دكان في الكلاكلة بي اللفة أحسن من أي دكان في أمريكا

في هذا البوست
نحاول وضع نقاشات بعض أصحاب
المحلات والحوانيت والتشاشات والكناتين السودانين في بعض
الولايات الأمريكية بعد الأزمة المالية .

قاسم شاب من ALBANY .
من لوتراب الهند 1998 . دخل في الزمن الزين . وفي جيبو 165 دولار .
حسب كلامو قال : هو خريج أقتصاد وما كان عندو مشكلة في اللغة وطوالي دعك
في الدكاكين ليل نهار نهار ليل .
بعد سنة فتح محلو براو . محل ال (ARBAB GROCEERIES )
..
وعاين الحصل شنو .

قاسم في سنتو التانية قلب ال GROCEERIES الي
DISCOUNT . وبرضو فتح GROCEERIES ناصية جديد .
وشحن حافلتين كوستر 1992 لنج من السعودية للسودان . يازول الهمبريب
في السنترال أفنيو كان عجيب . والحساب في بنك الناشونال طامح كل يوم
..
وعاين الحصل شنو .

اخونا عثمان موسى
كل عام وانتم بخير
وربنا احقق امانيك واماني الجميع
واصل يا حبيب التجارب للاستفادة العامة
تحياتي

عزيزنا عبدالله ود البوش
سلامات
وعيدك مبارك
قاسم يا عبدالله الدنيا مشت معاو عجوة .
زولك فتح CORPORATION عديل . خلاف المحلين والحافلتين حقات السودان .
والكوربوريشن حقتو مسكت توزيع الاكياس في ولاية NY و NJ و VA و PA وكاسح .
..
وتعال شوف الحصل

قاسم في سنتو الرابعة
عرف نفسو كويس وشاف الحواجز بي عينو .
وعرف صعوبة الدخول للجخانين البعيدة في عالم التجارة في بلد زي أمريكا .
الا بمعرفة قوانين البلد ثم تجويد طرق ال SALES .
وهاك يا دراسة . في سبيل الدخول لحلبة مصارعة مسانيح المال .

في نهاية سنتو الرابعة
قاسم عاد الي الهند . سافر رغم مشقة العمل بين الشركة والدكاكين
لمناقشة ماجستير في أدارة الأعمال .

السنة الخامسة كانت سنة
النجاح في تعدي العتبات الصعبة و الكبيرة .
قاسم أصبح من حملة درجات الماجستير في أدارة الأعمال
وبرضو أجتاز اختبار الجنسية الأمريكية . وبرضو نجح في كورسات التدريب
علي فنون التجارة في مدرسة مانهاتن .
وبرضو نجح في عقد بعض الصفقات بين شركات هندية وأمريكية .
..
( قاسم في سنتو الخامسة في أمريكا كان عمرو 30 سنة )

تحية...

يطيب لنا دوما الوقوف علي قصص النجاح ...النجاح القائم علي العمل المؤسس من علم وتخطيط واستقراء للواقع وذكاء وتحسب لكافة الاحتمالات بغية تلافي المخاطر بدراستها بعمق وتدبر بغية تجاوزها بقدر الامكان او وضعها في الحسبان تامينا للخطة...(خطة المشروع)

قراءة الواقع تبدو من الاهمية بمكان في نظام راسمالي لا يرحم الحالمين او المتعجلين او المغامرين ..

كانك بالعنوان الذي تشير تريد ان تقودنا الي واقع درامي غير الذي يتحقق فيه النجاح بالفعل المدروس..


اكرر الي اهمية التاهيل والتخصص عند معالجة اي مشروع والحصافة في ترتيب الخطوات للخروج باقل الخسائر ان وجدت...

