ثلاثة اشياء كبيرة وهامة فشلت فيهم الانقاذ ...

الاول : هو فشلها فى انشاء او اعادة تاهيل الناقل الوطنى (سودانير) وجعله بمصافة الخطوط العالمية ...

الثانى : هو فشلها ايضا فى بناء مطار دولى بمواصفات عالمية يتناسب ومكانة وعظمة السودان...

الثالث : فشلها فى بناء استاد رياضى عالمى وضخم يشرف السودان مثلما نشاهده من استادات حتى فى الدول الافقر من السودان .

دي ياها الأشياء الكبيرة وهامة؟؟؟؟؟؟؟؟؟؟؟
نسيت أمنهم من الخوف وأطعامهم من جوع؟؟؟؟؟؟؟
كل يغني علي ليلاه

تحياتى اخى ناصر ،،

Quote: دي ياها الأشياء الكبيرة وهامة؟؟؟؟؟؟؟؟؟؟؟ نسيت أمنهم من الخوف وأطعامهم من جوع؟؟؟؟؟؟؟ كل يغني علي ليلاه

صدقت كل يغنى على ليلاه ... وتلك ليلتى ... بقية الفواشل متروكة لاخرين اشد مراسا...

إنفصال الجنوب أكبر طامة
تفشى العنصرية والتعنصر
التذوير والخج وضياع الديمقراطية والحرية وتسلط الحزب الواحد
مصادرة ممتلكات الدولة عبر الخصخصة الخاصة بهم
تفشى الفساد المالى والإدارى وقيل الأخلاقى ايضا


هذه هى اركان الفشل الخمسة الأساسية

وبعدها تأتى الفواشل الأخرى والتى من بينها سودانيركم ومطاركم وإستاداتكم




تحياتنا

يعني :
- طيارة
- ومكان تطير منه الطيارة
- ومكان نلعب فيه التيوة

* هذه هي الأشياء الكبيرة وهامة ؟


الراجل عايز يتونس يا جماعة ....... فليتونس في زمن اللاونسة.

الأخ / علي

سلام واحترام ،،،،،

كل سنة وانت واسرتك الكريمة بالف خير وعافية ومشتاقين

قلت لي ثلاثة اشياء فقط يا زول فيك الخير

حاول الثلاثة دي اعمل ليها ستة سبعة اصفار كدا خليك كريم يا حبيبنا

تحياتي لك ولاسرتك وورينا اخبارك



أبو كريم

تحياتى اخى عاطف ،

Quote: يعني : - طيارة - ومكان تطير منه الطيارة - ومكان نلعب فيه التيوة * هذه هي الأشياء الكبيرة وهامة ؟ الراجل عايز يتونس يا جماعة ....... فليتونس في زمن اللاونسة.

يا عاطف يا اخوى ... فشل الانقاذ فى كل النواحى مافى خلاف عليهو... الا بس الذكرتهم انا ديل فشل ولاما فشل ولا عاد كيفن يعنى الفهم ؟؟ ... يعنى ببساطة ممكن تضيفهم للفواشل الكبار كبار الشايفهم انت اهم من بتاعاتى ديل ... ولو كل زول شاف فشل الانقاذ زى ما عايزة انت فى زمن اللاونسه الاشرت ليهو ده الانقاذ قاعدة قاعدة كان رضيت ولا ابيت !... وبينى وبينك هسى الانقاذ لو ظبطت التلاته الانا اشرت ليهم فوق دى ... الكسبان منوبس !!... ولا الانقاذ لما تمشى ح تشيلهم معاها... غايتو كان كلامى ده ما وقع ليك اعتبرو ونسة ساااى ...

مشكور على مرورك

تحياتى محمد النيل ،،

Quote: إنفصال الجنوب أكبر طامة تفشى العنصرية والتعنصر التذوير والخج وضياع الديمقراطية والحرية وتسلط الحزب الواحد مصادرة ممتلكات الدولة عبر الخصخصة الخاصة بهم تفشى الفساد المالى والإدارى وقيل الأخلاقى ايضا

ممكن تضيف ثلاثتى المعنون بها البوست ... الى اخر اللستة التى اتيت بها ... بعد اركان الفشل الخمسة الاساسية...

العزيز الفاتح ،،

تحياتى العطرة ... وكل عام وانت والاسرة بالف خير ...

