ندرة بروز نساء فلاسفة ..المانع شنو نخش في الحتة دي ما هو البوست ياهو فاتح وداك الجمل وداك الجمال
طبعا البوست دا ماقاعد ليهو في صنقور زول

الأخ الـكـريـم صـهـيـب حـامـد

لـك الـتـحايـا مـرة أخــرى


ممـا لاشـك فيـه أن الـفـيـلـسـوفـة الألـمانـيـة حـنا آرنـدت تـعـد واحـدة مـن عـمالـقـة الـفـكـر الـسـياسـى الـنـقـدى فى التاريـخ المـعـاصـر. وقـد تمـيـزت بفـلـسـفـة وعـطاء فـكـرى ثـر شـكل نقـلـة نـوعـيـة فـى الـفـكـر الـماركـسـى خـاصـة والـفـكـر التـحـررى الإجـتـماعـى-السـياسـى عـامة. ولـكـن مـن ا لـمـؤســف حـقـا أن الـمـعـرفـة بـهـا لاتـتـعـدى حـدود الـدارسـيـن للـفـكـر السـياسـى والنظـريـة الماركـسـيـة والنظـريات النقـدية. وممـا يـزيـد الأسـى أنـهـا كـثـيـرا ما تـذكـر كـعـشـيـقـة للـفـيـلـسـوف الألـمانـى مـارتـن هـايـدغـر الـذى مـلأ عـالـم الـفـكـر والـفـلـسـفـة وشــغـل الـناس، دون الإشـارة إلـى عـمـق إسـهـامـاتـهـا.

وحـنا تـعـتـبـر مـن أوائـل مـن نـظـر لـلـتـسـلـط والـدكتاتـوريـات وفـهـم مـسـبباتـهـمـا فـنـشـرت فى عـام 1951 كـتابـهـا أصـول التـسـلـط السـياسـى (الـدكتاتـوريات) ثـم نـشـرت واحـدا مـن أهـم الأعـمال الأصـيـلـة فى فـلـسـفـة الـفـكـر الـبشـرى الأحـوال الإنسـانـيـة وجـزئيـن مـن كـتابـهـا حـياة الـعـقـل. وهـى تـعـد أيـضـا مـن أهـم الـمـؤصـلـيـن لفـلـفـسـات الـفـعـل والــحـكم والـمـواطـنـة, وكـتبـت كـثـيرا مـن الإسـهـامات عـن الـسـلـطـة الـسـياسـيـة والـحـريـة والـثـورة والـحـداثـة والـتـقـالـيـد والـفـكـر والـعـمـل. وهـذا قـلـيـل مـن أثـرهـا عـلـى الـفـكر والـفـلـسـفـة فى أوربـا وأمـريـكا.

ولـك الـتـحايـا والـود

الأخ الـكـريـم صـهـيـب حـامـد

لـك الـتـحايـا مـرة أخــرى

وبـنـفـس الـقـدر الـذى ظلـمت بـه حـنا آرنـدت لعـلاقـتـهـا العـاطـفـيـة مـع هـايـدجـر، ظـلـمـت رائـدة الفـلـسـفـة الـنـسـائـيـة الـمـعـاصـرة والـتى يـعـتـبـرهـا كـثـيـر مـن الـمـؤرخـيـن واحـدة مـن أكـثـر الـمـفـكـريـن تـأثـيـرا فـى الـعـالم إلـى يـومـنـا هـذا. فـفـكـر الفـيلـسـوفـة الـوجـوديـة الـفـرنـسـيـة سـيـمون دي بـوفـوار يـؤكـد أنـهـا حـقـا ام الحـركة الـنـسـوية في العـالم مـن يـوم صـدور كـتابـهـا الـجـنـس الآخـر فـى عـام 1949؛ فـلـم يـتـوقـف تـأثـيـرهـا فـى كل أرجـاء الـعـالـم. وهـى تـنـاقـش فـى هـذا الـكـتـاب مـوضـوع الـواقـع الـذكـورى وإنـعـكاسـاتـه فـيـما نـحـن بـصـدد نـقـاشــه فـى هـذا الـبـوســت.

ولسـخـريـة الـقـدر ظـلـت الإشـارة إلى سـيـمـون دى بـوفـوار تـرتـبـط دائمـا بــقـصـة حـبـهـا الأســطـورى وعـلاقـتـهـا بالفـيـلـسـوف الوجـودى سـارتـر. فمـا ذكـرت سـيـمـون دى بـوفـوار إلا وذكـرت تلـك العـلاقـة مع ســارتـر! فـى حـيـن أنـنـا نـجـد أغـلـب الإشـارات إلـى ســارتـر تـخـلـو تـمامـا مـن أى ذكـر لـهـا!

ويـبـقـى الـســؤال الـهـام: لــــم؟

ولك التـحـايـا.

هلا بالاخ عبد الرحمن
كيف الاحوال
نرحب بك وحاعود ليك انشاء الله

غايتوا
أنا ما عرف لىّ
فيلسوفه
غير مرتى!!
والله فلسفتنى
جنس فلسفة!!
حسى اتو قايلين
السنى دفع الله دا
فيلسوف شديد ليه
ما هو كمان فلسفوهو
زى ما فلسفونى

ازيك يا بروف وكيف الاولاد
وبرضو يبدو انها اتفلسفت نامن علمتك انت زاتك الفلسفة
وما براك ..(المر) ذاتو علمو الفلسفة كمان، ما نفس المدرسة(وجه ضاحك)


















تخريمة : موضوعنا لسه معلق ما تنشطو يا بروف