نرفع القبعات للنجاح

عزيزنا محمد الكامل
سلامات
وعيدك مبارك .
والله يا أخ محمد زولك قاسم وأصحابو التجار السودانيين المهاجرين
كلهم ناس أذكياء . بس تلافي المخاطر كان صعب .
الحصل يا ود الكامل في سنة 2005 كان بداية لمذبحة عموم ال SALESPEOPLE والتجار
من اليمن لي الشام .
الحصل كان عجيب . الحصل يا أخ محمد ما فرز بين التاجر ال PROFESSIONAL والساكت
..
يا محمد أنقر الحصل لصاحبك قاسم شنو ؟

في جلسة من جلسات الدبرسة
بعد العاصفة التي أكتسحت ال STOCK MARKET والشجر الكبار بي صمغو .
تحدث الينا عزيزنا الأسد الجريح قاسم عن الأزمة الوحش .
من أي الجهات هبت ؟؟؟
وأين كان مرقدها ؟؟؟
وكيف حدثت ؟؟؟ .
في جلسة الدبرسة تلك تحدث قاسم .
عن فشل نظريات السيد ROBERT LICHELLO . وعن طرشقة
الأحلام وعن لفة الكلاكلة .
وعن التفكير للعودة للحافلتين الكوستر .

قاسم في عز ديك الدبرسة
جاو تلفون من السودان . قالوا حنبيع الحافلتين
الكوستر عشان عرس أخوانك وحنهد صالون الجالوص القديم
وحنهد التكل وحنهد ال ....
وحنهد ال ...
وقاسم يسوي في ال HOW ؟؟
HOW ؟؟
الحافلتين الكوستر ؟
يا جماعة أنا جاني كلوسترول من النوع البكتل كتامي .

عثمان كل عام و انتم بخير يا اخى جهجهتنا معاك الافتتاح رسميا السبت القادم انشا اللة

عزيزنا رجل الأعمال الهميم
حسن جادين
السلامات بالجملة
وأنشاءالله بالتوفيق يا بركة .
يا حسن صاحبك قاسم شايفو بتكلم براو بعد العاصفة .
وكلامو كلو عن الحظ و ال SALES وحافلة الثورة بي النص .
..
حتشوف قصص كل أصحاب قاسم المعجبين بأغنية وردي ( مسكين البدا يأمل )

عثمان موسى كل سنه وانت طيب
قاسم انضرب من القراب اظنو دايما بضربوك فى التنك اسال مجرب
الشى التانى مسالة انهيار الاقتصاد العالمى دا موضوع تانى
تحياتى

عزيزنا خالد المحرب
سلامات
وعيدك مبارك يا مك .
يا خالد أخوي يا ريت لو جات من القراب .
المساكين حلال عليهم تب .
الجات دي جات كيف ؟
الجات حيرت كل مدارس الرصد

..
الخوف الحصل يا خالد . اكتر من خوف عمنا أبوقطاطي
ساعة قال :
سوات العاصفة بي .. . ساق الشتيل الني
وفعل السيل وكت .. يتحدر يكسح ما يفضل شي
..
يا خالد هبوب الأزمة
شالت ساق الشتيل الني علي حطب المهوقني الكبار كلو علي الخور .
يا خالد عليك الله منو اليصدق شيوخ ليمان برازار يمشو الخور ؟؟؟
مسكين قاسم

Quote: قاسم في عز ديك الدبرسة

أخى عثمان كل عام وانت والأسرة بخير

الموضوع ذو شجون

العبرة يا عثمان اخوى انو قاسم يقوم يلملم اطرافو ويرجع تانى شوية شوية

وصدقنى حا يصل

أخوك عندو تجارب زى دى تشيب الراس وبقى جلدنا تخين

لكن صدقنى طالما جينا البلد دى بى حق التذكرة تب ما بنندم

ولا بعرف الفشل دربنا نقع ونقوم نقع ونقوم

وزى ماقالوا أهلك

Better to die trying than to give up

وياعثمان انا منتظرك فى نيويورك والمحل جاهز

أهه رايك شنو بتخاف وله تتوكل وتجى تتبلبل معانا ؟

عزيزنا حسن حماد
زعيم شارع الاتلانتك .
لو مشت عديل يا ود حماد أنت
مفروض تكون زي جاك بوب في زمانو .
بس معليش وده حال الدنيا .
شايفك بتتكلم تاني عن الأحلام ولملمة الاطراف . ههههههههها
كبرنا علي اللملمة وفترنا من OPEN 24 HOURS .
ولو ما فترنا الشارع زاتو فتر .
يا حسن ياخ حال الناس أصبح يحنن .
سامع عمك جوردن براون رئيس وزراء بريطانيا يرطن ليه يومين عن الأزمة .
قال : المشاكل دي بدأت في أمريكا .
وقال : القصة تتطلب مراجعة شاملة للنظام المالي في العالم كلو .
..
ارجع ليك في التلفون لموضوع المحل .
تحياتي