Quote: حاول الثلاثة دي اعمل ليها ستة سبعة اصفار كدا خليك كريم يا حبيبنا

سمعا وطاعة 10000000 فشل وفشل زريع ..
والله يا الفاتح قلنا نبدأ بى ديل او على الاقل نشير ليهم ... وكان سووههم الجميع كسبان ... بس اليسوههم لينا ويكون البوست ده جاء بى فائدة... وتحياتى عبرك لجارك الصياد...

خالص مودتى ،،

الغالي علي

تحياتي واحترامي ،،،

والله اصفارك الكتيرة دي كيفتني كيف

والله ربنا يسمع منك ويعملوهم لينا وتكون برضو ما قصرته

تحياتك سوف تصل لصاحبنا العزيز

تقبل سلام جميع الشباب

وخليك متواصل وياريت لوعن طريق الايميل

تحيايت لك والاسرة



أبو كريم

Quote: الاول : هو فشلها فى انشاء او اعادة تاهيل الناقل الوطنى (سودانير) وجعله بمصافة الخطوط العالمية ...

تفسير عن تقديم هذا الفشل الاول حسب وجهة نظرى انا الما بشوف الفواشل الكبيرة التانية ... سودانير دى يا جماعة عندنا معاها ود قديم وذكريات طفولة...
سودانير كانت مفخرة للسودانيين فى زمن غابر من الازمان ... ولو بتتذكروا الصفحة الاعلانية الثابتة فى مجلة (المجلة) وهى تزين الصفحة قبل الاخيرة بشعارها وبعض من صور طبيعية من السودان ... نفتقد هذه المؤودة فى هذا الزمان رغم تفسيرات حظر الامريكان وعدم القدرة على توفير قطع الغيار... ونحن نسمع ونشاهد كل خطوط طيران الدول الاخرى تحلق فى سماوات رب العباد الا سودانير حقتنا دى ... يعنى يا اهلنا ويا وطنيين موضوع زى ده ما بحز فى نفوسكم... وانا اعتبرتها فشل انقاذى هام وكبير لان الانقاذ وهى خاشه على عامها الكم وعشرين تعتبر اطول فترة حكم مستمرة فى تاريخ السودان ... وبرضو كان رضيتو ولا ابيتو ... بس ياريت كمان ناس الانقاذ او اى واحد واصل لاصحاب القرار يلفت نظرهم ويشوفوا لينا موضوع الطيارات ده قبل ما يطيروا ... وطالما ما هم قاعدين قاعدين احسن ينجضوا لينا الشغل ده اسوة بالكبارى الغطت اجزاء من نهر النيل العظيم بدل ماهن كانوا كم كبرى وهسى بقن ما بتعدن ... وانشاءلله تتحسب فى سجل حسناتهم بس التَظبط سودانيرنا دى ... وجايين للباقيات..

سلام يا أخ علي,

قبل أن نطير يجدر بنا أن نأكل ونطمئن على البلاد في قوتها واقتصادها,

المصيبة الأكبر هي مشروع الجزيرة وهي السكة الحديد من بعد ذلك,

لكن الانقاذ يا عزيزي لديها مراكز دراسات غرضها الاساسي بقاء الانقاذ وهذه

درست فأفادت بضرورة إنهاء الكيانات الاقتصادية الكبيرة لصالح مشاريع طفيلية يملكها الانقاذيون,

مشروع الجزيرة والسكة الحديد مصنفة على أنها (خطر أمني) لذا لا بد من تفكيكها .. تخيل يا عزيزي

لو أن مشروع الجزيرة بعافيته ومكانته تلك من الاقتصاد السوداني وتخيل لو أن العاملين فيه والمزارعين

نفذوا اضراباً عاماً لأي سبب من الاسباب وكذلك السكة الحديد؟؟؟ بعض الفشل مقصود لذاته يا عزيزي

هذا هو السبب

أحمد الشايقي

تحياتى اخى احمد،،
لك كل التحية والتقدير على مشاركتك المنطقية..

