خروف الضحية قرب يكون دقسة مغربيه

بمناسبة عيد الاضحى المبارك التهنئة لكل العضوية والقراء .
الحكاية كانت امبارح فى المغربية والمكان زريبة المستشفى الصينى لهوامل الخراف الاسعار نار يا حبيبى نار المشكلة زمان ناس الخرفان كانوا بيقطعوا عليك الطريق علشان تشترى ومصيرك بعد الشراء زيارة الحمام لزوم ازالة رائحة برفان الضأن الناتجة من جرجرة ايادى اصحاب وسماسرة الضأن الطول الوقت تفتش فى الخرفان وتمسح فى هدوم الزوار المهم عملته فيها الولد تفتيحة اعاين بطرف عينى لاكوام الضأن خوفا من جرجرة وعكننة برفان الضان وعند كل كوم كنت بقيف اكشف للمشترين واسترق السمع للمسعرين واول ما اسمع على بالطلاق ده سعره 700 وحرم لوما مسافر الحق العيد ما ببيعه بالسعر ده والمكشة ابو 700 عنده استسغاء (مرض يصيب الانسان باتفاخ البطن ) بينى وبينكم سرحته ومن كترته الخرفان المكرشة قلته امكن جيت غلط للديات بدل الزريبة اتخيل لى لو اى زول فات السوق الشعبى وقال داير ملح ما يلاقاه الا برشتة من كترة استعماله لتسمين الخرفان لزوم الداقسين واصحاب العربات البكحلوا من من بين تظليل القزاز شوف عينى واحد من الجماعة ديل وقف عربيته وقال للزول لو سمحته الخروف البيجى ده خطه فى الضهرية المشكلة الخروف لونه ابيض لكن من كترت الملح الشربهبقى بيرقش وعنده كرش حرم لو ودوده اى عيادة الدكتور على طول بيقول دخلوه على العملية وكمان الولاده قيصرية الخروف البيجى كمدوه فى الضهرية وانا الشمار قاتلنى لمعرفة سعره بس يا خسارةصاحب الخروف التفت على بحركات المبايعة ومافى طريقة الا اشتت مشيت لكوم تانى الحيرنى ما فى زول واقف والريحة بتاعت عنبر قصار الكان فى مستشفى امدرمان وكسروه شميته عديل (عنبر قصار كان فى مستشفى امدرمان للنسوان والمريضة من يقولوا ليها ارقدى فيه يا اتخارجت او ركبت التنوسية )
خرفان عمك ما ايبولا عديل من كترت شراب الملح حرم الخرفان من جريان البطون افتكرته نفسى واقف فى ورشة ركشات نتيجة تفاعلات المصاريين .
نواصل

من بعيد شفته لى لمة ناس وقدر ما عاينته ما شايف لى خروف لمن وصلته لقيت الخرفان راقده على الواطه والرقبات ممدوة الى الامام عدييل قربته اعمل خلف دور قلته امكن جيت عنبر عظام تخصص قضاريف بس الاسعار معقولة و المشكلة الخروف لو داير تشيله تربط رقبته بخشبه قلته يا ولد شوف الحكاية ده سببه ايه اطقسته يمين ويسار وعرفت السبب اصلو الخرفان ده بتاعت الشولات بجبوها صحبة راكب ( الخروف بدخلوه فى شوال العيش وبخلوا راسه وجزء من الرقبه بره ) ولطول السفرية لمن ينزوله بيكون مصاب بداء القضروف ووجع الجنبات وفى قول اخر كلما طالت السفرية توقع وجود اسهال معوى .
بصراحة خرفان ساحة المستشفى الصينى ده مكانه ولو بأيدى كنت بطلق عليها مستشفى الخراف الصينى وده كله بسبب البوست العمل اشاعة عن رخصة اسعار خرفان المستشفى الصينى .
بعد تمحيص وعمل كرت صحى والاستعانة بخبراء المعامل عبر التلفون توصلت الى اول كوم عند مدخل الزلط البدخل السوق الشعبى وانتهى بى المطاف واتى الليل وتحولت عيون الخرفان الى عدسات تعمل بالاشعة الحمراء لقيت لى خروف كبرته وهللته لكن يا فرحة ما تمت جانى مس كول وبالرجوع اليه كان زول عزيز داير اجيب ليه معاى خروف طبعا بحقه ولى اجر التوصيلة تكلته خروفى على اليمين واصبحت كرزقاء اليمامة ابحث وسط الكوم لاظفر بتانى وما تنسوه خروفى جدع ( الجدع يقال للخروف الذى اكمل عام) والجدع فى الكوم ذى الكحلة فى العيون اخيرا لقيت لى خروف وعمك ماسك الخروفين التقول داير يوصل سماعات ساون سيستم وبدات جولة المفاوضات الثانية وللاسف اطاحت بلاتفاقية الاولى وقربنا من توقيع عقد الاتفاق الا ان التحركات الماكوكية للسمارة كادت ان تقفل الملف.
تطلب الموقف الاستفادة من مفاوضات فصل الجنوب وطبقته على الطبيعة وكانت النتيجة فصل الفرخفين من الكوم
نواصل

ذى ما قلته ليكم طبقت سلام الاكوام لشراء الضأن وتحول الملف الى الترحيل ففى الحالة الاولى وقبل ما يجى المس كول الموضوع محلول انا والخروف داخل الركشة مع الاستعانة بوطاية الجزمة للدفاع عن محاولات استخدام الخروف لصواريخ ارض جو المنصوبة على منصات الراس كما يجب الحذر من انفلونزا الخرفان الكملت كتاحة كردفان وامدرمان والدليل انتشار ظاهرة العراقيب حتى فى خرفان ابو مليون وطبعا يا جماعة ده من المشى الكتير والزوغان من ايصالات الطريق السريع اتحدى واحد يجيب لى خروف شحمان وما عنده عرقوب .
طبعا كنت بفاوض وماسك التيمان خوف من الدفسة البتغير الخرفان وانت سارح مع الركشات والامجاد بس دقسته وفكيت خروف والتانى فى الايد وبتكلم مع بتاع الامجاد وانتهى الحديث بالوصول الى الركشات وده الكان بس الدور الجاى بحكى عن دقسة خروف الضحية ودقسة المعربية
نواصل