عثمان

تسلسل جميل للاحداث

Quote: بعد العاصفة التي أكتسحت ال STOCK MARKET والشجر الكبار بي صمغو

دي انا عارفها اما وصلتك السماء او غطست حجرك

زولك بيكون سمع من الناس بس وإتلهما بدون حسابات

المهم صحتو كيف؟

عزيزنا الطيب شيقوق
سلامات
وعيدك مبارك
يا الطيب أخوي
صاحبك فاروق شاب من باكستان .
صاحب ناطحة سحاب ناصية علي شارع البرودوي العجيب .
مالك الناطحة الناصية تحول يا الطيب الي مجنون في نفس الناصية .
وعاين يا الطيب .
خلاف ناطحة شارع البرودوي الناصية . فاروق برضو كان من أنشط
تجار ال IMPORT و ال EXPORT في المصنوعات الجلدية .
وكانت عندو أفكار جميلة بس يا الطيب الهبوب اتلهمتو .
تحياتي

تحية...

اختلال النظام الراسمالي لا يحتاج الي برهان لذلك تعكف مراكز البحث في دراسة غلوائه و وكيفية درء نتجائها الكارثية.. لم تعد الاسماك الصغيرة هي الضحايا انما المراكز الاقتصادية الكبري...النظام الائتماني برمته في المحك الان...الارباح الضخمة هل هي تعبير حقيقي عن الجهد أم صورة من صور الازمة...سوء توزيع مردود الانتاج الضخم صورة اخري من صور الازمة ومسبباتها في ان...

بين يدي كتاب عن سقوط الراسمالية ساحاول اعطاء مقتطفات منه لزوم النقاش...

والحال كهذا تبدو حالة وضع كل البيض في سلة واحدة من الخطورة بمكان...الشراكات قد تخفف من المخاطر لكنها ليست واردة في ذهنيتنا(تبلع براك تنشرق)...دراسات المسح الميداني للسوق تبدو من اللوازم..لا خاب من استشار..الاعتماد علي الموارد الذاتية اهم من الغلو في الاستدانة المصرفية...الحذر واجب..

لك احترامي ( ابحث عن عنوان اخانا كمال عبد الله من البني فضلا)

Quote: الخوف الحصل يا خالد . اكتر من خوف عمنا أبوقطاطي ساعة قال : سوات العاصفة بي .. . ساق الشتيل الني وفعل السيل وكت .. يتحدر يكسح ما يفضل شي .. يا خالد هبوب الأزمة شالت ساق الشتيل الني علي حطب المهوقني الكبار كلو علي الخور . يا خالد عليك الله منو اليصدق شيوخ ليمان برازار يمشو الخور ؟؟؟ مسكين قاسم

حياك الله يا عثمان
صاحبك ربنا حـ يعوضوا بإذن الله تعالى.. بس خليهو يقول: اللهم آجرني
في مصيبتي واخلف لي خيراً منها"..
في تمامة الحديث أن من قال هذه المقولة يخلف الله له خيراً مما أتخذ منه

وخليهو يعالج القلق النفسي بالصبر والصلاة.. "واستعينوا بالصبر والصلاة"

بعدين يا عثمان.. هسع شايف "الطمبجة" حاصلة...

وخاصة بعد تطورات حركة "احتلوا وول ستريت" المناهضة للرأسمالية

أمس أو قبله.. قرأت أن 48 ألف أمريكي تعهدوا بسحب أموالهم من أكبر بنكين
أمريكيين.. طبعاً الحركة دي لو توسعت فستتوقف حركة الإقراض، وقد يتبعها
انهيار هذه البنوك.. وهذا قد يكون له ما بعده

طبعاً إذا عطست أمريكا، فسيصيب الزكام أثرياء الخليج..
فكثير منهم يضعون أموالهم هناك..