Quote: قبل أن نطير يجدر بنا أن نأكل ونطمئن على البلاد في قوتها واقتصادها, المصيبة الأكبر هي مشروع الجزيرة وهي السكة الحديد من بعد ذلك, ولكن الانقاذ يا عزيزي لديها مراكز دراسات غرضها الاساسي بقاء الانقاذ وهذه درست فأفادت بضرورة إنهاء الكيانات الاقتصادية الكبيرة لصالح مشاريع طفيلية يملكها الانقاذيون, مشروع الجزيرة والسكة الحديد مصنفة على أنها (خطر أمني) لذا لا بد من تفكيكها .. تخيل يا عزيزي لو أن مشروع الجزيرة بعافيته ومكانته تلك من الاقتصاد السوداني وتخيل لو أن العاملين فيه والمزارعين نفذوا اضراباً عاماً لأي سبب من الاسباب وكذلك السكة الحديد؟؟؟ بعض الفشل مقصود لذاته يا عزيزي هذا هو السبب

الطيران فى وقتنا الحاضر ركن اساسى وهام فى كل عجلات ودورات التطور الاقتصادى السريع لذلك ابتدأت به، وقد تختلف فيه الرؤية دون شك ... ومما يجعلنى اكثر انزعاجا هو ما رميت اليه ان تكون السياسة والسلطة والسعى اليهما والبقاء فيهما يتم بهذه الطريقة القذرة من حيث تدمير مراكز اقتصادية فعالة ومثمرة من اجل هدف وضـيع ... ومشروع الجزيرة فعلا كان هو الرافد الاقتصادى الاكبر للسودان... وقد احزننا ما آل اليه ... ومشروع الجزيرة مثلا تناوله الكثيرون وكم من الدموع سكبت فيه وعليه ... ولكن وكما ظللت اكرر الفشل فى اشياء اخرى لا يمنع ان نتناول الفواشل الاخرى ... التى قد تهم ملايين من العالمين ... ونظرا لفقداننا الامل فى ما سقته من حراك مدنى مثل الاضراب عن العمل لتصحيح المسارات ... لجانا الى سوق الامنيات بان يقوم من يتولون امرنا اليوم الى الالتفات لمثل هذه الضروريات ...

Quote: الثانى : هو فشلها ايضا فى بناء مطار دولى بمواصفات عالمية يتناسب ومكانة وعظمة السودان...

اما عن الفشل الثانى وذلك ايضا حسب وجهة نظرى الذاتية، وايمانا منى بان السودان هو الهم الاول بغض النظر عمن يدير دفته...، اصبحت المطارات اليوم واجهة تعريفية اولية واساسية... تعكس وللوهلة الاولى صورة انطباعية واساسية لاى زائر لبلادنا... وتعطيه الخيط الاول لكثير من الاشياء الهامة...، على سبيل المثال:
مدى التطور ، درجة النظافة ، طريقة التعامل، طريقة الاجراءات ..الخ .. وغير ذلك وحتى ان لم يكن هناك اهمية لزوار بلادى ورؤيتهم لنا...، نختصر الحديث عن ملايين السودانيين الذين ضربوا فى الارض... واصبحت اعدادهم المسافرة للخارج لمختلف الاسباب تستدعى ان يكون لنا مطار يرقى ويواكب احدث ما وصل اليه العالم فى هذا الجانب...، والحديث هنا يطول عن رداءة الخدمات المتوفرة حاليا فى مطار الخرطوم وكـأبة العاملين به وجفافهم و قلظتهم فى التعامل مع القادمين والمغادرين ... والشواهد على هذا الامر لا تحصى ولا تعد... ولكنى اذكر واحدة حدثت لزوجتى وهى قادمة الى السودان لوحدها وكانت تحمل معها طفلتنا الرضيعة... وبعد نزولها من الطائرة ودخولها الى الصالة كانت ترغب فى ارضاع طفلتنا... ولكنها لم تجد كرسى واحد فارغ او مهيأ لتجلس عليه...، والمصيبة الاكبر والانكأ انها تقدمت الى احد رجال الشرطة الذين يجلسون فى ممر الدخول لصالة الجوازات وطلبت منه تفضلا ان يسمح لها بالجلوس لارضاع ابنتها ولدقائق معدودة فقط حيث هو جالس ... ولكنه للاسف لم يعبأ بهذا الطلب واعتزر عن افساح الكرسى!!! وهذا مثال لتجربة شخصية فريدة من نوعها... عمموما قد لايصدق المرء حدوث مثل هذه الاشياء ولكنها وبحق الله واقع معاش وللاسف الشديد...، لذلك ولمواقف كثيرة تحدث يوميا و لمئات من المسافرين تعكس سوء البنية الاساسية وضالة رقى العاملين فى مطاراتنا من حيث التعامل... تمنينا ان يُهتم بهذا المرفق الهام والذى يعتبر اليوم من اهم ضروريات العصر من حيث ...وذلك مثلا وليس حصرا، بتامين اماكن للجلوس لاخذ قسط من الراحة... وتامين حمامات نظيفة.... وقبل كل هذا اختيار عمالة تستطيع ان تعكس الاصل الطيب للشعب السودانى رحابة وبشاشة وتفانيا فى خدمة الاخرين ...