ربنا يهون القواسي

عثمان

اصبحت طيب؟

Quote: وكانت عندو أفكار جميلة بس يا الطيب الهبوب اتلهمتو .

اهلنا بقولولك الجاتك في مالك سامحتك

ان شاء الله فداهو يا عثمان اخوي

Quote: السنة الخامسة كانت سنة النجاح في تعدي العتبات الصعبة و الكبيرة . قاسم أصبح من حملة درجات الماجستير في أدارة الأعمال وبرضو أجتاز اختبار الجنسية الأمريكية . وبرضو نجح في كورسات التدريب علي فنون التجارة في مدرسة مانهاتن . وبرضو نجح في عقد بعض الصفقات بين شركات هندية وأمريكية . .. ( قاسم في سنتو الخامسة في أمريكا كان عمرو 30 سنة )

أخانا عثمان عيدك مبارك سعيد... عليك الله أرجع لينا للمداخلة المقتبسة أعلاه وورينا بعداك الحصل شنو بالتفصيل قبل ما نصل لبيع الحافلتين!

عزيزنا محمد الأمين
سلامات
في سنتو الخامسة يا محمد زولك تمدد وكاشو
دقش المليونين دولار .
وبعدين حصل المكتوب .
بس عليك الله قاسم يكون شنو مع زول زي G. HOWARD زول التريليون دولار ؟؟ .
قصة بيع الحافلتين يا محمد كانت حزينة وصعبة .
معليش ياهو حال الدنيا .
تحياتي

عزيزنا الطيب شيقوق
سلامات
وبرضو يا الطيب أهلنا بقولو ( العرجة لمراحها )
في المثل ده هم قاصدين . العودة للوطن مهما طالت الغربة .
وبرضو قاصدين بالمثل . بلدك لو تصلحت مافي أحسن منها .
يعني في الغربة قدر ما تنفخ روحك برضو في يوم حتنفس وترجع لتلك
الرواكيب الجميلة والهمبريب الحقيقي .
عشان كدي يا الطيب أخوي . صاحبك قاسم بعد ما الهبوب لفحت منو مبلغ
ال 2 مليون دولار . قال كلمتو المشهورة . ( دكان في الكلاكلة ولا الامبير استيت )
يا الطيب أخوي صاحبك قاسم . تكربج بكرباج سيل الأزمة كربجة السنين
وهو صابر . وحامد . وشاكر .
وعندو أمل . تاني وتاني في بصل ود العباس وطماطم سنار .
تحياتي

العزيز محمد الكامل
السلامات جملة .
حدثنا يا أخ محمد عن العلاج .
والله يا محمد السفر حال دون اكمال الحديث
الممتع والجميل مع عمنا عوض عبدالمجيد . ( ربنا يديه العافيه وطول العمر )
عمك عوض عبدالمجيد هو أول مدير سوداني لبنك باركليز
بعدها وزير مالية في عهد النميري .
السيد / عوض عبدالمجيد من العلماء الكبار في دنيا الأقتصاد والمال
وتفاصيل الصناعة و الانتاج .
الرجل حقيقة مدهش .

عزيزنا عماد حسين
سلامات
وعيدك مبارك
أكيد أكيد عزيزنا قاسم ربنا بيعوضوا .
الزول تعب كتير وجاهد كتير يا عماد في درب النجاح .
كل يوم من الساعة خمسة صباح في عز الجليد
وفي عز المطر زولك يصارع عشان المحل يقيف طولو .
ناس قاسم وفاروق ديل مثال يا عماد .
هبوب الأزمة المالية يا عماد أخوي عصفت بي
حوالي 2 ألف من رجال الأعمال السودانيين في
الولايات المتحدة الأمريكية .
..
وتعال شوف الحصل

Quote: وتعال شوف الحصل

السلام عليكم أخ عثمان
كلامك مشوق وأسلوبك في السرد ممتع
لكن بتسل روح الواحد وبتدينا الكلام بالقطارة
واصل بدون فواصل بالله عليك

العزيز محمد جلال
سلامات
وعيدك مبارك
معليش يا أخ محمد . والله العمل متعب .

والكمبيوتر قديم ومعصلج . و الكتابة تحتاج لكمبيوتر جديد .
والكمبيوتر الجديد يحتاج دولار .
بس يا محمد أخوي الدولار حتي في بلاد الدولار برضو أصبح
بالقطارة .
الدولار المجنون ود الحنود يمشي وما يجي . جنو يكسح ويجهجهك .
ويعكر زمنك . شايف ؟؟؟
جنو يخليك تحلم بالحريرة والعرضة والغرفتين المعكوسات ويرحل .
تشوفو في الصور وفي أفلام النهب الممنتج .
حليل دأك الزمان .
البلد دي كان فيها براح كبير عشان تحلم وتحلم وترسم علي كيفك .
مالو ؟
الرسم حرام ؟؟
غايتو ربنا يدينا وجميع المهاجرين العافية .
وعليك الله شوف لينا معاك موضوع دكان سوق لفة الكلاكلة .
والله يا محمد الربح الجد والحقيقي الزول يموت في بلدو .
يموت في بلدو حتي رفسو في بلدو حمار .
تحياتي

عزيزنا محمد الكامل
سلامات
ضروري ضروري تحاول تجيب للناس بعض
المقتطفات من كتاب ( سقوط الراسمالية ) السقوط المفجع العجيب .
حاول لو تكرمت يا عزيز . تجيبو مترجم .
مع كتير التقدير والاحترام
تحياتي

++

كل سنة والجميع بألف خير

الصعود ما كان سريع ولكن إنهيار السوق كان أسرع

خلو رجل الكلاكله اللفه كم ؟؟

السلة الواحده والمكان الواحد أكبر المشاكل

العزيز طارق سيد أحمد
سلامات
وعيدك مبارك
النزول كان بسرعة الصاروخ يا طارق .
بس التريليونات دي كوعت وين ؟

الخبر السمح عودة الباكستاني فاروق
للحياة . فاروق تعالج علي حساب شركة من الشركات الخيرية .
بعد ما جلدو البرد والحر ستة سنوات .
فاروق رحل من ناصيتو الي فندق أبو نجمتين .
مع تكاليف العلاج والتمارين الرياضية ومصاريف للمواصلات والمسرح .
فاروق شغال بنص دوأم في شركة كرتون .
والرجل جاد في العودة الي عسل التجارة وهمبريب شارع البرودوي الجميل .
قابلت عزيزنا فاروق الشهر الفات . وهو في تمام العافية .
فاروق مازال يردد ( والله والله الحياة حلوة )

))))))

لو جابك الدرب فايت بي
ميدان شارع ال 14 st حتسمع هضربة عجيبة .
دي أصوات هضربة مجانين ال STOCK MARKET . شايف الزول المكرفس دأك ؟؟
ده ياهو مايك مارفن . كان يقول للدهب أقعد . الدهب يقعد . أقيف . يقيف .
يا سبحان الله .

أصوات مصانع الفيرنيتشر
والمنسوجات في ولأية نورث كارزلاينا وثاوث كارولاينا كانت
ضاجة . دخاخين المطاعم عاكلة بالنهار . وشرار الجيتارات عكستو كبابي الشربوت
المستورد من بلد الاسكوتش .
تصدق يا عثمان ؟
تصدق يا عثمان NORTH CAROLINA دي نامت نوم الفيلة .
..
وهاك شوف الثاوث .

علي مصلح اليريمي
يمني من أعيان مدينة ديترويت . 31 سنة
في تجارة الشاحنات والريل أستيت و ال REMODELING .
علي مصلح الرجل الخبير و البصير و الصعب في صراع حلبات الاوكشنات .
منو اليصدق طيحانو ؟
منو اليصدق علي مصلح طاح ؟
علي ودعمك مصلح كان ركيزة من ركايز ديترويت العربية وديترويت الأمريكية .