Quote: الثانى : هو فشلها ايضا فى بناء مطار دولى بمواصفات عالمية يتناسب ومكانة وعظمة السودان...

ابوعلوه لك التحايا ياحبيب
شوف عيني ياعلي وماقالوا لي زول في اجازتي الاخيره للسودان في صالة الوصول بتاعة المطار
جقر يقدل بكل حريه داخل الصالة !!!؟؟؟

يا هلا ابو الباشق ،،

حمدا لله على سلامة العودة ... وافتقدناك فى المنبر ...واكيد جاينا بانطباعات عن السودان ونحن فى انتظارها...

Quote: ابوعلوه لك التحايا ياحبيب شوف عيني ياعلي وماقالوا لي زول في اجازتي الاخيره للسودان في صالة الوصول بتاعة المطار جقر يقدل بكل حريه داخل الصالة !!!؟؟؟

الجقر وجوده احتمال يتوافق مع مبدأ الرفق بالحيوان واحتمال وجود الجقر قادلا فى مطار الخرطوم ...هو بداية من حيث انتهى الناس تطورا بتامين حياء آمنه للحيوانات ومن ثم ح يشوفو مراعاة لحقوق الانسان من حيث توفير خدمات افضل ...

Quote: الثالث : فشلها فى بناء استاد رياضى عالمى وضخم يشرف السودان مثلما نشاهده من استادات حتى فى الدول الافقر من السودان .

اما عن الفشل الثالث ... والذى ربما ينظر اليه البعض بانه فشل كمالى وثانوى ... ولا يكاد يُقارن مع ما تُتهم به الانقاذ من تقتيل وتشريد وتقسيم وعرقية ومتاجرة باسم الدين الى اخر اللستة الاساسية كما زعم احد المتداخلين ... الرياضة وكما يتفق الجميع ان اهميتها تكاد تقارن مع اهمية الصحة لان الصحة والرياضة صنوان ... اذا مارسنا الرياضة او هُيئة لشبابنا سبل واماكن للرياضة لكفينا انفسنا ولكفينا شبابنا التلهى بكثير من الاشياء الضارة ... ولعل اهم الرياضات هنا كرة القدم اللعبة الاكثر شعبية بل الاكثر انشغالا بها من قبل السودانيين ... عموما دعك عن هذا كله ... وللحقيقة عندما اشرت الى فشل الانقاذ فى هذا الجانب كان يحز فى نفسى كثيرا ان بلدا عملاقا مثل السودان وشعبا تجاوز عدد سكانه الاربعون مليونا (طبعا قبل الانفصال) لا يمتلك استادا رياضايا يشرفنا امام العالم ... او على اقل تقدير يسع لميئات الالاف من المتفرجين ... خاصة ونحن المتبجحين باننا من مؤسسى الاتحاد الافريقى لكرة القدم ... نعم نحن اسسنا ولكن لم ننجز ... وفاتح الباب ليس كمن فُتح له الباب ... فدورنا فى هذه الجزيئة كان عبارة عن موظف اوكل اليه فتح الباب لدخول شخصيات مهمة تتقاسم مهام كبيرة وبقينا ننتظرهم وهم يتقاسمون الانجازات الرياضية ... فكثيرا ما تزعجنى هذه البجاحة من بعض الرياضيين والمحللين عندما يذكرونها ... وما قادنى ايضا للاشارة الى هذه الفواشل ان الشعب السودانى بمقدورة القيام باشياء عظيمة اكبر من هذه الثلاثة اذا ما عزمنا عليها العزم ... وتملأنا الحسرة ان العالم امامنا وخاصة الدول التى لم يكرمها الله بربع ما اكرم الله به السودان من خيرات تمتلك فى بنيتها الاساسية استادات ومطارات تواكب العصر تنظيما وجودة ... الا نحن بنوالسودان !!

يا ترى باى من هذه الثلاثة ستكمل الانقاذ مباراة حكمها قبل ان يؤتى الله الملك من يشاء من اهل السودان ..؟؟