عثمان كيفك..
Up

عثمان قريبي

كل سنة وانت طيب
متابعين

عزيزنا الحاج حمد
سلامات
وعيدك مبارك .
يا حاج حمد شايف زولك زول بحري الشعبية
وأقف وفي ديك قوتو . وعندو فيلم جديد حيكشف فيه عن من تسبب في
الأزمة . وبطل الفيلم حيتكلم عن الناس الكشحو الشطة في عيون البايع
والمشتري .
ياحاج حمد أخوي عارفك . أفلام زولك دي بتقوم نفسك .
زولك صعب
تحياتي

عزيزنا د / المشرف
السلامات جملة
وعيدك والأسرة الكريمة مبارك .
ياخ والله مشتاقين لجلسات الفول المدنكل قدام الفسحة .
حتظل بيوت ناس عمك حسن هارون و جدك الشكيري تدي الخرطوم ثلاثة طعم
فوق الطعم الحلو العارفو يا دكتور .
وحتظل عزيزتنا أنعام تعلم الأطفال رسم هطول مطر الخير القادم أنشاءالله
..
يا ود المشرف مكتبة BORDERS الفي شارع ال 14 تشمعت .
تصدق ؟؟؟
أي زول يجيبو الشارع يصرخ HOW ؟
ده بكان شراب القهوة ومعرفة أخبار الدنيا يا ود المشرف .
وشركة الاستيشنري الضخمة عريضة المنكبين الجمب BORDERS ديك تشمعت .
يا ود المشرف مصاريف الاهل في تمبول والزيداب وجوبا والقضارف توقفت .
وصاحبك فاروق الباكستاني يحن لتلك الأيامات الكلينتونية السمحة .
..
تحياتي

مردوح التركي اليهودي
في ونستو عن ال business وال plan في المستقبل
ما حسيتبو متحمس زي أول .
ياخ في أيام كلينتون . أحلام اليهود كانت طامحة زي الاتبراوي في شهر 8 .
مردوح بعد ما مشيتلو لقيتو ساعة يطنطن عن بوران الحلاوة .
معقول يا عثمان حلاوة نوتبال كوكولين تبور ؟؟؟
يا عثمان دي حلاوة محشية بكريمة البندق والرز المقلي والسكر .
كيف تبور ؟؟
يا عثمان ال COOKIES الانجليزي الليلة توزيعو صفر .
منو البصدق ؟؟
شوف !
شوف ال Mackintosh.s
الماكنتوش الحلاوة الكواليتي الجد . بارت .
..
اليهودي حلف . قال : بعد الأزمة دي أصبح أباطو والنجم .
وبعدين صحة مردوح النفسية ما عجبتني تب .

الحمروشاوي
لبناني عندو جنسية من GUATEMALA
وعندو الجنسية الأمريكية . الحمروشاوي دأعك في ال business بتاع
المنظفات ليه 21 سنة .
كان صاحب مملكة ضخمة في بيع المنظفات في عموم الولايات .
أشغال الحمروشاوي تراجعت
مع التراجع الكبير .
في شهر مايو 2009 الحمروشاوي المسكين مات بالهارت أتاك .

..
تعرفت علي الحمروشاوي عليه الرحمة في زوأج خالد نويفع سنة 1998 في بروكلن
كان ليلتها قايد دبكة شباب البرودوي .

قاسم يضحكك عند الحديث عن بوران الدجاج

يا عثمان مئات المليارات الضخاها أوباما في الاقتصاد الامريكي ما عملت Recovery حتى الآن؟؟
عرفنا أن أسعار العقارات انهارت، ولكن لم نكن نتوقع أن فقد الوظائف كان بالحدة نفسها لدرجة أن يحجم المستهلك عن الانفاق فتضطر تجارة التجزئة والأعمال الصغرى للإفلاس والإغلاق.
وسمعنا أن أكثر من 100 بنك أعلن أفللاسه... ما تأثير ذلك على الأعمال المتوسطة والصغرى؟

Quote: عزيزنا الحاج حمد سلامات وعيدك مبارك . يا حاج حمد شايف زولك زول بحري الشعبية وأقف وفي ديك قوتو .

يا عثمان الازمة دي هزت الجميع لكن أولاد بحري الشعبية ديل مقرمين و عندهم مناعة قوية ، يعني تقدر تقول بقدروا يقاوموا لحين انفراج الأزمة.

متابعين و منتظرين كلام قاسم البضحك عن بوار الدجاج.

عزيزنا الحاج حمد
سلامات
كلام صاحبك قاسم عن بوران الدجاج حتشوفو
وبالصورة والصوت .

عزيزنا محمد الأمين موسي
سلامات
وعيدك مبارك
لا لا والله يا محمد الترليونات بتاعتو ما عملت
أي RECOVERY .
ولو كشح قدرها عشرين . برضو ما حتعمل التدعك .
ده يا محمد أخوي أقتصاد ضخم ضخم ضخم .
والانهيار كان بحجمو يازول .
عاين يا محمد .
شوف الحمروشاوي الزول الرياضي القوي زول الدبكة والبهجة مات بالهارت أتاك .
مردوح حالتو النفسية ما بتعجب .
فاروق تحت العلاج يهضرب بالعودة المستحيلة .
..
تحياتي

الهنود السيخ أحرف ناس
في جمع الدنانير في العالم .
مستعجبين في طفشان الفراش الأخضر .
السيخاوي أبوعمة قنطور حلف قال يومين درجو ما دخلو ولا عشرة سنت .
دكاكين السيخ كانت بالصف .
4 كاشيرات 24 ساعة بدون توقف .
وين رأحت جبال الدنانير ؟؟؟
دي عملتها كيف يا بشبش ؟؟

يا عثمان إنتو غلطانين! كان عندكم الود كلينتون زول مبسوط في البيت ومبسوط في المكتب لذلك اشتغل ليكم الاقتصاد بمزاج وترك الرئاسة وفائض الميزانية يفوق الـ400 مليار دولار وقال ليكم أمسكوا قوي في آل قور الزول المفكر صاحب فكرة الـInformation Super Highway، سمعتوا كلامو وجبتو بشبوش المربوش الغطس حجركم وحجرنا...

Quote: دكان في الكلاكلة بي اللفة

إسمو سوق ( اللفه مول ) يا حبيب

وفيهو بضائع في بلادكم البعيده دي ما بتلقاها ... !



ودي الذي يترقبه الآخرون ... وحسن مكاوي معاهم

عباس السوري
مهندس معماري تخرج من جامعة دمشق في 1985 .
عباس في سنة 1993 تحول من تجارة السمك في ALASKA
الي أعمال الكونستراكشن في ديترويت .
و مع نهضة المعمار الحصلت كان حالو زي الورد .
.. مسكين عباس .

الأخ عثمان موسى السلام والتحية

كان في أوتلت قريب مننا و يقصدة الكثيرون من ولايات مختلفة للملايات.
الآن عدد الدكاكين الفاتحة فيه بسيطة جداَ و دكان الملايات أول واحد قفل...

أكثر تفسير منطقي عجبني للأزمة المالية دي سمعته من محلل إقتصادي في abc
قال التاكس كتس الأداها بوش للأغنياء و دخوله في حروب ما عارف حيصرف عليها كيف
أضرت بالإقتصاد...
و الآن أوباما عايز يرجع التاكسس للأغنياء زي ما كانت في عهد كلينتون , لكن الجمهوريين
رافضين

أمس في ال abc
جابو ربورت عن ال expected recovery time لل states
بعض الولايات ما حتستعيد عافيتها الإقتصادية حتى 2017 (نفادا , رود آيلند)
بعض الناس إنتحروا بسبب الأزمة دي الله يثبت قلوب أصحاب البزنسس, فهي حاجة فعلاً تجنن.

عزيزنا Hisham
سلامات
سامع وأحد قال الدكان 3 م في 3 م في سوق اللفة
ايجارو بي 2000 دولار في الشهر .
معناتو الحال كويس

عزيزتنا الأخت فردوس
سلامات
مافي SALES يا فردوس
الحال وقف كو . حتسمعي كلام عمك قاسم كلو .
تحياتي

في خبر جميل عن فاروق الباكستاني